བོད ལྷ་ཀླུ་གཉན་གསུམ།
བོད་མི་དག་ད་ལྟ་ནི། འཛམ་གླིང་གི་མི་དམངས་སྤྱི་འབུངས་ལྟར་དཔལ་འབྱོར་གྱི་འགྲན་རྩོད་ཀྱི་ལམ་དུ་དང་དོད་ཆེ་རུ་འགྲོ་བཞིན་པའི་སྐབས་འདི་ལ། བོད་མི་དག་གིས་དཔལ་འབྱོར་འཚོལ་སྒྲུབ་ཀྱིས་ཚ་ཚ་འུར་འུར་སྐར་ཆ་རེ་དང་སྐར་མ་རེ། ཟླ་རེ་ནས་ལོ་རེ་བཞིན་འགྱུར་བ་འགྲོ་འགོ་ཞིག་བོད་ཕྱི་ནང་གཉིས་སུ་འགྲོ་བཞིན་པ་དེ་ཡི་ཁྲོད་ནས་བོད་མིས་བོད་ཡིག་ལ་བཅིངས་པའི་བརྩེ་བ་ཆུང་དུ་འགྲོ་བཞིན་པའི་གནད་དོན་གཙོ་བོ་དེ་ནི། བོད་ཡིག་སྤྱང་ནས་རང་ཁ་གསོ་མི་ཐུབ་པའི་སྣང་ཚུལ་ཞིག་མཐོ་དམན་ཀུན་ལ་གཅིག་གྱུར་གྱི་ལྟ་ཚུལ་ཞིག་བྱུང་གི་ཡོད་པ་དེ་ནི་སྤས་སྐོང་བྱེད་མི་ཐུབ་པའི་གནད་དོན་ཞིག་ཆགས་ཀྱི་ཡོད་པ་དེར་དཔྱད་ཞིབ་ལོ་མང་རིང་བྱས་པ་ལས་རང་གི་ཉམ་མྱོང་སྟེང་ནས་སྐད་ཆ་ཕྲན་པུ་ཞིག་ཞུས་འདོད་བྱུང་།
དང་བོ་བྱེས་སུ་འཚར་ལོངས་བྱུང་བཞིན་པའི་བོད་མི་དག་གི་བོད་ཡིག་བཅིངས་པའི་བརྩེ་བ་ཆུང་དུ་འགྲོ་བཞིན་པའི་གནད་དོན་ནི། བྱེས་སུ་སྐྱེ་བའི་བོད་མི་དག་གིས་རང་ཉིད་ཀྱི་ལྟོ་གོས་དེ་སྲ་བརྟན་ཞིག་ཆགས་པར་འབད་བརྩོན་ཤུགས་ཆེར་བྱས་པ་ལས་བྱུང་གི་ཡོད། དེ་ནི་བོད་མི་རྒན་རབས་པ་དག་གིས་རང་རང་གི་མི་ཚེ་ནང་དུ་གཞན་ཡུལ་ནས་ལོ་ཟླ་བསྐྱལ་ནས་གཞན་ཡུལ་ནས་རང་ཁ་གསོ་དགོས་དུས། གཞན་མི་ལ་མི་བསྟུན་ཁ་མེད་ཀྱི་གནད་དོན་ཞིག་དང་འཕྲད་དུས། གཞན་མིའི་སྐད་ཡིག་ཤེས་རྒྱུ་དེ་ནི་གལ་ཆེན་པོ་ཆགས་པ་དང་། གཞན་མིའི་སྐད་ཡིག་ཤེས་པ་ཡིན་ན། གཞན་ཡུལ་ནས་འཚོ་བ་བསྐྱེལ་བར་སྟབས་བདེ་བ་དང་རང་གི་འཚོ་གོས་སོགས་ལ་དཀའ་ངལ་ཆུང་དུ་འགྲོ་བཞིན་པའི་གནད་དོན་དེ་ཡི་རྐྱེན་གྱིས་རང་གི་བུ་ཕྲུག་དག་ལ་ལྟོ་གོས་ཀྱི་དཀའ་ངལ་མེད་པར་བཟོ་བ་ལ་གཞན་གྱི་སྐད་ཡིག་སྤྱང་བ་དེ་ནི་ཐབས་ལམ་ཆེས་ཡག་ཤོས་ཡིན་པའི་བསླབ་བྱ་རྒྱག་ཚུལ་ནི། དབྱིན་ཡིག་ཡག་པོ་སྤྱོང་། འཚར་ལོངས་བྱུང་བ་ཡིན་ན་ཕྱི་རྒྱལ་དུ་འགྲོ་ཐུབ་པ་དང་རང་གི་འཚོ་གནས་སུ་དཀའ་ངལ་མི་ཡོང་བ་སོགས་འཚོ་གོས་ཀྱི་དཀའ་ངལ་སེལ་ཕྱོགས་ཀྱི་ཐབས་ལམ་དེ་ཉིད་གཅིག་བུ་ཡིན་པས་ལམ་སྟོན་བྱེད་ཀྱི་ཡོད་པ་དེ་ཡིན་ལ། ཕྱི་ལོག་གང་རུང་དུ་འགྲོ་ཐུབ་སོང་བ་ཡིན་ན། དེ་ནི་རང་གི་འཚོ་གོས་ཀྱི་དཀའ་ངལ་ནི་མེད་པར་ཆགས་ཀྱི་ཡོད་པར་འདོད་པ་དེ་ནས་བྱུང་གི་ཡོད།
བོད་ནང་གི་བོད་ཡིག་ལ་བཅིངས་པའི་བརྩེ་བ་ཆུང་དུ་འགྲོ་བའི་གནད་དོན་ནི། བོད་མི་དག་གིས་རང་རང་གི་བུ་ཕྲུག་དག་གིས་བོད་ཡིག་སྤྱང་ནས་ལས་ཀ་ཡང་ཡག་པོ་ཞིག་མི་རེག་པ་དང་ལས་ཀ་ཞིག་རེག་ཀྱང་དེ་ནི་དགེ་རྒན་དང་གྲྭ་བ་བྱེད་པ་སོགས་ལས་གཞན་པའི་ལས་ཀ་ཞིག་བྱེད་མི་ཐུབ་པར་འདོད་ཀྱི་ཡོད་པ་ལས། བོད་ཡིག་ལ་བཅིངས་པའི་བརྩེ་བ་ཆུང་དུ་གཏོང་བཞིན་ཡོད་པ་མ་ཟད། ཕྱོགས་གཞན་ཞིག་ནས་་བོད་ཡིག་སྤྱང་ནས་སློབ་གྲྭ་ཆེན་པོ་འགྲོ་ས་མེད་པ་དང་། བོད་ཡིག་གི་ལམ་ནས་ཆེད་ལས་སྤྱོང་ས་མེད་པ་དང་། བོད་ཡིག་གི་ལམ་ནས་ཚན་རིག་འཕྲུལ་ཆས་ཀྱི་ལས་ཀ་སོགས་བྱེད་ས་མེད་པའི་གནས་ཤིག་དུ་བསྐྱལ་ཡོད་པ་དེ་ཡི་གནད་དོན་གྱིས་བོད་མི་དག་གིས་རང་གི་སྐད་ཡིག་གིས་རང་གི་བུ་ཕྲུག་དག་གི་ལྟོ་གོས་སྲ་ཐག་ཐག་ཞིག་ཡོང་གི་མེད་པ་དེ་ནི་རྒྱའི་སྲིད་གཞུང་གིས་འགྲོ་ལུགས་ནི་རྒྱ་ཡིག་ཡག་པོ་ཞིག་མ་ཤེས་པ་ཡིན་ན། ཞིང་ཆེན་དང་གྲོང་བརྡལ་གང་དུ་བསྡད་ཀྱང་ལས་ཀ་མི་སྤྲོད་པ་སོགས་ལ་བརྟེན་ནས་བོད་མི་དག་རང་དབང་མེད་པར་ལས་མེད་དུ་བཅར་བཞིན་པ་དེ་དག་གི་གནས་ཚུལ་མཐོང་ནས་རང་གི་སྐད་ཡིག་ལ་བཅིངས་པའི་བརྩེ་བ་དེ་ཆུང་དུ་འགྲོ་བཞིན་ཡོད་པ་རེད།
ཁ་ཤས་ཤིག་གི་བོད་དུ་སློབ་འབྲིང་ཐར་ཕྱིན་ནས་བྱེས་སུ་རེ་བ་ཆེན་པོ་ཞིག་བརྒྱབ་ནས་བྱེས་སུ་ཡོང་ནས་ཆེད་ལས་ཀྱི་རིགས་ཤིག་བོད་ཡིག་གི་ལམ་ནས་སྤྱོང་འདོད་ཀྱི་སྐོམ་པ་ཆུ་འདོད་ལྟར་ཡོང་ན་ཡང་། དེ་དག་བྱེས་སུ་འབྱོར་ནས་བོད་ཡིག་གི་གོ་གནས་དང་བོད་ཡིག་གི་ཆེད་ལས་ཀྱི་ཁོར་ཡུག་བོད་ལས་ཀྱང་ཆུང་དུ་ཡོད་པ་མཐོང་ནས་སེམས་ཤུགས་རི་རབ་ལྟ་བུ་ཞིག་ཁུར་ནས་ཡོང་བ་དེ་ནི་བྱེས་སུ་ལོ་འགའ་འགོར་རྗེས་སུ། གཞི་ནས་ག་ལེར་ཡོད་པ་ནས་ཆུང་དུ་སོང་ནས། བྱེས་སུ་འབྱོར་མ་ཐག ཁ་ཏ་དང་ངོ་ཤེས། ཉེ་དུ་དང་གཞུང་འབྲེལ་གྱི་མི་སྣ་སོགས་ལ་ཁ་མིག་ཡར་ལྟ་བྱེད་ས་དེ་དག་གིས་ཀྱང་བོད་ཡིག་ལས་གཞན་ཡིག་ལ་མཐོང་ཆེན་དང་གཞན་ཞིག་གི་ལམ་ནས་ལས་ཀ་བྱེད་བཞིན་ཡོད་པ་དང་། དེ་དག་གིས་ངག་ན་དུས་རྒྱུན་དུ་བོད་ཀྱི་རིག་གཞུང་ཟེར་ནས་གླེང་བཞིན་ཡོད་པ་ལས། དོན་དངོས་སུ་བོད་ཀྱི་རིག་གཞུང་ཟེར་བ་དེ་ནི་གླུ་གཞས་གཏོང་བ་དང་། ལྷ་མོ་འཁྲབ་པ། ཐང་ག་འབྲི་བ། ལྷ་སྐུའི་རིགས་འགྲེམ་ཚོང་བྱེད་བཞིན་པ་དེ་དག་གི་རྣམ་པ་ཞིག་ལས། བོད་མི་རིགས་ཀྱི་བོད་ཡིག་གི་རིན་གོང་ལ་ཆེ་རུ་འགྲོ་ཐབས་ཀྱི་ལམ་ཁ་ཞིག་བསྐྲུན་མེད་པ་དེ་ཡིན།
བྱེས་སུ་བོད་ཡིག་གི་ཁོར་ཡུག་ཞིག་ཡོད་པ་དེ་ནི་དགོན་སྡེ་ཁག་ཡིན་ཟེར་ན་མ་ཆོག་པ་མེད་ཀྱང་། དེ་ཡང་དེང་སང་བོད་ཡིག་གི་ཁོར་ཡུག་ནས་དབལ་འབྱོར་གྱི་འགྲན་རྩོད་ཀྱི་ལམ་དུ་ཞུགས་ཚར་བའི་ནད་ཚ་ཞིག་འགོས་དེ། དགོན་སྡེ་དག་གི་ནང་དུ་ཡང་རང་མགོ་ཐོན་པའི་བོད་ཡིག་ཤེས་མི་ཤེས་པའི་མཚམས་དེར། དབྱིན་ཡིག་ཤེས་པ་དེ་ནི་འཚོ་གོས་ཀྱི་དཀའ་ངལ་སེལ་ཕྱོགས་ཀྱི་ཐབས་ལམ་ཞིག་ཡིན་པར་སྙམ་ནས་ལོ་རེ་བཞིན། གདན་ས་ཁག་ནས་དབྱིན་ཡིག་ལ་དོ་སྣང་དང་བརྩེ་བ་ཆེ་རུ་འགྲོ་བའི་གྲངས་ཀ་ནི་ལོ་རེ་ནས་ལོ་རེ་མང་དུ་འགྲོ་བཞིན་ཡོད་པ་དང་། བོད་ཡིག་ལ་བཅིངས་པའི་བརྩེ་བ་དེ་ནི་ལོ་རེ་ལོ་རེ་ནས་ཆུང་དུ་འགྲོ་བཞིན་ཡོད་པ་རེད། གནད་དོན་འདི་ནི་དཔལ་འབྱོར་འཚོལ་སྒྲུབ་ཀྱི་ནད་ཚ་ལས་བྱུང་བ་ཞིག་ཡིན། འོན་ཀྱང་། མི་ཟེར་བ་འདི་ལ་འཚོ་གོས་ཀྱི་དཀའ་ངལ་ནི་འཕྲད་དུ་མི་རུང་བ་ཞིག་ཡིན་ཡང་། ད་ལྟ་ང་ཚོ་བོད་མི་ཚོ་ནི་མི་རིགས་གཞན་དག་གི་གནས་སྟངས་དང་གཏན་ནས་མི་འདྲ་བར། རང་རང་གི་འཚོ་གོས་གཅིག་བུའི་ཆེད་དུ་བྱེས་སུ་བསྡོད་ཀྱི་མེད་པ་དེ་ནི་ཤེས་དགོས་པ་ཡིན་ལ། རང་གི་བུ་རྒྱུད་དག་ལ་རང་གི་འཚོ་གོས་ལས་ཀྱང་མི་རིགས་ཤིག་གི་འཆི་གསོན་གྱི་གནད་དོན་དེ་ནི་ཧ་ཅང་གལ་ཆེན་པོ་ཆགས་ཡོད་པ་དེ་ནི་དངོས་སུ་གོ་བརྡ་སྤྲོད་པའི་དུས་ཡིན་ལ། དུས་ཚོད་ཧ་ཅང་འཕྱི་མེད་ཀྱང་སྔ་བའི་ཚོད་དུ་མེད་པ་སྤུན་ཟླ་མི་ཉུང་བ་ཞིག་གི་སེམས་ཁོང་གི་ནད་ཚར་གྱུར་ཡོད་ངེས་ཡིན།
དེ་འདྲ་ཡིན་དུས། ད་ནི་འུ་ཅག་གིས་སྐད་ཤུགས་ཆེན་པོའི་སྒོ་ནས་བོད་མིས་བོད་ཡིག་ལ་ཆུང་བའི་བརྩེ་བ་དེ་ཆེ་རུ་གཏོང་བ་ལ་བོད་ཀྱི་མི་ཚང་རེ་ནས་རང་རང་གི་བུ་ཕྲུག་དག་གིས་ཅི་ནས་ཀྱང་མ་ཤེས་པར་ཐབས་མེད་པ་དེ་ནི་རང་གི་སྐད་ཡིག་ཡིན་པ་དང་། རང་གི་སྐད་དང་ཡི་གེ་མི་ཤིས་པའི་མི་དེ་ནི་བོད་མི་ཞིག་ཆགས་ཐབས་མེད་པའི་གོ་བརྡ་དངོས་དེ་སྤྲོད་དགོས་ཀྱི་ཡོད་པ་མ་ཟད། བོད་མི་གནས་ཡུལ་གྱི་དགོན་སྡེ་དང་གཞིས་གྲོང་། བོད་མིའི་གཉེར་བའི་སྒེར་གྱི་ཚོང་ཁང་དང་ཟ་ཁང་། གང་དུ་ཡིན་ཡང་སྒོ་བྱང་ཙམ་ཞིག་ཡིན་ཡང་བོད་ཡིག་གི་སྟེང་ནས་འབྲི་དགོས་པར་འབོད་སྐུལ་བྱེད་དགོས་པ་དང་། བོད་མི་དག་གིས་གཉེར་བའི་ཟ་ཁང་གི་ནང་དུ་ཟས་ཐོ་ཡིན་ཡང་གནས་ཡུལ་རྒྱ་གར་དུ་ཡོད་ཀྱང་། དབྱིན་ཡིག་དང་བོད་ཡིག་གཉིས་ཀའི་ཟས་ཐོ་འབྲི་བ་སོགས་བྱེད་དགོས་ཀྱི་ཡོད་ལ། ཐ་ན་གཞུང་འབྲེལ་དང་སྒེར་གྱི་ཚོགས་པ་ཁག་ནས་སྟོད་གོས་དང་གྱོན་གོས། ཆབ་བསྒྲགས་ཀྱི་ཤོག་ལེབ་གཅིག་ཡིན་ཡང་བོད་ཡིག་དང་དབྱིན་ཡིག་གཉིས་ཀྱི་སྟེང་ནས་སྤེལ་དགོས་ཀྱི་འདུག ད་དུང་། ཚོགས་པ་སོ་སོའི་ལས་རྟགས་སྟེང་ན་བོད་ཡིག་མེད་པ་དེ་འདྲ་མི་ཉུང་བ་ཞིག་ཡོད་པ་དེ་དག་གིས་ཀྱང་བོད་ཡིག་དང་དབྱིན་ཡིག་གཉིས་ཀ་དགོས་ཀྱི་ཡོད་པ་དེ་ནི་བཤད་མ་དགོས་པ་ཞིག་རེད།
འདི་ལྟར་བོད་ཡིག་གི་དར་ཆབ་ཤུགས་ཆེན་བྱེད་པ་དང་། ཐ་ན་སྒེར་ལ་རླངས་འཁོར་དང་འཕྲུལ་རྟ་སོགས་ཡོད་ན། དེ་ཡི་སྟེང་ལ་བོད་ཡིག་འབྲི་བ་སོགས། མདོར་ན་བོད་མི་རང་གི་གཉེར་འཁོའི་ཅ་དངོས་གང་ཞིག་སྟེང་དུ་ཡིན་ཡང་བོད་ཡིག་འབྲི་དགོས་ཀྱི་འདུག དེ་ལྟར་ལག་ལེན་དུ་བསྟར་ནས་བོད་གཞུང་ཤེས་རིག་ལས་ཁུངས་ཀྱི་གཙོ་བའི་ཤེས་རིག་སྡེ་ཚན་ཁག་ནས་བོད་ཡིག་གི་ཆེད་ལས་པ་གསོ་སྐྱོང་བ་བྱེད་པའི་ཐབས་སུ་ནང་སྒྱུར་གྱི་སྡེ་ཚན་ཁག་ལ་སློབ་སྤྱོང་སྤྲོད་ཐབས་སོགས་བྱས་པ་ཡིན་ན། བོད་ཡིག་གི་སྟེང་ནས་ཆེད་ལས་པ་ཐོན་ངེས་ཡིན་ལ། བོད་མིས་བོད་ཡིག་ལ་བཅིངས་པའི་བརྩེ་བ་དེ་ཡང་ཆེ་རུ་འགྲོ་ངེས་ཡིན།
སྤུན་ཟླ་ཚོ། གནད་དོན་འདིའི་སྐོར་ལ་ཁ་རེ་གྲགས་ན་བསམ་ནས་སྒུག་ཡོད།
བོད་ནང་ལོགས་ལ་བཞུགས་མཁན། བོད་ཕྱི་ལོགས་ལ་བཞུགས་མཁན་བོད་མི་ཚང་མས་བོད་ཡིག་ཐོག་ལ་ཡོད་པ་རྣམས་ལ་ཀློག་རྒྱུ་དགའ་པོ་དང་། བོད་སྐད་ཐོག་ལ་ཤོད་རྒྱུ། བོ་སྐད་ཐོག་ལ་འབྲི་རྒྱུ་ནི་། བོད་མི་སྒེར་དང་སྤྱི། གཞུང་དང་མི་མང་། སྐྱ་སེར་ཕོ་མོ་རྒན་བྱིས་ཚང་མས་དོ་སྣང་དང་ཤུགས་སྣོན། བོད་སྐད་དང་བོད་ཡིག ཉམས་པ་གསོར་ཆུད་དང་མི་ཉམས་གོང་འཕེལ། ཡར་རྒྱས་དར་ཁྱབ་ལ་ཐོན་མིའི་རྗེས་འབྲངས་པ་ཚང་མ་ལ་འགན་འཁུར་དང་འགན་འཁྲི་ཡོད་རེད་སྙམ།
ཀརྨ་རྡོ་རྗེ་ལགས། ང་ཚོས་འགན་འདི་འཁུར་དུ་ལེན་ཕྱོགས་ཀྱི་སྐད་རྒྱགས་པ་དང་ངོ་འཚང་འདྲི་བ། བརྡ་ཁྱབ་སྤྱར་བ་སོགས་བྱེད་རྒྱུའི་དུས་ཚོད་ལ་སླེབས་འདུག རང་གི་ནང་མིའི་ཁྲོད་དུ་བུ་ཕྲུག་ཅི་ཙམ་ཡོད་ན་དེ་དག་ལ་བོད་མི་ཡིན་ན་བོད་སྐད་དང་བོད་ཡིག་ཤེས་རྒྱུ་དེ་ནི་དང་བོ་ཡིན་པར་བསླལ་བྱ་གཅིག་བུ་མིན་པར་དེབ་དང་བྱིས་སྒྲུང་སོགས་འཁོ་སྤྲོད་བྱེད་དགོས་ཀྱི་འདུག
རེད་ཡ། སྤྱིར་བཏང་བཙན་བྱོལ་ན་བོད་ཡིག་གི་སྤྱོད་སྒོ་ཆེས་ཉུང་ཞིང། བོད་ཡིག་གི་རིན་ཐང་ཡང་ཤིིན་ཏུ་ཞན་པོ་རེད་ལབ་ན་མི་འགྲིགས་རྒྱུ་མེད་ཀི། ང་ཡང་ཁྱེད་ཉིད་དང་འདྲ་བར་བོད་ཀྱི་སྐད་ཡིག་བཀོད་སྤྱོད་ཀྱི་ཐད་ལ་སྐད་ངན་རྒྱག་མཁན་ཞིག་ཡིན། སྐྱབས་བཅོལ་གྱི་འཚོ་བ་དང། རང་དབང་གི་ཁོར་ཡུག ཕ་མའི་བསླབ་བྱ་དང། སྤྱི་ཚོགས་ཀྱི་ཤུགས་རྐྱེན་གང་མང་ཞིག་ལ་བརྟེན་ནས་བྱུང་བའི་གྲུབ་འབྲས་ནི། བོད་སྐད་དང་བོད་ཡིག་དག་མོ་ཞིག་མི་ཤེས་པའི་མི་རབས་གསར་པ་ཞིག་འཚར་ལོངས་བྱུང་བཞིན་པ་འདི་རེད། ངོ་མའི་སེམས་སྐྱོ་ནི་ཞིག་རེད། བོད་སྐད་གཙང་མར་བརྟེན་ནས་ཁོང་ཚོར་གོ་བརྡ་ཡང་འཕྲོད་ཁག་པོ་རེད། གང་ལྟར་འདི་ནི་ང་ཚོའི་མི་རབས་འདིའི་ཕྲག་སྟེང་དུ་སླེབས་པའི་དུས་རབས་ཀྱི་ལས་འགན་ཉག་གཅིག་ཡིན་པ་འདྲ། ང་ཚོས་སོ་སོའི་ས་ནས་བོད་ཡིག་གི་བཀོད་སྤྱོད་ཀྱི་རང་བཞིན་རིན་ཐང་དང་ལྡན་པ་བཟོས་ཆོག
ང་རང་ཁྱེད་ཀྱི་བསམ་བློའི་རྒྱབ་ལོག་ན་ཀ་བ་ལྟར་འགྱིང་ནས་ཡོད། ང་ཚོ་ལྷན་དུ་མདུན་དུ་བསྐྱོད་ཆོག བོད་ཡིག་གི་ལང་ཚོ་ལ་རོལ་དུ།
འབྲོང་བུ་ཟླ་བ་ཚེ་རིང་ལགས། ང་ཚོ་ནི་བོད་དུ་སྐྱེ་བ་ཡིན་ལ། ང་ཚོས་རང་གི་སྐྱེ་ཡུལ་དང་རང་གི་རིགས་ལ་འགན་ཞིག་མ་ཁུར་ན་སུས་འགན་ཁུར་གྱི་ཡོད། དེ་ཡིན་དུས་རང་རང་གི་ས་ནས་ངོ་ཤེས་ཚད་ལ་སྡུག་སྐད་འདི་ཤུགས་ཆེན་པོས་སྒོ་ནས་རྒྱགས་དང་། ནམ་ཞིག་ཁོར་ཡུག་ནས་གཉིད་སད་དེ་འོང་ངེས་ཡིན་ལ། གྲོགས་པོ་ངོ་ཤེས་དག་གིས་ཀྱང་རང་གི་བུ་ཕྲུག་ལ་བོད་སྐད་དང་བོད་ཡིག་ནི་བོད་མི་ཞིག་ཡིན་དུས་མ་ཤེས་ཐབས་མེད་ཡིན་པའི་ལྷ་རྒྱལ་ཞིག་འཐེན་ཁོ་ཐག་ཡིན། ང་ཚོས་རང་ཉིད་ལ་ཡིད་ཆེས་དང་སྤོབས་པས་འཐོར་འདེགས་བྱེད་ཡ་་་