བོད་ཀྱི་དགེ་འདུན་པས་ཐེ་ཝན་ལ་སེམས་འགུལ་ཐེབས་བཅུག་པ།

ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཡིག་ཚང་།

 
ཐའེ་ཝན་ནི་ཆ་རྐྱེན་བཟང་ཞིང་། མིའི་སྤུས་ཀ་ལེགས་པོ་ཡོད་ན་ཡང་། ཕྱོགས་གཅིག་ནས་རང་བྱུང་གི་གནོད་འཚེ་དང་མིས་བཟོས་དོན་རྐྱེན་མང་པོ་འབྱུང་ཡུལ་ཞིག་ཡིན། ཐའེ་ཝན་དུ་ནང་པའི་ཆོས་ལུགས་ཁྱབ་ཆེན་པོ་ཡོད་ཅིང་། བོད་བརྒྱུད་ནང་བསྟན་གྱི་རྗེས་འཇུག་ཀྱང་མི་ཉུང་བ་ཞིག་ཡོད།
དེ་ཡང་ཐའེ་ཝན་དུ་ཡོད་པའི་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་རྟག་པར་ས་ཆ་དེར་རང་བྱུང་དང་མིས་བཟོས་ཀྱི་གོད་ཆག་གང་བྱུང་ཡང་། མ་བསྐུལ་དང་བླངས་ཀྱིས་འཛོམས་ཏེ་གསོལ་འདེབས་སྨོན་ལམ་བྱེད་པ་དང་། ཆེ་ཆུང་ལ་མ་ལྟོས་པར་དངོས་པོའི་རོགས་སྐྱོར་དང་འཚམས་འདྲི་སོགས་དུས་ཐོག་གནང་བཞིན་ཡོད་ལ། གསར་འགྱུར་བརྒྱུད་ལམ་དང་མི་མང་གིས་བསྔགས་བརྗོད་ཀྱང་ཐེངས་མང་ཐོབ་མྱོང་།

སྤྱི་ལོ་༢༠༡༦ ཟླ་བ་༣ཚེས་༢༨ ཉིན་རྒྱལ་ས་ཐའེ་པེའི་མངའ་ཁུལ་དུ་གཏོགས་པའི་ནེའི་ཧུའུ་（內湖）ཞེས་པའི་ས་ཁུལ་གྱི་ས་འོག་མེ་འཁོར་གྱི་འབབ་ཚུགས་ཤིག་ནས་བུད་མེད་ཅིག་གིས་རང་གི་ཕྲུ་གུ་བུ་མོ་ལོ་བཞི་ཅན་ཞིག་ཁྲིད་ནས་ཕྱིར་ཐོན་བཞིན་ལམ་འགྲམ་དུ་སླེབས་པའི་སྐབས་དེར་། འགྲམ་ནས་ངོ་མི་ཤེས་པའི་སྐྱེས་པ་ལོ་ན་སུམ་ཅུ་ལྷག་ཡིན་པ་ལག་ཏུ་ཚལ་གྲི་ཆེན་པོ་བཟུང་མཁན་ཞིག་གིས་བསམ་བཞིན་དུ་བུ་མོ་ཨ་མའི་ལག་ནས་འཕྲོག་སྟེ་ཡ་ང་བག་ཚ་མེད་པར་ཐད་ཀར་ཚལ་གྲིས་སྣུན་པར་མ་ཟད། བུ་མོ་ཆུང་ཆུང་གི་མགོ་དང་ལུས་པོ་སོ་སོར་ཕྲལ་ནས་ས་གནས་དེ་གར་བཀྲོངས།

ཧ་ཅང་ཡིད་སྐྱོ་བའི་གནས་ཚུལ་དེས་ཐའེ་ཝན་རྒྱལ་ཡོངས་ལ་ཁོང་ཁྲོ་དང་སྐྱོ་སྣང་ཆེན་པོ་བསླངས། གསོད་མཁན་ལག་དམར་གྱི་ཐོག་ཏུ་མི་མང་ཁོང་ཁྲོ་ཆེན་པོ་བྱེད་པ་དང་། ཕྲུ་གུ་ཆུང་ཆུང་དེར་གདུང་སེམས་མཉམ་བསྐྱེད་བྱེད་མཁན་མང་པོ་ཐོན་ཞིང་། ཐའེ་ཝན་ཧྲིལ་པོའི་ཐུན་མོང་གི་སེམས་སྡུག་ཆེན་ཤོས་ལྟ་བུ་ཞིག་ཏུ་ཆགས།
ཁར་རྩང་། ཞིབ་འཇུག་ཚོགས་པས་གོ་སྒྲིག་གནང་ནས་ཐའེ་པེ་རུ་འཚོགས་བཞིན་པའི་ཐའེ་ཝན་བོད་བརྒྱུད་ནང་བསྟན་དར་སྤེལ་བགྲོ་གླེང་ཐེངས་དྲུག་པ༼ཕྱོགས་ཡོངས་ཀྱི་དགོངས་འཆར་བསྡུ་ལེན༽ཞེས་པའི་བགྲོ་གླེང་ཚོགས་འདུ་མཇུག་གྲུབ་པ་དང་། ཞིབ་འཇུག་ཚོགས་པས་སྣེ་ཁྲིད་དེ་བོད་བརྒྱུད་རིས་མེད་དགེ་འདུན་པ་སུམ་ཅུ་ཙམ་ཞིག་ཡུལ་ངོས་རང་དུ་བསྔོ་སྨོན་གསུངས་སར་ཆེད་ཕེབས་གནང་བར་ཐའེ་ཝན་གྱི་བརྒྱུད་ལམ་ཆེན་པོ་ཁག་དང་མི་སྒེར་གཉིས་ཆར་གྱིས་སེམས་འགུལ་ཆེན་པོས་བསྟོད་བསྔགས་གནང་འདུག

དེ་ཡང་ཐའེ་ཝན་གྱི་ཚགས་པར་ཆེ་ཤོས་ཨང་དང་པོ་ཀུ་ཤུ་ཉིན་རེའི་ཚགས་པར་（蘋果日報）གྱི་དྲ་ངོས་སུ།
http://www.appledaily.com.tw/realtimenews/article/local/20160330/828361/30仁波切誦經文%E3%80%80齊為小燈泡超渡
མགོ་བརྗོད་དུ།
རིན་པོ་ཆེ་སུམ་ཅུས་གྲལ་འགྲིག་པོས་འདོན་པ་འདོན་བཞིན་སྒྲོན་ཏོག་ཆུང་ཆུང་（小燈泡བུ་མོ་ཆུང་ཆུང་དེའི་གཅེས་མིང）ལ་གནས་འདྲེན་བྱེད་པ། ཞེས་བྲིས་པའི་སྐབས་དོན་གསལ་འགྱུར་སྙིང་བསྡུས་སུ་བསྒྱུར་ན།

སྒྲོན་ཏོག་ཆུང་ཆུང་ལ་གནོད་འཚེ་ཕོག་ནས་ཉིན་གསུམ་པ་སྟེ། མི་མང་རང་འགུལ་གྱིས་ས་ཁུལ་རང་དུ་ཡོང་ནས་རྔན་པ་དང་རྩེད་ཆས་འདྲ་མིན་ས་གནས་དེར་བཞག་ནས་མྱ་ངན་ཞུ་བཞིན་ཡོད། ཕྱི་དྲོ་ཆུ་ཚོད་ལྔ་བར་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་སྣེ་ཁྲིད་པའི། རྙིང་མ། དགེ་ལུགས། བཀའ་བརྒྱུད། ས་སྐྱ་བཅས་འདུས་པའི་དགེ་འདུན་པ་སུམ་ཅུ་ལྷག་ཅིག་ཡུལ་ངོས་སུ་བསླེབས་ཤིང་། ཕྱག་ཏུ་སྒྲོན་མེ་ཐོགས་ཀྱིན་བཟང་སྤྱོད་སྨོན་ལམ་དང་བདེ་བ་ཅན་གྱི་སྨོན་ལམ་བཏོན་ཏེ་སྒྲོན་ཏོག་ཆུང་ཆུང་གི་ཆེད་དུ་བསྔོ་སྨོན་གནང་སྟེ་ཁོང་མོ་བདེ་བ་ཅན་དུ་སྐྱེ་བའི་སྨོན་ལམ་བཏབ།
རིན་པོ་ཆེ་རྣམ་པའི་ཕྱག་ཏུ་གློག་མཆོད་བསྣམས་བཞིན་ཞལ་འདོན་གནང་མགོ་ཚུགས་ཤིང་། ཉེ་འཁོར་གྱི་མི་མང་དག་ཀྱང་གཅིག་རྗེས་གཉིས་མཐུད་དུ་མཆོད་མེ་བླངས་ནས་མཉམ་ཞུགས་བྱས། ཚང་མས་བློ་གཅིག་སེམས་གཅིག་གིས་སྒྲོན་ཏོག་ཆུང་ཆུང་གི་ལམ་ལ་བར་ཆད་མེད་པར་དག་ཞིང་གི་བདེ་སྐྱིད་ལྡན་པའི་ལྷ་ཕྲུག་ཅིག་ཡོང་བའི་སྨོན་ལམ་བཏབ།
ཞལ་འདོན་ཚར་བ་དང་། རིན་པོ་ཆེ་རྣམ་པས་མེ་ཏོག་དང་མཆོད་མེ་དག་རེ་རེ་བྱས་ནས་དེ་ཀར་བཞག་གནང་མཛད། ཡུལ་ངོས་ནི་ཧ་ཅང་བརྗིད་ཆགས་ལ་དང་བ་འདྲེན་པ་ཞིག་རེད།
ཅེས་བྲིས་ཡོད་པར་མ་ཟད། དྲ་མཆན་འགོད་མཁན་ཞིག་གིས་གསར་འགྱུར་དེའི་འོག་ཏུ།
ཧ་ཅང་སེམས་འགུལ་ཐེབས་བྱུང་། ཐའེ་ཝན་གྱི་ཞིབ་འཇུག་ཚོགས་པའི་མཁན་སྤྲུལ་དགེ་བཤེས་འདི་དག་འདི་ལྟར་ཐའེ་ཝན་གྱི་སྤྱི་ཚོགས་ཀྱི་གཏིང་རིམ་དུ་ཞུགས་ཏེ། ཐའེ་ཝན་མི་མང་ལ་བརྩེ་བ་བཅངས་ཤིང་འདུག
ནམ་རྒྱུན་རྟག་པར་གང་དུ་གནོད་འཚེ་ཕོག་པ་དང་། གང་དུ་སྡུག་བསྔལ་ཡོད་པ་དེར་ངས་འདི་ལྟར་གུས་པར་འོས་པའི་ནབ་གཟན་དམར་པོ་ཅན་གྱི་དགེ་འདུན་པ་ཁྱེད་ཅག་གི་ཐུགས་བརྩེ་དང་བསྔོ་སྨོན། འབད་བརྩོན་དང་བློས་བཏོང་བཅས་མཇལ་བྱུང་། ཐའེ་ཝན་གྱི་བུ་བུ་མོ་དག་གིས་ཁྱེད་ཚོར་ཐུགས་རྗེ་ཆེ་ཞུ། རྗེས་སུ་ཡི་རངས་ཡོད། ཅེས་དང་།

ཡང་དྲྭ་འབངས་གཞན་ཞིག་གིས།
རང་ཉིད་ཡེ་ཤུའི་ཆོས་ལུགས་རྙིང་པའི་རྗེས་འཇུག་པ་ཞིག་གིས་དགེ་འདུན་པ་འདི་དག་མཐོང་བ་དང་མིག་ལ་ཧ་ཅང་བདེ་བ་བྱུང་བ་དེ་ག་རེ་ཡིན་ནམ། དེ་ལས་ལྡོག་སྟེ། ཚུལ་འཆོས་ཆེ་ཞིང་། སེམས་རྒྱ་དོག་པའི་དམ་བཅའ་ལས་འགལ་བ་བྱེད་མཁན་གྱི་ཐའེ་ཝན་གྱི་ཡེ་ཤུ་བ་དེ་ཚོ་མིག་ལ་འཛེར་བ་ཞིག་རེད། ཅེས་བྲིས་ཡོད།

ཞིབ་འཇུག་ཚོགས་པ་ནི་ཆབ་སྲིད་དང་མ་འབྲེལ་ཞིང་། རིས་མེད་༧སྐྱབས་མགོན་རྣམ་པའི་བཀའ་སློབ་ལམ་སྟོན་བཞིན་ཆོས་དང་རིག་གཞུང་དར་སྤེལ་བྱེད་པའི་ཚོགས་པ་ཞིག་ཡིན། ཚོགས་པ་འདིའི་དམིགས་ཡུལ་གཙོ་བོ་ནི་ཐའེ་ཝན་གཙོ་བོར་གྱུར་པའི་རྒྱ་རིགས་ཀྱི་སྤྱི་ཚོགས་སུ་བོད་བརྒྱུད་ནང་བསྟན་ལ་ཡང་དག་པའི་ངོས་ཟིན་ཐོབ་ཏུ་འཇུག་རྒྱུ་དང་། ནང་བསྟན་དང་སྤྱི་ཚོགས་ཀྱི་བཟང་ཕྱོགས་ཀྱི་འབྲེལ་བ་དམ་དུ་བཏང་སྟེ་དེ་ལས་མང་པའི་སྤྱི་ཚོགས་ཀྱི་མི་སྣས་ནང་ཆོས་ལ་ངེས་ཤེས་དང་ཡིད་ཆེས་རྙེད་པ་བྱ་རྒྱུ་དེ་རེད།

ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཡིག་ཚང་ནས།

ཞིབ་འཇུག་ཚོགས་པའི་དྲ་རྒྱ།
http://www.buddhajnana.org

ངོ་དེབ།
https://www.facebook.com/itbsi

ཞིབ་ཚོགས་དྲྭ་རྒྱའི་བརྙན་འཕྲིན་གྱི་ངོ་དེབ།
https://www.facebook.com/TTBtv心動新媒體-537255982960645/