བོད་ཀྱི་རི་དྭགས། (2)བྱ་མ་བྱིའུ། flying squirrel

མི་རྐང་གླིང་བུ།

འདི་ནི་གླང་བྲ་འཕུར་ལྡིང་ཅན་ཞིག་སྟེ། བྲ་བའི་རིགས་སུ་གཏོགས། གཟུགས་པོའི་བོངས་ཚོད་བྱི་བ་ཙམ་དང་། སྤུ་མདོག་རྒྱབ་ཕྱོགས་སུ་ཁམ་ནག་དང༌། མདུན་ངོས་སུ་དཀར་ཤས་ཅན། མིག་ཀོང་ནག་པོ། རྔ་མ་རིང་ལ་སྤུ་མཐུག་པ། རྒྱུན་དུ་རྔ་མ་གྱེན་དུ་བསླངས་ནས་ལུས་ཀྱི་བོངས་ཚོད་དང་མཉམ་ལ་ཁད་པ། གོམ་འགྲོས་ཤིན་ཏུ་མགྱོགས་པ། ཤིང་སྡོང་གི་ཡལ་ག་སོགས་ཀྱི་སྟེང་དུ་ཅི་བདེར་བགྲོད་ཐུབ་པ། ཤིང་འབྲས་དང་འབྲུའི་རིགས་སོགས་སུ་སྤྱོད་པ། རྣམ་རིག་དང་སྤྱང་གྲུང་ཤིན་ཏུ་ཆེ་བས་ཟས་རིགས་འཚོལ་མཁས་པ། རྐུ་མའི་གཡའ་ཅུང་ཟད་ཡོད་པ་ཡིན།

དམིགས་བསལ་གྱི་ཁྱད་ཆོས་ནི། ལུས་ཀྱི་འདབ་བཞིའི་པགས་པ་ལྷུག་པོ་ཡོད་པས་ཤིང་སྡོང་གཡས་གཡོན་གྱི་བར་དང༌། ལུང་འགག་ཅུང་ཆུང་བའི་ཕ་རི་དང་ཚུར་རི་འཕུར་ཐུབ་པ། ཁོ་ཡི་འཕུར་སྟངས་དེ་ནི་འདབ་ཆགས་བྱ་ཡི་འཕུར་སྟངས་དེ་མ་ཡིན་པར་དེང་རབས་དམག་འཐབ་ཀྱི་གནམ་གྲུ་ནས་དམག་མི་གདུགས་མཆོང་བྱེད་པའི་རྣམ་འགྱུར་ལྡན། དེང་རབས་ཀྱི་གདུགས་མཆོང་བྱེད་ཐབས་དེའང་སྲོག་ཆགས་འདི་ཡི་འཕྲུལ་རྩལ་ལས་རྐུ་བཤུ་བྱས་པ་ཡིན་སྲིད། ཆེ་ཞིང་ཡང་བའི་རྔ་མ་འདིས་ཁོ་ཡི་འཕུར་ཐབས་འདི་ལ་རམ་འདེགས་ངེས་ཅན་ཞིག་བྱེད་ཀྱི་མེད་དམ་སྙམ།

གནས་ཡུལ་ནི། བོད་ཁམས་ཚ་བ་རོང་སོགས་བོད་ཀྱི་རོང་ཆེན་རྣམས་སུ་འཚོ་གནས་བྱེད་ལ་འཛམ་གླིང་ཡུལ་གྲུ་གཞན་དུ་འདིའི་རིགས་ཡོད་ཀྱང་ཆེ་ཆུང་དང་སྤུ་མདོག་སོགས་ནི་གོང་གི་བཤད་པ་དེ་དང་མཐུན་པའི་ངེས་པ་མེད།
སྨན་གཞུང་དུ། བྱ་མ་བྱིའུ་རུས་བུ་འབྱིན་རྩ་ནད་སེལ།། ཞེས་སྲོག་ཆགས་འདི་ཡི་ཤ་རུས་བོད་ཀྱི་སྨན་རྫས་སུ་བེད་སྤྱོད་བྱེད་སྲོལ་ཡོད་པས་གནའ་སྔ་མོ་ནས་བོད་པས་དོ་སྣང་བྱུང་ཡོད། འོན་ཀྱང་སྨན་པ་འགའ་ཞིག་གིས་འདི་ཉིད་ཚུལ་བཞིན་དུ་ངོས་མ་ཟིན་ནས་སྲོག་ཆགས་ཕ་ཝང་དང་འཕྲུལ་ནས་ཡོད། དེ་ལ་དེའུ་དམར་དགེ་བཤེས་ནས།
དེང་སང་འདི་ན་བྱ་མ་བྱི་འུ་དང༌།།
ཕ་ཝང་སྐྱི་ལྷེབ་ནོར་བ་མི་འདུག་གམ།། *
ཞེས་སོགས་ཀྱིས་སྐྱོན་སེལ་མཛད། སྔོན་མ་ནས་སྲོག་ཆགས་རིག་པ་བ་དེ་དག་གི་བར་དུ་ནོར་འཕྲུལ་བྱུང་བའི་དབང་གིས་ཕྱིས་སུ་༼བོད་རྒྱ་ཚིག་མཛོད་ཆེན་མོ་༽སོགས་སུ་ནོར་བ་དེ་ཉིད་རྒྱུན་འབྱམས་སུ་སོང་ནས་ཕ་ཝང་དང་འདི་གཉིས་འགྲེལ་བཤད་གཅིག་པ་བྱས་ནས་ནོར་ཡོད་པས་ཆེད་དུ་བཀོད་དོ། །

*ཚིག་རྐང་གཉིས་པོ་འདི་དེའུ་དམར་ཚང་གི་གསུང་ཡིན་ཡང་གཞུང་གང་ཡིན་མ་དྲན་ལ་དག་མིན་ཡང་ཞུ་མི་ཐིག

བྱ་མ་བྱིའུ་འཕུར་བསྐྱོད་ཀྱི་གློག་བརྙན་གཟིགས་འདོད་ན་ཁ་བྱང་འདིར་འདུག
http://www.evtv1.com/player.aspx?itemnum=7855