བལ་མི་ཚོས་མནོ་བསམ་འཁོར་དགོས

དཔལ་གློ་བོ་རྒྱལ།

 

སེམས་ལ་རང་དབང་མེད་པས་ཅི་དགར་དུ།།
བྱས་དང་བྱེད་པའི་དཀར་ནག་ལས་འབྲས་ལ།།
བསམ་ན་མི་ཤེས་མིག་གིས་མཐོང་མེད་པས།།
ཡིད་ཆས་དཀའ་བའི་འཇིག་རྟེན་ཆེན་པོ་ན།།

 

འབྱུང་བཞི་འཁྲུག་པའི་སྡུག་བསྔལ་སྐད་ཅིག་གིས།།
སྐྱབས་བྲལ་ཉེ་དུ་གྲོགས་དང་དགྲ་སྣང་སོགས།།

ཡུད་ཀྱིས་བརྗེད་ནས་རང་སྲོག་སྐྱོབ་པའི་ཆེད།།
འོ་འདོད་འབོད་བཞིན་མནར་བའི་སྤུན་ཟླ་ཚོས།།

 

བལ་གཞུང་བྲམ་ཟེས་སྐྱོང་བའི་ངང་ཚུལ་དང་།།
རོགས་སྐྱོར་བྱེད་མཁས་ཕྱི་ནང་ཆོས་ལུགས་སོགས།།
དམངས་ལ་ཕན་ལ་ས་གནམ་ཧེ་བག་གིས།།
གནས་ཚུལ་རྨོངས་ནས་ཕན་ཚུན་སྡང་བས་འགྱོད།།

གློ་བུར་ས་ཡོམ་འགུལ་བས་མི་སེར་དག།
ཤི་རྨས་བྱུང་ལ་སྐྱོབས་གསོ་གནང་བའི་སྐབས།།
ཆོས་པས་ཕན་དང་གཞུང་ངན་སྒེར་གཅོད་ཀྱིས།།
གནོད་པའི་གནས་ཚུལ་གསར་འགྱུར་མ་མཐོང་སྐྱོ།།

 

སློབ་གསོར་འབད་ནས་སྤྱི་སྒེར་སོ་སོ་ཡིས།།
རང་གིས་མདུན་ལམ་ཡངས་པོ་བྱེད་དཀའ་ཞིང་།།
འཕྲལ་གྱིས་ལྟོ་གོས་གཏམ་ལ་ཞེན་པ་ཡིས།།
དཔོན་པོ་དག་ལ་རེ་བའི་རྨངས་ལ་བརྩེ།།

 

སྐྱིད་སྡུག་སྐབས་སུ་ཅི་ཞིག་བྱེད་བསམ་ནས།།
རང་མགོན་རང་གིས་མ་ཤེས་གཞན་བསྟེན་ཡང་།།
ངེས་མེད་ཚུལ་ངན་འགྱུར་ལྡོག་བྱ་སྤྱོད་གིས།།
ལུས་སེམས་མནར་བའི་སྡུག་བསྔལ་ག་ལ་བཟོད།།

 

དེང་དུས་ཕྱི་ནངཡག་པོར་ཁས་ཆེས་དང་།།
སྟོབས་ཤུགས་ངོམས་མཁས་རྒྱ་ནག་དཀར་པོ་སོགས།།
རྣམ་སྨིན་རེ་བཅས་ལས་དོན་བྱས་པ་ལ།།
བཟང་ངན་གཏམ་གྱིས་ཁྱབ་དུས་ངུ་ཤོར་སོང་།།

 

རང་གིས་རང་ལ་འཇབ་རྩུབ་ཐབས་ལམ་གྱིས།
རང་ཡུལ་ཆོག་ཤེས་འཚོ་བ་མ་རོལ་ནས།།
ངེས་མེད་ལུང་འགྲིམ་མྱོང་བའི་དཀའ་ངལ་དག།
ཤེས་ཀྱང་འགྲོ་དགོས་ལས་ངན་ཀྱེ་མ་ཧུད།།

 

ཨ་ཁ་བལ་མིའི་ཀླད་པ་ལྗང་ཁུ་ཡིས།།
རང་ལྟོ་ཙམ་ལ་འབད་ནས་ནང་འཁྲུག་ལས།།
རང་རྒྱལ་ཕན་ཕྱིར་ལས་ལ་མ་བརྩོན་པར།།
ད་དུང་གཞན་ངོར་རྫིག་བྱེད་ཧ་ཧ་ཧ།།

 

གོར་ཁ་དམག་མིས་གཞན་བྲན་བཀོལ་བ་ལས།།
རང་རྒྱལ་གནོད་མཐོང་ལས་བརྩམས་དུས་ཀུན་ཏུ།།
དཔའ་བོ་ཡིན་མདོག་བྱས་ནས་གཞན་ངོར་ལ།།
རང་མཚང་འབྱིན་ལ་ལྟོས་དང་ཨ་ཁ་ཁ།།

 

དངོས་ནས་དཔའ་བོས་རང་རྒྱལ་ཆེད་དུ་འཐབ།།
ངོ་མ་མཁས་པས་རང་རྒྱལ་ཆེད་དུ་འབད།།
དཔོན་པོ་བཟང་པོས་རང་རྒྱལ་ཡར་འཕེལ་གྱིས།།
མཛད་རྗེས་རི་བོང་ར་ལ་སུ་ཡིས་རྩིས།།

 

ཧ་ཧ་བཤད་ན་མི་འགྲིགས་སྙིང་ལ་ཕོག།
སྦས་ན་གཅོང་ནད་ཆགས་པའི་ཉེན་ཁ་ཡིས།།
ཅི་བྱས་མེད་པར་བཤད་པའི་ཚིག་དོན་ལ།།
བསམ་ནས་དགའ་སྐྱོ་མེད་ན་བཏང་སྙོམས་འཇོག།