བོད་མིའི་མིང་ཡང་བརྗེ་བའི་དུས་ལ་བབས།

འབའ་སྲས།

ཕ་ཡུལ་ཤོར་ནས་གཞན་ཡུལ་ཁྱིམ་དུ་བྱས།།
རང་བཙན་བཞག་ནས་དབུ་མའི་ལམ་ལ་ཞུགས།།
དབུ་མའི་ལམ་གྱི་སྣེ་ཐག་ཆད་ལ་ཉེ།།
ད་ནི་ང་ཚོས་ལམ་ཁ་ཅི་ཞིག་འདེམ།།

རྒྱ་ནག་དམར་པོའི་སྲིད་དབང་བོད་ལ་བཙུགས།།
བཙན་བྱོལ་བོད་གཞུང་རྡ་རམ་ས་ལར་ཆགས།།
འདི་གཉིས་བར་ན་དབུ་མའི་ལམ་ཞིག་ཡོད།།
དབུ་མའི་ལམ་དུ་རྐང་པ་ཇི་ལྟར་སྤོ།།

བདག་གི་ཕ་མ་གངས་ཅན་བོད་ན་ཡོད།།
བདག་གི་བླ་མ་ས་མཐའི་ཡུལ་ན་བཞུགས།།
འདི་གཉིས་ཐུགས་ན་དམར་པོ་མེ་ཞིག་ཡོད།།
མེ་ལྕེ་མཆེད་པའི་རླུང་ཁ་ཇི་ལྟར་འབྱེད།།

རང་བཙན་སྐད་འབོད་དབུ་མའི་ལམ་དང་འགལ།།
དྲག་པོའི་རྒོལ་བ་ནང་པའི་ཆོས་དང་འགལ།།
ཟས་བཅད་ཤི་བ་རྒྱལ་སྤྱིའི་ཁྲིམས་དང་འགལ།།
ད་ནི་ང་ཚོས་བདེན་པ་ཇི་ལྟར་རྩོད།།

དགའ་ལྡན་ཕོ་བྲང་སྲིད་དབང་ཕྱིར་བསྡུ་བྱས།།
རྒྱལ་བ་ཆེན་པོའི་སྐུ་དབང་འབངས་ཀྱིས་བླངས།།
བཙན་བྱོལ་བོད་གཞུང་མཚན་ཡང་གཞན་ལ་བསྒྱུར།།
གནས་སྟངས་སྐྱུར་མོ་འདི་འདྲ་ཇི་ལྟར་བྱུང་།།

བཙན་བྱོལ་བོད་གཞུང་བོད་མིའི་སྒྲིག་འཛུག་ཆགས།།
དགའ་ལྡན་ཕོ་བྲང་བདེན་པ་ཉིད་ལ་བརྗེས།།
བཀའ་བློན་ཁྲི་བའི་མིང་ཚབ་སྲིད་འཛིན་བྲིས།།
རྒྱལ་དར་རྒྱལ་གླུའི་ཚབ་ལ་ཅི་ཞིག་འཇོག །

རྒྱལ་སྤྱི་སྟེང་ན་སྐུ་ཚབ་དོན་གཅོད་མང་།།
དོན་གཅོད་ཁང་གི་སྒོ་ཆེན་ཇི་ལྟར་འབྱེད།།
བཙན་བྱོལ་གཞུང་ལ་གཞུང་འབྲེལ་ལྷན་ཁང་མང་།།
ལྷན་ཁང་ཁག་གི་མིང་བྱང་ཅི་ཞིག་འབྲི།།

རྒྱ་ནག་བལྟས་ནས་རང་བཙན་མར་ལ་ཕབ།།
རྒྱ་དཀར་བལྟས་ནས་བཅའ་ཁྲིམས་བསྒྱུར་བཅོས་བྱས།།
རྒྱལ་ཁབ་དཀར་ནག་གཉིས་ཀྱི་བར་ཁུག་ནས།།
བོད་མིའི་སེམས་ཀྱི་ཁྲག་དམར་ཇི་ལྟར་བཞུར།།

བོད་མི་མང་པོས་བོད་ནས་རང་སྲོག་གཏོང་།།
གྲོས་ཚོགས་ར་བར་ཁུར་ཚུར་གཡུག་རེས་བྱེད།།
དམར་པོ་གཞུང་ལ་གཏད་དགོས་མེ་ལྕེ་དེ།།
གྲོས་ཚོགས་ནང་ཁུལ་བར་ནས་འབར་དོན་ཅི།།

བཙན་བྱོལ་བོད་གཞུང་མིང་ནི་བརྗེས་དང་ཐལ།།
དགའ་ལྡན་ཕོ་བྲང་མཚན་ཡང་བརྗེས་དང་ཐལ།།
བཅའ་ཁྲིམས་རིན་པོ་ཆེ་ཡང་བརྗེས་དང་ཐལ།།
བོད་མིའི་མིང་ཡང་བརྗེ་བའི་དུས་ལ་བབས།།