བོད་མིས་སྐྱབས་བཅོལ་ཞུ་ཡུལ་ནོར་འདུག

སྤོབས་པ་མཐའ་ཡས།

ལྷ་སར་༡༩༥༩ ལོར་རྒྱ་ནག་གི་དབང་བསྒྱུར་ལ་ངོ་རྒོལ་ལངས་ཤིང་རྒྱལ་བ་རིན་པོ་ཆེས་དབུ་ཁྲིད་པའི་བོད་གཞུང་དང་ཆོལ་ཁ་གསུམ་གྱི་བོད་མི་ཁྲི་ཕྲག་མང་པོས་ཕ་ཡུལ་བློས་བཏང་སྟེ་ཁྱིམ་མཚེས་རྒྱ་གར་དུ་སྐྱབས་བཅོལ་ཞུས་ཤིང་ད་ལྟའི་བར་དུ་ལུས། སྤྱིར་ན་རྒྱ་གར་ནི་བོད་མིའི་ངོས་ནས་ཆོས་ཕྱོགས་ནས་འབྲེལ་འདྲིས་དང་དད་ཞེན་ཟབ་ཐོག་ཁྱིམ་མཚེས་རྒྱལ་ཁབ་སྟོབས་ཅན་གཅིག་པོ་དེ་ཡང་ཡིན་སྟབས་སྐྱབས་བཅོལ་ཞུ་ཡུལ་ག་གཅིག་པོ་ཡིན་པར་ཀུན་གྱིས་ངོས་འཛིན་བྱེད། རྒྱ་གར་གྱིས་བོད་མི་སྐྱབས་བཅོལ་བ་ལ་འཛིན་སྐྱོང་གི་སྒྲིག་འཛུགས་རང་དབང་དང་། སྡོད་གནས་གོ་སྒྲིག དཔལ་འབྱོར་རོགས་སྐྱོར་གྱིས་མཚོན་པའི་རོགས་འདེགས་རྒྱ་ཆེན་བྱས་པའི་བཀའ་དྲིན་བསམ་ཤེས་དགོས་པ་གལ་ཆེན་ཡིན།
ཡིན་ན་ཡང་བོད་མིའི་མངོན་འདོད་ཉག་གཅིག་སྟེ་བོད་ཀྱི་ཆབ་སྲིད་དཀའ་རྙོགས་སེལ་བར་རྒྱ་གར་གྱིས་ཕན་ནུས་གང་ཡང་འདོན་མྱོང་མེད། ཐ་ན་མཉམ་འབྲེལ་རྒྱལ་ཚོགས་ཀྱི་ཁོངས་སུ་བོད་དོན་ཞུ་གཏུག་གི་སྐབས་སུ་ཡང་རྒྱ་གར་གྱིས་གྲོས་ཆོད་ལ་མོས་མཐུན་མ་གནང་ཐོག་གྲོས་མོལ་ཕྱིར་འཐེན་དགོས་པའི་དགོས་འདུན་བཏོན་པ་སོགས་བྱས་ཡོད། བོད་མིའི་ངོས་ནས་རྒྱ་གར་གྱིས་བོད་དོན་དཀའ་རྙོགས་སེལ་བར་རྒྱབ་སྐྱོར་བྱ་འོས་པ་ཞིག་ལ་ངོས་འཛིན་བྱེད་བཞིན་ཡོད། དེ་ཡང་རྒྱ་གར་ནི་བོད་མིའི་སྐྱབས་བཅོལ་ཡུལ་ཡིན་པ་མ་ཟད་རྒྱ་དཀར་ནག་གཉིས་ཀྱི་ས་མཚམས་རྩོད་རྙོགས་ལས་བྱུང་བའི་དགྲར་འཛིན་གྱི་བག་ཆགས་གཙོ་བོར་གྱུར་པའི་རྒྱུ་མཚན་བགྲངས་ནས་རྒྱ་གར་གྱིས་བོད་ཀྱི་དཀའ་རྙོགས་སེལ་བར་རོགས་སྐྱོར་བྱ་དགོས་པའི་རེ་སྐུལ་བྱས་ཀྱང་རྒྱ་གར་གྱིས་བཏང་སྙོམས་སུ་འཇོག་གིན་ཡོད།

ལྷག་པར་ཡང་སྲིད་འཛིན་ཨ་ཊཏ་བྷེ་ཧ་རི་ཝ་ཇི་པའེ་ཡིས་རྒྱ་ནག་དང་མཉམ་དུ་ཚོང་དོན་དང་ས་མཚམས་ཀྱི་སྐོར་གྱི་ཆིངས་ཡིག་ལ་མིང་རྟགས་བཀོད་པ་དང་། ཉེ་ཆར་གྱི་པེ་ཅིང་ཨོ་ལེམ་པིག་གི་སྐབས་སུ་རྒྱ་གར་དུ་སྡོད་བཞིན་པའི་བོད་མིས་རྒྱ་ནག་ལ་ངོ་རྒོལ་་བྱེད་པར་བཀག་འགོག་བྱ་རྒྱུར་ཁས་ལེན་བྱས་པ་སོགས་ལ་བསམ་ཚེ་རྒྱ་གར་གྱིས་བོད་དོན་ལ་ནམ་ཡང་ལག་པ་འཆང་རྒྱུ་མིན་པ་ཐག་ཆོད།
རྒྱ་གར་གྱིས་རྒྱ་ནག་གི་ངོ་འཚོ་དགོས་པའི་གནད་དོན་གཅིག་ནི་རྒྱ་གར་གྱིས་ཀྱང་རྒྱ་ནག་དང་མཚུངས་པའི་ཆབ་སྲིད་ཀྱི་ནག་ཉེས་མང་པོ་བསགས་དང་གསོག་བཞིན་ཡོད་པས་ཡིན། དེ་ཡང་ཀ་ཤི་མིར་གྱི་གནད་དོན་དང་། སིཀ་གི་རང་བཙན་གནད་དོན། འབྲས་ལྗོངས་ཀྱི་གནད་དོན། ཨ་སམ་ནང་གི་གྲངས་ཉུང་མི་རིགས་ཀྱི་གནད་དོན་སོགས་ལ་ཁྲག་དྲི་བྲོ་བའི་དྲག་གནོན་རྒྱུན་མ་ཆད་དུ་བྱེད་བཞིན་ཡོད་སྟབས་རྒྱ་ནག་ལ་ཁ་འཁོར་ནས་འགྲོ་བ་མིའི་ཐོབ་ཐང་གི་གནད་དོན་གླེང་ངོ་མ་ཤེས་པ་རེད། དེ་བཞིན་མངའ་ཁོངས་བདག་དབང་གི་ཕྱོགས་ནས་ཀྱང་ཀ་ཤི་མིར་དང་མོན་རྟ་དབང་སོགས་མ་བདག་བདག་བཟུང་གི་ས་ཆ་མང་པོ་ཉར་ཡོད་པར་བརྟེན་དུས་ཚོད་སྐྱེལ་གང་ཐུབ་བྱེད་པ་རེད།
དོན་ངོ་མར་རྒྱ་དཀར་ནག་གཉིས་གྲོགས་པོ་རྣམ་དག་ཅིག་བྱེད་པར་ཧ་ཅང་རྒྱུན་རིང་པོར་འགོར་གྱི་རེད། དེ་གཉིས་ལ་ས་མཚམས་ཀྱི་ལོ་རྒྱུས་ངེས་གཏན་མེད་པའི་ཁྱིམ་མཚེས་གསར་པ་ཡིན་སྟབས་ས་མཚམས་ཀྱི་རྩོད་རྙོགས་འདི་ཡུན་རིང་བར་དུ་ལུས་རྒྱུ་ཡིན་པ་དང་། མི་རིགས་ཕྱོགས་གཉིས་པོ་ཡང་རྒྱལ་ཞེན་དང་གཡོ་ཇུས་ཀྱི་ཕུལ་དུ་ཕྱིན་ཡོད་སྟབས་ནམ་ཡིན་ཡང་ས་མཚམས་ལ་ཐག་པ་འཐེན་ནས་རྟགས་རྒྱག་དགོས་ན་ཁག་པོ་རེད། དེ་བཞིན་ཚོང་གི་འབྲེལ་ལམ་དམ་པོ་ཞིག་གིས་རྒྱལ་ཁབ་འདི་གཉིས་ཀྱི་འབྲེལ་ལམ་བརྟན་པོ་བྱ་རྒྱུ་དེ་ཁག་པོ་ཡིན། ཕྱོགས་གཉིས་ཀ་ཡར་རྒྱས་འགྲོ་བཞིན་པའི་རྒྱལ་ཁབ་ཡིན་ཞིང་བཟོ་ལས་རང་མགོ་ཐོན་ཙམ་རེ་ཕྱོགས་གཉིས་ཀར་ཡོད་སྟབས་ཚོང་འབྲེལ་དེ་དེ་ཙམ་གལ་ཆེན་པོ་མིན།
མདོར་ན་རྒྱལ་སྤྱིའི་སྟེང་ནས་བོད་དོན་གྱི་གླེང་སློང་གང་ཞིག་ཡིན་རྒྱ་གར་གཞུང་ནི་རྒྱ་ནག་གུང་ཁྲན་གྱི་ལངས་ཕྱོགས་ཉག་གཅིག་ཏུ་འགྲེང་བཞིན་ཡོད། ཡིན་ན་ཡང་༡༩༥༩ ལོའི་ལྷ་སའི་རྒྱ་རྒོལ་ལས་འགུལ་གྱི་ཟིང་འཁྲུགས་ལངས་ནས་མི་ལོ་བཅུ་ཕྲག་ལྔ་འགོར་བའི་དེ་རིང་གི་ཉིན་མོར་ཡང་བོད་མི་རྩམ་ཟན་ཚོ་ཁྱུ་དང་ཁྱུ་བྱས་ནས་རྒྱ་གར་འཕགས་པའི་ཡུལ་དུ་སྐྱབས་བཅོལ་དུ་ཡོང་གི་ཡོད། ཡིན་ན་ཡང་རྒྱ་གར་ཁ་སྤུ་ཅན་པ་ཚོས་བོད་ཀྱི་གང་ཟག་སྒེར་རེ་ཟུང་གི་ལུས་སྲོག་བསྐྱབ་ཐུབ་ན་ལས་བོད་མི་རིགས་སྤྱིའི་ཆག་འཇིག་ལས་སྐྱོབ་ཐུབ་པའི་རེ་བ་མི་འདུག