བོད་རང་བཙན་ཐོབ་པའི་རྨི་ལམ་རྨིས། །

ན་མོ་གུ་རུ་རཏྣ་བྷྱ།
ཤར་སྐྱ་བའི་སྐྱ་རེངས་དང་པོའི་སྐབས། །
བྱ་སྐྱ་ཀའི་ཀ་ཀ་མ་སྒྲོག་གོང་། །
གཉིད་སད་རྨི་གཉིས་ཀྱི་བར་མཚམས་ནས། །
ཤར་མཛེས་ལྗོངས་རུ་དམ་ལུང་བ་མཇལ། །

རྗེ་བླ་མ་གྲུབ་དབང་རིན་པོ་ཆེས། །
གསེར་སེར་པོའི་སྒོང་ང་རྣམ་གསུམ་ཞིག །
ཐུགས་དགྱེས་བཞིན་བདག་ལ་གནང་བར་རྨིས། །
ངས་རྒྱལ་བ་སྲས་བཅས་མཆོད་པར་ཕུལ། །

དཔལ་སྒྱུ་འཕྲུལ་དྲ་བའི་དཀྱིལ་འཁོར་དབང་། །
བཀའ་ཡོངས་རྫོགས་བདག་ལ་ཐོབ་པར་རྨིས། །
དགའ་དྲག་ནས་རིག་པའི་ངོ་བོ་སྐྱོང་། །
བསྟན་འགྲོ་བར་ཕན་བདེས་བསྔོ་སྨོན་བྱས། །

དེས་སྐབས་སུ་དག་པའི་སྣང་བ་ལ།
མཆོག་གི་སྤྲུལ་སྐུ་ཨ་འགྱུར་རིན་པོ་ཆེས། །
གཟུངས་པོ་ཏི་བསྟན་པ་བུ་གཅིག་རྒྱུད། །
བྱམས་བརྩེ་བས་བདག་ལ་གནང་བར་རྨིས། །

ཨ་ལ་ལ་རྨི་ལམ་འོད་གསལ་ལས། །
རྒྱུད་བཀླག་འདོན་ཚར་གཅིག་བྱས་པ་དང་། །
སེམས་བདེ་གསལ་མི་རྟོག་རིག་པའི་ངང་། །
དུས་ནམ་ཡང་མ་འདས་སྣང་བར་ཤར། །

རྗེ་བླ་མ་ཡིད་བཞིན་ནོར་བུ་དང་། །
སེམས་རིག་པའི་སྣང་ཆ་འགགས་མེད་གཉིས། །
དབྱེར་མེད་པའི་ཀ་དག་རིག་པ་ལ། །
རྩལ་རང་བཞིན་རོལ་བ་ལྷུན་གྱིས་གྲུབ། །

དཔེ་བཞག་ན་མན་ཤེལ་ཉི་འོད་འདྲ། །
དོན་སྟོང་བ་ནམ་མཁའི་གཟུགས་བརྙན་འདྲ། །
རང་མྱོང་བ་ཆང་བཟིའི་ཚོར་བ་འདྲ། །
དགའ་དྲག་པ་རྒྱལ་སྲིད་ཐོབ་དང་མཚུངས། །

ཡུན་མ་རིང་རླུང་སེམས་ཟིང་ཟིངས་ལྡིང་། །
གྲོགས་རྫོགས་ཆེན་བསྟན་འཛིན་དར་རྒྱས་ཀྱིས། །
ཁྱོད་རོགས་པ་ཅི་དགོས་སྒྲུབ་ཆོག་ཅེས། །
བཞིན་འཛུམ་པའི་མདངས་བཅས་མཇལ་བ་རྨིས། །

ངའི་སྣང་བར་ཨེ་ཝྃ་ཆོས་སྨན་ཁང་། །
གཞི་གསར་འཛུགས་སྨན་བླའི་ལྷ་ཁང་ཞིག །
བཞེངས་དགོས་པའི་བཀའ་མོལ་ཞུས་པའི་ཚེ། །
སྨན་གཡང་གི་གཏེར་སྒོ་ཕྱེ་བ་རྨིས། །

གོང་མའི་ཉི་མའི་འོད་ཟེར་ཤར་ནས་ཤར། །
གནམ་རྒྱལ་སྒོར་འཛམ་གླིང་ཀུན་འཛོམས་ནས། །
དཔལ་སྒྱུ་འཕྲུལ་ལོངས་སྤྱོད་རྫོགས་པ་ཆེའི། །
ཆོས་ཟབ་མོའི་སྐལ་བཟང་བསྩལ་བ་རྨིས། །

རྒྱ་དགའ་བའི་རྒྱལ་ཁབ་ཟིན་པ་རྨིས། །
བོད་དགྱེས་པའི་གཞི་བྱེས་ཐུག་པ་རྨིས། །
ཀུན་དགའ་བའི་དགའ་སྟོན་ཚེས་པ་རྨིས། །
བཟང་རྨི་ལམ་འདི་འདྲ་ཨེ་མ་ཧོ། །

གསེར་སྒོང་ང་དང་པོ་རིག་པའི་གནས། །
གསེར་སྒོང་ང་གཉིས་པ་མཐུན་པའི་དཔལ། །
གསེར་སྒོང་ང་གསུམ་པ་དམ་པའི་ཆོས། །
དར་སྨིན་གྲོལ་ནམ་མཁའ་གང་བར་ཤོག །

ལྷ་རྩ་གསུམ་རྒྱལ་བ་སྲས་བཅས་དང་། །
གྲོགས་ཆོས་སྐྱོང་སྲུང་མ་ལས་ལ་བསྐུལ། །
དོན་རྨི་ལམ་ལུང་བསྟན་མཐོང་བར་ཤོག །
ཕན་བདེ་བས་རྒྱལ་ཁམས་གང་བར་ཤོག །
ཅེས་པའང་རབ་རྒྱན་ལྕགས་ཡོས་དབོ་ཟླའི་ཡར་ངོའི་ཚེས་པ་བཅུའི་ཉིན་ལ་རྨི་ལམ་ཡ་མཚན་ཅན་ཞིག་རྨིས་ནས་སད་མ་ཐག་རང་སྣང་གང་དྲན་བཅོས་བསྒྱུར་མེད་པར་ཤྲྰི་སྨྱོན་པས་སུག་ ལས་སུ་བགྱིས་པ་དོན་དང་ལྡན་པར་གྱུར་ཅིག་གུ། ཤྲྰི་སརྦ་ལོ་ཀ་མངྒ་ལཾ་བི་ཛ་ཡནྟུ། །