རྫ་ཚེ་རིང་བཀྲ་ཤིས།
འོ་རེད། ཡང་ངས་སྐད་ཆ་ཞིག་བཤད། མ་གཞི་ད་ལོའི་གྲོས་ཚོགས་ཀྱི་ལས་རིམ་ཆ་ཚངས་ད་དུང་བལྟས་མ་ཚར། སྔོན་རྩིས་ཀྱི་སྐོར་རགས་རིམ་ཞིག་མཐོང་བྱུང་། གདུང་སེམས་མཉམ་བསྐྱེད་ཀྱི་གྲོས་ཆོད་འགའ་སྤྱི་མོས་མ་བྱུང་བ་དེ་ཅུང་ཡག་པོ་བྱུང་མ་སོང་ཞེས་ཁ་སང་གྲོགས་པོ་ཞིག་གིས་ལམ་ཁ་ཞིག་ནས་བསམ་ཚུལ་བཤད་བྱུང་། ཨ་ལེ་རེད་པས་ལབ་པ་ཡིན། དེ་ཙམ་རེད།
ད་ནངས་ཚང་མས་ཚ་ཚ་འུར་འུར་གྱིས་སྤྱི་མཐུས་རྨོ་ལགས་ཤིག་གི་གཏམ་བཤད་དུམ་བུ་ཞིག་དྲ་ལམ་དུ་གཏོང་གིན་འདུག ཚང་མས་སེམས་ཚོར་ཆེན་པོས་༼བོད་རྒྱལ་ལོ་༽༼བོད་རྒྱལ་ལོ་༽ལབ་ཀྱི་འདུག དེ་ནས་ཡར་ལངས་ཞོར་དུ་མོའི་སྐད་ཆ་མཉན་པ་ཡིན།
ལར་ང་ལ་བཀུར་འོས་སྤྱི་འཐུས་ཁོང་ལམ་དབུ་མ་ཡིན་དང་རང་བཙན་ཡིན་ཁྱད་པར་གང་ཡང་མེད། མོས་སུ་ལ་བདག་གཞན་མཉམ་བརྗེ་སྒོམ་མིན་ལའང་བསམ་ཚུལ་མེད། ཡིན་ན་ཡང་། བོད་མི་མང་སྤྱི་འཐུས་ཤིག་ཡིན་པའི་ཆ་ནས། དུས་ཡུན་རིང་པོར་སྐུབ་སྟེགས་དེའི་ཐོག་འདུག་མཁན་ཞིག་གི་ངོས་ནས། ༼བོད་རྒྱལ་ལོ་༽ཞེས་པའི་ཚིག་དེའི་དོན་གཏན་ནས་རྟོགས་མེད་པ་མཐོང་དུས་ཞེ་བློ་མ་བདེ་བ་ཆེན་པོ་བྱུང་།
ད་དུང་། མ་མཐའི་ཆབ་སྲིད་རྒྱུན་ཤེས་དང་། ༧གོང་ས་མཆོག་གིས་ང་ཚོས་རྒྱ་ལ་དགྲ་བོའི་འདུ་ཤེས་འཛིན་གྱི་མེད་གསུངས་པ་སོགས་ལ་གོ་བ་ལེན་སྟངས་རྦད་དེ་ཀྱོག་ཀྱོག་ཆགས་བསྡད་ཡོད་པའི་ཚོར་བ་ཞིག་བྱུང་།
མ་གཞི་༼བོད་རྒྱལ་ལོ་༽ལབ་ན་བོད་པ་རྣམས་ཀྱིས་རང་གི་མངོན་འདོད་མངོན་འགྱུར་ཡོང་བའི་རེ་འདུན་ཙམ་རེད། རང་ཉིད་ཀྱི་ཁ་ལས་རླུང་རྟ། ཚེ་བསོད་ནམས། དབང་ཐང་སྙན་གྲགས་སོགས་མཐོར་འདེགས་ཡོང་བའི་སྨོན་འདུན་ཙམ་ཞིག་རེད། ༼བོད་རྒྱལ་ལོ༽འི་ཁྱབ་ཁོངས་དངོས་གནས་རྒྱ་ཆེན་པོ་ཞིག་རེད།
ནམ་རྒྱུན་རི་བསང་ཕུད་དུས་བོད་པ་ཚོ་རྒུ་རུའི་ཟམ་ཆེན་ཕར་སྟེགས་ཀྱི་རི་མགོ་དང་ལྷ་རྒྱལ་རིའི་བསང་ཁྲིའི་འགྲམ། ཡང་ན་འདམ་གྱི་གཉན་ཆེན་ཐང་ལྷའི་མདུན་དུ་འདུས་ནས་ལྷ་རྒྱལ་ལོ་ཞེས་འབོད་པ་དང་འདྲ་པོ་རེད།
དེ་ཡང་ཚུལ་དང་མི་མཐུན་པའི་རང་རྒྱལ་གཞན་ཕན་དང་ཀུན་སློང་ངན་པ་དེ་འདྲ་ཞིག་སྔོན་འགྲོའི་ཆ་རྐྱེན་དུ་ཡོད་དགོས་པ་མ་རེད།
བདེན་པ་དང་འཚེ་བ་མེད་པ། ཡང་དག་པ་འཇིག་རྟེན་ཡོངས་ཁྱབ་ཀྱི་རིག་གཞུང་གི་རིན་ཐང་དང་བསམ་བློས་ཕྱུག་པའི་བོད་ཀྱི་སྲིད་འབྱོར་རིག་བསམ་གྱི་བསྟན་པ་དར་དགོས་ན་༼བོད་རྒྱལ་ལོ་༽ལབ་ཆོག་པ་རེད།
གཞི་བྱེས་མཉམ་འཛོམས་དང་༧གོང་ས་མཆོག་ཕོ་བྲང་རི་བོ་གྲུ་འཛིན་དུ་ཞབས་སོར་འཁོད་དགོས་ན་༼བོད་རྒྱལ་ལོ་༽ལབ་ཆོག་པ་རེད།
མདོར་ན། ༼བོད་རྒྱལ་ལོ་༽ནི་ང་ཚོའི་རྨི་ལམ་ཞིག་གི་བསྡུས་གཟུགས་རེད། ༧གོང་ས་མཆོག་སྐུ་ཚེ་རིང་པོར་བཞུགས་ནས་མཛད་འཕྲིན་དར་ཞིང་རྒྱལ་པའང་༼བོད་རྒྱལ་ལོ༽འི་སྨོན་འདུན་གྱི་གོ་དོན་གཙོ་བོ་ཞིག་རེད།
ཡང་བོད་ནང་དུ་སྐད་འབོད་བྱེད་མཁན་མང་ཆེ་བས་༼བོད་རྒྱལ་ལོ་༽ལབ་པ་དེ་སེམས་ཀྱི་ན་ཟུག་དང་ལོག་པའི་སྲིད་ཇུས་ལ་མི་འདོད་པའི་རྣམ་འགྱུར་སྟོན་པ་ཞིག་རེད། དེའང་རྒྱ་སྡུག་པོ་ཡོང་བར་ཤོག་ལབ་པའི་དོན་མ་རེད། རང་ལ་གང་ཡོད་འོས་པའི་གཞི་རྩའི་ཐོབ་ཐང་དང་མངོན་འདོད་ལ་རེ་སྨོན་དང་དགའ་ཞེན་བྱེད་པ་ཞིག་རེད།
དེས་ན་འདི་ནི་རྒྱ་ནག་གཞུང་ལ་དམོད་མོ་བྱེད་པའི་ཁ་གཏད་ཀྱི་ཚིག་ཡན་གར་བ་དེ་འདྲ་ཞིག་གཏན་ནས་མ་རེད། སྐུ་ཚེ་རིང་། ད་གོ་ཨེ་སོང་།
ད་ཐེངས་མི་མང་པོ་ཞིག་ལ་ཚོར་བ་ཤུགས་ཆེན་པོ་འཕར་དོན་ཡང་། ཁོང་ཚོ་ཆུང་ཆུང་ཡིན་དུས་ནས་ཁོང་ཚོའི་སློབ་དེབ་ཀྱི་ནང་ཚུན་ཆད་ནས་རང་ཉིད་བོད་པ་ཞག་ཡིན་པའི་ངོས་ནས། རང་གི་རྩ་དོན་དང་འབྱུང་འགྱུར་གྱི་རེ་སྨོན་ཡོད་ཚད་༼བོད་རྒྱལ་ལོ་༽ཞེས་པའི་པའི་བརྡ་རྟགས་འདི་ཁོ་ན་མཚོན་དོན་དུ་སྤྱད་ན་ཁ་ནས་བོས་ཞིང་། རིང་ནས་ཞེ་ལ་མནགས་ནས་ཡོང་བ་ཡིན་སྟབས་ཁོང་ཚོའི་སེམས་སུ་ཟུག་པོ་བྱུང་བ་རེད་དྲན་གྱི་འདུག །
མ་གཞི་བོད་པའི་རྩ་དོན་རྩོད་མཁན་ཞིག་ཡིན་ན་རང་རྒྱལ་གཞན་ཕམ་གྱི་བློ་དགོས་ཏ་དགོས། རང་རྒྱལ་གཞན་ཕམ་འདི་ལ་ཚུལ་མཐུན་ལུགས་མཐུན་གྱི་རང་རྒྱལ་གཞ་ཕམ་ཞིག་དང་། ཚུལ་མཐུན་ལུགས་མཐུན་མ་ཡིན་པ་གཉིས་སུ་ཕྱེ་དགོས། འདི་གལ་ཆེན་པོ་ཞེ་དྲག་ཡིན། དེ་རིང་ངས་ཁྱོད་ལ་རིན་མེད་ཀྱི་སློབ་ཚན་ཞིག་ཁྲིད།
དཔེར་ན། འཁྲིག་སྤྱོད་ཀྱི་གནོད་འཚེ་ཕོག་པའི་བུད་མེད་ཅིག་གིས་ཁྲིམས་ཁང་ནས་རང་ཉིད་ལ་ཐོབ་འོས་པའི་གུན་སབ་དང་། ཉེས་ཅན་པར་འོས་འཚམས་ཀྱི་ཁྲིམས་ཆད་གཅོད་དགོས་པའི་དངོས་འདུན་བཏོན་ཏེ་ཁྲིམས་གཏུགས་བྱས་ན་དེ་ལ་རྒྱལ་ཁ་ཐོབ་དགོས་པ་དེ་ཚུལ་མཐུན་ལུགས་མཐུན་གྱི་རང་རྒྱལ་གཞན་ཕམ་ལ་བརྩོན་ལེན་བྱེད་པ་རེད།
འགའ་རེེས་སྟོབས་ཤུགས་དང་དབང་ཆ། ཡང་ན་རྒྱུ་དང་འབྲེལ་ལམ་སོགས་གཡོ་སྒྱུ་ཁྲམ་གསུམ་ཏེ། མདོར་ན་དྲང་བདེན་མིན་པའི་ལམ་རང་ལ་རྒྱལ་ཁ་ཐོབ་ཐབས་བྱེད་པ་དང་གཞན་ཕམ་པར་བྱེད་པ་ན་དེ་ཚུལ་མཐན་ལུགས་མཐུན་མིན་པའི་རང་རྒྱལ་གཞན་ཕམ་གྱི་བསམ་བློ་ཁུར་སྟངས་རེད། ༧གོང་ས་མཆོག་གིས་ང་ཚོས་རང་རྒྱལ་གཞན་ཕམ་གྱི་འདུ་ཤས་ཁོ་ནས་རྩ་དོན་མི་རྩོད་གསུངས་པ་དེའི་གོ་དོན་ཡང་ལུགས་མཐུན་དང་ཚུལ་མཐུན་མིན་པའི་ལམ་ནས་ཆབ་སྲིད་ཁོ་ན་རྩོད་ཀྱི་མེད་ཅེས་པའི་དོན་རེད། ད་གོ་ཨེ་ཐལ།
དེས་ན། བདེན་པ་དང་འཚེ་བ་མེད་པ་གཞི་ལ་བཅོལ་བའི་རང་རྒྱལ་ཞིག་ཀྱང་མ་དགོས་ན། ཆབ་སྲིད་ལྟ་ཅི་སྤྱིར་བཏང་གི་འཇིག་རྟེན་གྱི་འཚོ་བ་ཙམ་ཡང་སྐྱེལ་ཐུབ་ཐབས་མེད་པ་རེད། དེ་ལ་དགོངས་ནས་འཇམ་མགོན་མི་ཕམ་པས་ལུགས་གཉིས་ཀྱི་བསྟན་བཅོས་རིན་པོ་ཆེ་ལས་ཀྱང་། ཕན་མེད་གནོད་མེད་རྒྱ་མཚོའི་རྡོ། །འདི་ཡང་བག་མེད་པ་ཡི་སྐྱོན། །ཞེས་བསམ་ཚུལ་འདི་ནི་བག་མེད་ཀྱི་ཆ་ཤས་ཤིག་ཡིན་པར་གསུངས་ཡོད།
མདོར་ན། ༧གོང་ས་མཆོག་གི་དགོངས་དོན་ནི། རང་རྒྱལ་གཞན་ཕམ་འབའ་ཞིག་གི་ཚོར་བའི་དབང་དུ་མ་སོང་བར། རྒྱལ་སྤྱིའི་དང་འཛམ་གླིང་གི་གནས་བབ། བོད་མིའི་རྩ་དོན་གྱི་དགོས་འདུན་སོགས་ཕྱོགས་ཡོངས་ལ་བསམ་བློ་བཏང་ནས་ཕྱོགས་གཉིས་ཆར་ལ་ཁེ་ཕན་ཡོད་པ་དང་ལག་ལེན་དུ་ཁེལ་ཐུབ་སྲིད་པའི་ལམ་ཁ་ཞིག་འཚོལ་དགོས་པ་དེ་རེད། དེ་དང་མཉམ་དུ་བདེན་པ་རྒྱལ་ནས་བདེན་པའི་མཐའ་གསལ་བ་ནི་ཅིས་ཀྱང་བརྩོན་ལེན་འོས་པའི་རླབས་ཆེན་གྱི་ཕུགས་འདུན་ཞིག་ལ་ངོས་འཛིན་གནང་གིན་ཡོད།
དེ་ཡང་ཆེ་ས་ནས་བཤད་ན། ༼བོད་རྒྱལ་ལོ་༽ཁྱབ་ཁོངས་ཀྱི་བོད་ཀྱི་རྒྱལ་ཁ་ནི་རྒྱ་ནག་ལ་ཚུལ་མིན་གྱི་སྡུག་པོ་བྱེད་པའི་དོན་མ་རེད་ལ། ༼བོད་རྒྱལ་ལོ་༽ནི་བོད་གཅིག་པུའི་རྒྱལ་ཁ་ཙམ་མིན་པར་བོད་ཀྱི་ཆུའི་ཐོན་ཁུངས་དང་བྱམས་བརྩེའི་རིག་གཞུང་། ནང་ཆོས་ཀྱི་ཉམས་ལེན་བཅས་འཛམ་གླིང་གི་སྤྱི་ནོར་ཡིན་པའི་ཆ་ནས་བོད་ཀྱི་རྒྱལ་ཁ་དེ་དོན་ལ་འཛམ་གླིང་གི་རྒྱལ་ཁ་ཞིག་ཡིན་པའི་ངོས་འཛིན་ཡོད་དགོས།
དེ་ཙམ་མ་ཟད། བོད་ཀྱི་རྩ་དོན་ནི་བདེན་པའི་འཐབ་རྩོད་ཡིན་པ་དང་། དབུ་མ་དང་རང་གཙན་གང་ཡིན་ཡང་ཚད་གཞི་མི་འདྲ་བའི་ཐོག་ནས་བདེན་པའི་ལམ་ནས་བདེན་པའི་རྒྱལ་ཁ་རྩོད་པ་ཞིག་ཡིན་པའི་ཆ་ནས་༼བོད་རྒྱལ་ལོ་༽ནི་དྲང་བདེན་གྱི་འབོད་སྒྲ་ཞིག་ཏུ་ངོས་འཛིན་ཐུབ་དགོས།
དེའི་རྒྱུ་མཚན་གྱིས། སྔར་དྲངས་པའི་ལུགས་ཀྱི་བསྟན་བཅོས་སུ་ཡང་། སྔར་བྱས་ལས་ཀྱི་རྟིང་གཅོད་དང༌། ། ད་ལྟའི་བྱ་བ་ལེགས་ཉེས་ལ། ། ཇི་བཞིན་གསལ་ཤན་མི་བྱེད་པ། ། མི་དྲང་གཡོ་སྒྱུ་ཅན་གྱི་རྟགས། །ཞེས་གསུངས་པ་རེད། འདི་ནི་ནོར་འཁྲུལ་ལ་བདའ་འདེད་དང་ལེགས་ཉིས་ལ་རྒྱལ་ཁམ་གྱི་ལ་ཤན་འབྱེད་དགོས་པ་དེ་འགྲོ་བ་མའི་ཀུན་སྤྱོད་ཀྱི་འོས་འགན་ཞིག་ཡིན་ཞེས་པའི་དོན་རེད།
སངས་རྒྱས་ཀྱིས། ལྷ་རྣམས་རྒྱལ། ལྷ་མ་ཡིན་རྣམས་ཕམ། ཞེས་པའི་གོ་དོན་ཡང་དེ་རེད། ད་དུང་ཅུང་ཟད་གཏིང་ཟབ་སར་འཛུལ་ནས་ཞུས་ན་ཨ་མ་ལགས་ཀྱིས་གོ་ས་མ་རེད། གནས་སྐབས་དེ་ཙམ་གྱིས་ཆོག་པ་བྱེད།
གང་ལྟར། གཅིག་ན་ད་ལྟའི་ཆར་རྒྱལ་སྤྱིའི་དང་བོད་ཀྱི་ཆབ་སྲིད་ཀྱི་གནས་བབ་ཀྱི་ཆ་ནས་ཁོར་ཡུག་བསྐྲུན་པ་སོགས་ཀྱི་སྐད་ཆ་དག་རང་བཞིན་གྱིས་མེད་པ་ཞིག་རེད། ཁྱད་པར་དུ། ཆབ་སྲིད་ཀྱི་གསང་གནད་ངོ་མའང་། རང་གི་ནུས་པ་མཐོར་འདེགས་བཏང་ནས་འཁྲེག་ཙམ་བྱས་ན་ཕ་རོལ་པོས་གཞི་ནས་ཡ་བྱེད་པ་དང་། འདྲ་མཉམ་གྱི་གླེང་སྟེགས་ཤིག་ཡོང་སྲིད་པ་དེ་རེད། སྤྱི་འཐུས་ཤིག་གི་ངོས་ནས་ངོས་འདི་དག་ཡེ་མ་མཐོང་བ་དེ་བསམ་བློའི་ཡུལ་ལས་འདས་པ་རེད། དེའི་ཆ་ནས་ང་ཡང་སྐད་ཆ་དེ་ལ་ཅུང་ཟད་ཧང་སང་སོང་བ་ལས། གཞན་ང་ལ་ཆབ་སྲིད་ཀྱི་སེམས་ཤུགས་ཆེ་འདོག་དང་། ༼བོད་རྒྱལ་ལོ་༽མ་ལབ་ན་ཞེད་པོ་ཅིག་རེད་ཅེས་གང་ཡང་ལབ་ཀྱི་མེད།
ད་ཐེངས་མོས་༼བོད་རྒྱལ་ལོ་༽ལབ་པ་དེ་རང་རྒྱལ་གཞན་ཕམ་གྱི་བསམ་བློ་ཡིན་པ་དང་། དེ་དབུ་མའི་ལམ་གྱི་འགོག་རྐྱེན་ཡིན་པ། དེ་ལབ་ན་མི་འགྲིགས་པའི་སྐད་ཆ་དེས་གཞོན་སྐྱེས་ལར་ཞེན་ཅན་རྣམས་ཀྱི་སེམས་ལ་ཕོག་ཐུག་བཏང་ཡོད་པ་དངོས་ཡོད་ཆགས་པ་རེད། ད་དུང་སྐད་ཆ་འདིས་དབུ་མའི་ལམ་གྱི་གོ་དོན་ལ་འགྲེལ་ལོག་དང་བརྡ་ལན་ལོག་པ་སྤྲད་ཡོད།
གལ་ཏེ་དེ་ཚང་མ་བཅོས་དགོས་ན། ལྷ་རྒྱལ་རི་ལ་ལྷ་རྒྱལ་ལོའི་གོ་དོན་ཡོད་པས་བདུད་ཕམ་དུ་བཅུག་ན་རང་རྒྱལ་གཞན་ཕམ་དུ་འགྱུར་བས་དེ་ཡང་བཅོས། བདེན་པ་ཉིད་རྒྱལ་གྱུར་ཅིག་ལབ་ན་རྫུན་མ་དང་རྫུན་མའི་སྲིད་གཞུང་ལ་ཟུར་ཟ་ཡིན་སྲིད་པས་དེ་ཡང་བཅོས། དུང་ཚད་མེད་ཡོན་ཏན་མའི་ཚིག ནག་ཕྱོགས་དང་ཀླ་ཀློ་རང་དབང་སོགས་རེ་རེ་ནས་བཅོས། ནམ་ཞིག་༧རྒྱལ་བ་རིན་པོ་ཆེའི་མཚན་གྱི་དབུ་ན་ཡོད་པའི་བདུད་བཞི་ལས་རྒྱལ་བའི་གོ་དོན་ཡོད་པའི་༧རྒྱལ་བ་ལའང་རང་རྒྱལ་གཞན་ཕམ་གྱི་གོ་དོན་ཡོད་མེད་གླེང་སློང་བྱ་རྒྱུ་ཁེལ་ས་རེད། མཐར་བཤད་གྲྭ་པའི་བཤད་སྟངས་བྱས་ན་ཤེས་བྱ་ཁྲ་ལེབ་ཏུ་འགྱུར་རྒྱུ་ལས་མེད་པ་ཞིག་ཆགས་ས་རེད། ཡག་ཤོས་བྱུང་ན་གྲོས་ཚོགས་ར་བ་ནས་སྐད་ཆ་དེ་ཕྱིར་འཐེན་ཐུབ་ཙམ་བྱུང་ན་མོ་རང་ལ་དེ་ལས་ཁེ་སང་ཆེ་བ་ཡོད་ས་མ་རེད།
གཞན་དུ། ད་ལྟ་དང་མ་འོངས་པར་གྲོས་ཚོགས་ཚོགས་དུས་འདིའི་ནང་དུ་སྐད་ཆ་དེ་དང་གནས་ཚད་མཉམ་པའི་སྐད་ཆ་སུས་བཤད་བྱུང་ན། དེ་ཆབ་སྲིད་དང་རིག་གཞུང་། བོད་རང་གི་རིག་ཐུན་མོང་མ་ཡིན་པའི་བསམ་བློའི་འཁྱེར་སོ་བཅས་ཀྱི་གོ་རྟོགས་དང་ལ་ཡིག་ཚད་བརྒྱ་ཆ་བདུན་ཅུ་མན་དུ་ཟག་པ་ཞིག་ཏུ་ངོས་འཛིན་འོས་པ་ཞིག་རེད།
མི་དེ་རིགས་འདི་ལོའི་འོས་འདེམས་དངོས་གཞིའི་སྐབས་སུ་འོས་ཁོངས་སུ་ཡོད་པ་ཞིག་ཡིན་ན། ཆོལ་ཁོངས་སམ་ཆོས་བརྒྱུད་ཀྱི་འོས་འཕེན་པ་དག་གིས་སོ་སོའི་འོས་ཤོག་རྐང་གཅིག་པོ་དེ་སྤྱད་ནས་བཀུར་འོས་སྐུ་ངོ་སྤྱི་འཐུས་དེ་དང་དེ་འདྲ་བ་དག་ལ་བརྡ་ལན་ཡག་པོ་ཞིག་འབྱོར་བ་བྱས་ན་ཡིད་ཚིམ་པོ་ཡོང་ས་རེད། དེ་ནི་ཐག་རིང་ས་ནས་བཤད་ན། སྤྱི་འཐུས་ཀྱི་སྡིང་ཆ་འདི་གང་དྲན་དྲན་བཤད་ས་ཞིག་མིན་པ་དང་། སྡིང་ཆ་འདིར་བརྩོན་ལེན་བྱེད་པ་དག་ལའང་བསམ་བློ་དང་ཤེས་ཡོན་གྱི་རྨང་གཞི་ངེས་ཅན་ཞིག་དགོས་པའི་བརྡ་ལན་ཞིག་ཏུའང་འགྱུར་སྲེིད།
ང་ཚོས་རང་ལ་དབང་བའི་འོས་ཤོག་རྡོག་མ་གཅིག་པོ་དེ་སྤྱད་ནས་བརྗིད་ཉམས་སྟངས་འཛིན་གྱི་ལག་ལེན་དུས་ལས་མ་ཡོལ་བ་ཞིག་བྱུང་ན་ཡག་པོ་ཡོད་ས་རེད་ཨང་སྙམ་པ་ཞིག་ཀྱང་བྱུང་།
ཕྱོགས་གཞན་ཞིག་ནས་མོའི་སྐད་ཆ་འདིའི་རྐྱེན་གྱིས་རྒན་གཞོན་མང་པོ་ཞིག་ལ་༼བོད་རྒྱལ་ལོ་༽དང་༼བོད་རྒྱལ་ལོ༽འི་གོ་དོན་ལ་དྲན་གསོ་བྱས་པ་རེད། ༼བོད་རྒྱལ་ལོ་༽ཞེས་པ་འདི་གྲོས་ཚོགས་ཚོགས་དུས་འདིའི་མཚོན་རྟགས་ཀྱི་ཚིག་ཏུ་གྱུར་པ་རེད། མ་མཐའ་ཡང་། དེ་ནི་རྟེན་འབྲེལ་ཡག་པོ་ཞིག་ཏུ་རྩི་ཆོག་པ་ཞིག་རེད། ངས་ཀྱང་རྩོམ་ཡིག་འདྲི་འདྲ་ཞིག་འབྲི་ཐུབ་པ་བྱུང་བ་རེད། དེའི་ཆ་ནས་ཁོང་ལ་ཡང་བཀའ་དྲིན་ཞུའོ།།
ཞོག་ཇ་འཐུང་ཞོར་བསམ་ཚུལ་ཡི་གེར་བྲིས་པ་ཡིན། ཀུན་སློང་གཞན་པ་ནི་གང་ཡང་མེད། ཚོར་བ་ཙམ་ཞིག་ཀྱང་མིན། དྲ་འབུ་བྱེད་འདོད་པའང་མིན། དོ་བདག་སྤྱི་འཐུས་ཁོང་ལ་སྒེར་ངོས་ནས་ནི་འགལ་འབྲེལ་གང་ཡང་མེད་ཀྱང་། བཀའ་མོལ་དེ་སྐད་ཆའི་ངོས་ནས་༼ཁ་ཚོད་ཡོད་ཀྱི་ནང་གི་ཚིག་ཚོད་མེད་༽ཡིན་པ་ཙམ་དུ་མ་ཟད། བསམ་བློ་དང་གོ་རྟོགས་ཀྱི་གནས་ཚད་ཀྱིས་དེ་བས་ཀྱང་བློ་ཅུང་ཟད་ཕམ་དུ་བཅུག་བྱུང་བས་སྐད་ཆ་འདི་འདྲ་ཞིག་བཤད་ཤོར་སོང་ངོ་། ངོ་མ་ཡིན། ང་ནོར་ཡོད་ན་དགོངས་དག་ཞུ།
རྫོགས་སོ།།
ཨོ་གླིང་རི་སྔོན་པོ་ནས་སྤྱི་ལོ་༢༠༢༡ཟླ་༣ཚེས་༡༧ལའོ།།