བོད་བརྒྱུད་ནང་བསྟན་ཆོས་ལུགས་དབུ་འཁྲིད་རྣམས་ལ།

བསྟན་པའི་རྒྱལ་མཚན་ནས།
 
དེང་འཛམ་གླིང་ནང་དུ་བོད་བརྒྱུད་ནང་བསྟན་འདི་བཞིན་བསྟན་པ་མདོ་སྔགས་ཟུང་འབྲེལ་ཆ་ཚང་ཞིང་སྤུས་དག་ཡིན་པ་བློ་སྤོབས་བྱེད་བཞིན་པ་གང་ལེགས་ལ། འོན་ཀྱང་བོད་བརྒྱུད་ནང་བསྟན་ནང་གི་འགོ་ཆོས་བརྒྱུད་ཀྱི་དབུ་འཁྲིད་རྣམས་ནས་བླ་སྤྲུལ་མཁན་པོ་དགེ་བཤེས་གྲྭ་བཙུན་སྔགས་པ་སོགས་མང་པོ་ཡོད་པ་ཚང་མ་ལ་སྤྱི་དང་སྒེར་གྱི་འགན་ཆེན་པོ་ཡོད་པར་བརྟེན་དུས་རབས་ཉེར་གཅིག་པ་དང་མཚུངས་པའི་ནང་པ་ཡིན་རྒྱུ་གལ་ཆེ་བར་སོང་གཤམ་གྱི་འབོད་བསྐུལ་དོན་གནད་རྣམས་ལ་དགོངས་པ་རྒྱ་ཆེན་པོ་བཞེས་རོགས་ཞུ།

༼དང་པོ་༽ བླ་མའི་ཡང་སྲིད་ངོས་འཛིན་བྱེད་ལུགས་འདི་བཞིན་རིང་མིན་མཚམས་འཇོག་བྱས་ན་མ་གཏོགས་རྨོངས་དད་ཁོ་ནའི་དབང་གིས་ཡང་སྲིད་ངོས་འཛིན་བྱེད་ལུགས་འདི་ལས་རྙོག་གླེང་ཤ་སྟག་མ་གཏོགས་མེད་པ་ཉམས་མྱོང་མངོན་སུམ་གྱི་གྲུབ་པར་སོང་རིང་མིན་དམར་ཤོག་དབང་འཛིན་པས་བཀོད་པའི་སྐུ་ཕྲེང་བཅོ་ལྔ་པ་གཏན་འཁེལ་ཉེན་རེད།

༼གཉིས་པ་༽ བོད་བརྒྱུད་ནང་བསྟན་འགོ་དམངས་ཡོངས་ནས་དམར་ཟས་ལ་དམ་སྒྲགས་ནན་པོ་བྱས་ནས་དཀར་ཟས་ལ་ཕྱོགས་དགོས་ཐུབ་ན་མ་གཏོགས་ཁ་ནས་གཞན་ཕན་དང་ཡ་རབས་བཟང་སྤྱོད་ཟེར་བཞིན་དོན་དུ་ཤ་ཟ་རྒྱུ་དང་ཁྲག་འཐུང་རྒྱུའི་མཚོན་པའི་སྲོག་གཅོད་མ་སྤངས་པར་འཚེ་མེད་ཞི་བའི་ལམ་ལ་བསྐྱོད་རྒྱུ་ཁ་ཞེ་མི་མཚུངས་པར་སོང་མི་རིགས་མང་པོ་ཞིག་ནས་བོད་པའི་བླ་མ་གྲྭ་བཙུན་ཚོས་ཤ་ཟ་སྟངས་ལ་མཐོང་ཚུལ་སྡུག་ཆག་ཡོད་པ་ཆོས་ཉིད་རེད།

༼གསུམ་པ་༽ སྤྱིར་དགོན་པའི་ནང་ལ་གྲྭ་པ་མང་ན་ཡག་པོ་ཡིན་ཚུལ་ཡོད་ནའང་ཡར་རྩེ་རྣམ་རྒྱལ་གྲྭ་ཚང་དང་གདན་ས་སེ་འབྲས་དགེ་གསུམ་ནས་མར་དགོན་པ་ཆུང་ཆུང་ནང་གི་གྲྭ་པ་ཚོ་བགྲེས་སོང་ཁ་ཤས་མཏོགས་ཕལ་ཆེ་བ་བུ་དང་བུ་མཉམ་པོ་དགའ་བོ་བྱས་ནས་ཉལ་པོ་བྱེད་བསྡད་མཁན་མང་པོ་ཡོད་པ་ཙམ་མ་ཡིན་པར་དགེ་བཤེས་ཕལ་ཆེ་བར་མགྲོན་པོ་རེ་ཉར་སྲོལ་ཡོད་པ་མང་ཚོགས་ནང་མང་པོ་ཞིག་གིས་ཤེས་ནའང་མགོ་རུལ་རྣ་བས་མི་འཚོར་བའི་དཔེ་ལྟར་སྲོལ་ངན་རྒྱུན་འཇགས་ལ་ཕྱིན་ནས་འདི་མུར་བཞག་མི་རུང་། འདི་བཞིན་རང་ཚང་སྐྱོན་ཅན་འདི་འདྲ་ཡོ་བསྲང་མ་བྱས་པ་ལ་བརྟེན་ནས་བླ་མ་སྤྲུལ་སྐུ་གྲྭ་པ་ཁ་ཤས་ནས་ཕྱི་རྒྱལ་བ་དང་རྒྱ་མོ་ལ་བཙན་གཡེམ་བྱས་པའི་ལོ་རྒྱུས་ཚགས་ཤོག་ནང་འགྲེམ་སྤེལ་བྱེད་དང་བྱེད་བཞིན་པའི་གནས་ཚུལ་འདིའི་རྩ་བ་དགོན་པའི་ནང་འདུལ་ཁྲིམས་ཡག་པོ་མེད་ནས་བྱུང་བ་རེད།

༼བཞི་པ་༽ དགོན་པའི་ནང་གི་བླ་མ་སྤྲུལ་སྐུ་མང་པོ་ཞིག་ལ་གསང་ཡུམ་མམ་ཆུང་མའམ་ཟུར་མོ་དེ་འདྲ་ཉར་ནས་དོན་ལ་རྟེན་སྔགས་འཆང་ཡིན་ནའང་མིན་མདོག་མདོག་གིས་སྐྲ་དང་ཁ་སྤུ་བྲེགས་ནས་ཆོས་གོས་རྣམས་གསུམ་འཛེམ་བག་མེད་པར་གྱོན་ནས་ཁྲི་ཆེན་པོའི་སྟེང་དུ་བསྡད་མཁན་མང་བས་འོག་གི་གྲྭ་པ་དཀྱུས་མ་ཚོའང་སྔ་ཕྱི་དང་ཕྱི་ནང་གི་ཁྱད་པར་མ་གཏོགས་དེ་འདྲ་མང་པོ་ཡོད་པ་འདི་ནི་བསྟན་པ་ལ་རྨ་འབྱིན་པའི་རྒྱུ་རྐྱེན་གཙོ་བོ་དེ་རེད།

༼ལྔ་པ་༽ དགོན་པ་ཚོའི་ནང་གཞུང་ཆེན་ཁ་ཤས་ཀྱི་རྩ་བ་བློ་འཛིན་དང་གྲྭ་ས་སོ་སོའི་དཔེ་ཆ་ཁ་ཤས་ངོ་ཤེས་ཙམ་མ་གཏོགས་གཞི་གསུམ་གྱི་ཉམས་ལེན་ཉུང་ཞིང་ཕལ་ཆེ་བ་ཕྱོགས་བསྐྱོད་ཁོ་ན་ལ་གཡེང་ནས་སྒོམ་ཉམས་ལེན་སློབ་མཁན་མེད་པས་དོ་སྣང་བྱེད་མཁན་ཉུང་བས་དེང་སང་དགོན་པའི་ནང་ཆོས་ངོ་སྤྲོད་ཆེད་དུ་ཐུབ་བསྟན་སྦྱིན་པའམ་མགོ་སེར་མཁས་དབང་སྐད་བཏང་དགོས་པ་མཐོང་ཆོས་རེད།

༼དྲུག་པ་༽ དེའང་སྔོན་བོད་དུ་བོན་དང་བན་དེ་འུ་ཐུག་དུས་ལྷ་དང་བཙན་གསོལ་བྱས་ནས་བསྟན་སྲུང་ཡིན་ཁུལ་གྱིས་གནས་ཆུང་དང་བརྟན་མ་བརྟེན་དགོས་པའི་ལུགས་སྲོལ་འདི་བཞིན་ད་ཆ་དེང་རབས་ནང་པའི་མཁས་དབང་རྣམས་མཚན་རིག་མཉམ་བགྲོ་གླེང་བྱེད་བཞིན་དུ་འདི་འདྲ་ལས་ལུང་བརྟན་ཞུ་རྒྱུ་འདི་མཚམས་འཇོག་བྱེད་དགོས་པ་མངོན་སུམ་རེད།

འདི་རྣམས་རང་ཉིད་བོད་རིགས་ཤིག་ཡིན་པའི་དབང་གིས་ཞུས་པ་ལས་གཞན་ཕྱི་མི་མང་པོས་མཐོང་ཚུལ་འདི་འདྲ་མང་པོ་ཡོད་རེད། ཁོང་ཚོ་ངེད་ཚོར་གྲོགས་པོ་ཡིན་པས་མ་ལབ་པ་ཙམ་ལས་གོང་གི་གནད་དོན་འདི་རྣམས་བོད་བརྒྱུད་ནང་བསྟན་དབུ་འཁྲིད་ཚོས་དགོངས་པ་ནན་པོ་བཞེས་ནས་ལེགས་བཅོས་དང་བཅོས་བསྒྱུར་གནང་ཐུབ་ན་དགེ་བར་མཐོང་བས་ལྷག་བསམ་གྱིས་འཇར་མི་ནིར་གནས་བསྡོད་གུས་བསྟན་པའི་རྒྱལ་མཚན་ནས་བྲིས་ཏེ་ཕུལ་ན་ལགས།