བོད་མིའི་ཛ་དྲག་གི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ

གནས་ཚུལ་སྤྲོད་མཁན། ཨ་ བཙན་པོ།
སྤྱི་ལོ་ ༢༠༡༢ ལོའི་ཟླ་ ༠༢ ཚེས་ ༡༩ ཉིན་ཚངས་དབྱངས་རྒྱ་མཚོ་ལགས་ཀྱིས་བཀོད་སྒྲིག་འོག་”བོད་མིའི་ཛ་དྲག་གི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ”ཞེས་པའི་ཛ་དྲག་གི་བགྲོ་གླེང་སྐབས་བཀུར་འོས་མདོ་སྟོད་སྤྱི་འཐུས་ལི་ཐང་འཇམ་དབྱངས་བཟོད་པ་དང་། མདོ་སྨད་སྤྱི་འཐུས་བསོད་ནམས་རྒྱལ་མཚན། མདོ་སྨད་སྤྱི་འཐུས་རྨོག་རུ་བསྟན་པ། མདོ་སྟོད་སྤྱི་འཐུས་གངས་ལྷ་མོ། དབུས་གཙང་སྤྱི་འཐུས་ཤར་གླིང་ཟླ་སྒྲོན། རྩོམ་པ་པོ་བོན་རྒྱ་བསྟན་འཛིན་རབ་རྒྱས། ལོ་རྒྱུས་ཉམས་ཞིབ་པ་མཁན་པོ་འཇུ་བསྟན་སྐྱོང། ནོར་གླིང་མཐོ་སློབ་ཀྱི་ལོ་རྒྱུས་སློབ་དཔོན་ལྷ་ལུང་རྒྱལ། སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། ལོ་རྒྱུས་ཉམས་ཞིབ་པ་མགོ་ལོག་དམ་ཆོས་དཔལ་བཟང་དང་། དབུས་གཞོན་ནུའི་ཚོགས་གཞོན་དོན་གྲུབ་ལྷ་དར། བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་འཆི་མེད་གཡུང་དྲུང་། རྡ་སའི་བོད་རང་དབང་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན། གོ་སྒྲིག་པ་ཚངས་དབྱངས་རྒྱ་མཚོ་བཅས་དང་། ཟུར་ཉན་པ་དབུས་འོས་བསྡུའི་འགན་འཛིན་ལས་འཕར་ཟུར་བ་གཡང་ཁོ་རྒྱལ་དང་། ནོར་གླིང་ཉམས་ཞིབ་འགན་འཛིན་རྡོ་རྗེ་དབང་ཕྱུག ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་དང་། བློ་བཟང་ཡེ་ཤེས། དེ་བཞིན་ས་རཱ་མཐོབ་སློབ་ཀྱི་སློབ་མ་དང་། ནོར་གླིང་མཐོ་སློབ་ཀྱི་སློབ་མ་སོགས་ཁྱོན་བཅུ་ཕྲག་བདུན་ལྷག་མཉམ་འཛོམས་ཀྱིས་བགྲོ་གླེང་གནང་ཡོད་ལ། སྐབས་དེར་བཀའ་སྤྱི་གཉིས་ལ་ཞེན་སྐུལ་གྱི་ཚུལ་དུ་སྙན་ཞུ་ཞིག་དང་། གོ་སྒྲིག་པའི་ངོས་ནས་སྐབས་དེ་དང་བསྟུན་ནས་གསར་འགོད་བསྒྲགས་གཏམ་ཞིག་ཀྱང་སྤེལ་ཡོད་འདུག

གསར་འགོད་བསྒྲགས་གཏམ།
ང་ཚོས་ཅིའི་ཕྱིར་ངོ་རྒོལ་སྤེལ།
ད་ལྟ་ང་ཚོའི་བགྲོ་གླེང་བྱེད་ཀྱིན་པའི་སྐབས་ཏག་ཏག་ལ་མདོ་སྨད་རྔ་བ་འཛམ་ཐང་བར་མ་ཡུལ་ཚོ་ཆོས་རྗེ་ཚོ་བའི་སྡེ་མི་ཕ་སྤྱན་གཟིགས་དང་། མ་སྙིང་མོ་གཉིས་ཀྱི་བུ་སྣང་གྲོལ་ལགས་ཀྱིས་འཛམ་ཐང་དགོན་པའི་ཉེ་འཁྲིས་སུ་རང་ལུས་མེར་བསྲེགས་བཏང་ཏེ་སྐུ་གྲོངས་པའི་རླབས་ཆེན་གྱི་གནས་ཚུལ་ཐོན་པ་དང་། རྒྱལ་གཅེས་དཔའ་བོ་སྣང་གྲོལ་ལགས་གཙོ་བྱས་པའི་བོད་ནང་གི་རྒྱལ་གཅེས་དཔའ་རྒོད་རྣམས་ལ་གུས་འདུད་དང་བཅས། བྱུང་བཞིན་པའི་འཚེ་བ་མེད་པའི་མེར་བསྲེགས་ལས་འགུལ་གྱི་ཐད་ལ་བགྲོ་གླེང་གང་རྒྱས་བྱས་རྗེས། རྒྱ་གཞུང་གིས་ད་ལྟའི་བར་དུ་སྒོ་དང་སྒེའུ་ཁུང་ཡོད་ཚད་ནས་འཁྱོག་བརྗོད་དང་རྫུན་གཏམ་ཤ་སྟག་ལས་བོད་ཀྱི་གནད་དོན་ཐད་ལ་དྲང་བདེན་གྱི་སྐད་ཆ་ཚིག་གཅིག་ཀྱང་ཐོན་མ་མྱོང་བ་དང་། ད་དུང་མུ་མཐུད་ནས་བོད་ཀྱི་ལོ་རྒྱུས་འཁྱོག་བརྗོད་དང་བདེན་དོན་རྫུན་བསྒྱུར། དད་མོས་དམ་བསྒྲགས་བྱེད་ཀྱིན་པ་བཅས་ནི། བོད་མིས་ལུས་སྲོག་མེར་བསྲེགས་ཀྱིས་ངོ་རྒོལ་བྱེད་དགོས་པའི་རྒྱུ་རྐྱེན་གཙོ་བོ་ཁག་ཡིན་པའི་བསམ་ཚུལ་བྱུང་ཞིང་། གཤམ་གསལ་ཁག་ནི་བྱུས་ངན་དེ་དག་ཐེར་འདོན་བྱས་པའི་སྐོར་གྱི་དོན་ཚན་འགའ་ཡིན།
ཀ༽ བོད་འདི་སྔ་མོ་ནས་ཀྲུང་གོའི་ཆ་ཤས་ཤིག་ཡིན་ཚུལ་གྱི་རྫུན་བསྒྲིགས་ལོ་རྒྱུས་རྒྱུན་མུར་སྤེལ་ཏེ་མི་རབས་གསར་བའི་བསམ་བློ་རྨོངས་སྒྱུར་དང་མི་རིགས་ཀྱི་ལོ་རྒྱུས་ནག་བསུབ་དང་གཞི་རྩའི་ཐོབ་ཐང་རྡོག་རོལ་གྱི་ཉེས་པ་ཆེན་པོ་བསགས་པ།
ཁ༽ བོད་ཞི་བས་བཅིངས་འགྲོལ་བཏང་ཚུལ་གྱི་ཧམ་བཤད་བྱས་ཏེ་གཉའ་གནོན་དང་བཙན་འཛུལ་གྱི་ནག་ཉེས་ཡོད་དོ་ཅོག་འགེབས་སྦས་ཀྱི་བྱུས་ངན་ཆེད་དུ་སྤེལ་བ།
ག༽ བོད་ཆོལ་ཁ་གསུམ་པོ་དུམ་བུ་མང་པོར་བཅད་བགོས་ཀྱིས་མི་རིགས་གཅིག་གྱུར་གྱི་རང་སྐྱོང་ཁེ་དབང་ལ་གནོད་ཚབས་ཆེན་པོ་བཏང་ཞིང་མི་རིགས་ཀྱི་ངོ་བོ་གཞན་འགྱུར་གྱི་བྱུས་ངན་སྤེལ་བ།
ང༽ རྒྱ་མི་མང་པོ་བོད་དུ་གནས་སྤོ་ཤུགས་ཆེན་གྱིས་བོད་ཡུལ་མི་སེར་སྤེལ་ཡུལ་བཟོ་བཞིན་པ་དང་། བོད་ཀྱི་འབྲོག་པ་རྩ་སྟོང་དང་མཉམ་ལས་སྲིད་བྱུས་སྤེལ་བ།
ཅ༽ བོད་ཀྱི་བླ་ན་མེད་པའི་དབུ་འཁྲིད་༸གོང་ས༸སྐྱབས་མགོན་ཆེན་པོར་ཉེས་འགེལ་མཚན་དམོད་ཀྱིས་བོད་མིའི་རང་དབང་དད་མོས་ལ་བཙན་གནོན་རྒྱུན་མུར་སྤེལ་བ།
ཆ༽ བོད་རིགས་མང་ཚོགས་ཀྱིས་༸གོང་ས་མཆོག་བོད་དུ་གདན་ཞུ་དང་། བོད་ཀྱི་ཆོས་ལུགས་དད་མོས་རང་དབང་དང་། བོད་མིའི་ཁེ་དབང་སྲུང་སྐྱོབ། བོད་རང་དབང་རང་བཙན།ཆ༸པཎ་ཆེན་རིན་པོ་ཆེ་གཙོས་བོད་ཀྱི་ཚབ་སྲིད་བཙོན་མ་རྣམས་ངེས་པར་གློད་གྲོལ་གཏོང་དགོས་པ་སོགས་ཀྱི་ཆེད་ཞི་བའི་ངོ་རྒོལ་ལ་རྒྱ་གཞུང་གིས་ཐེ་ཚོམ་མེད་པར་ཉེས་རྡུང་དང་། དྲག་གནོན་བྱས་ཏེ་ད་བར་དུ་བོད་མི་མང་པོ་དམར་གསོད་བཏང་བ།
ཇ༽ ༸གོང་ས་༸སྐྱབས་མགོན་ཆེན་པོ་མཆོག་དང་དབུས་བོད་མིའི་སྒྲིག་འཛུགས་ངོས་ནས་འབྱུང་འགྱུར་བོད་འདི་ཀྲུང་གོའི་མངའ་ཁོངས་སུ་མཉམ་གནས་འཆམ་མཐུན་གྱིས་འཚོ་རྒྱུར་ཕྱི་གསལ་ནང་གསལ་གྱིས་བོད་རིགས་རང་སྐྱོང་སྐོར་ལ་ཀྲུང་གོའི་རྩ་ཁྲིམས་དང་རང་སྐྱོང་བཅའ་ཁྲིམས་གཞིར་བཟུང་གཞུང་འབྲེལ་བསམ་འཆར་ཡིག་ཆ་ཕུལ་བར་ཡང་བརྡ་ལན་དོན་ལྡན་མ་བྱུང་ཁར་ངོ་བོ་འགྱུར་བའམ་ཕྱེད་རང་བཙན་སོགས་ཀྱི་མིང་འདོགས་ཀྱིས་བོད་རིགས་ཚང་མར་ས་ཁོངས་གཅིག་གི་རང་སྐྱོང་སྤྲོད་འདོད་མེད་པའི་རྣམ་འགྱུར་ཤུགས་ཆེན་བསྟན་ནས་བོད་རྒྱ་ཞི་མོལ་གྱི་ལམ་བུ་བཀག་ཅིང་མི་རིགས་རང་སྐྱོང་གི་གཞི་རྩའི་ཐོབ་ཐང་རྩིས་མེད་བཏང་བ།
གོང་གསལ་གནད་དོན་འདི་དག་གིས་གཞིས་བཞུགས་བོད་མིའི་སེམས་ལ་རྨ་ཁ་ཆེན་པོ་བཟོས་ཏེ་རྒྱ་གཞུང་ལ་ངོ་རྒོལ་གྱི་རླབས་ཕྲེང་དང་མེ་ལྕེ་ཤུགས་ཀྱིས་མཆེད་བཞིན་པ་ཡིན་པས་འདིའི་འགན་ཡོངས་རྫོགས་རྒྱ་གཞུང་གིས་འཁུར་དགོས་པར་མ་ཟད། རྒྱ་ནག་མི་མང་གི་གཙོས་འཛམ་གླིང་གི་མི་མང་ཡོངས་ཀྱིས་དེ་དོན་གསལ་རྟོགས་ཐུབ་རྒྱུའི་འབོད་སྐུལ་ཞུ་རྒྱུ་ཡིན། དེ་བཞིན་དུ་གཞིས་བཞུགས་བོད་རིགས་སྤུན་ཟླ་མང་པོ་ཞིག་གིས་བོད་དོན་ཆེད་སྙིང་སྟོབས་ཆེན་པོའི་སྒོ་ནས་རང་ལུས་མེ་མཆོད་ལ་ཕུལ་བཞིན་པ་ནི་དངོས་གནས་བློ་ཡུལ་ལ་ཤོང་དཀའ་བའི་བློས་གཏོང་ཆེན་པོ་ཞིག་དང་། སྙིང་སྟོབས་ཆེན་པོ་ཞིག་ཡིན་པར་ངོས་འཛིན་དང་འབྲེལ། རྒྱལ་སྤྱིའི་གཟུར་གནས་གཞུང་མང་ཡོངས་ཀྱིས་ད་ལྟའི་བོད་ནང་གི་གནས་སྟངས་དང་། བོད་མི་མང་པོ་ཞིག་གིས་རང་སྲོག་བློས་བཏང་གིས་རང་ལུས་མེ་མཆོད་འབུལ་བཞིན་པའི་དགོས་དོན་གང་ཡིན། རྒྱ་གཞུང་གི་ཐ་ཤལ་གྱི་སྤྱོད་པ་སོགས་ལ་རྒྱུས་ལོན་བྱས་ཏེ་དྲང་བདེན་གྱི་སྒོ་ནས་རྒྱབ་སྐྱོར་ཅི་ནུས་གནང་སྐྱོང་ཡོང་བའི་གཞེན་སྐུལ་ཡང་ཞུ་གིན་ཡོད།
ཞེས་བོད་མིའི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ་ཞེས་པའི་བགྲོ་གླེང་སྐབས་བཀོད་སྒྲིག་ཚོགས་ཆུང་ནས་སྤྱི་ལོ༢༠༡༢ ལོའི་ཟླ་ ༠༢ པའི་ཚེས་ ༡༩ ལ་སྤེལ།

བཀའ་སྤྱི་གཉིས་ལ་ཞེན་སྐུལ་སྙན་ཞུ།

༄༅། །དཔལ་ལྡན་བོད་མི་མང་སྤྱི་འཐུས་དང་བཀའ་ཤག་ལྷན་རྒྱས་པའི་དྲུང་དུ།
ཆེད་ཞུ།
སྤྱི་ལོ་ ༢༠༡༢ ལོའི་ཟླ་ ༠༢ ཚེས་ ༡༩ ཉིན་ཚངས་དབྱངས་ལགས་ཀྱིས་བཀོད་སྒྲིག་འོག་”བོད་མིའི་ཛ་དྲག་གི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ”ཞེས་པའི་ཛ་དྲག་གི་བགྲོ་གླེང་སྐབས་བཀུར་འོས་མདོ་སྟོད་སྤྱི་འཐུས་ལི་ཐང་འཇམ་དབྱངས་བཟོད་པ་དང་། མདོ་སྨད་སྤྱི་འཐུས་བསོད་ནམས་རྒྱལ་མཚན། མདོ་སྨད་སྤྱི་འཐུས་རྨོག་རུ་བསྟན་པ། མདོ་སྟོད་སྤྱི་འཐུས་གངས་ལྷ་མོ། དབུས་གཙང་སྤྱི་འཐུས་ཤར་གླིང་ཟླ་སྒྲོན། རྩོམ་པ་པོ་བོན་རྒྱ་བསྟན་འཛིན་རབ་རྒྱས། ལོ་རྒྱུས་ཉམས་ཞིབ་པ་མཁན་པོ་འཇུ་བསྟན་སྐྱོང། ནོར་གླིང་མཐོ་སློབ་ཀྱི་ལོ་རྒྱུས་སློབ་དཔོན་ལྷ་ལུང་རྒྱལ། སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། ལོ་རྒྱུས་ཉམས་ཞིབ་པ་མགོ་ལོག་དམ་ཆོས་དཔལ་བཟང་དང་། དབུས་གཞོན་ནུའི་ཚོགས་གཞོན་དོན་གྲུབ་ལྷ་དར། བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་འཆི་མེད་གཡུང་དྲུང་། རྡ་སའི་བོད་རང་དབང་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན་བཅས་པ་མཉམ་འཛོམས་ཀྱིས་བགྲོ་གླེང་གནང་སྐབས། བཙན་བྱོལ་བོད་མིའི་ད་ལྟའི་འཐབ་རྩོད་ཀྱི་སྟོབས་ཤུགས་ཇི་ལྟར་གོང་འཕེལ་གཏོང་ཐབས་སྐོར་ལ་གཤམ་གསལ་བསམ་ཚུལ་ཁག་བརྒྱད་ཙམ་བྱུང་བ་འདི་འདྲ་རེད།
ཀ༽ གཞུང་དང་གཞུང་འབྲེལ་མིན་པའི་དབར་ལ་ཀུ་ཡངས་ཀྱི་ལྟ་ཚུལ་འོག་ཆིག་སྒྲིལ་དང་ཐུན་མོང་གི་ནུས་པ་འདོན་ཐབས་ལ་ང་ཚོ་ཐུན་མོང་གིས་ནུས་པ་ངེས་པར་འདོན་དགོས།
ཁ༽ ད་ལྟའི་གནས་སྐབས་སུ་གསར་འགྱུར་མཁོ་སྤྲོད་བྱེད་སྟངས་ཐད་ལ་འཐུས་ཤོར་ཆེན་པོ་འགྲོ་གིན་འདུག་པའི་ལྟ་ཚུལ་ཐུན་མོང་ལ་བྱུང་ཞིང་། འཐུས་ཤོར་དེ་བསུབ་ཐབས་ལ་ལྟ་ཚུལ་སྣ་ཚོགས་པ་ཞིག་བྱུང་བ་ལས་གཙོ་ཆེ་བ་གཉིས་བྱུང་། གཅིག དབུས་བོད་མིའི་སྒྲིག་འཛུགས་ཀྱི་ངོས་ནས་བོད་ནང་གི་ས་ཁུལ་ཁག་ཡོངས་རྫོགས་ཀྱི་མི་སྣ་འདུས་པའི་ཚོགས་ཆུང་ཞིག་བཙུགས་ནས་བོད་ནང་གི་གནས་ཚུལ་ཇི་བྱུང་བསྡུ་ལེན་དང་ཞིབ་འཇུག་བྱས་ཏེ་གསར་ལམ་ཁག་ལ་མཁོ་སྤྲོད་དང་ལོ་རྒྱུས་ལ་ཉར་ཐབས་བྱེད་རྒྱུདང་།
གཉིས། ད་ལྟའི་གནས་སྐབས་སུ་མི་སྒེར་དང་ཚོགས་པ་ཁག་གང་ལ་བོད་ནང་གི་གནས་ཚུལ་འབྱོར་ནའང་། དང་པོར་བདེ་སྲུང་དང་འགྲོ་བ་མིའི་ཐོབ་ཐང་ལ་སྤྲད་དེ། བདེ་སྲུང་དང་འགྲོ་བ་མིའི་ཐོབ་ཐང་ཚོགས་པའི་ངོས་ནས་མར་མཁོ་སྤྲོད་བྱས་རྗེས་ད་གཟོད་གསར་ལམ་ཁག་ལ་བསྒྲགས་རྒྱུའི་བྱེད་ཐབས་གཉིས་བྱུང་།
ག༽ ད་ལྟའི་ལྷག་དཀར་ལས་འགུལ་ལྟ་བུ་ནི་ངེས་པར་དགོས་ངེས་དང་ད་དུང་འཐུས་ཚང་ལ་བཏང་ནས་མི་བསྟུན་པའི་ལས་འགུལ་ཚད་ལྡན་ཞིག་ཡོང་ཐབས་ལ་འབད་པ་བྱེད་དགོས།
ང༽ ད་ལྟའི་ཆར་ང་ཚོས་ངེས་པར་ལས་འགུལ་སྤེལ་སྐབས་ལས་འགུལ་བ་མང་ཆེ་བས་ལས་འགུལ་གྱི་ངོ་བོ་ཤེས་རྟོགས་མེད་པའི་སྣང་ཚུལ་ཞིག་འབྱུང་གིན་ཡོད་པས། ལས་འགུལ་སྤེལ་ཐབས་ཀྱི་སྐོར་ལ་སྦྱོར་བརྡར་ངེས་པར་སྤེལ་དགོས།
ཅ༽ ད་ལྟའི་ཆར་བོད་ཀྱི་བླ་མ་ཁག་ལ་རྗེས་འཇུག་འབུམ་ཚོ་བརྒལ་བ་ལོངས་ཀྱིན་ཡོད་པ་རེད། ཁོང་དག་གིས་བོད་ཀྱི་རྩ་དོན་ལ་འགན་བླངས་ནས་འགྲེལ་བཤད་གནང་རྒྱུ་གལ་ཆེན་རེད།
ཆ༽ ཉིན་བཅུ་དང་བཅོ་ལྔའི་རྗེས་ནས་ལུས་འགུལ་བ་བརྗེ་རེས་ཀྱིས་རྒྱ་ནག་གཞུང་ཚབ་ཁང་། མཉམ་འབྲེལ་རྒྱལ་ཚོགས། འགྲོ་བ་མིའི་ཐོབ་ཐང་ཚོགས་པ། ཡུ་རོབ་སྤྱི་མཐུན་བཅས་ཀྱི་སྒོ་ཁར་ཟླ་དང་ལོ་བསྟུན་ནས་ལས་འགུལ་སྤེལ་དགོས།
ཇ ༽ ད་ལྟའི་བཀའ་བློ་ཁྲི་པ་ལྟ་བུར་བོད་ནང་གི་བོད་མིའི་གདེང་འཇོག་དང་གུས་བརྩི་ཆེན་པོ་དེ་ཡོད་པའི་སྐབས་དང་བསྟུན་ནས་བོད་ནང་གི་མེར་བསྲེག་ལས་འགུལ་ལ་ཁ་ཕྱོགས་ཤིག་སྟོན་རྒྱུ་གལ་ཆེན་ཡིན་པ།
ཉ ༽ ལོ་ངོ་ལྔ་བཅུའི་འཐབ་རྩོད་ཀྱི་བརྒྱུད་ལམ་ཁག་ལ་ལེགས་ཉེས་ཅི་བྱུང་གི་སྐོར་ལ་ངེས་པར་བསྐྱབ་ཞིབ་ཅིག་བྱེད་དགོས།
གོང་གསལ་དོན་ཚན་ཁག་ནི་བགྲོ་གླེང་སྐབས་བྱུང་བའི་བསམ་ཚུལ་དག་གཅེས་བསྡུས་བྱས་པ་ཡིན་པས་ངེས་པར་དགོངས་བཞེས་ཅེས་”བོད་མིའི་ཛ་དྲག་གི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ”བགྲོ་གླེང་བཀོད་སྒྲིག་པ་ཚོགས་ཞུགས་པ་ཐུན་མོང་ནས་གུས་འདུད་དང་བཅས།

མིའི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ་ཞེས་པའི་
བགྲོ་གླེང་སྐབས་ཀྱི་ཚོགས་ཞུགས་པ་རྣམ་པའི་མཚན་གཤམ་གསལ།

1. བོད་མི་མང་སྤྱི་འཐུས་བསོད་ནམས་རྒྱལ་མཚན།

2. བོད་མི་མང་སྤྱི་འཐུས་ཤར་གླིང་ཟླ་སྒྲོན།

3. བོད་མི་མང་སྤྱི་འཐུས་རྨོག་རུ་བསྟན་པ།

4. བོད་མི་མང་སྤྱི་འཐུས་འཇམ་དབྱངས་བཟོད་པ།

5. བོད་མི་མང་སྤྱི་འཐུས་གངས་ལྷ་མོ།

6. ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས།

7. ནོར་གླིང་མཐོ་སློབ་གྱི་ལོ་རྒྱུས་སློབ་དཔོན་དགེན་ལྷ་ལུང་།

8. ལོ་རྒྱུས་ཉམས་ཞིབ་པ་འཇུ་བསྟན་སྐྱོང་།

9. རྩོམ་པ་པོ་བོན་རྒྱ་བསྟན་འཛིན་རབ་རྒྱས།

10. ལོ་རྒྱུས་ཉམས་ཞིབ་པ་མགོ་ལོག་དམ་ཆོས་དཔལ་བཟང་།
11. དབུས་གཞོན་ནུའི་ཚོགས་གཞོན་དོན་གྲུབ་ལྷ་དར།
12. བོད་རྒྱལ་ཡོང་མང་གཙོ་ཚོགས་པའི་ཚོགས་གཙོ་འཆི་མེད་གཡུང་དྲུང་།
13. རྡ་སར་ཡོད་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་རྡོ་རྗེ་ཚེ་བརྟན།
14. བགྲོ་གླེང་གོ་སྒྲིག་པ་ཚངས་དབྱངས་རྒྱ་མཚོ།
15. ཟུར་ཉན་པ་དབུས་འོས་བསྡུའི་འགན་འཛིན་ལས་འཕར་ཟུར་བ་གཡང་ཁོ་རྒྱལ་དང་། ནོར་གླིང་ཉམས་ཞིབ་འགན་འཛིན་རྡོ་རྗེ་དབང་ཕྱུག ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་དང་། བློ་བཟང་ཡེ་ཤེེས། དེ་བཞིན་ས་རཱ་མཐོབ་སློབ་ཀྱི་སློབ་མ་དང་། ནོར་གླིང་མཐོ་སློབ་ཀྱི་སློབ་མ་སོགས་ཁྱོན་བཅུ་ཕྲག་ལྔ་ལྷག་ཡོད།