ཚེ་རིང་རྡོ་རྗེ།
རང་བཙན་ལ་ཞིབ་ཕྲའི་འགྲེལ་ཚུལ་མང་ཡང་རགས་པའི་བྱེ་བྲག་གཉིས་སུ་དབྱེ་ཆོག་སྟེ། ཕྱི་ཡི་ས་ཁོངས་རང་བཙན་དང་ནང་གི་རིག་གནས་རང་བཙན་ནོ།། དེ་ཡང་ཅུང་གསལ་བར་བྱས་ན། ཕྱི་ཡི་ས་ཁོངས་རང་བཙན་ནི་བོད་རྒྱལ་ཁབ་ཀྱི་ས་ཆའི་བདག་དབང་དང་། ནང་གི་རང་བཙན་ནི་བོད་ཀྱི་ཐུན་མོང་མ་ཡིན་པའི་ངོ་བོ་གཞན་དང་མ་འདྲེས་པར་འབྱེད་བྱེད་ཀྱི་རིག་གནས་དང་དེ་ཉིད་རྟེན་སའི་སྐད་དང་ཡི་གེ་ལའོ།།
རྒྱ་ནག་དམར་ཕྱོགས་གཞུང་གིས་ཐོག་མར་བོད་ཀྱི་ཕྱིའི་རང་བཙན་ཕྲོགས་པ་དང་། ཁོ་ཚོས་བོད་ཡོངས་སུ་དབང་དུ་བསྡུ་བར་ཕྱིའི་རང་བཙན་ཁོ་ན་ཕྲོགས་པས་མི་འགྲུབ་པ་ཤེས་པ་དང་། དེ་མ་ཐག་ཏུ་བོད་ཀྱི་ནང་གི་རང་བཙན་རྨག་མེད་ཏུ་གཏོང་བའི་གཡོ་ཇུས་བརྩམས། སྔོན་ལ་བོད་ཀྱི་ཁྱད་ཆོས་དང་ངོ་བོ་ལྡན་པའི་སྤྱི་ཚོགས་ཀྱི་སྒྲིག་གཞི་དག་གཏོར་བཤིག་བཏང་བ་ནི། གྲལ་རིམ་འཐབ་རྩོད་ལ་ཁ་གཡར་ཏེ་གནའ་སྔ་མོ་ཞིག་ནས་གཏན་ཆགས་སུ་གྱུར་བའི་བོད་ཀྱི་དཔལ་འབྱོར་དང་རིག་གནས་ཀྱི་སྲོལ་རྒྱུན་རྩ་གཏོར་བཏང་། དེས་ཀྱང་བོད་མིའི་ནང་གི་རང་བཙན་དངོས་དེ་གཞོམ་གཞིག་མི་ནུས་པ་རྟོགས་པས། རིག་གནས་གསར་བརྗེ་ཟེར་བ་ཞིག་གི་སྐབས་དང་བསྟུན་ནས་བོད་ཀྱི་རིག་གནས་ཡི་གེར་བཀོད་པའི་གླེགས་བམ་པོ་ཏི་ཀུན་བསྲེགས་པའི་ལས་འགུལ་བསླངས། དེས་ཀྱང་ནང་གི་རང་བཙན་ཡོངས་སུ་གཞོམ་དཀའ་བ་མཐོང་སྟེ། མཐར་ནང་གི་རང་བཙན་གྱི་སྲོག་རྟེན་ཏེ་བོད་ཀྱི་སྐད་དང་ཡི་གེ་རྩ་མེད་གཏོང་ཐབས་བྱས། རྒྱ་ནག་དམར་ཕྱོགས་གཞུང་གིས་བོད་ཡིག་༼རྙིང་བཞིའི༽་གྲས་སུ་བརྩིས་ཏེ་རྨོངས་དད་ཀྱི་ཞྭ་མོ་གཡོགས་ནས་བོད་མི་ཚོར་བཙན་ཤེད་ཀྱིས་དགག་པ་རྒྱག་ཏུ་བཅུག དུས་སྐབས་དེ་ནི་ཕལ་ཆེར་སྤྱི་ལོ་ཆིག་སྟོང་དགུ་བརྒྱ་དྲུག་ཅུ་དང་བདུན་ཅུའི་སྟོད་ཙམ་དུ་ཁྱབ།
དེ་དང་དུས་མཉམ་པའི་བཙན་བྱོལ་བོད་ལ་དཔྱད་བསྡུར་ཕྲན་ཙམ་བྱས་ན། དེ་དུས་ནི་སྐྱབས་བཅོལ་གྱི་ཐོག་མའི་ལོ་བཅུ་ཕྲག་གཅིག་ལྷག་གི་སྐབས་ཡིན་པ་དང་། བཙན་བྱོལ་བ་ཚོས་འཚོ་གནས་ཀྱི་ཕྱིར་དུ་ཉེ་བར་སེལ་དགོས་པའི་སྐབས་འཕྲལ་ལྟོ་གོས་གནས་མལ་དང་བོད་ཀྱི་ཕྱིའི་རང་བཙན་སླར་གསོའི་ཆེད་དུ་དཀའ་སྤྱད་འབད་བརྩོན་བྱེད་པའི་དུས་སྐབས་དང་ཁེལ། དེའི་དུས་སུ་ཕྱིའི་རང་བཙན་མེད་པ་གཞིས་བྱེས་གཉིས་ཀར་འདྲ་བ་དང་། གཞིས་པ་བོད་ལ་ནང་གི་རང་བཙན་ཤོར་བའི་ཉེན་ཁར་ཚུད་ཡོད་པ་དང་། བྱེས་པ་བོད་ལ་ནང་གི་རང་བཙན་མ་ཉམ་པར་ཡོད་པ་མ་ཟད། འཛིན་སྐྱོང་སྤེལ་གསུམ་གྱི་རང་དབང་ཡང་ལྡན། འོན་ཀྱང་བྱེས་པ་བོད་ལ་མཚོན་ཡང་ཕྱི་ནང་གི་རྐྱེན་སྣ་ཚོགས་ལས་ནང་གི་རང་བཙན་ཤོར་བའི་ཉེན་ཁ་ཧ་ཅང་ཆེ། རྒྱུ་མཚན་དེར་དགོངས་ནས་༧རྒྱལ་བ་ཐམས་ཅད་མཁྱེན་པ་མཆོག་གིས་ནང་གི་རང་བཙན་ཤོར་རྒྱུའི་ཉེན་བརྡ་ལུང་བསྟན་གྱི་ཚུལ་དུ་བཀའ་སློབ་དང་ལམ་སྟོན་རབས་དང་རིམ་པར་གནངས་འདུག དཔེར་ན། ཕྱི་ལོ་ ༡༩༦༣ ནང་ངྷ་རམ་ས་ལར་འཚོགས་པའི་རིས་མེད་ཆོས་ལུགས་ཚོགས་ཆེན་སྟེང་དུ་གནངས་པའི་བོད་སྐད་ཡིག་སྐོར་གྱི་ལུང་བསྟན་ཁ་ཚ་དགོས་གཏུག་དེ་ལྟ་བུའོ།།
དུས་དེར་བོད་གཞིས་པ་ལ་མཚོན་ན་གཞན་དབང་དུ་གྱུར་ཏེ་མི་འདོད་བཞིན་དུ་བོད་སྐད་ཡིག་རྩ་གཏོར་གྱི་ལས་འགུལ་ལ་ཚུད། བྱེས་པའི་བོད་ལ་མཚོན་ན་བོད་མི་ཕལ་མོ་ཆེས་ནང་གི་རང་བཙན་གྱི་སྲོག་རྟེན་བོད་སྐད་ཡིག་གི་ནོར་ཉམས་མ་ཆོད་པའི་ངང་ཚུལ་སྐྱོ་བོ་བྱུང་འདུག ཡང་ཅིག་བསམ་ན། བྱེས་པ་ཚོས་ཕྱིའི་རང་བཙན་ཉེ་བར་མཁོ་བའི་འདུ་ཤེས་ཟབ་དྲགས་པས། ནང་གི་རང་བཙན་ལ་དེ་ཙམ་གྱི་ཐུགས་མཉམ་མ་བཞག་པའང་སྲིད། གཞིས་པ་བོད་ལ་མཚོན་ན་རིག་གནས་གསར་བརྗེ་སྟེ་བོད་ཀྱི་ནང་གི་རང་བཙན་རྩ་གཏོར་གྱི་ཡོ་ལང་འཁྲིགས་པ་དང་། མགོན་མེད་སྐྱབས་བྲལ་དང་འཆི་གསོན་མ་ངེས་པའི་ངང་ནས་སྡུག་བསྔལ་ཡ་ང་བ་མྱོང་བའི་དུས་ཤིག་ཏུ་གནས། དེ་འདྲའི་གནས་བབ་འོག་ཏུའང་སྐྱེས་ཆེན་རྣམ་དཔྱོད་ཅན་ཁ་ཅིག་གིས་ནང་གི་རང་བཙན་གྱི་སྲོག་རྟེན་བོད་ཡིག་ལ་མི་འཇིག་པའི་སྐྱབས་སྦྱིན་མྱོང་། ལོ་ཟླ་གང་ཡིན་གསལ་ཆ་མེད་ཀྱང་དར་ལུང་རྣ་ཡི་ཐོས་ཚུལ་ལ། ཨ་ཁུ་གསུང་རབ་རྒྱ་མཚོ་མཆོག་གིས་གཙོས་པའི་སྐྱེས་ཆེན་དམ་པ་འགས་མའོ་ཙེ་ཏུང་གི་བསམ་བློ་མཚོན་པའི་བརྩམས་ཆོས་པོད་འགའ་ཡོད་པ་བོད་ཡིག་ཏུ་བསྒྱུར་ཏེ། རྒྱ་ནག་དམར་ཕྱོགས་ཀྱི་མགོ་ཁྲིད་ཚོར་བོད་ཡིག་རྨོངས་དད་ཀྱི་དངོས་པོ་མིན་པ་དང་། བོད་ཡིག་གིས་༼རླབས་ཆེན་གཙོ་འཛིན་མའོ་ཙེ་ཏུང་གི་དགོངས་པ༽་ཡང་དག་པར་སྟོན་ནུས་པ་འགྲེལ་བཤད་བརྒྱབ་པས། རིག་གནས་གསར་བརྗེ་ཡི་མེ་ལྕེ་དགུང་དུ་འཕྱུར་ནས་བོད་ཡིག་གི་སྲོག་རྩ་གཅོད་ལ་ཉེ་ཡང་། རྒྱ་ནག་དམར་ཕྱོགས་པས་མའོ་ཙེ་ཏུང་གི་བསམ་བློ་སྟོན་པའི་བོད་ཡིག་གི་སྟེང་དུ་སྟ་གྲི་འཕྱར་མ་ཕོད། འདི་ལྟར་ཐབས་ལ་མཁས་ཤིང་རྣམ་དཔྱོད་ལྡན་པའི་སྐྱེས་ཆེན་ཚོས་བོད་ཡིག་མའོ་ཙེ་ཏུང་གི་བསམ་བློ་ཟེར་བའི་ལྕགས་ཁྲབ་འོག་ཏུ་གབ་པས། བོད་ཡིག་རྒྱ་སྟག་དམར་པོའི་མཆེ་སྡེར་བར་ནས་ཐར་བ་དང་ཚེ་སྲོག་གི་རྒྱུན་བསྲིངས། ཕྱིས་སུ་པཎ་ཆེན་རིན་པོ་ཆེ་མཆོག་གིས་གཙོས་པའི་སྐྱེས་ཆེན་དག་གིས་ནང་གི་རང་བཙན་དང་དེའི་སྲོག་རྟེན་བོད་ཡིག་འཛིན་སྐྱོང་སྤེལ་གསུམ་གྱི་བ་གཞག་ལ་ལམ་སྟོན་དང་སྣེ་འཁྲིད་བྱས། དེའི་འབྲས་བུ་ནི་བོད་མི་ཚོ་རྒྱའི་རིག་གནས་སུ་མ་ཐིམས་པར་བོད་རྒྱ་ཐ་དད་དུ་ཡོད་པ་ས་གསལ་ཐང་གོ་ཡིན། ཁོ་བོ་རྒྱ་མིར་མ་གྱུར་བ་དང་བོད་ཡིག་ཤེས་པ་འདིའང་དེ་ལས་མ་འདས། དེ་ལྟ་མོད་ཀྱང་། བོད་གཞིས་བྱེས་གཉིས་ན་ནང་གི་རང་བཙན་ལ་འཆི་རྐྱེན་སྣ་ཚོགས་ཤིག་ཡོད་པ་དང་། བོད་མི་ལ་ལའི་ངོས་ན་ཡལ་ལ་ཉེ་བ་དང་ལ་ལའི་ངོས་ན་སྔར་ནས་ཤི་ཟིན་འདུག བོད་སྐད་བོད་ཡིག་མི་ཤེས་པར་རྒྱ་ནག་གི་སྐད་ཡིག་དང་དབྱིན་ཇིའི་སྐད་ཡིག་ཏུ་ཐིམས་པའི་བོད་མི་གང་སར་མཐོང་རྒྱུ་ཡོད་པ་དང་། དེའི་ཉེར་ལེན་གྱིས་བོད་ཀྱི་རིག་གནས་དང་གོམས་གཤིས་ཀྱང་ཁོ་ཚོ་དང་རིང་དུ་གྱེས། ཉམ་རྒུད་ཀྱི་གནས་སྟངས་འདི་ལ་གཟིགས་ནས་གཞིས་པ་བོད་མི་མཁྱེན་དཔྱོད་ཅན་དང་ལྷག་བསམ་ཅན་ཁ་ཅིག་གིས་ནང་གི་རང་བཙན་དང་དེའི་སྲོག་རྟེན་བོད་སྐད་ཡིག་རྒྱུད་འཛིན་དང་གོང་འཕེལ་གྱི་ལས་འགུལ་རྒྱུན་མ་ཆད་པར་བརྩམས་དང་རྩོམ་བཞིན་འདུག
ད་ནི་བཙན་བྱོལ་བོད་ལ་རོབ་ཙམ་བལྟ་ན། ཉེ་བའི་ལོ་ཤས་རིང་ནས་གཞིས་པ་བོད་མིས་ནང་གི་རང་བཙན་དང་དེའི་སྲོག་རྟེན་སྐྱོབ་པའི་ལས་འགུལ་གྱི་ཤུགས་རྐྱེན་བཙན་བྱོལ་དུ་རིམ་པར་མཆེད་པས། དེ་སྔོན་དང་བསྡུར་ན་བཙལ་བྱོལ་བ་ལ་ལའི་གོ་རྟོགས་སད་པ་དང་། ལ་ལ་སད་མ་སད་ཀྱི་གནས་སྐབས་ན་འདུག འདི་ནི་དགའ་བར་འོས་པའི་སྣང་ཚུལ་ཞིག་ཏུ་མཐོང་། དྲང་མོར་བཤད་ན། བཙན་བྱོལ་བོད་མིས་གཞིས་པ་བོད་དུ་གང་བྱེད་ཅི་འགྱུར་ལ་སྒུག་པ་ནི་སྒྱིད་ལུག་དང་འགན་འཁྲིའི་སེམས་མེད་པའི་སྣང་ཚུལ་ཞིག་ཡིན་པར་འདོད། ང་ཚོ་རང་ངོས་ནས་མ་འོངས་སྔོན་དཔག་གིས་ནང་གི་རང་བཙན་དང་དེའི་སྲོག་རྟེན་འཛིན་སྐྱོང་སྤེལ་གསུམ་བྱ་དགོས་པ་ལྡོག་ཏུ་མེད། འོན་ཀྱང་ངས་བཙན་བྱོལ་བོད་དུ་དབུ་འཁྲིད་མཁྱེན་དཔྱོད་ཅན་མེད་པའམ་ནུས་ཤུགས་བཏོན་མྱོང་མི་འདུག་ཟེར་བ་མ་ཡིན། ནང་གི་རང་བཙན་དང་དེའི་སྲོག་རྟེན་འཛིན་པར་དོ་སྣང་དང་ཤུགས་མ་བསྐྱེད་ན་མཇུག་འབྲས་གང་དང་གང་འབྱུང་བ་གཟིགས་ནས། སྔོན་མའི་བཀའ་ཁྲི་མཁྱེན་རྒྱ་ཅན་བློ་བཟང་བསྟན་འཛིན་མཆོག་གིས་སྣག་ཐོག་ཁབ་གཙགས་ཀྱི་སྲིད་ཇུས་གསར་འཛུགས་དང་རྒྱུན་འཁྱོངས་བྱས། ཆེས་འབུར་དུ་ཐོན་པའི་དཔེར་མཚོན་ཞིག་ནི། སློབ་གྲྭ་ཁག་ཏུ་བོད་ཡིག་གི་ཤེས་ཡོན་སྲིད་ཇུས་ལག་ལེན་བྱུང་བ་དང་སྲོང་བཙན་དཔེ་སྟོན་སློབ་གྲྭ་བཙུགས་པ་འདི་གཉིས་ཡིན་པར་སེམས། འདི་ནི་རང་རེས་ངེས་པར་དུ་རྒྱུན་སྐྱོང་དགོས་པའི་དོན་ཆེན་ཞིག་ཏུ་འཁུམ།
ཡིན་ནའང་། བཙན་བྱོལ་བ་གང་མང་ཞིག་ནི་སེམས་ཚོར་ཙམ་གྱི་དབང་དུ་སོང་ནས་སོ་སོའི་ཆབ་སྲིད་ལངས་ཕྱོགས་དེ་ཡིན་མིན་དང་སྲིད་མིན་རྩོད་པའི་རྩེད་མོར་གཡེང་བ་མ་གཏོགས། རང་གི་ནུས་པས་ཀྱང་ལྕོགས་པ། འགྲུབ་ཀྱང་སླ་བའི་ནང་གི་རང་བཙན་དང་དེའི་སྲོག་རྟེན་བདག་གིར་འཛིན་པ་ལ་དོ་སྣང་དང་འབད་འབུང་མི་བྱེད་པར། དུས་རྟག་ཏུ་རང་བཙན་དང་དབུ་མའི་ལམ་གྱི་བར་ནས་ཕན་ཚུན་ཕྲག་དོག་དང་ཁ་འཐབ་ཀྱི་གཡུལ་བཤམས་པར་དགའ། མདོར་རྩ་བཤད་ན། རང་བཙན་པ་ཡིན་ནའང་འདྲ། དབུ་མའི་ལམ་པ་ཡིན་ནའང་འདྲ། ནང་གི་རང་བཙན་ནི་ཕྱོགས་གཉིས་ཀར་མེད་དུ་མི་རུང་བའི་སྲོག་རྩ་ཡིན། གལ་སྲིད་ང་རང་བཙན་པ་ཡིན་པས་ནང་གི་རང་བཙན་མི་དགོས་ཟེར་ན། ཁྱོད་ཀྱི་ཕྱིའི་རང་བཙན་ནི་སྲོག་རྟེན་མེད་པའི་རྡོ་སེང་གེ་ཞིག་ཡིན་པ་གོར་མ་ཆགས། གལ་སྲིད་ང་རང་དབུ་མའི་ལམ་པ་ཡིན་པས་ནང་གི་རང་བཙན་མི་དགོས་ཟེར་ན། ཁྱོད་ཀྱི་རང་སྲིད་རང་སྐྱོང་ནི་བླ་སྲོག་བྲལ་བའི་རྡོ་སེང་གེ་ཉག་ཅིག་ཡིན། ནང་གི་རང་བཙན་ནི་ཆབ་སྲིད་ཀྱི་ལངས་ཕྱོགས་གང་ཡིན་ལ་མ་བལྟོས་པར་བོད་མི་ཐུན་མོང་ལ་ཁྱབ་དགོས་སྙམ། གལ་སྲིད་བླ་སྲོག་ཏུ་གྱུར་བ་འདི་དོར་ནས་ཆབ་སྲིད་ཀྱི་ལངས་ཕྱོགས་སམ་སྟོང་བསམ་ཁོ་ན་བཅངས་ཏེ། ལན་རེར་གནམ་ལ་འཕུར་གྲབས་དང་། ལན་རེར་ས་ལ་འཛུལ་གྲབས་བྱེད་ན། དེ་ནི་དགོད་ཡང་བྲོ་ལ་ངུ་ཡང་བྲོ་བའི་གནས་ཤིག་ལས་སྙིང་བོ་ཅི་ཡང་མེད།
འོ་ན། ནང་གི་རང་བཙན་གང་འདྲ་བྱས་ནས་ཐོབ་དགོས་ཤེ་ན། དང་པོ། བོད་ཡིག་མི་ཤེས་པ་དག་གིས་ཀ་ཁ་ནས་བརྩམས་ཏེ་འབྲི་ཀློག་སློབ་དགོས་པ་དང་། ཤེས་པ་དག་གིས་གོང་དུ་སྤེལ་ཏེ་སུམ་རྟགས་དག་གསུམ་གྱི་དག་ཆ་ལ་བྱང་ཚད་རན་པ་ཞིག་འོང་བ་བྱ་དགོས། གཉིས་པ། བོད་ཡིག་ཤེས་ཟིན་ན་ཉི་མ་རེ་ལ་དུས་ཚོད་ཕྲན་བུ་རེ་བཏང་ནས་བོད་ཡིག་གི་དཔེ་དེབ་སྣ་ཚོགས་བཀླགས་ཏེ་བོད་ཀྱི་རིག་གནས་ཀྱིས་རང་ཉིད་བརྒྱན་པ་དང་། དུས་རྒྱུན་བོད་ཡིག་གང་ཐུབ་བེད་སྤྱོད་དགོས། གསུམ་པ། བོད་གཞུང་ངམ་རྒྱུ་སྟོབས་ཅན་གྱི་གང་ཟག་སྒེར་བ་ཚོས་འགྲོ་གྲོན་བཏང་སྟེ་སྒྲ་སྒྱུར་གླིང་ཚད་ལྡན་ཞིག་འཛུགས་དགོས་པ་དང་། དུས་ཐོག་ཏུ་དེང་རབས་ཀྱི་ཤེས་བྱ་དང་བརྡ་འཕྲིན་སྣ་ཚོགས་བོད་ཡིག་ཏུ་ཕབ་བསྒྱུར་བྱས་ཏེ། བོད་མིས་བོད་ཡིག་ལ་རྟེན་ནས་འཛམ་གླིང་ལ་རྒྱུས་ལོན་དང་དེང་རབས་ཤེས་རིག་གི་འདོད་བློ་སྐོང་ཐུབ་པ་ཞིག་བྱ་དགོས།
གཞུང་དམངས་གཉིས་ཆ་ནས་རང་ནུས་ཅི་ལྕོགས་ཀྱིས་ཤུགས་རེ་བཏོན་ན། ནང་གི་རང་བཙན་ནི་རིང་ས་ན་མེད་པར་ཉེ་ས་ན་ཡོད་པས། དེ་ཐོབ་ན་བོད་ཀྱི་སྲོག་རྩ་བརྟན་པ་དང་། ཆབ་སྲིད་ཀྱི་ལངས་ཕྱོགས་གང་ཡིན་ཡང་དེའི་མངོན་འདོད་ཀྱི་ཕྱེད་ཀ་གྲུབ་པ་ཡིན། དེ་ལས་ལྡོག་ན། བོད་རང་བཙན་དང་རང་སྲིད་རང་སྐྱོང་ནི་ཆབ་སྲིད་ཀྱི་སྟོང་བསམ་ལས་གྲུབ་པའི་རྡོ་སེང་གེ་ཙམ་མོ།།
ཕྱི་ལོ་ ༢༠༡༢ ཟླ་ ༦ ཚེས་ ༢༡ ཉིན་རང་ཤག་ཏུ་བྲིས།
དངོས་གནས་ལེགས་པོ་འདུག
སྐུ་ཞབས་ཚེ་རིང་རྡོ་རྗེ་ལགས་ཀྱིས་རང་རེའི་བོད་ཀྱི་བླ་སྲོག་བསྲུང་བའི་འབོད་སྐུལ་དང་། ཐབས་ལམ་གསུངས་པ་བཀའ་དྲིན་ཆེ། ང་ཚོ་སུ་ཡིན་ཀྱང་གཞུང་ལ་སྐྱོན་བརྗོད་དང་དམངས་ལ་སྡིག་དམོལ་མི་བྱེད་པར་བོད་སྤྱི་བའི་དོན་དག་ཆེ་ཕྲ་གང་ཡིན་ཀྱང་སྣང་མེད་དུ་མི་འཇོག་པར། དེ་ལ་ཕན་པའི་ཐབས་ལམ་རེ་གསུང་རྒྱུ་ཡོད་ཚེ་གསུང་རྐྱང་གནང་ན་ཀུན་གྱི་བློ་སྒོ་འབྱེད་པར་ཧ་ཅང་ཕན། དེ་ལ་ཕན་པའི་ཐབས་ལམ་མ་གསུང་པར་འདི་འགྲིག་མི་འདུག འདིས་མི་ཕན་སོགས་ལ་དགོས་པ་ཆེར་མ་མཐོང། སླད་མའི་ཆར་ཡང་འདི་ལྟ་བུ་མང་ཙམ་སྤེལ་རོགས། ཁ་ཞེ་གཉིས་མེད་ཀྱིས་ཐུགས་རྗེ་ཆེ་ཞུ་བ་ལགས།
ཚེ་རིང་རྡོ་རྗེའི་ལེགས་པོ་བྲིས་སྣང་བས་ག་ལེར་ཞིབ་ལྟ་བྱ་རྒྱུ་ཡིན། འདི་འདྲ་བྲིས་པར་དགའ་འོ།།
ཚེ་རིང་རྡོ་རྗེ་ལགས་གི་ལྷག་བསམས་རྣམ་དག་གི་ལམ་སྟོན་འདི་ལ་རྗེས་སུ་ཡི་རིང་ཡོད་།
ཡག་པོ་བྲིས་འདུག་ཐུགས་རྗེ་ཆེ་འོན་ཀྱང་ཟླ་ཤས་ནང་རྡ་སའི་ལྷན་ཁང་ཁག་ནས་དབྱིན་ཇིའི་གཟི་འོད་རྒྱས་བཞིན་འདུག།
ཚེ་རིང་རྡོ་རྗེ་ལགས་གི་ལྷག་བསམས་རྣམ་དག་གི་ལམ་སྟོན་འདི་ལ་རྗེས་སུ་ཡི་རིང་ཡོད་།
སྐུ་ཞབས་ཚེ་རིང་རྡོ་རྗེ་ལགས་ནས་དེ་ལྟར་ཞིབ་འཇུག་གནང་སྟེ་བོད་ཀྱི་རིག་གཞུང་
སྐད་ཡིག་དང་བཅས་པ་མི་ཉམས་རྒྱུན་འཛིན་གྱི་ཐུགས་རེ་བཅངས་གནང་བ་དང་།
བོད་གཞིས་བྱེས་གཉིས་པོའི་ཁག་སོ་སོར།ཉམས་ཉེས་དེ་དག་བྱུང་རིམ་གྱི་འཆར་
འགོད་དང་རྨང་གཞི་ཇི་ལྟར་གྲུབ་མིན་སོགས་རྒྱས་པར་གསུངས་གནང་འདུག་ལ་འགོག་
རྐྱེན་དེ་དག་ལས་རྣམ་པར་རྒྱལ་བ་ལ། ང་ཚོས་འདུ་ཤེས་འཛིན་སྟངས་ཡར་རྒྱས་བཏང་ནས་བཀོལ་སྤྱོད་ཀྱི་ཁྱབ་ཁོངས་མ་ལག་དང་བཅས་པ་འཚོལ་དགོས་ཚུལ་སོགས་གསུངས་པར་རྗེས་སུ་ཡི་རངས་ཞུ་རྒྱུ་དང་གང་ཐུབ་ཀྱིས་
དང་ལེན་ཞུ་བར་བརྩོན་ངེས་ལགས་སོ།།
སྐུ་ཞབས་ཚེ་རིང་རྡོ་རྗེ་ཁོང་གིས་གསུང་བ་དེ་དག་ང་ཚོའི་བཙན་བྱོལ་སྤྱི་ཚོགས་འདི་ཁ་ཚ་དགོས་གཏུགས་ཀྱི་ལག་ལེན་དགོས་པའི་འདས་ཟིན་པའི་ཉམས་མྱོང་གལ་ཆེན་ཞིག་དང་འབྱུང་འགྱུར་ལ་དགོས་པའི་ལམ་སྟོན་སྒྲོན་མེ་ཞིག་རེད། འདི་ལྟར་ལམ་སྟོན་གནང་བར་ཐུགས་རྗེ་ཆེ་ཞུ།
རེད་ཡ། ཡག་པོ་འདུག ཡིན་ནའང་ད་ལྟའི་ཆ་བོད་དོན་གྱི་སྐོར་དེ་་་་་་རུས་སྦས་ཀྱི་སྤུ་ཡི་གོས་ལ་ཆེ་ཆུང་དང་བཟང་ངན་བཤད་པ་དང་གཉིས་སུ་མེད། །
ད་ཆ་ང་ཚོས་འདས་པ་ཁོ་ན་བཤད་བསྡད་དུས་ཤིག་མ་རེད།འབྱུང་འགྱུར་ལམ་ཁ་ཅིག་འཚོལ་རན་རེད།འོན་ཀྱང་།བོད་མི་ཤེས་ཡོན་པའི་ཁྲོད་ཛ་དྲག་གི་དུས་བབ་འདིར་ལམ་སྟོན་དང་དགོངས་འཆར་གསར་པ་སུ་གང་འབུལ་ཐུབ་མཁན་མེད་པར།དགུན་གྱི་ཁུ་བྱུག་གི་ངང་ཚུལ་བཟུང་སྟེ་འདུག་པར་བློ་ཕམ་ཡོད།
རྗེས་སུ་ཡི་རང་ཡོད།