—རྔ་བ་ཀུན་བཟང་།
དེ་རིང་དེ་གར་ཝཱཎ་བོད་ཀྱི་གཙུག་ལག་སློབ་གཉེར་ཁང་གི་བུད་མེད་ལྷན་ཚོགས་ནས་བོད་ཀྱི་བུད་མེད་སྒེར་ལངས་ཐེངས་ ༥༨ པ་དྲན་གསོ་དང་སྲུང་བརྩི་ཞུས་བཞིན་ཡོད་པས། སེམས་ཀྱི་རེ་བ་དང་རྨི་ལམ་གཅིག་པའི་བོད་རིགས་སྤུན་ཟླ་ཡོངས་དང་། ཡང་སྒོས་སུ་ཆོས་དང་རིག་གཞུང་གཅིག་པའི་ཆོས་གྲོགས་རྣམས་ས་གནས་སོ་སོ་ནས་མཉམ་འཛོམས་སུ་ཕེབས་ནས་བུད་མེད་སྒེར་ལངས་དྲན་གསོ་བྱེད་བཞིན་ཡོད་པ་ང་རང་ཉིད་ནས་བཀའ་དྲིན་ཆེ་ཞུ།
དེ་ཡང་ཕྱི་ལོ་༡༩༥༩ ལོར་བོད་རྒྱལ་ཁབ་ནང་དྲག་པོའི་གཉན་གནོན་འོག་ཏུ་ཤོར་བའི་རང་རེའི་ཤ་ཁྲག་གཅིག་པའི་སྤུན་ཟླ་ཚོའི་ཆེད་དུ། མདོ་དབུས་ཁམས་གསུམ་གྱི་རྒྱལ་ཞེན་དང་སྙིང་སྟོབས་ཅན་གྱི་བུད་མེད་རྣམས་ཀྱིས་མ་བཟོད་པར་༡༩༥༩ ལོའི་ཟླ་བ་༣ ཚེས་༡༢ ཉིན་མོར། ཕོ་བྲང་པོ་ཏྭ་ལའི་མདུན་དུ་རང་གི་རྒྱལ་ཁབ་དང་མི་རིགས་ཀྱི་དོན་དུ་རང་སྲོག་དམར་པོ་བློས་གཏོང་གནང་ནས་མི་ལོ་ཧྲིལ་བོ་༥༨ འཁོར་བའི་དུས་དྲན་དང་། རྒྱལ་གཅེས་དཔའ་མོ་དག་གི་བཅོས་མིན་གྱི་ལྷག་བསམ་དང་ཞུམ་མེད་ཀྱི་སྙིང་སྟོབས་ལ་ང་ཚོ་ཚང་མས་མ་འཆི་བར་དུ་གུས་བཀུར་དང་རྗེས་སུ་ཡིད་རང་ཞུ་བཞིན་ཡོད།
དེ་ཡང་འདས་ཟིན་པའི་དཔའ་མོ་རྣམས་ཀྱི་ཟུངས་ཁྲག་གི་མཆོད་མེ་རེ་རེ་དང་བཞུད་ཟིན་པའི་ལོ་ཟླ་སྐྱུར་མོ་དེ་དག་ནི་ཁ་སང་གི་སྤུན་ཟླའི་སྙིང་སྟོབས་ཡིན་པས། ང་ཚོ་འདི་ལྟར་ཚོར་མེད་བེམ་པོ་བཞིན་བག་འཁུམས་ནས་མ་སྡོད་པར་རང་གི་ཆོས་དང་རིག་གཞུང་ཀུན་ལ་འབད་དགོས་པ་ཁོང་ཚོའི་རེ་བ་ཡིན་ལ། བོད་མི་ས་ཡ་དྲུག་གི་རྨི་ལམ་ཡང་ཆགས་ཡོད། ད་དུང་འདས་ཟིན་པའི་དཔའ་མོ་རྣམས་ཀྱི་སྙིང་ལ་ཟུག་པའི་འབོད་སྒྲ་རེ་རེ་དང་། སྲོག་ལ་བབས་པའི་ཚེ་སྲོག་གི་རིན་ཐང་དག་དྲན་ནས། ནམ་ཡང་ལེ་ལོ་དང་སྒྱིད་ལུག ཚོར་མེད་དང་བག་འཁུམ་ཀྱི་འདུ་ཤེས་སྤངས་ནས། གངས་ཅན་པའི་དཀའ་སྡུག་གི་ལོ་ཟླ་ཡོད་ཚད་སེམས་ལ་བརྣག་དགོས་པའི་རེ་སྐུལ་ཞུ་བཞིན་ཡོད།
མདོར་ན། དམར་པོའི་བཙན་འོག་གི་གཞིས་བཞུགས་མི་དམངས་ཀྱི་སྙིང་སྟོབས་དང་ལངས་ཕྱོགས་ཡོད་ཚད་མིག་དཔེར་བཟུང་སྟེ། ད་ལྟའི་གཉན་འཕྲང་གི་དུས་སུ་མཐུན་པའི་ལག་གདང་སྦྲེལ་ནས་སྔར་མེད་ཀྱི་སྤྱི་ཚོགས་ཤིག་དང་རང་དབང་་ལྡན་པའི་མི་རིགས་ཤིག་བསྐྲུན་ཐབས་སུ་འབད་རོགས།
ཕྱི་ལོ་༢༠༡༧ ཟླ་༣ པའི་ཚེས་༡༢ ཉིན་ཕུལ།
བོད་ཀྱི་དཔའ་མོ་དག་ནམ་ཡང་དྲན་དགོས་པ་ང་ཚོ་ཚང་མའི་འས་འགན་ཡིན།
བོད་ཀྱི་དཔའ་མོ་དག་ནམ་ཡང་དྲན་དགོས་པ་ང་ཚོ་ཚང་མའི་ལས་འགན་ཡིན།
ཆོས་དང་རིག་གཞུང་གཅིག་པ་ཨེ།
མ་འོངས་པ་ལ་བོད་མི་ཟེར་བ་དེ་ལ་ཆོས་དང་གྲུབ་མཐའ་མི་གཅིག་པ་མང་པོ་ཡོད་པའི་དམིགས་ཚད་བཟུང་དགོས། བོད་པ་ཁ་ཆེ་བ་དང་བོད་པ་ཡེ་ཤུ་བ་དང་བོད་པ་ནང་པ་བ་དང་བོད་པ་བོན་པོ་བ་དང་བོད་པ་ཆོས་མེད་པ་ལྟ་གྲུབ་སྣ་ཚོགས་དང་ལྡན་པའི་སྤྱི་ཚོགས་ཞིག་ཡིན་པར་བསམ་བློ་གཏོང་དགོས་དེ་མིན་གཞན་པ་ཚོ་སྤྱི་ཚོགས་འདི་ནས་རྒྱང་བུད་བཏང་བའི་བཟོ་འདྲ་ཞིག་འདུག་བསམ།
ཨ་རོ། འདིའི་ཐོག་ན་སྒེར་ལངས་ཞེས་པའི་བརྡ་ཆས་དེ་ལ་ངོ་སྤྲོད་ཙམ་ཡང་མི་འདུག་གོ །
ཟླ་བ་ལྷ་ས་ལགས། སྒེར་ལངས་ཞེས་པ་དེ་ལ་དམིགས་གསལ་གྱི་ཚིག་འགྲེལ་དགོས་དོན་མེད་མོད། དོན་དངོས་སུ་ཟླ་༣་ཚེས་༡༢་ཉིན་རང་འགན་རང་འཁུར་དང་རང་ངོས་རང་ཤེས་ཐོག་འབྱུང་བ་ཞིག་ཡིན་བསམ།
ཀློག་པ་པོ་ཡོངས་ལ་ཁ་དྲོ།
ངོ་སོ་བསྟོད་་་་་མི་མཐུད་དུ་བྲིས་ཤོག