བུ་འདོད་ཕ་མའི་རྒྱུན་ཤེས།

བློ་བཟང་ཆོས་འཕེལ་གྱིས་
————–

B B C གསར་ཁང་གི་སྡོམ་ཚིག་ལྟར་ན་ཉིན་རེར་འཛམ་གླིང་འདིར་ཕོ་མོའི་ལུས་འབྲེལ་བྱེ་བ་གཅིག་ལྷག་བྱེད་ཀྱིན་ཡོད་པ་ལ་བརྟེན་ནས་ཕྲུ་གུ་གྲངས་བཞི་འབུམ་རེ་སྐྱེ་བཞིན་ཡོད་སྐད་བསྒྲགས་འདུག་ཀྱང་། ཁྱིམ་ཚང་ཞིག་ལ་མཚོན་ན་ལུས་དབང་ཡན་ལག་དང་བཅས་པ་ཐང་པོ་ཡོད་པའི་ཕྲུ་གུ་རེ་སྐྱེ་བ་ནི་ཧ་ཅང་རེ་བ་ཆེན་པོ་བྱེད་ཡུལ་ཞིག་ཡིན། མ་ཟད་ཕྲུ་གུ་ཆགས་མ་ཐུབ་པ་དང་། ཡང་ན་སྐྱེས་ཀྱང་སོ་སོའི་རེ་འདུན་དང་མི་མཐུན་པར་བུ་ལས་བུ་མོ་མི་སྐྱེ་བ་དང་བུ་མོ་ལས་བུ་མི་སྐྱེ་བ། ཞ་ལོང་ལྟ་བུ་དབང་པོ་ཡན་ལན་མ་ཚང་བ་དང་སྐྱོན་ཅན་སྐྱེ་བ་སོགས་ཕྲུ་གུ་སྐྱེད་བསྲིང་བྱེད་པའི་ཐད་སེམས་འཚབ་དང་དཀའ་ངལ་མང་པོ་ཞིག་ཡོང་དང་ཡོད་བཞིན་པར་བརྟེན་དེའི་རིགས་ལ་དཔྱད་གཞི་ལྟ་བུར་དམིགས་ནས་བོད་ལུགས་གསོ་རིག་དང་མི་འགལ་བའི་རང་ལུགས་གཙོར་བཟུང་གིས་གཞན་ལུགས་ཀྱི་སྤྲོས་པ་དོར་ཏེ་ཚིག་ཉུང་དོན་བསྡུས་གང་ཐུབ་བྱས་ཏེ་བྲི་བ་ལ།

དང་པོ། ཕ་མའི་འོས་ཆོས།

ཕོ་ལོ་བཅུ་དྲུག་ལོན་དགོས་ཀྱང་མ་མཐའི་ལོ་ཚད་འདི་ཡིན་ཞེས་གཅིག་གྱུར་གྱི་ཚད་བཀག་མེད། མོ་ལོ་བཅུ་གཉིས་ནས་ལྔ་བཅུ་བར་གྱི་དར་མ་ཡིན་དགོས། དེའི་དོན་གཙོ་བོ་ནི་ཕོ་མོ་སུ་ཡིན་ཡང་ལུས་ཟུངས་དང་དབང་པོའི་ནུས་པ་མ་ཉམས་པའི་དར་མ་ཡིན་པ། རྒྱུན་པར་ཟས་སྐོམ་བཟའ་བཏུང་དང་མྱགས་བཞུ་དྭངས་གསུམ་ལ་དཀའ་ངལ་མེད་པར་བཤང་གཅི་སྐ་སླ་སོགས་ཚུལ་བཞིན་དུས་སུ་འབབ་པ་མ་ཟད་ལུས་ངག་ཡིད་གསུམ་བྱ་བ་གང་ལའང་བརྩོན་ནུས་དང་ལྡན་པའི་ཐ་མལ་ནད་མེད་ཡིན་དགོས། ཁྱད་པར་དུ་རིགས་རྒྱུད་སྤེལ་ནུས་པའི་རྟགས་སུ་ཕའི་ཁུ་བ་དེ་མདོག་སྦྲང་རྩི་ལྟར་དཀར་ཞིང་འོད་འཚེར་བ། ངོ་བོ་ལྕི་ཞིང་རོ་བསྐ་མངར་དང་ལྡན་པ། བུངས་ཚད་ཀྱང་མང་དུ་འབྱུང་བ་བཅས་དང་། དེ་བཞིན་མའི་ཟླ་མཚན་ཡང་སྐབས་རེར་རྒྱ་སྐེགས་ཀྱི་ཁུ་བ་ལྟར་སྨུག་ལ། སྐབས་རེར་རི་བོང་གི་ཁྲག་དང་འདྲ་བར་དམར་བོ་ཡིན་པ་ལ་ངོ་བོ་དྭངས་ཤིང་གོས་ལ་འགོས་པ་ཆུ་གྲང་གིས་བཀྲུས་ན་ཁྲག་གི་ཤུལ་མེད་པར་དག་པར་འགྱུར་བ་བཅས་ཀྱི་རྟགས་དང་ལྡན་པ་སོགས་དེ་ལྟ་བུའི་ཁུ་ཁྲག་གཉིས་ནི་ཉེས་པ་རླུང་མཁྲིས་སོགས་ཀྱིས་སྐྱོན་དང་བྲལ་བ་ཡིན་ལ་དེ་གཉིས་འཛོམས་ན་མངལ་ཆགས་པའི་ས་བོན་ཚུལ་བཞིན་བྱེད་ཐུབ། དེ་ལས་ལྡོག་པའི་ཁུ་ཁྲག་སྐྱོན་ཅན་ནི།

རྒྱུད་ལས། ཁུ་ཁྲག་རླུང་གིས་རྩུབ་ནག་རོ་བསྐ་ལ།། མཁྲིས་པས་རོ་སྐྱུར་མདོག་སེར་དྲི་མ་མནམ།། བད་ཀན་སྐྱ་འབྱར་རོ་མངར་བསིལ་བ་སྟེ།། ཁྲག་གིས་རུལ་ཏེ་བད་རླུང་དུམ་བུར་ཆད།། ཁྲག་མཁྲིས་རྣག་འདྲ་བད་མཁྲིས་མདུད་པ་ཅན།། རླུང་མཁྲིས་སྐམ་ཞིང་འདུས་པ་བཤང་གཅི་འདྲ།། འདི་དག་སྐྱོན་རེས་ས་བོན་བྱེད་མི་ནུས།། ཞེས་གསུང་བ་ལྟར་རང་ཉིད་ཀྱི་ཁུ་ཁྲག་སྐྱོན་ཅན་ཡིན་ན་སྔོན་དུ་སྨན་པར་བསྟེན་གཏུགས་ཀྱིས་བཅོས་ཐབས་གནང་དགོས་པ་ལས་གང་བྱུང་སྣང་མེད་བྱས་ན་མངལ་མི་ཆགས་ཐུབ། མ་ཟད་འབྱུང་ལྔ་སོ་སོའི་ཆ་ཤས་ཡོངས་སུ་མ་སྙོམས་པ་སོགས་ཉེས་པའི་སྟོབས་ཀྱིས་མངལ་ཆགས་ཀྱང་མིའུ་ཐུང་དང་། ཞ་ལོང་སོགས་གཟུགས་མི་སྡུག་པ་ཇི་སྙེད་གཅིག་སྐྱེས་དང་སྐྱེ་བཞིན་ཡོད་པས་ངེས་པར་ཕ་མ་སོ་སོས་འཕྲོད་བསྟེན་ལ་བརྟག་དཔྱད་དང་ཡིད་གཟབ་བྱ་དགོས། དེ་མིན་གནད་དོན་གཞན་ཞིག་ལ་ཕ་མ་རང་ཉིད་དང་བསོད་ནམས་མཉམ་པའི་ཕྲུ་གུ་སྐྱེ་བ་ཤུགས་ཆེ་བས་བྱམས་སྙིང་རྗེ་བྱང་སེམས་ཀྱི་རྩིས་ཟིན་པའི་ཚོགས་གསོག་དགེ་སྒྲུབ་བྱེད་རྒྱུ་ཡང་རྨོངས་དད་དང་སྐབས་འདིར་འབྲེལ་འབྲས་མེད་པ་ཞིག་མིན་པས་རྒྱུན་པར་ཕ་མ་རང་ངོས་ནས་དོ་སྣང་བྱ་གལ་མཐོང་།

གཉིས་པ། འདོད་པ་བསྟེན་པའི་དུས།

ཟླ་མཚན་འབབ་ཉིན་ནས་བཟུང་ཞག་བཅུ་བཞིའི་རིང་གི་དང་པོའི་ཞག་གསུམ་ལ་ཟླ་ཁྲག་འབབ་བཞིན་པའི་དུས་ཡིན་པས་བུ་མི་ལེན་པ་མ་ཟད་སྐབས་དེར་འཁྲིག་པ་སྤྱད་ན་ཕ་མ་གཉིས་ཀྱི་ལུས་ལ་གནོད་ཆེ། མ་ཟད་ཟླ་མཚན་ཕྱིར་བབས་ཟིན་ནས་ཞག་བཅུ་གཅིག་གི་རིང་ལ་ཡང་བུའི་ས་བོན་ཁམས་དམར་དེ་གསོག་བཞིན་པའི་སྐབས་ཡིན་པས་མངལ་ཆགས་མི་ཐུབ། དེ་ནས་བརྩིས་པའི་ཞག་བཅུ་གཉིས་ཀྱི་རིང་ལ་བུའི་ས་བོན་ཁམས་དམར་དེ་ཤེད་ཡོངས་སུ་རྫོགས་ཤིང་སྨིན་པའི་དུས་ཡིན་པས་རིགས་རྒྱུད་འདོད་པའི་ཕ་མ་གཉིས་ཀྱིས་སྐབས་འདིར་ཟས་སྤྱོད་ལེགས་པར་བསྟེན་ཞིང་། ཁྲུས་དང་གཙང་སྦྲ་བྱས་ཏེ་འདོད་པ་བསྟེན་པའི་ཆོ་ག་ཚུལ་བཞིན་དུ་སྤྱད་དགོས། དུས་དེ་ཡོལ་བའི་རྗེས་སུ་འཁྲིག་པ་སྤྱད་ཀྱང་མངལ་ནང་ཁྲག་རོ་བསགས་པ་དེ་མང་དུ་སོང་ནས་ཞག་བཞི་ལྔའི་རྗེས་སུ་ཕྱིར་བརྡོལ་རན་པས་ཁུ་བ་དེ་མངལ་དུ་འཛིན་པའི་ནུས་པ་ཡོངས་སུ་བྲལ་ཞིང་ཕྱིར་དོན་པར་འགྱུར་བ་མ་ཟད། དཔེར་ན་ཉི་མར་བསྟེན་ནས་ཁ་འབྱེད་པའི་མེ་ཏོག་པདྨའི་ཁ་ཉི་མ་ནུབ་པ་དང་ཟུམ་འགྲོ་བ་བཞིན་དུ་ཞག་གྲངས་བཅུ་གཉིས་པོ་འདས་ནས་བུད་མེད་མང་ཆེ་བའི་མངལ་ཁ་ཟུམ་པར་འགྱུར་བ་ཡང་ཡིན། རག་རྡོ་བློ་བསྟན་མཆོག་གིས། མངལ་ཆགས་པའི་སྐོར་གྱི་ཞག་གྲངས་རྣམས་ནི་ཚེས་ཞག་གཙོ་བོ་བྱེད་པ་ཡིན་ཏེ། ནང་གི་ཁམས་དཀར་དམར་གྱི་འཕེལ་འགྲིབ་བཞིན་ཟླ་བ་འཕེལ་འགྲིབ་བྱེད་པའི་ཕྱིར། དེས་ན་ཚེས་ཞག་གི་ཟླ་བ་སོ་གསུམ་ལ་ཉིན་ཞག་གི་ཟླ་བ་སོ་གཉིས་ལས་མེད་དོ།། ཞེས་གསུང་བ་ལྟར་ཚེས་ཞག་བརྒྱད་ལ་ཉིན་ཞག་བདུན་ལྷག་ཙམ་ལས་མེད་པས་བརྩི་སྟངས་ལ་ཁྱད་པར་ཕྲན་བུ་ཡོད། མདོར་ན། ཟླ་མཚན་འབབ་ཉིན་ནས་བརྩིས་པའི་ཞག་གྲངས་བཅུ་བཞིའི་རྗེས་ཀྱི་ཞག་གྲངས་བཅུ་གཉིས་དེ་ནི་རིགས་རྒྱུད་སྤེལ་བར་འདོད་མཁན་དག་གི་རེ་བ་མངོན་འགྱུར་ཡོང་བའི་དུས་ཚོད་གཙོ་བོ་ཡིན། ད་དུང་འཁྲིག་པ་སྤྱོད་སྟངས་ལ་སྦྱོར་དངོས་ཀྱི་ལས་སྣ་ཚོགས་ཤིག་ཡོད་པ་ལྟར་མཁས་དབང་དགེ་ཆོས་ཀྱི་འདོད་བསྟན་སོགས་སུ་གཟིགས་ནས་ཇི་ལྟར་བུ་ཆགས་པའི་ཐབས་སུ་འབད་རིགས་པ་ཡིན་ནོ། །

གསུམ་པ། འདོད་མོས་ལྟར་ཕྲུ་གུ་ཕོ་མོ་བཟོ་ཐབས།

མངལ་དུ་ཕ་མ་གཉིས་ཀྱི་ཁུ་ཁྲག་ལྷན་གཅིག་ཏུ་ཚོགས་པ་དེའི་ཚེ་བུའི་རྒྱུར་འགྱུར་བའི་ཁུ་བའི་ཆ་མང་ན་བུ་ཕོ་རུ་སྐྱེ་བར་འགྱུར་ལ། ཟླ་མཚན་དེ་བུ་མོར་འགྱུར་བའི་ཁུ་བའི་ཆ་མང་ན་བུ་མོར་སྐྱེ་བར་འགྱུར་ཞེས་གསུང་བ་ལྟར་གཙོ་བོ་ཐོག་མའི་ལུས་ཁུ་ཁྲག་གི་ཚོགས་རྡུལ་དེའི་ངོ་བོ་དང་། དེ་བཞིན་བར་དོའི་རྣམ་ཤེས་དེའི་ལས་དབང་དང་འབྲེལ་བ་ཆེ་ཞིང་མཐུན་པའི་རྒྱུ་ཚོགས་མང་པོ་འཛོམས་དགོས་པས་མཐའ་གཅིག་ཏུ་བཤད་ཐུབ་པ་ཞིག་མིན།

ལྷག་དོན་རྒྱུད་ལས། ཐ་མལ་རྟེན་གྱི་རྩ་རྒྱུད་རྣམ་གསུམ་ནི།། ཕོ་རྩ་མོ་རྩ་བྱང་ཆུབ་སེམས་རྩ་གསུམ།། ཕོ་ཡི་རྩ་ནི་སྦོམ་ལ་རགས་པར་འཕར།། མོ་ཡི་རྩ་ཡི་ཕྲ་ལ་མྱུར་བར་འཕར།། བྱང་ཆུབ་སེམས་རྩ་རྒྱུད་རིང་འཇམ་ལ་མཉེན།། ཕོ་ལ་མོ་རྩ་བྱུང་ན་ཚེ་རིང་ཞིང་།། མོ་ལ་ཕོ་རྩ་བྱུང་ན་བུ་དཔལ་ཆེ།། གཉིས་ཀར་བྱང་ཆུབ་སེམས་དཔའི་རྩ་བྱུང་ན།། ཚེ་རིང་ནད་དཀོན་ཡས་བྱམས་མས་སྡང་སྟེ།། དྲུང་གསུམ་དགྲར་ལྡང་མཐའ་ཕུགས་རབས་ཀྱང་ཆད།། ཕོ་རྩ་ནང་ཕྲད་ཕར་ཆེར་བུ་མང་སྟེ།། མོ་རྩ་ནང་ཕྲད་བུ་མོ་ཕར་ཆེར་མང་།། བྱང་ཆུབ་སེམས་རྩ་ཕོ་མོ་གང་ཕྲད་པ།། དེ་ཡི་དབང་གིས་གཅིག་འབྱུང་དེ་ནས་མིན།། ཞེས་གསུང་བ་ལྟར་རྒྱུན་རྩ་བྱང་ཆུབ་སེམས་རྩའམ་མ་ནིང་གི་རྩ་ཡིན་པའི་ཕོ་མོ་གཉིས་བཟའ་ཟླ་བྱས་ན་རིགས་རྒྱུད་སྤེལ་མི་ཐུབ། དེའི་ཕྱིར་སྤྱི་ཚོགས་དང་ཕ་མ་སུ་ཡིན་ཡང་སོ་སོའི་ཕྲུ་གུ་དེའི་རྒྱུན་རྩ་གང་ཡིན་ཆུང་དུས་ནས་སྨན་པར་དྲིས་ཏེ་ཧ་གོ་བ་བྱེད་ཅིང་དེ་མཐུན་གྱི་བཟའ་ཟླ་འཚོལ་རྒྱུ་ཡང་རིགས་རྒྱུད་སྤེལ་བའི་གནད་དོན་དང་འབྲེལ་བ་ཆེ། དེ་ཙམ་མ་ཟད་བག་རྩིས་ཚད་ལྡན་བྱས་ཏེ་ལུས་སྲོག་དབང་ཀླུང་གི་འབྱུང་བ་མཐུན་པའི་རིགས་དང་གཉེན་བསྒྲིག་དགོས་པ་སོགས་མདོར་ན་རིགས་རྒྱུད་ཕོ་མོ་རང་འདོད་ལྟར་སྤེལ་རྒྱུ་ནི་རྒྱུ་རྐྱེན་སྣ་མང་འཛོམས་དགོས་པ་ཞིག་ཡིན་པས་མཐའ་གཅིག་ཏུ་བཤད་མི་ཐུབ་ཀྱང་། འདོད་པ་བསྟེན་པའི་ཞག་གྲངས་ལ་ཁྱད་པར་ཡོད་དེ། ས་བོན་ཁམས་དམར་དེ་མ་སྨིན་པའི་ཞག་བཅུ་བཞི་ཡོལ་ནས་བརྩིས་པའི་ཞག་དང་པོ་དང་། གསུམ་པ། ལྔ་པ། བདུན་པ། དགུ་པ་བཅས་སུ་འཁྲིག་པ་སྤྱད་ན་བུ་ཕོར་འགྱུར་བ་དང་། དེ་བཞིན་ཞག་གཉིས་པ་དང་། བཞི་པ། དྲུག་པ། བརྒྱད་པ་རྣམས་སུ་འཁྲིག་པ་སྤྱད་ན་བུ་མོར་འགྱུར་བར་ཡིན་ཏེ། རྒྱུད་ལས། གཅིག་གསུམ་ལྔ་བདུན་དགུ་ལ་བུར་འགྱུར་ཏེ།། གཉིས་དང་བཞི་དྲུག་བརྒྱད་པར་བུ་མོར་འགྱུར།། ཞེས་གསུངས་པས་སོ། ད་དུང་བུ་མོ་བུར་འགྱུར་བའི་ལྟེ་བསྒྱུར་གྱི་ལག་ལེན་ཞིག་ཡོད་ཀྱང་སྐབས་འདིར་དགོས་གལ་མ་མཐོང་བས་རེ་ཞིག་བཞག

བཞི་པ། མངལ་ཆགས་པའི་རྟགས།

གོང་དུ་ཇི་སྐད་བཤད་པའི་ས་བོན་དང་བར་སྲིད་ཀྱི་རྣམ་ཤེས་གཉིས་ལྷན་དུ་མངལ་ནང་ཆགས་ཤིང་གནས་ཡོད་པའི་རྟགས་སུ། ཕོ་མོ་གཉིས་འཁྲིག་པར་ཞུགས་པ་ལས་བྱུང་བའི་ས་བོན་དེ་ཉིད་མངལ་གྱི་ནང་བཟུང་ནས་ཕྱིར་མི་འབྱུང་བ་དང་། དེས་བུད་མེད་དེ་རེ་ཞིག་འདོད་པ་ནམ་རྒྱུན་ལས་ངོམ་ཆེ་ཞིང་ཚིམ་པ་དང་། གློ་བུར་དུ་བྱ་བ་གང་ཡང་བྱེད་མི་སྤྲོ་བར་ལུས་སྙོམ་པ་དང་སྔར་ལས་ལུས་ལྕི་ཞིང་དུབ་པ། ཡན་ལག་རྣམས་འདར་བ། སྙིང་རྩའི་འཕར་གྲངས་ཅུང་མགྱོགས་སུ་འགྲོ་བ། ལུས་ཀྱི་བ་སྤུ་ལྡང་བ་སོགས་ཀྱི་མངོན་རྟགས་ཡོང་ཞིང་དེ་དུས་མངལ་དུ་བུ་ཆགས་ཡོད་པས་ཚད་ལྡན་སྨན་པར་བསྟེན་གཏུགས་ཀྱིས་སྨན་པའི་ངག་བཞིན་མ་བུ་བདེ་ཐང་གི་ཟས་སྤྱོད་བསླབ་བྱ་སོགས་བདུན་ཕྲག་སོ་བརྒྱད་འདས་ནས་དངོས་སུ་མ་བཙས་བར་ཚུལ་བཞིན་ཉམས་ལེན་དང་སྤང་བླང་བྱེད་གལ་ཧ་ཅང་ཆེ།

ལྔ་བ། མཇུག་བསྡུ་བ།

རྩོམ་ཐུང་འདི་མི་དམངས་དཀྱུས་མའི་གྲས་ཀྱི་ཕ་མ་རིགས་རྒྱུད་འདོད་མཁན་ཚོར་ཆེད་དམིགས་ཀྱིས་དཔྱད་གཞིར་བྲིས་པའི་ཁུལ་ཡིན་པས། དེ་དག་གི་ངོར་གང་འཚམ་པ་གཙོར་བཟུང་བྱས་པ་ལས་ཁམས་དཀར་དམར་གྱི་གནས་སྟངས་དང་ཕྱིར་འབྱིན་ཚུལ། བར་དོའི་རྣམ་ཤེས་མངལ་དུ་ཇི་ལྟར་འཇུག་ཚུལ་སོགས་ཕྲ་བའི་གནད་གང་ཡང་བཤད་ཐབས་ལ་འབད་མེད། ལྷག་པར་མངལ་ཆགས་པའི་དུས་ཚོད་ངོས་འཛིན་གྱི་འགྲེལ་བཤད་ལྟ་བུར་མཚོན་ན་རྒྱུད་འགྲེལ་མང་པོ་དང་། རྩོམ་ཡིག་འདྲ་མིན་ནང་མ་འདྲ་བ་མང་པོ་ཡོད་ཀྱང་ཐེངས་འདིར་དོན་དངོས་རྒྱུ་མཚན་གྱིས་ཕྱུག་ཤོས་སུ་མཐོང་བ་དྲང་སྲོང་ཞལ་ལུང་རང་ལུགས་བཞིན་བྲིས་པ་ལས་གཞན་དག་ལ་དགག་སྒྲུབ་དང་དཔྱད་པ་ཅི་ཡང་མ་བྱས་པ་འདི་ཡང་གཙོ་བོ་གང་དུ་དམིགས་པའི་ཡུལ་གཙོར་བཟུང་བྱས་པའི་ཁུལ་ཡིན། ཡང་རྒྱུ་མཚན་གཞན་ཞིག་ལ་ཁ་བརྡ་དྲ་ཚིགས་སོགས་སུ་བོད་ལུགས་གསོ་རིག་གི་ཆེད་ལས་སྨན་པ་དང་སྨན་སློབ་མེད་པ་ལྟ་བུའི་ཉུང་བ་དང་། ཚིག་ཚོགས་མང་དྲགས་ན་དྲ་ངོས་འདིའི་རྩོམ་ཡིག་གི་ཁྱད་ཆོས་བཀླགས་འགྲོ་བ་མ་ཟད་ཀློག་མཁན་ལའང་ཉོབ་སྣང་སྟེར་བར་སྐྲག་ནས་གང་བསྡུས་རོབ་བཤད་འདི་ཙམ་བྱས་པ་ཡིན།

སྨྲས་པ།

རྗེ་གཡུ་ཐོག་བླ་མའི་དགོངས་པ་བཞིན།།

བོད་ཕ་མ་འབྱོར་མེད་དཀྱུས་མ་ཚོར།།

ཅུང་ཕན་ན་སྙམ་ནས་བྲིས་འདིས་ཀྱང་།།

གཞན་འགྲོ་དོན་ཅུང་ཞིག་འགྲུབ་གྱུར་ཅིག།

ཅེས་བློ་བཟང་ཆོས་འཕེལ་གྱིས་གུས་ཕུལ།