བོད་མིས་རང་ལུས་མེར་བསྲེགས་བྱེད་པ་ནི་ཆབ་སྲིད་ཀྱི་གནད་དོན་ཞིག་ཡིན།

རྟེན་འབྱུང་ནས།

འཛམ་གླིང་ཟླུམ་པོ་འདིའི་སྟེང་གི་སྐྱེ་བོ་ཚང་མས་རང་དབང་ལ་མཐོང་ཆེན་དང་གཙིགས་ཆེར་འཛིན་པའི་དུས་སྐབས་འདིར་བོད་ཕྱི་ནང་གི་བརྩེ་བའི་སྤུན་ཟླ་ཕོ་མོ་མང་པོ་ཞིག་གིས་རང་ལུས་མེར་བསྲེགས་བཏང་དང་གཏོང་བཞིན་པ་ནི་ཆབ་སྲིད་ཀྱི་གནད་དོན་ཞིག་ཡིན་པར་བརྟེན་ཆབ་སྲིད་ཀྱི་གནས་བབ་ཞིག་གི་སྒང་ནས་སྐད་ཆ་བཤད་ན་ལས་སེམས་བཟང་ཙམ་དང་ཕྱོགས་ལྷུང་གིས་འགྲིག་མི་འགྲིག་སོགས་ཀྱི་བསམ་ཚུལ་བཤད་བསྡད་པ་ནི་དོན་དངོས་སུ་འགྱེལ་བའི་སྒང་ལ་རྡོག་བརྫིས་དང་། གཞན་ཡང་དཔེར་ན་མི་ཉམས་ཆུང་ཞིག་ལ་གཞན་གྱིས་བཙན་དབང་གིས་ལུས་པོའི་སྟེང་ནས་ཤ་རྡོག་རེ་རེ་གྲིས་གཏུབ་ནས་ངན་གསོད་བྱེད་སྐབས་ཁ་ནས་ཨ་ཚ་འབྱིན་ན་ཨ་ཚ་མ་ཟེར་ཟེར་བ་དང་གཅིག་མཚུངས་ཆགས་ཡོད། རྒྱ་གཞུང་གིས་ང་ཚོའི་སྤུན་ཟླ་མང་པོ་བཙོན་ཁང་ནང་སྡུག་སྦྱོང་མནར་གཅོད་ཀྱི་སྡུག་བསྔལ་ཤུགས་དྲགས་ལ་རྒྱུན་རིང་བ་དེ་དང་མེར་བསྲེགས་བའི་སྡུག་བསྔལ་གཉིས་མཚུངས་བསྡུར་བྱེད་ན་ས་གནམ་གྱི་ཁྱད་པར་ཡོད་ལ། བཙོན་ཁང་ནང་ནས་ངན་གསོད་བྱས་པའི་གྲངས་འབོར་དང་མེར་བསྲེགས་པའི་གྲངས་ཀ་གཉིས་ཡང་ས་གནམ་གྱི་ཁྱད་པར་ཡོད་པ་ཤེས་དགོས།

སྔོན་ཆད་རྒྱ་གཞུང་གིས་ཁྲིམས་འགལ་དང་སྡུག་རྩུབ་ཐོག་གཞན་ཡུལ་བཙན་བཟུང་སྐབས་ཤི་བའི་དམག་མི་རྣམས་ལ། སྐྱེ་བ་རླབས་ཆེ་ཞིང་ཤི་བ་གཟི་བརྫིད་ཆེ་ཟེར་ནས་བསྟོད་གླུ་བཏང་བ་དང་འདྲ་གཟུགས་ཀྱི་རྡོ་སྐུ་མང་པོ་བཟོས་ནས་མངའ་སྡེ་སོ་སོར་སྐྱེ་བ་རླབས་ཆེ་ཚུལ་དང་ཤི་བ་གཟི་བརྫིད་ཆེ་བའི་དྲིལ་བསྒྲགས་ཤུགས་ཆེར་བྱས་པ་རེད། འོན་ཀྱང་ང་ཚོའི་བརྩེ་བའི་དཔའ་བོ་དཔའ་མོ་དེ་དག་གི་སྙིང་སྟོབས་དང་ཀུན་སློང་སྤྱོད་ལམ་བཅས་ཚང་མས་ཐོག་ནས་རྒྱ་གཞུང་གི་མི་གསོད་ལག་དམར་ཚོ་ལས་བརྒྱ་འགྱུར་སྟོང་འགྱུར་གྱིས་ཁྱད་དུ་འཕགས་ཡོད་མོད། ཆབ་སྲིད་ནག་པོའི་ཀུན་སློང་བསམ་ངན་སྦྱོར་རྩུབ་ཀྱིས་ང་ཚོའི་དཔའ་བོ་དཔའ་མོ་དེ་དག་གི་ལས་འགུལ་གྱི་ཁ་ཕྱོགས་གཞན་དུ་བསྒྱུར་བར་ཐབས་བརྒྱ་ཇུས་སྟོང་གིས་འབད་བཞིན་ཡོད་པ་འདི་ང་ཚོ་བོད་མི་ཚང་མས་ཤེས་དགོས་པའི་མི་ཚད་མྱོང་བ་ཐོན་དགོས་པའི་གནད་དོན་ཞིག་ཡིན། མདོར་ན་རང་དབང་ནི་རང་སྲོག་ལས་ཀྱང་རྩ་ཆེན་ཡིན་པར་བརྟེན་རང་དབང་གི་ཆེད་དུ་རང་སྲོག་བློས་གཏོང་གནང་བ་རེད།