བོད་ཀྱི་ཡིག་གཟུགས་དུས་ཆེན་གཏན་འཁེལ་བྱུང་འདུག

ཆོས་ཉིད་ཀྱིས་འོས་སྦྱོར་བྱས།

 

༢༠༡༧།༠༥།༠༢ཉིན་སྤེལ། ཟླ་༠༤ཚེས་༣༠ཉིན་བོད་ཀྱི་ཡིག་གཟུགས་དུས་ཆེན་དུ་གཏན་འཁེལ་བྱུང་དོན་ནི། བོད་ཀྱི་ཡི་གེར་དབྱངས་༤དང་གསལ་བྱེད་༣༠ཡོད་པས་ཡིན། ཞེས་བརྗོད་འདུག

འདི་ག་གསར་ཁང་གིས་གནས་ཚུལ་རྒྱུས་ལོན་བྱས་པ་ལྟར་ན། ༢༠༡༧ལོའི་ཟླ༤པའི་ཚེས༡༥ཉིན་ནས་ཚེས༡༦བར་མཚོ་སྔོན་མི་རིགས་སློབ་ཆེན་དུ་རྒྱལ་ཡོངས་བོད་ཀྱི་ཡིག་གཟུགས་བགྲོ་གླེང་ཚོགས་འདུ་སྐབས་དང་པོ་འཚོགས་ཡོད་པ་དང་།  ཚོགས་ཐོག་ནས་ལོ་རེའི་ཟླ་བ༤པའི་ཚེས༣༠ཉིན་དེ་བོད་ཀྱི་ཡིག་གཟུགས་དུས་ཆེན་དུ་གཏན་འཁེལ་བྱས་གནང་བའི་གནས་ཚུལ་ལོན་སོང་།

དེ་ཡང་གོང་ཚེས་ཉིན། ཡིག་གཟུགས་དུས་ཆེན་དུ་གཏན་འཁེལ་བྱེད་དགོས་པའི་རྒྱུ་མཚན་ནི། བོད་ཀྱི་ཡི་གེར་དབྱངས་༤དང་གསལ་བྱེད་༣༠ཡོད་པས་ཡིན་པ་དང་། ༢༠༡༧ལོའི་ཟླ་༤པའི་ཚེས་༡༦ཉིན། ཚོགས་རྟགས་ཤིག་ཀྱང་རྒྱལ་ཡོངས་བོད་ཀྱི་ཡིག་གཟུགས་བགྲོ་གླེང་ཚོགས་འདུ་སྐབས་དང་པོའི་ཐོག་མདོ་དབུས་ཁམས་གསུམ་གྱི་ཆོས་ལུགས་རིས་མེད། སྐྱ་སེར་རིས་མེད་ཀྱི་ཡིག་མཁན་དང་དགེ་སློབ་༡༣༠ལྷག་གིས་དམངས་གཙོའི་ལམ་ནས་དུས་ཆེན་གྱི་མིང་དང་ཟླ་ཚེས་ལ་འོས་ཤོག་འཕངས་པ་ལས༼བོད་ཀྱི་ཡིག་གཟུགས་དུས་ཆེན་༽ཞེས་པའི་མིང་འདོགས་དང་། སྤྱི་ཟླ་༤པའི་ཚེས་༣༠ཉིན་དུས་ཆེན་གྱི་ཉིན་མོར་གཏན་འཁེལ་བྱུང་ཡོད་འདུག

གཞན་ཡང་།  བོད་ཀྱི་ཡིག་གཟུགས་དུས་ཆེན་གྱི་ཚོགས་རྟགས་འགྲེལ་བཤད་རྟགས་བརྒྱད་རིས་ཀྱི་བརྡ་དོན་འགྲེལ་བཤད་བྱས་པ་ལས། ངེད་བོད་ཀྱི་ཡིག་གཟུགས་དུས་ཆེན་རྩོམ་སྒྲིག་ཚན་ཆུང་གིས་ཕུལ་དུ་བྱུང་བའི་ཡིག་རིས་འཆར་བཀོད་པ་ཀླུ་རྒྱལ་དོན་གྲུབ་ལགས་ལ་མངགས་བཅོལ་བྱས་པ་བཞིན། ཁོང་གིས་ཚོགས་རྟགས་འདི་ཆེད་དུ་བཟོས་པ་ཡིན་ལ། བོད་ཀྱི་ཡིག་གཟུགས་དུས་ཆེན་མཐུན་ཚོགས་ཀྱི་ཚོགས་གཙོ་སྟེ་མཁས་དབང་རྡོ་དགོན་གསང་བདག་རྡོ་རྗེ་ལགས་ཀྱིས་༼བོད་ཀྱི་ཡིག་གཟུགས་དུས་ཆེན་༽ཞེས་པའི་དཔེ་ཚུགས་ཡི་གེ་ཕྱག་བསྟར་མའི་བཀའ་དྲིན་བསྐྱངས་པ་ཡིན། ཞེས་དང་།

ཚོགས་རྟགས་ནི་མཚོན་དོན་བཀྲ་ཤིས་གྲངས་ལྡན་གྱིས་མཚོན་པ་ཡིན་པས་དེ་དག་རེ་རེ་ནི།

ཕྱིའི་མུ་ཁྱུད་དཀར་པོས་བོད་ཀྱི་སྣོད་ཀྱི་འཇིག་རྟེན་གངས་རི་ར་བས་བསྐོར་བ་མཚོན།
ནང་གི་རྒྱབ་ལྗོངས་མཐིང་སྔོན་གྱིས་བོད་ཀྱི་བཅུད་ཀྱི་སེམས་ཅན་རྣམས་འཚེ་མེད་ཞི་བདེ་ལ་དགའ་བ་མཚོན།
སྨྱུག་བུམ་ཤོག་གསུམ་གྱིས་བོད་ཀྱི་ཡིག་མཁན་རྣམས་ཀྱི་གཅེས་ནོར་ཆེན་པོ་གསུམ་མཚོན།
བུམ་གཟུགས་སེར་པོས་བོད་ཀྱི་འོད་སྟོང་འབར་བའི་སྲོལ་རྒྱུན་ལྷ་ཆོས་རིག་གནས་དང་དབུས་གཙང་ཆོས་ཀྱི་ཆོལ་ཁ་མཚོན།
ཤོག་བུ་དཀར་པོས་བོད་ཀྱི་མི་ཆོས་རིག་གནས་དང་མདོ་སྟོད་མིའི་ཆོལ་ཁ་མཚོན།
སྨྱུ་གུ་ལི་ཁྲིས་བོད་ཀྱི་དེང་རབས་རིག་གཞུང་དང་མདོ་སྨད་རྟ་ཡི་ཆོ་ཁ་མཚོན།
དེ་གསུམ་རྟེན་འབྱུང་ལྷན་དུ་འདུས་པའི་ཡི་གེ་༼བོད་༽ཅེས་པས་བོད་ཀྱི་མི་རིགས་ཀྱི་ངོ་བོ་དང་མཐུན་ལམ། སྙིང་སྟོབས་བཅས་མཚོན། ཟླུམ་རིས་རིམ་པ་གཉིས་ལྷན་དུ་སྦྱར་བས་ནི་གནས་དེང་ཟུང་དུ་འབྲེལ་བའི་བོད་མིའི་རིག་གཞུང་གི་མ་འོངས་མདུན་ལམ་བཅས་མཚོན་ཡོད་པ་ཡིན་ནོ། །
ཞེས་༼བོད་ཀྱི་ཡིག་གཟུགས་དུས་ཆེན་༽ལས་སྒྲུབ་ཁང་ནས་སྤྱི་ཟླ་༤པའི་ཚེས་༢༥ཉིན་བསྒྲིགས། ཞེས་འགྲེལ་བཤད་ཅིག་ཀྱང་གཏན་འབེབས་གནང་ཡོད་འདུག

དེ་མིན་བོད་ཕྱི་ནང་ཀུན་ན་བོད་ཡིག་ལ་དོ་སྣང་དང་འགན་འཁུར་ཕྲག་ཏུ་བཞེས་མཁན་རྣམས་ཀྱིས་དགའ་བསུའི་མཚམས་རྟགས་དང་། ལྷག་པར་དུ་ད་ལྟའི་དུས་རབས་སུ་སྤྱི་ཚོགས་བརྒྱུད་ལམ་རྒྱུགས་ཆེ་ཤོས་ངོ་དེབ་དང་སྐད་འཕྲིན། འཕྲིན་སྟེགས་སོགས་སུ་ཁྱབ་རྒྱ་ཆེན་པོར་གྱུར་སོང་ལ། ཨ་རིར་ཡོད་པའི་བོད་ཀྱི་ལྭ་རྩེ་དཔེ་མཛོད་ཁང་གི་སྐད་ཚོམས་སུ་དམིགས་གསལ་གྱིས་ཉིན་མོ་དེ་སྲུང་བརྩི་གནང་སོང་བ་སོགས་དཔེར་ན། བོད་ཀྱི་རྩོམ་པ་པོ་སྐྱུ་རའི་རླུང་བུ་ཟེར་བ་ཞིག་གིས་ཉིན་མོ་འདིར་ཆེད་དུ་རྩོམ་ཡིག་བྲིད་པ་གཤམ་གསལ་དུ།

ཡིག་གཟུགས་དུས་ཆེན་ཡོད་པ་དེས་ང་ཚོར་འགན་འཁྲི་གསར་པ་ཞིག་རྙེད་སོང་།

སྤྱིར་ན་འཛམ་གླིང་ཧྲིལ་པོའི་ཐོག་ཡིག་རིགས་དྲུག་ཅུ་ལྷག་རང་ལུགས་སོ་སོའི་སྒྱུ་རྩལ་དང་འབྲི་སྲོལ་གྱི་སྒོ་ནས་ཡིག་གཟུགས་ཀྱང་འདྲ་མིན་རེ་གཏོད་ནས་སྤྱི་ཚོགས་ཡོངས་ལ་སྲི་ཞུའི་ལག་གདང་སྒྲིལ་དང་སྒྲིལ་བཞིན་ཡོད་པ་རེད།

དེའི་ནང་ནས་བོད་རང་གི་ཡིག་རིགས་ལ་མཚོན་ན།  རྩ་བ་ཀ་མད་སུམ་བཅུའི་ཞིང་སར་སྔོན་རྗེས་མིང་གསུམ་གྱི་ཡལ་འདབ་རྒྱས་ནས་མི་རིགས་འདིའི་ཤེས་དཔལ་རིགས་གསུམ་གྱི་ཆུད་ཚད་གོང་ཐོར་གཏོང་དང་གཏོང་མུས་ཡིན་པ་མ་ཟད་ཡིག་རིགས་དེ་དག་ལས་གཟུགས་རིས་ཀྱི་རྣམ་པ་དུ་མ་ཞིག་ཀྱང་འབྲི་སྲོལ་བྱུང་ཡོད་པ་ནི་ཨུ་ཅན་དང་འབྲུག་ཚ།  ཚུགས་ཐུང་།  ཚུགས་རིང་།འཁྱུག་ཡིག་སོགས་རྣམ་གྲངས་ཀྱི་སྤྲོས་པ་མཐའ་ཡས་པ་ཞིག་ལོ་རབས་བརྒྱད་བཅུའི་བར་དར་ཁྱབ་བྱུང་ནས་ད་ལྟའི་བར་མ་ཉམས་གྲ་རྒྱས་སུ་གནས་ཡོད་པ་ནི་ཀུན་གྱི་མཐོང་ཆོས་སུ་གྱུར་ཡོད།

དེང་གི་ཆ་ལ་མི་རིགས་མང་པོ་ཞིག་གི་རིག་གནས་ཆུད་ཚད་དང་དཔལ་འབྱོར་ཚད་གཞི་མཐོན་པོར་སྙེགས་ནས་རང་རང་གི་རིག་གཞུང་རྣམས་ཡང་རྩེར་སོན་པའི་སྟེང་དུ་མི་རིགས་གཞན་གྱི་རིག་གནས་ལ་སྦྱང་བརྩོན་བྱས་ཏེ་བསམ་པའི་དཔལ་ཡོན་གོང་ཐོར་གཏོང་མཁན་ནུབ་ཕྱོགས་རྒྱལ་ཁབ་སོགས་མི་རིགས་མང་དག་ཞིག་ད་ལྟ་དངོས་སུ་ཐོན་བཞིན་པའི་དུས་དེར་ང་ཚོས་ཀྱང་དེ་དག་གི་རྗེས་སུ་འབྲངས་ནས་ཕྱི་ལུགས་དང་དེའི་རིག་གནས་ལ་སྦྱང་བརྩོན་བྱེད་བཞིན་ཡོད་པ་རེད།    དོན་ངོ་མར་ང་ཚོས་དེ་དག་གི་རྗེས་འབྲངས་ཡང་དག་ཞིག་བྱེད་ཐུབ་བམ་ཞེ་ན་མི་ཐུབ་པ་ལྟ་ཅི།  དེ་ལས་ལྡོག་ཏེ་རང་ཉིད་ལ་དབང་བའི་བཅུ་ཕྲག་རིག་གཞུང་གི་གོམ་བགྲོད་ཀྱང་གཏན་པོར་སྤོ་མི་ཐུབ་པའི་སྔོན་རྟགས་ཞིག་ཐོན་བཞིན་པ་རེད།

ནུབ་ཕྱོགས་སོགས་མི་རིགས་དེ་དག་ནི་རང་ཉིད་ཀྱི་རིག་གཞུང་གཙོར་འབད་བྱས་པའི་རྨང་གཞིའི་ཐོག་གཞན་གྱི་གཞུང་ལུགས་ལ་ཐོས་བསམ་བྱེད་མཁན་ཤ་སྟག་ཡིན་པ་ཀུན་གྱི་དཔྱད་གསུམ་གྲུབ་རྟགས་ལས་དཔོག་ནུས་པས་ང་ཚོ་དང་ཧེ་བག་ཧ་ཅང་ཆེ་བ་མ་ཟད་དམིགས་ཡུལ་གྱི་ནུས་པ་ཡང་ཐ་དད་དུ་གྱུར་བཞིན་ཡོད་པ་རེད།

དེ་ཅིའི་ཕྱིར་ཞེ་ན།  ང་ཚོས་ཕྱི་ལུགས་དང་དེའི་རིག་གཞུང་སྦྱང་བ་ནི་ཕལ་ཆེར་སྐད་བརྡ་ཕྲོད་བྱེད་ཙམ་ལས་བཅུ་ཕྲག་རིག་གཞུང་གཙོར་འབད་ཐུབ་པའི་རྨང་གཞིའི་འོག་མིག་བལྟ་བྱས་པ་ཞིག་ཉུང་ཉུང་ཡིན་མོད་མི་རིགས་གཞན་གྱིས་ང་ཚོའི་རིགས་གཞུང་སྦྱང་བ་ནི་ཟབ་པ་དང་རྒྱ་ཆེ་བ་དཔེར་ན།   ནང་ཆོས་ཀྱི་ལྟ་གྲུབ་དག་ལས་ནང་སེམས་ཁམས་ཀྱི་བདེ་སྐྱིད་འཚོལ་ཤིབ་བྱེད་ཐུབ་པ།  ཟས་བཅུད་འཕྲོད་བསྟེན་གྱི་ཐོག་ནས་ ༼ རྩམ་པ་ ༽    ལུས་པོའི་བདེ་ཐང་འཚོལ་སྙེགས་བྱེད་ཐུབ་པ་སོགས་གྲུབ་འབྲས་ནུས་པའི་ཐོག་ནས་རྗེས་འབྲངས་ཡང་དག་ཞིག་ག་ལ་མཚུངས།

དེ་ལས་གྱོང་ཁ་ཆེ་བ་ཞིག་ལ་རང་གཞུང་རང་གིས་མགོ་ཐོན་མི་ཐུབ་པའི་ནག་ཉེས་ཞིག་ཐོན་རྒྱུ་སྨོས་སུ་མེད།

ད་དུང་རྗེས་འབྲངས་གོ་ལྡོག་ནས་བརླག་པའི་ང་ཚོའི་རིག་གཞུང་ལ་ཕྱིར་བལྟ་ཞིག་བྱས་ན།

དེ་རིང་སྟེ།   སྤྱི་ཟླ་༤  ཚེས་ ༣༠ ཉིན་ནི་དབྱངས་བཞི་དང་གསལ་བྱེད་སུམ་བཅུའི་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་ཡིན་པས་ཚང་མས་དྲྭ་ཐོག་རྒྱུད་ནས་ཡིག་གཟུགས་འདྲ་མིན་མང་པོ་སྤེལ་བཞིན་སྨོན་ཚིག་དང་ཤིས་བརྗོད་ཀྱི་མུ་འཁྱུད་སྒྲོན་བཞིན་མ་ཡིག་གི་རིན་ཐང་ངོམས་བཞིན་འདུག      དེ་དག་ཁྲོད་ལས་ཡིག་གཟུགས་ཕལ་ཆེ་བ་ནི་ནང་བསྟན་སྡེ་ཁག་ནས་ཐོན་པའི་དགེ་འདུན་པའི་ཡིག་གཟུགས་ལས་དེ་མིན་སེར་སྐྱ་ཐུན་མོང་གི་ཡིག་གཟུགས་ཞིག་ཧ་ལམ་དཀོན་པས་དགའ་སྐྱོ་ཟུང་གི་བསམ་བློའི་སྟོབས་ལས་ཡིག་གཟུགས་ཀྱི་དུས་ཆེན་དེ་ཙམ་ལ་སྐྱ་སེར་དབར་ཧེ་བག་འདི་ལྟར་ཡོད་དུས་མི་རིགས་འདིའི་རིག་གཞུང་རྒྱུན་འཛིན་བྱེད་མཁན་ཧ་ལམ་དགེ་འདུན་པ་ལས་གཞན་དཀོན་ནམ་སྙམ་པའི་ཐེ་ཚོམ་ཞིག་འཆར་བྱུང་།

དེ་ལྟ་བུའི་དྲྭ་ཐོག་གི་ཁྱབ་ཁུངས་ཙམ་ལ་བརྟེན་ནས་རིག་གཞུང་རྒྱུན་འཛིན་བྱེད་མཁན་དབྱེ་འབྱེད་གསལ་པོ་མི་ཐུབ་ཀྱང་།   དེ་མ་ཡིན་པའི་སྲོལ་རྒྱུན་རིག་གནས་གཞན་ལའང་དེ་ལྟ་བུའི་ཁྱབ་ཁུངས་དང་དགེ་མཚན་ཡོད་པ་ཡོངས་སུ་གྲགས།

མདོར་ན་མི་རིགས་འདིའི་རིག་གཞུང་རྒྱུན་འཛིན་བྱེད་པར་སྐྱ་སེར་ཐུན་མོང་བར་འགན་འཁྲི་ཡོད་ཀྱང་དེ་རིང་གི་ཡིག་གཟུགས་དུས་ཆེན་བསུ་བའི་དགའ་སྟོན་ཐོག་སྐྱ་སེར་ཐུན་མོང་ཐོག་མེད་པ་ནི་གོང་གི་རྗེས་འབྲངས་གོ་ལྡོག་པའི་ནག་ཉེས་ལས་ལྷུངས་བའི་འབྲས་རྟགས་ཡིན་སྲིད།

དེར་བརྟེན་གནོང་འགྱོད་ཀྱི་དོགས་ཆར་མང་པོ་མདུན་དུ་བསུས་ནས་ཡིག་གཟུགས་དུས་ཆེན་ཡོད་པ་དེས་མ་འོངས་པར་ང་ཚོའི་རིག་གཞུང་འཛིན་སྐྱོང་བྱེད་པའི་འགན་འཁྲི་གསར་པ་ཞིག་རྙེད་ཚོར་ཐུབ་པའི་དགའ་བ་དང་བཅས་ཡིག་གཟུགས་དུས་ཆེན་ལ་བསུ་བ་ཞུ་བཞིན་ལྷོ་གཡོ་རུའི་ཆ་ནས་འདི་ལྟར་སྨྲས་སོ།། ཞེས་འབྲེལ་ཡོད་ཀྱི་རྩོམ་ཡིག་འདི་འདྲ་མང་པོ་ཞིག་གིས་འཛམ་གླིང་བརྒྱུད་ལམ་ཡོངས་སུ་འཁེངས་སོང་བ་བཅས།།
གསར་འགོད་པ་ཆོས་ཉིད།
ཡོང་ཁུངས་ཤམ་བྷ་ལའི་ཕོ་ཉ།