བོད་མི་ཁ་ཤས་ཤིག་རྒྱ་གར་མི་སེར་བྱེད་པའི་གོ་སྐབས་རག་པ།

ཡོང་ཁུངས། ཤམ་བྷ་ལའི་ཕོ་ཉ།

ཕྱི་ལོ་༡༩༥༠ ནས་༡༩༨༧ བར་རྒྱ་གར་ནང་སྐྱེས་པའི་བོད་མི་སྐྱབས་བཅོལ་ལག་འཁྱེར་བཟོ་བར་ཐོ་འགོད་བྱེད་མཁན་དག་གནས་སྐབས་འཕར་འགྱངས་བྱེད་དགོས་པ་དང་། ཁོ་ཚོ་རྒྱ་གར་ནས་སྐྱེས་པའི་མི་སེར་ཡིན་པར་ངོས་འཛིན་དགོས་ཞེས་བཀོད་ཁྱབ་གནང་འདུག

འདི་ཟླའི་ཕྱི་ཚེས་ ༡༨ ཉིན། རྒྱ་གར་དུས་བབས་གསར་ཁང་གིས་སྤེལ་བའི་གནས་ཚུལ་ལྟར་ན། ༡༩༥༠ནས་༡༩༨༧བར་རྒྱ་གར་ནང་སྐྱེས་པའི་བཙན་བྱོལ་བོད་མིས་རྒྱ་གར་མི་སེར་ལག་འཁྱེར་ལེན་ཆོག་པ་མ་ཟད། ཕྱི་ལོ་ ༢༠༡༧ ཟླ་ ༣ པ་ནས་བཟུང་། སྲིད་ཇུས་དེ་ལག་བསྟར་གྱིས་གོང་འཁོད་ལོ་བཅད་བྱས་པའི་ནང་གི་བཙན་བྱོལ་བོད་མི་སྐྱབས་བཅོལ་ལག་དེབ་བཟོ་མཁན་རྣམས་གནས་སྐབས་འཕར་འགྱངས་བྱེད་དགོས་པའི་བཀོད་ཁྱབ་ཞིག་ཕྱི་སྲིད་ལྷན་ཁང་ནས་བཏང་ཡོད་འདུག

དེ་ཡང་གསར་འགྱུར་གྱི་ཁ་བྱང་དུ་བོད་མི་སྐྱབས་བཅོལ་བ་རྣམས་ལ་རྒྱ་གར་མི་སེར་ལག་འཁྱེར་རག་རྒྱུ། ཞེས་དང་། མདོ་དོན་དུ། ཕྱི་ལོ་ ༡༩༥༠ ནས་ ༡༩༨༧ བར་ལ་སྐྱེས་པའི་བོད་མི་སྐྱབས་བཅོལ་བ་རྣམས་ལ་གང་མགྱོགས་རྒྱ་གར་མི་སེར་ལག་འཁྱེར་རག་ཐུབ་ཀྱིན་ཡོད་པ་དང་། ལོ་སྔོན་མར་ལྡི་ལི་ས་གནས་ཁྲིམས་ཁང་( Delhi high Court) ཞིག་གིས་བོད་མི་སྐྱབས་བཅོལ་བ་རྣམས་ལ་རྒྱ་གར་མི་སེར་སྐོར་གྱི་དྲི་བ་ཞིག་རྒྱ་གར་ཕྱི་སྲིད་ལྷན་ཁང་ལ་བཏང་བར་དེ་ག་ནས་ངོས་བཞེས་གནང་སྟེ། ཕྱི་ལོ་ ༢༠༡༦ ཟླ་ ༩ པའི་ནང་། རྒྱ་གར་གཞུང་གི་ཁྲིམས་དཔོན་སེན་ཇེབ་སཱཆ་དྷེ་ཝ་ Sanjeev Sachdeva ལགས་སུ། རྒྱ་གར་ནས་སྐྱེས་པའི་བོད་མི་སྐྱབས་བཅོལ་བ་རྣམས་རྒྱ་གར་གྱི་མི་སེར་རྩ་འཛིན་ཁྲིམས་ཡིག་འོག རྒྱ་གར་གྱི་མི་སེར་ཡིན་མིན་ཐད་རྩོད་པ་མེད་ཟེར་བ་དེ་ངོས་བཞེས་གནང་བ་ཡིན་པའི་བརྡ་ལན་ཞིག་ཕྱི་སྲིད་ལྷན་ཁང་ནས་ཕུལ་ཞིང་། ཕྱི་ལོ་ ༢༠༡༧ ཟླ་ ༣ པ་ནས་སྲིད་ཇུས་འདི་ལག་བསྟར་བྱས་ཡོད་པ་དང་། འདིས་རྒྱ་གར་ནང་སྐྱབས་བཅོལ་འོག་སྡོད་ཀྱིན་པའི་བོད་མི་མང་པོ་ཞིག་ལ་ཁེ་ཕན་བསྐྲུན་ཐུབ་པའི་རེ་བ་བྱེད་ཀྱིན་ཡོད། ཅེས་དང་།

གཞན་ཡང་། ཕྱི་སྲིད་ལྷན་ཁང་ནས་རྒྱ་གར་ནང་གི་ཕྱི་སྐྱོད་ལག་འཁྱེར་ལས་ཁུངས་ཁག་ལ་ཕྱི་ལོ་༡༩༥༠ ཟླ་ ༡ ཚེས་ ༢༦ ནས་ཕྱི་ལོ་ ༡༩༨༧ ཟླ་ ༧ ཚེས་ ༡ བར་ལ་རྒྱ་གར་ནང་སྐྱེས་པའི་བོད་མི་སྐྱབས་བཅོལ་ལག་འཁྱེར་བཟོ་བར་ཐོ་འགོད་བྱེད་མཁན་དག་གནས་སྐབས་འཕར་འགྱངས་བྱེད་དགོས་པ་དང་། ཁོ་ཚོ་རྒྱ་གར་ནས་སྐྱེས་པའི་མི་སེར་ཡིན་པར་ངོས་འཛིན་དགོས་ཞེས་བཀོད་ཁྱབ་གནང་བ། ཞེས་འཁོད་འདུག

གོང་འཁོད་རྒྱ་གར་མི་སེར་ལག་ཁྱེར་དང་འབྲེལ། བཙན་བྱོལ་བོད་གཞུང་གི་བཅའ་ཁྲིམས་ཀྱི་ལེའུ་དང་པོའི་དོན་ཚན་བརྒྱད་པའི་བོད་ཀྱི་ཡུལ་མི་ཞེས་པའི་ཚན་པ་གཉིས་པའི་ནང་དུ། “བཙན་བྱོལ་བོད་མི་སུ་ཞིག་འཕྲལ་རྐྱེན་དབང་གིས་རྒྱལ་ཁབ་གཞན་གྱི་ཡུལ་མི་མ་བྱེད་ཐབས་མེད་བྱུང་རིགས་ཀྱང་བཅའ་ཁྲིམས་འདིའི་དོན་ཚན་བཅུ་གསུམ་པ་ནང་གསལ་གྱི་འཁུར་འགན་ཁག་འགལ་མེད་བསྒྲུབས་ཕྱིན་བོད་ཀྱི་ཡུལ་མིའི་རང་བཞིན་འདོར་མི་དགོས།” ཞེས་འཁོད་འདུག

དེ་མིན་རྒྱ་གར་མི་སེར་གྱི་ཁྲིམས་ཡིག་ཅེས་པའི་ནང་དུ། ཕྱི་ལོ་༡༩༥༠ ཟླ་ ༡ ཚེས་ ༢༦ ནས་ཕྱི་ལོ་ ༡༩༨༧ ཟླ་ ༧ ཚེས་ ༡ བར་ལ་རྒྱ་གར་ནང་སྐྱེས་པའི་བཙན་བྱོལ་བོད་མིས་རྒྱ་གར་མི་སེར་ལག་ཁྱེར་བཟོ་ཆོག་པ་དང་། ༡༩༨༧ཟླ་༠༧ཚེས་༠༡ནས་བཟུང་སྲིད་ཇུས་དེར་འགྱུར་བ་ཐེབས་ཤིང་། ཕ་མ་གཉིས་གང་རུང་རྒྱ་གར་གྱི་མི་སེར་མིན་དུས་རྒྱ་གར་ནང་སྐྱེས་པའི་ཕྲུ་གུ་ལ་མི་སེར་ལག་ཁྱེར་ཐོབ་ཐུབ་མེད་པར་འཁོད་པ་སོགས་བཅས།།

• གསར་འགོད་པ་ཆོས་ཉིད།