བོད་ཀྱི་རྒྱན་ཆ་རིག་གནས་ལ་བདག་གཅེས་བྱོས།

དྲ་འདྲེ།

མི་ལོ་བརྒྱ་ཕྲག་མང་པོ་རིང་གི་ལོ་རྒྱུས་ཀྱི་སྐས་རིམ་བརྒྱུད་དེ་བོད་པའི་སེམས་ཁམས་ལ་རྐང་ཚུགས་པ་དང་རང་རྐྱ་འཕེར་བ་ཞིག་གྲུབ་ཡོད་པའི་ཕུལ་བྱུང་རྒྱན་ཆའི་རིག་གནས་ཀྱི་རིན་ཐང་། མི་རིགས་ཀྱི་མཛེས་ཆོས་ལྟ་བ། ཡུལ་གོམས་གཤིས་ལུགས་ཀྱི་ཐུན་མོང་མ་ཡིན་པའི་ཁྱད་ཆོས་སོགས་ལ་དྲང་བདེན་གྱིས་ལྟ་བའི་མིག་ཟུང་ལྡོངས་ཤིང་གཞན་ལྟ་མཆོག་འཛིན་གྱི་བསམ་བློ་ཡན་གར་བ་རེ་ཁྱེར་ཏེ། དེང་རབས་ཅན་དུ་འབོད་པའི་གཅེར་གཟུགས་མཛེས་ཆོས་ཀྱི་གད་སྙིགས་རིག་གནས་རིན་ཐང་སྒུམ་པའི་གཡམ་རྒྱུག་པ་ཁ་ཅིག་གིས། གང་དྲན་བྱུང་རྒྱལ་དུ་སྨྲ་བའི་གཏམ་ལ་རྒྱུ་མཚན་སྣ་གཅིག་མ་མཐོང་།

ཉིན་ཤས་སྔོན་བདག་གིས་བྲིས་པའི་བོད་ཀྱི་སྲོལ་རྒྱུན་རྒྱན་ཆའི་རིག་གནས་འདོར་མི་རུང་བའི་རྩོམ་ཡིག་སྐོར་ལ་བསམ་ཚུལ་མི་མཐུན་པ་བརྗོད་མཁན་མང་པོ་ཞིག་བྱུང་ཞིང་། མདོར་བསྡུས་ནས་བཤད་ན། ད་ལྟ་བོད་རིགས་རྣམས་ཀྱི་ལུས་ལ་འདོགས་པའི་རྒྱན་ཆ་མང་དྲག་པའི་སྐྱོན་དང་། གསེར་དངུལ་གཟུ་བྱུར་གྱི་རྒྱན་ཆའི་རིན་གོང་དེ་ཤེས་ཡོན་སློབ་གསོའི་ཕྱོགས་སུ་བཀོལ་དགོས་པའི་བསམ་ཚུལ་རྣམས་ཡིན། ད་དུང་ཁ་ཅིག་གིས་རྒྱན་ཆ་འདོགས་སྲོལ་འདི་རིག་གཞུང་མིན་པའི་སྒྲུབ་བྱེད་དུ་གླང་གོག་རྭ་དེ་གླང་གོག་གི་རིག་གཞུང་ཡིན་དགོས་ཟེར་བ་ལྟ་བུའི་གྲྭ་སའི་རིགས་འགྲོས་ལམ་ནས་དཔེ་མཚོན་བཀོད་པའང་མཐོང་།

དང་པོ། སྤྱིར་སྲོལ་རྒྱུན་ཞེས་པ་ནི་མི་རིགས་ཤིག་གི་ལོ་རྒྱུས་ཀྱིས་བསྐྲུན་པའི་ཐུན་མོང་མ་ཡིན་པའི་རིག་གནས་ཞིག་ཡིན་ཕྱིར། འདི་ལ་མང་ཉུང་དང་ཆེ་ཆུང་། ཡང་ལྕི། དཀར་ནག་སོགས་ཀྱི་ཁྱད་པ་མེད་པར་མི་རིགས་དེའི་མཛེས་ཆོས་ཀྱི་དགའ་ཕྱོགས་དང་བསྟུན་ནས་དར་བ་ཞིག་ཡིན། བོད་མི་དག་གི་ལུས་ལ་འདོགས་པའི་རྒྱན་ཆ་མང་དྲག་པའི་སྐྱོན་དུ་བཤད་པ་ནི་བོད་ཀྱི་སྲོལ་རྒྱུན་རིག་གནས་ཀྱི་མཛེས་ཆོས་ལྟ་བའི་སེམས་ཁམས་ལ་རྒྱུན་ལོན་མེད་པའམ། ཡང་ན་མི་རིགས་ཀྱི་སྲོལ་རྒྱུན་རིག་གནས་ཀྱི་རྩ་བའི་ཁྱད་ཆོས་དང་དེའི་དགེ་མཚན་མ་ཤེས་པས་ཡིན་གྱི། བོད་པའི་དམངས་ཁྲོད་ཀྱི་མཛེས་ཆོས་ལྟ་བ་ལ་རྒྱུས་མངའ་ཡོད་མཁན་ཞིག་གི་སྐད་ཆ་མ་ཡིན། དེ་ཡང་གསེར་དངུལ་གཟུ་བྱུར་གྱི་རྒྱན་ཆ་མང་པོ་དང་ཆེན་པོ། ཉུང་ངུ་དང་ཆུང་ཆུང་འདོགས་པ་ནི་སྤྱི་ཚོགས་དང་མི་སྒེར་དེའི་དཔལ་འབྱོར་གྱི་གནས་བབ་དང་། ཁོར་ཡུག་གི་འགྱུར་ལྡོག་སོགས་ལ་གཞིགས་ཏེ་ཐག་ཆོད་པ་ལས། མཐའ་གཅིག་ཏུ་མང་ཉུང་དང་ཡང་ལྕི། ཁ་དོག་སོགས་ཀྱི་གཏན་འབེབས་ཡོད་པའི་སྲོལ་རྒྱུན་རིག་གནས་ཤིག་འཛམ་བུ་གླིང་འདིའི་སྟེང་གི་མི་རིགས་དཀར་ནག་སུ་ལའང་ཨེ་ཡོད་ན།

གཉིས། མི་རིགས་སུ་ཞིག་ལ་མཚོན་ནའང་ཤེས་ཡོན་དང་སློབ་གསོ་ནི་ཅི་ལས་ཀྱང་གལ་ཆེ་ཞིང་དེའི་ཆེད་དུ་འགྲོ་གྲོན་ག་ཚོད་དགོས་ཀྱང་ནར་གཏོང་བྱེད་དགོས་པ་ནི་རྒྱུ་མཚན་ཡང་དག་གི་གཏམ་ཞིག་རེད། ཡིན་ནའང་སྣ་བཅད་དེ་ཁ་ལ་ལྷན་པ་བརྒྱབ་དགོས་པའི་དཔེ་ལ་ང་ཁྱོན་ནས་མི་འཐད། རང་རེའི་བོད་ཀྱི་ཕུན་སུམ་ཚོགས་པའི་སྲོལ་རྒྱུན་རིག་གནས་ཀྱི་རྒྱན་ཆ་རིན་ཆེན་གསེར་དངུལ་གཡུ་བྱུར་རྣམས་མི་རིགས་གཞན་ལ་བཙོང་སྟེ། དེའི་རིན་གོང་གིས་བོད་མི་རིགས་ཀྱི་ཤེས་ཡོན་དང་སློབ་གསོ་གོང་མཐོར་གཏོང་གི་ཡིན་ཟེར་བ་འདི་དགོད་བྲོ་བའི་གཏམ་ཞིག་རེད། དེའི་རྒྱུ་མཚན་ཡང་ཤེས་ཡོན་དང་སློབ་གསོ་གལ་ཆེ་རུ་མ་རྩིས་པ་རྩར་ནས་མིན་པར། སྤྱིར་རིན་པོ་ཆེ་རུ་འབོད་པའི་གསེར་དངུལ་གཡུ་བྱུར་དེ་དག་གི་རིན་ཐང་ངོ་མ་དེ་མཛེས་ཆོས་ཀྱི་ལྟ་བའམ་སྲོལ་རྒྱུན་རིག་གནས་རང་ངོས་ལ་ཡོད་ཀྱི། ལྕགས་རྡོའི་རང་སྟེང་གི་རྒྱུ་སྤུས་ཁོ་ནར་རིན་ཐང་བརྩིས་པ་ཞིག་ག་ལ་ཡིན།
དེའི་ཕྱིར། རྒྱན་ཆ་འདི་དག་ཚོང་དགོས། ཉུང་དགོས། མཚམས་འཇོག་དགོས་ཟེར་བ་སོགས་ཀྱང་སྲོལ་རྒྱུན་རིག་གནས་ཀྱི་མཛེས་ཆོས་ལྟ་བ་བཙོང་པ་དང་འཕྲི་པའི་དོན་ཁོ་ནར་གོ་བ་ལས། ལྕགས་རྡོའི་རིགས་བཙོང་པ་དང་། ཉུང་འཕྲི། རྩ་མེད། གཞན་ཞིག་གིས་ཚབ་བྱས་ཟེར་བ་ལྟ་བུ་དག་དང་ཐད་ཀར་འབྲེལ་བ་མེད་པ་རིག་པས་དཔྱད་ན་ག་ལེར་གསལ་འོང་། དེ་ལྟར་ནའང་ད་ལྟ་བོད་ལ་དར་བའི་སྲོལ་རྒྱུན་གྱི་རྒྱན་ཆའི་རིག་གནས་འདི་ངེས་པར་དུ་གསོན་པོར་གནས་དགོས་པའི་ངེས་པའང་གཏན་ནས་མེད།

མི་རིགས་སུ་ཞིག་གི་རིག་གནས་གང་ཞིག་ཡིན་ནའང་ཡུལ་དུས་གནས་བབ་དང་བསྟུན་ནས་འགྱུར་ལྡོག་དང་ཡར་རྒྱས། འཐུས་ཚང་བཅས་འགྲོ་བ་ནི་ཆོས་ཉིད་ཅིག་ཡིན་སྟབས། བོད་ཀྱི་སྲོལ་རྒྱུན་དུ་གཏོགས་པའི་རིག་གནས་ཐམས་ཅད་ཀྱང་དེ་བཞིན་མི་རིགས་སྤྱིའི་དུས་སྐབས་ཀྱི་འགྱུར་ལྡོག་དང་བསྟུན་ནས་རང་བཞིན་གྱིས་མདུན་བསྐྱོད་བྱེད་ངེས་པ་ཞིག་ཡིན་པས། བཙན་གྱིས་བསྒྱུར་དགོས་པ་དང་འདོར་དགོས་པའི་རིག་གནས་གསར་བརྗེ་ཡི་ལས་འགུལ་དང་གཏམ་བརྗོད་འདིའི་རིགས་ལ་དོན་སྙིང་གང་ཡང་མེད་པའང་ཀུན་གྱིས་ཤེས་གསལ་ཡིན།

དེ་བཞིན་བོད་ཀྱི་རྒྱན་ཆ་འདོགས་སྲོལ་འདི་སུ་ཞིག་གིས་རིག་གཞུང་རེད་ཅེས་བཤད་པ་ཡིན་གཏན་ནས་མ་ཤེས་མོད། རིག་གནས་ཡིན་པ་ལ་ནི་འགྲེལ་བཤད་རིང་པོ་རྒྱག་དགོས་དོན་མེད་པར། བོད་ཀྱི་སྐད་དུ་རིག་གནས་དང་ཤེས་བྱ་རྣམས་ཀྱི་འཇུག་ཡུལ་ཧ་ལམ་གཅིག་མཚུངས་སུ་སྣང་ཞིང་། ཡོད་པ་ཐམས་ཅད་ཤེས་བྱ་ཡིན་པར་འདོད་པའི་རིགས་ལམ་ཙམ་གཞིགས་ཏེ་བཤད་པ་མིན་ཡང་། མི་རིགས་ཤིག་གི་སྲོལ་རྒྱུན་གྱི་ཆའམ་ཕྱོགས་དེ་རིག་གནས་ཡིན་པ་འཛམ་བུ་གླིང་པ་ཀུན་གྱི་སྐད་དུ་གྲགས་འདུག་པས། ངས་ཀྱང་དེར་ཡིད་ཆེས་ཀྱིས་རིག་གནས་ཞེས་འབོད་པ་ཙམ་ཡིན། གཞན་གླང་གོག་དང་མ་ཧེའི་རྭ་ཅོག་གླང་གོག་དང་མ་ཧེའི་རིག་གཞུང་ཡིན་མིན་གྱི་རིགས་པ་འདོན་ཚུལ་འདི་དང་གང་ཞིག་འབྲེལ་བ་ཡོད་མིན་མ་ཤེས་པས་གླེང་བར་མི་འདོད།།

ཕྱི་ལོ་2008 ཟླ་8 ཚེས་1 ཉིན།