ཨ་རིག་དམ་ཆོས་བསམ་འཕེལ་གྱིས།
ངོ་སྤྲོད། སྤྱིར་སྐད་ཡིག་ཅེས་པ་ནི་མི་རིགས་གི་བླ་སྲོག་ཡིན་ལ། མི་རིགས་དེའི་རིག་གཞུང་དང་གོམས་གཤིས། ཆོས་དང་ཆབ་སྲིད་སོགས་སྤྱི་ཚོགས་ཀྱི་འཕེལ་རྒྱས་དང་འཛིན་སྐྱོང་གི་ལག་ཆ་གཙོ་བོ་ཡང་ཡིན། དེས་ན་ད་ལྟའི་བོད་གངས་ཅན་གྱི་ཛ་དྲག་གི་གནས་སྟངས་དང་ཆག་འཇིག་གི་རླུང་འཚུབ་འོག་ང་ཚོས་འཇོན་ཐང་དང་ནུས་པ་གང་ཡོད་ཀྱིས་རིག་པ་བསྒྲིམས་ཏེ་བོད་མི་རིགས་འདིའི་ལས་དོན་ཆེད་མི་རེ་རེའི་ངོས་ནས་གཞི་རྒྱ་ཆེ་ཆུང་ལ་མ་བལྟོས་པར་ལས་འགུལ་གང་ཐུབ་སྤེལ་རྒྱུ་ནི་ང་ཚོའི་མི་རབས་འདིའི་ཕྲག་པར་བབས་པའི་ལས་འགན་ཞིག་ཡིན་པ་སྨོས་ཅི་དགོས།
དམིགས་ཡུལ། རྒྱ་དམར་བཙན་རྒྱལ་རིང་ལུགས་ཀྱིས་དམིགས་ཡུལ་ལྡན་པའི་སྒོ་ནས་ཐབས་བརྒྱ་ཇུས་སྟོང་གིས་བོད་ཀྱི་སྐད་ཡིག་རྩ་མེད་དུ་བཏང་དང་གཏོང་བཞིན་པ་དང་བསྟུན། གོ་ལ་ཟླུམ་པོ་འདིའི་ཡུལ་ཕྱོགས་གང་སར་གནས་པའི་བཙན་བྱོལ་བོད་མི་དག་ལ་ཡང་བོད་ཀྱི་སྐད་ཡིག་བེད་སྤྱོད་བྱེད་སའི་ཁོར་ཡུག་ཆུང་བ་བཅས་ཀྱིས་བོད་མི་རིགས་ཀྱི་སྐད་ཡིག་འདི་བཙོན་པ་ལྟ་བུ་ཆགས་ཡོད། འོན་ཀྱང༌། ང་ཚོས་སྡུག་སྐད་ཤོར་བ་དང་འཁང་ར་བྱས་པ་ཙམ་མ་ཡིན་པར་བོད་པ་རང་ཉིད་ཀྱིས་ངོས་ནས་མ་བསྐུལ་དང་བླང་ཐོག་སེམས་ཐག་གཙང་བཅད་དང་ལྷག་བསམ་རྣམ་དག་གིས་རང་གིས་རང་ལ་དམ་བཅའ་བཞག་སྟེ་ཡུལ་གྲུ་གང་དུ་སླེབས་ཀྱང་བོད་ཀྱི་སྤྱི་ཚོགས་ཁྲོད་བོད་སྐད་གཙང་མ་བཤད་སའི་ཁོར་ཡུག་གསར་པ་ཞིག་བསྐྲུན་ཐབས་ལ་འབད་བརྩོན་བྱེད་རྒྱུ་དེ་དམིགས་ཡུལ་གཙོ་བོ་ཡིན།
ལས་འགུལ། ༡༽རང་ཉིད་བོད་མི་ཞིག་ཡིན་པའི་ཆ་ནས་མི་རིགས་ལ་བཅིངས་བའི་བརྩེ་སེམས་དང་ཤ་ཞེན། སེམས་ཤུགས་སོགས་ཀྱིས་བོད་ཀྱི་རྩ་དོན་ཆེད་དམིགས་ཏེ་བོད་རིགས་གྲོགས་པོ་དང༌། ནང་མི། བོད་མི་སུ་འདྲ་ཞིག་དང་འཕྲད་སྐབས་རང་ངོས་ནས་བོད་སྐད་གཙང་མ་ཞིག་བཤད་རྒྱུ།
༢༽ཕ་མ་བུ་ཕྲུག་ཅན་ཡིན་ཚེ་རང་ཉིད་ཀྱིས་ལས་འགན་ཅི་ལྕོགས་ཀྱིས་ཕྲུ་གུའི་མདུན་དུ་བོད་སྐད་གཙང་མ་བསྐྱོན་ནས་ཕྲུ་གུའི་རྒྱུད་ལ་བག་ཆགས་བཞག་སྟེ་བོད་སྐད་དེའང་ཁྱིམ་སྤྱོད་སྐད་ཡིག་ལ་བསྒྱུར་ཐུབ་པ་བྱེད་རྒྱུ།
༣༽བླ་མ་དང་མཁན་པོ། སློབ་དཔོན་དང་དགེ་བཤེས། བཙུན་པ་དང་བཙུན་མ། སྐུ་ངོ་དང་ལས་བྱེད། མཁས་དབང་དང་སློབ་དགེ། མཐོ་སློབ་དང་འབྲིང་སློབ་སོགས་ཡིན་ཚེ་རང་ཉིད་བོད་ཀྱི་སྤྱི་ཚོགས་ཁྲོད་མིག་དཔེ་ལྟ་ཡུལ་ཞིག་དང་གཞན་ལ་ལམ་སྟོན་དང་སྣེ་ཁྲིད་བྱས་ཏེ་བོད་སྐད་གཙང་མ་བསྐྱོན་པའི་ཁོར་ཡུག་བསྐྲུན་ཐབས་ཐད་ཕྱོགས་ཡོངས་ནས་འབད་བརྩོན་བྱ་རྒྱུ་བཅས་སོ།
ལག་ལེན། ཉིན་རེའི་འཚོ་བའི་ཁྲོད་ཀྱི་རྒྱུན་སྤྱོད་ཀྱི་ཐ་སྙད་རྣམས་རྨང་གཞིར་བཞག་སྟེ་དེང་རབས་འཕྲུལ་རིགས་གསར་པའི་བརྡ་ཆད་དང་ཚིག་གསར་རྣམས་བོད་ཕྱི་ནང་གཉིས་སུ་ཐོན་དང་ཐོན་བཞིན་པའི་བརྡ་ཆད་གསར་པའི་ཚིག་མཛོད་ཀྱི་ཚིག་གསར་རྣམས་བེད་སྤྱོད་ཐུབ་ཐབས་བྱེད་པ་དང་ཆབས་ཅིག་བོད་ཀྱི་སྐད་ཡིག་ཉམས་རྒུད་ཀྱི་འགག་རྩར་གདོང་ལེན་བྱ་རྒྱུ།
གྲུབ་འབྲས། གོ་ལ་ཟླུམ་པོའི་སྤྱི་ཚོགས་ཀྱི་འཕེལ་རྒྱས་དང་འཕོ་འགྱུར་ཁྲོད་བོད་མི་རིགས་རང་ཉིད་ཀྱིས་འགན་རང་གིས་ཁུར་ནས་དཀའ་སྡུག་ལ་གདོང་ལེན་བྱས་ཏེ་སྐད་ཡིག་རྒྱུན་འཛིན་དང་འཕེལ་རྒྱས་སུ་གཏོང་ཐུབ་པ་བྱ་རྒྱུ་དང༌། བོད་མི་གཅིག་གིས་གཅིག་ལ་བསྐུལ་མ་བྱས་ཏེ། གཅིག་གིས་གཉིས། གཉིས་ཀྱིས་བཞི་དང༌། བཞི་ཡིས་བརྒྱད་སོགས་གོམ་པ་རིམ་འཛེགས་ཀྱི་ཀུན་ལ་ཁྱབ་ཐུབ་པའི་གྲུབ་འབྲས་ཐོབ་པར་འབད་བརྩོན་རྡོག་རྩ་གཅིག་ཏུ་སྒྲིལ་ཐུབ་པ་བྱ་དགོས། ལོ་གཅིག་དང་གཉིས་ཀྱི་ནང་ཚུད་བོད་མི་བརྒྱ་ཕྲག་དང་སྟོང་ཕྲག ཡང་ན། ཁྲི་ཕྲག་སོགས་ཀྱིས་བོད་སྐད་གཙང་མ་བསྐྱོན་ཐུབ་པའི་གྲུབ་འབྲས་ཐོབ་པར་རེ་བ་བྱེད་བཞིན་ཡོད།
ལས་ཞུགས། བོད་མི་སུ་ཡིན་ཡང་ལས་འགུལ་འདིའི་ནང་ཞུགས་རྒྱུར་རང་དབང་གི་སྒོ་ཆེན་ཡང་བོར་ཕྱེས་ཡོད་ལ། བོད་སྐད་གཙང་མ་བསྐྱོན་པའི་དམ་བཅའ་བཞག་པ་དང་ལས་འགུལ་འདིའི་ཁྲོད་དུ་ཞུགས་ཟིན་པས་རང་ཉིད་ཀྱི་མིང་དང་ཁ་བྱང༌། རྒྱལ་ཁབ། གློག་འཕྲིན་ཁ་བྱང༌། ཁ་པར་ཨང་བཅས་གཤམ་གྱི་གློག་འཕྲིན་ཁ་བྱང་ཐོག་ལས་འགུལ་གྱི་འགོ་འཛུགས་པར་བསྐུར་ཐུབ་པ་གནང་དགོས། དེ་ལྟར་ཁྱེད་ཉིད་ཐོ་འགོད་བྱས་རྗེས་བོད་སྐད་གཙང་མ་བསྐྱོན་མཁན་མི་གྲངས་ཇི་ཡོད་ལོ་ཕྱེད་རེའི་ནང་ཡར་སྙན་ཞུ་ཐེངས་གཅིག་རེ་འབུལ་རྒྱུ་ཡིན།
ལས་འགུལ་འགོ་འཛུགས་པའི་གློག་འཕྲིན། dhamchoec@yahoo.com
ལག་ཐོགས་ཁ་པར། ༠༠༣༢་༤༩༦༣༡༣༡༢༦ ཁྱིམ་སྤྱོད་ཁ་པར། ༠༠༣༢་༣༣༢༦༨༡༢༢
མཇུག་བསྡོམས། བོད་སྐད་གཙང་མ་བསྐྱོན་པའི་ལས་འགུལ་ཆེད་ཚོགས་པ་བཙུགས་ཏེ་རྒྱུ་ནོར་དཔལ་འབྱོར་གྱི་འགྲོ་གྲོན་གཏོང་མི་དགོས་ལ། རིན་ཆེན་གསེར་ལས་ལྷག་པའི་ཤེས་ཡོན་དང་ཆུ་ཚོད་ཀྱིས་ཞལ་འདེབས་ཀྱང་སྤྲོད་མི་དགོས། ཁྲག་དང་ལུས་སྲོག་གིས་མཆོད་པ་དེ་བས་ཀྱང་ག་ལ་ཕུལ་དགོས། དེས་ན་བརྒྱ་བཤད་ཚིག་གི་རྩ་བ་སྟེ་བོད་ཕྱི་ནང་གཉིས་སུ་ཡོད་པའི་བོད་རིགས་སྤུན་ཟླ་རྣམས་ཀྱིས་རང་གི་ཐུན་མོང་མ་ཡིན་པའི་རིག་གཞུང་དང་སྐད་ཡིག་འདི་ཉིད་མི་རིགས་གཞན་ལ་མེད་པའི་རིན་པོ་ཆེ་ཞིག་ཡིན་པའི་ངོས་ཟིན་འོག་མི་རིགས་རིང་ལུགས་ཀྱི་ལྟ་བ་མཁྲེགས་འཛིན་དང་སྐད་ཡིག་གཞན་གྱི་རྒྱུག་ཁྱི་མི་བྱེད་པར་མདུན་བསྐྱོད་བྱེད་པར་ཆོད་སེམས་བརྟན་པོས་ལ་རྒྱའི་རལ་གྲི་དགུང་ལ་འཕྱར་ཐུབ་པའི་ཡིད་ཆེས་དང་རེ་བའོ། ། ཁ་བྲོ། བཀྲ་ཤིས།