ཨོ་རྒྱན་ཉི་མ།
བོད་ཀྱི་ནང་པའི་དབུ་ཁྲིད་ཆེ་ཁག་ཀུན་གྱིས་ཐུགས་བསམ་བཞེས་དགོས་ས་དེ་གཙོ་བོ་བསྟན་པ་གནས་པའི་ཐབས། བསླབ་པ་གཙོ་བོར་བྱས་པའི་སློབ་གཉེར་ལ་ཐུགས་འདུན་གཏད་དགོས་པར་སེམས། དགེ་འདུན་སྡེ་གཉིས་གནས་པ་དང་། བསྟན་པ་དྲི་མེད་ཅིག་གནས་དགོས་ན་བསླབ་ཁྲིམས་ལ་བསྟེན་དགོས་པ་ནི་སྨོས་མེད་རེད། ནང་ཆོས་དེ་ཡང་ཡེ་ཤུ་དང་། ཁ་ཆེའི་ཆོས་བརྒྱུད་ནང་བཞིན་ཚེ་འདིས་འཚོ་དང་འབྲེལ་བ་ཞིག་འདོད་ན་ཡང་། ཆོས་ཀྱི་སྒྲིག་ཁྲིམས་ལ་གནས་ལོས་དགོས། སྒྲིག་ཁྲིམས་མེད་བཞིན་ཉིན་རེའི་འཚོ་བའང་སྒྲུབ་མི་ཐུབ་ན་བསྟན་པ་གནས་པའི་ཐབས་ལམ་བསྐྲུན་མི་ཐུབ་པ་ནི་སྨོས་མ་དགོས་པ་ཞིག་རེད། བསྟན་པ་གནས་པར་བྱེད་པ་ལ་འདུས་སྡེ་མང་བ་དང་། འདུ་ཁང་ཆེ་བ། དཔལ་འབྱོར་མང་བ་གསུམ་གྱིས་ཕན་ཐོགས་ཁག་པོ་རེད། གལ་སྲིད་ཕན་ཐོགས་པའི་དབང་དུ་བཏང་རུང་གནས་སྐབས་ཙམ་རེད། དེང་སང་བླ་སྤྲུལ་ཆེ་ཁག་གིས་རང་རང་གིས་གཡོ་སྒྱུ་རྫུན་གསུམ་མ་བྱས་རུང་། གཤམ་འོག་ཏུ་ཁྲམ་པ་སྐོར་གཅིག་ཉར། དེ་དག་གསོ་སྐྱོང་གིས་ཕྱི་རྒྱལ་དུ་བཏང་། དེ་ཚོ་ལ་མིང་དང་གོ་ས་སྤྲད། ཞྭ་གོས་ནས་བཟུང་ཡོད་ཚད་སྦྱིན་ཏེ། རིག་འཛིན་བརྒྱུད་པའི་ཕྱག་བཞེས་དང་། འཕྲིན་ལས་ཡོད་ཚད་འཕྲོ་བརླགས་སུ་བཏང་མཁན་མང་པོ་རེད། དཔལ་འབྱོར་འདུ་འགོད་བྱ་བ་རང་བཞིན་ངང་གིས་བྱུང་བ་ཞིག་དང་། ཐབས་མཁས་ཀྱི་སྤྱོད་པ་ཡང་དག་ལ་བརྟེན་ནས་བྱུང་བ་གཉིས་སུ་ངེས་པ་ལས། དེ་ལས་གཞན་པའི་ཁྲམ་པ་དག་ལ་གོ་ཐོབ་སྤྲད་པ་མཚམས་བཞག་ན་ལེགས་པར་སེམས། ཁྲམ་པ་ཚོས་གཡོ་སྒྱུ་ལ་བརྟེན་ནས་འདུ་ཁང་ཞིག་དང་། གྲྭ་ཁང་རྒྱས་པ་ཞིག་རྒྱག་ཐུབ་ཀྱང་། དེས་གཡོ་སྒྱུ་ཁྲམ་གསུམ་བྱ་རྒྱུ་མང་དྲགས་ཏེ། བསྟན་པ་ཡུན་ཏུ་གནས་པ་དང་། བསྟན་པའི་འགྲོ་དོན་བྱ་ཡུལ། བསྟན་པའི་རིན་ཐང་ཕལ་ཆེ་བ་བརླགས་ཚར་བ་རེད། འདི་དག་གི་སྐོར་དངོས་སུ་ཁྲམ་པ་མོད་པའི་འཇིག་རྟེན་དེར་གཅིག་བསླེབ་ན་མ་གཏོགས་ཤེས་ཐུབ་པ་ཁག་པོ་རེད། ཁྲམ་པ་ཚོས་རང་ཉིད་ཆེན་པོ་སྒྲུབ་པའི་ཆེད་དུ་སྐད་ཆའི་ཆེད་ལས་པ་གདན་འདྲེན་ གྱིས་དེ་ཚོ་ལ་སྐད་ཆ་བཤད་བཅུགས། དེ་ཚོས་ཆེ་བརྗོད་རེ་བྱེད་དུས། དེ་གའི་མི་སེར་ཕལ་ཆེ་བ་ཆོས་ཕྱོགས་ཡོན་ཏན་གྱིས་སྟོང་པ་ཤ་སྟག་ཡིན་པས། ཆེན་པོ་ཞིག་དང་། གཉན་པོ་ཞིག་ཡིན་པར་རྟོགས་ཏེ། ཚང་མས་ཡིད་ཆེས་ཀྱིས་སྐྱབས་གནས་སུ་བཟུང་། ཁྲམ་པ་དེ་ཚོས་སྒོར་མོ་རག་ཚར་དུས་བསྟན་པའི་ཆགས་འཇིག་ལ་བསམ་བློ་མི་བཏང་བར། ཉིན་མོ་ཆོས་གོས་བསྒོས། མཚན་མོ་འཕྱོན་མ་དང་མཉམ་དུ་ཨར་ཁང་སོགས་ཉུལ་བ་ལ་བརྟེན་ནས་ཕུང་གསུམ་པའི་སྤྱོད་ ངལ་སྤེལ་བཞིན་པ་དང་། ཕུང་གསུམ་པའི་སྤྱོད་པ་སྤེལ་མཁན་ནང་དུ་བླ་ཆེན་གྱི་མིང་ཁུར་མཁན་ནས་བཟུང་། གྲྭ་བཙུན་དཀྱུས་ཡན་ཆོད་ཡོད། དེ་ཕྱིར་ཚང་མས་བསམ་བློ་གཏོང་རན་འདུག་ཅེས་བཤད་པ་ཡིན། བསྟན་པ་ཞེས་པ་དེ་ཁྱེད་ཅག་བླ་ཆེན་ཚོ་དང་། ནང་པའི་རྗེས་འཇུག ཁྱད་པར་དུ་ཡང་བོད་པ་ཚོ་ལ་དགོས་ན་དག་ཐེར་བྱ་རན་པ་རེད། སངས་རྒྱས་བྱོན་ནས་ད་བར་ལོ་ཉིས་སྟོང་ལྔ་བརྒྱ་ལྷག་གི་རིང་དག་ཐེར་རབ་དང་། རིམ་པ་བྱས་ཚར་བ་རེད། ད་ལྟ་ཡང་བྱ་བའི་དུས་ལ་བསླེབ་ཡོད་པར་མ་ཟད། ཅུང་ཟད་ཕྱི་ཚར་བའི་སྣང་བ་ཡང་སླེབ་ཀྱིན་འདུག
སྔོན་གྱི་དུས་སུ་རྒྱ་གར་འཕགས་པའི་ཡུལ་དུ། བཀའ་བསྡུ་རིམ་པ་གསུམ་བྱུང་བ་དེ་ཡང་བསྟན་པ་དག་ཐེར་གྱི་ཆེད་དུ་རེད། བོད་ལ་མཚོན་ན་མཁན་སློབ་ཆོས་གསུམ་གྱི་དགོངས་པ་ལས་ཕྱི་རོལ་དུ་སྨྲ་བའི་གང་ཟག་ དུ་མ་ཞིག་བྱུང་བ་ལ་བརྟེན་ནས། མཁན་པོའི་ཞལ་ཆེམས་བཞིན་སློབ་དཔོན་ཀ་མ་ཤི་ལ་གདན་དྲངས་པ་དང་། ཁོང་གིས་ཀྱང་ནན་གཟིགས་གནངས་ཏེ། སྒོམ་རིམ་ཐོག་མཐའ་བར་གསུམ་དུ་མཛད་ཡོད་པ་བཞིན་རེད། རྗེས་ནས་ཆོས་རྒྱལ་ཁྲི་རལ་བ་ཅན་གྱིས། བོད་ཀྱི་སྐད་ཡིག་ནས་བཟུང་དག་ཐེར་གནང་ཡོད་པ་དང་། ཆོས་རྒྱལ་གྱི་གདུང་རྒྱུད་ལྷ་བླ་མ་ཡེ་ཤེས་འོད་ཀྱིས་ཇོ་བོ་རྗེ་དཔལ་ལྡན་ཨ་ཏི་ཤ་གདན་དྲངས་ཏེ། གསང་སྔགས་ལ་འཆོལ་རྙོགས་སུ་སྤྱོད་པའི་གང་ཟག་དེ་ཚོ་རྩ་མེད་དུ་བཏང་བ་རེད། མཉམ་མེད་ཙོང་ཁ་བ་ཆེན་པོས་ཀྱང་འདུལ་བའི་བསྟན་པ་རྒྱ་ཆེར་སྤེལ་ཏེ། བསྟན་པའི་རྩ་བ་སྲ་བརྟན་དུ་བཏང་གནང་ཡོད་པ་དང་། ཉེ་ཆར་དུས་རབས་ཉི་ཤུ་པའི་ནང་བོད་དུ་བསྟན་པ་ཉམ་ཉེས་སུ་སོང་སྟེ་སླར་དར་གྱི་ སྐབས་སུ་ཡང་། མཁན་ཆེན་སྡེ་སྣོད་འཛིན་པ་འཇིགས་མེད་ཕུན་ཚོགས་མཆོག་གིས་ཀྱང་སྐུ་སྲོག་འབེན་དུ་བཙུགས་ཏེ། རྒྱལ་བསྟན་ཐེར་གནངས་ཏེ། གྲུབ་འབྲས་ཆེན་པོ་ཐོབ་ཡོད་པ་ཚང་མས། ཁོང་གི་ཆོས་སྒར་དེ་ལ་ཕེབས་ཏེ་གཅིག་གཟིགས་དང་། གཞན་ལས་ཁྱད་པར་འཕགས་པའི་ཆོས་མང་པོ་ཤེས་ངེས་ཡིན། འགའ་ཞིག་གིས་དྲན་པ་ཁྲམ་པ་ཚོ་ནི་གནས་སྐབས་ཙམ་རེད། ཁོ་ཚོས་གང་བྱས་ཀྱང་གཡུག་ཞོགས་དྲན་མཁན་ཡོད་ཀྱང་། དེ་ནི་ནོར་བའི་ནང་ནས་ནོར་བ་ཆེན་པོ་ཞིག་རེད། ཁྲམ་པ་ནི་ཁྲམ་པ་རང་རེད། ཁོ་ཚོ་ལ་དངུལ་ཞིག་ལས། ཚེ་འདི་ཕྱི་ཟེར་བ། ལས་རྒྱུ་འབྲས་ཟེར་བ། དགེ་སྡིག་ཟེར་བ། གཞན་ལ་གནོད་པ་ཟེར་བ་སོགས་ལ་གཏན་ནས་རྩིས་མེད་དུ་གཏོང་ངེས་རེད། གལ་སྲིད་བསྟན་པའི་ལ་རྒྱ་འཚོ་མི་ནུས་ཤིང་། བསྟན་པ་ཡང་དག་པར་སྲུང་མ་ནུས་ན་ཁྱེད་ཅག་བླ་ཆེན་ཚོ་ཤི་བའི་རོ་དང་གཅིག་པ་རེད། ཁྱེད་ཅག་གི་ལས་དཀའ་བསྟན་པ་འཛིན་སྐྱོང་སྤེལ་གསུམ་བྱ་རྒྱུ་རེད་མ་གཏོགས། ངན་པ་ལ་རྒྱབ་སྐྱོར་གྱིས་ཡོད་ཚད་ལ་རིན་ཐང་མེད་པར་བསྒྱུར་བའི་ཆེད་དུ་གོ་ས་དེ་བཟུང་བ་ཡིན་རྒྱུ་མ་རེད། དེ་ཕྱིར་བསྟན་པའི་ཆེད་དུ་བསྟན་འཛིན་གྱི་སྐྱེས་བུ་ཡང་དག་ཅིག་དང་། བསྟན་པ་ཡུན་དུ་གནས་པའི་ཐབས་ལ་ངེས་པར་དུ་འབད་རོགས་ཞེས་གསོལ་བ་འདེབས་པ་ལགས་སོ། །
ངས་སྐྱེ་བ་ནས་ཚེ་རབས་དུ་མར་རྩོད་དགོས་བྱུང་རུང་། གལ་སྲིད་ང་ལ་རང་དབང་ཞིག་ཡོད་རྒྱུ་ན། ངས་ཚེ་འདིར་མ་འགྲུབ་རུང་། སླར་ཡང་སྐྱེ་བ་ལེན་ཏེ་རྩོད་རྒྱུ་ཡིན། ཕུང་གསུམ་པ་ནི་སངས་རྒྱས་ཀྱི་བསྟན་པ་བཤིགས་པའི་གཏེ་བོ་དང་། ཁྲམ་པ། སེམས་ཅན་ཡོངས་ཀྱི་དགྲ་བོ་རང་རེད། བོད་པའི་མི་སེར་དག་ནང་ཆོས་ལ་དོ་སྣང་མེད་པར་བཟོ་མཁན་ཡང་ཕུང་གསུམ་པ་འདི་ཚོ་རེད། རྒྱལ་སྤྱིའི་ཐོག་ནང་ཆོས་ཀྱི་རིན་ཐང་བརླགས་བཅུགས་མཁན་ཡང་ཕུང་གསུམ་པ་འདི་ཚོ་རེད། འདི་ཚོས་རང་དོན་གཅིག་པུ་ལས། སེམས་ཅན་དང་། བསྟན་པ་ལ་བསམ་བློ་མི་གཏོང་ཁོ་ཐག་རེད། ཁོ་ཚོ་བདུད་མ་ཡིན་ན་གཞན་སུ་ཞིག་བདུད་ཅེས་དམིགས་བསལ་མགོ་ལ་ར་དང་། རྐུབ་ལ་མཇུག་མ་ཡོད་མཁན་ཞིག་ཡོད། བདུད་ཀྱི་ནང་ནས་བདུད་དང་མ་དེ་ཕུང་གསུམ་པ་འདི་ཚོ་རེད། བདུད་དེ་ཚོས་བླ་ཆེན་གྱི་རྫུ་ལ་ཞུགས། མཁན་སྤྲུལ་དགེ་གསུམ་དང་། གྲྭ་བཙུན་དཀྱུས་པ་ཡན་གྱིས་རྫུ་ལ་ཞུགས་ཏེ། སངས་རྒྱས་ཀྱི་བསྟན་པ་ལ་རྨ་འབྱིན་བཞིན་པ་རེད། དེ་ཕྱིར་བདུད་ཚར་གཅོད་དགོས་ན་ཕུང་གསུམ་པ་ཚར་ཆོད་ཅིག ཕུང་གསུམ་པ་རྩ་མེད་དུ་མ་སོང་གི་བར་དུ་སངས་རྒྱས་ཀྱི་བསྟན་པ་གནས་པའི་ཐབས་གཏན་དུ་ཟད་པ་རེད། སངས་རྒྱས་བསྟན་པའི་དགྲ་བོ། དཀོན་མཆོག་གི་དབུ་འཕོངས་སྨད་པའི་དམ་ཉམས། སེམས་ཅན་གྱི་བདེ་སྐྱིད་བརླགས་མཁན་གྱི་གཤེད་མ་ཡོད་ཚད་ཕུང་གསུམ་པ་འདི་ཚོ་རེད། དེ་ཕྱིར་ཕུང་གསུམ་པ་མེད་པར་བཟོ་བར་ཤུགས་སྣོན་རྒྱོབས་ཤོག་་་་་