བལ་པོའི་སེའུ། བལ་སེའུ།

འཇམ་དབྱངས་དཀར་པོ།

ས་སྐྱ་ལེགས་བཤད་ཀྱི་འཕྲིན་ལས་དར་བ་ནས་རང་རེའི་ཀུན་གྱི་ཁ་ལ། བལ་པོའི་སེའུ་མ་ཟོས་ཀྱང་།། ཁ་དོག་ཉིད་ལས་བྲོ་བ་ཤེས།། ཞེས་པའི་ཚིག་ཅིག་ཟེར་ལོབས་སུ་སོང་ཡོད། ཡིན་ན་ཡང་དོན་ངོ་མར་འུ་ཅག་གིས་བལ་པོའི་སེའུ་དེ་གང་ལ་ཟེར་བ་དང་ཅི་འདྲ་ཞིག་ཡིན་པ་ཤེས་མེད།

ལོ་མང་པོ་ཞིག་གི་གོང་ལ་བདག་འབྲུག་ཡུལ་དུ་བསྐྱོད། ཉིན་གཅིག་སྲང་ལམ་ནས་ཤིང་ཏོག་བཙོང་བའི་བུ་མོ་ཞིག་གི་ལག་ནས་བལ་སེའུ་རྒྱ་མ་གང་ཉོས་པ་བུ་མོ་དེ་མཛེས་པས་མིན་པར་ང་ཤིང་ཏོག་འདིར་དགའ་བས་ཡིན།

བུ་མོ་དེས་”བལ་སེའུ་ཞིམ་ཏོག་ཡོད་”ཟེར་བ། བལ་སེའུ་ཞིམ་པོ་ཡོད་ཟེར་བའི་དོན་ཡིན་པ་ཤེས་སོང་། སྐབས་དེར་ང་ལ་ར་འཕྲོད་པ་ནི་རྒྱ་གར་གྱིས་གྷོ་བ་(Guava) ཟེར་བའི་ཤིང་ཐོག་དྲི་མ་ཅན་དེ་ལ་བལ་པོའི་སེའུ་ཟེར་གྱི་ཡོད་པ་དེ་རེད། ངས་བསྐྱར་ནན་གྱིས་བུ་མོ་དེར་”འདིའི་མིང་ལ་ཅི་ཟེར་བ་རེད་”ཅེས་དྲིས་པར། མོས་ལན་དུ་”གྷོ་བ་”ཟེར། ངས་”མ་རེད་འབྲུག་སྐད་ལ་ཅི་ཟེར་བ་རེད་”ལབ་པར། མོས་ཀུ་རེ་རྩེ་ཡི་འདུག་སྙམ་གྱི་ཡོད་པའི་རྣམ་འགྱུར་ཞིག་ཁྲ་གོར་གོར་གྱི་མིག་ཟུང་དྭངས་མོ་གཉིས་ལས་ཧ་ཅང་མངོན་གསལ་དུ་ཤར་སོང་བར། ངས་”ཀུ་རེ་རྩེ་ཡི་མེད། འབྲུག་སྐད་ལ་འདིའི་མིང་ལ་ཅི་ཟེར་བ་ཤེས་ན་འདོད་པ་ཡིན་”ལབ་པར།མོས་”ཨ་ཇོ། འདིའི་མིང་ལ་བལ་པོའི་སེའུ་ཟེར། བལ་པོའི་སེའུ་མ་ཟོས་ཀྱང་།། ཁ་དོག་ཉིད་ལས་བྲོ་བ་ཤེས།། ཞེས་པའི་”བལ་པོའི་སེའུ་དེ་རེད་”ཟེར།

དཔལ་ལྡན་འབྲུག་གི་རྒྱལ་ཁབ་ན་དུས་དེང་སང་ཡང་འདི་ལ་བལ་པོའི་སེའུའམ། བལ་སེའུ་ཞེས་གྲ་མ་ཉམས་གྲུ་མ་ཆག་པར། ཉིན་རེའི་འཚོ་བའི་ནང་ན་བཀོལ་སྤྱོད་བྱེད་བཞིན་འདུག་ལ། ཤིང་ཏོག་བཙོང་བའི་བུ་མོ་ཆུང་ཆུང་དེའི་བཀའ་དྲིན་གྱིས་དུས་དེ་ནས་བཟུང་བལ་པོའི་སེའུ་ངོ་ཤེས་པར་གྱུར།

ཤིང་ཏོག་འདི་རྒྱ་གར་དང་མེཀ་ཁོ་(Mexico) གཙོས་འཛམ་གླིང་གི་ཡུལ་གྲུ་མང་པོར་སྐྱེས་ཡོད་པ་དང་། ཤིང་ཕྲུག་བཙུགས་ཏེ་ལོ་གཉིས་པ་ནས་འབྲས་བུ་ཐོགས་ཀྱི་ཡོད་པ་དང་། ཤིང་སྡོང་སྤྱིའི་ཆ་སྙོམས་ཀྱི་ཚེ་ཚད་ལོ་ ༤༠ ཡིན་འདུག

ཤིང་ཏོག་འདི་རྒྱལ་ཁབ་གང་སར་ཞོར་ཟས་ཤིང་ཏོག་གི་གྲང་ཚལ་དང་། ཟས་ཀྱི་སྔོན་འགྲོ། ཁུ་བ་བཙིར་ནས་འཐུང་བ་སོགས་བཀོལ་སྤྱོད་ཆེ་བའི་ཤིང་ཏོག་ཅིག་ཡིན་པས། སྤྱི་ལོ་ ༢༠༡༩ ལོར་འཛམ་གླིང་གི་ཚོང་རའི་ནང་བལ་པོའི་སེའུ་ཊོན་ས་ཡ་ ༥༥ (55 million tonnes) བཙོང་ཡོད། 

བདག་གིས་ཐོག་མར་ཤིང་ཏོག་འདི་སློབ་གྲྭའི་སྒོ་འགྲམ་ནས་ཉོས་ཏེ་དྲི་མར་སྣུམ་པས་གསེབ་དྲིའམ། གཡའ་དྲི། ཡང་ན་རུལ་དྲི་ཡིན་སྙམ་ལྟ་བུའི་དྲི་མ་མཚར་པོ་ཞིག་གིས་ཤིང་ཏོག་སྔོ་རྡོག་རྡོག་འདི་ཟ་རྒྱུའི་ཡི་ག་འགགས། རྒྱ་གར་བ་རྣམས་ཤིང་ཏོག་འདི་ཟ་དགའ་བ་རིག་ནས། རྒྱ་གར་བའི་ལུས་ལ་གསེབ་དྲིའམ་གཡའ་དྲི་ལྟ་བུའི་དྲི་མ་ངན་པ་ཞིག་ཁ་བ་ཤིང་ཏོག་འདི་དང་འབྲེལ་བ་འདུག་དྲན་མྱོང་། ཡིན་ན་ཡང་བདག་གི་གྲོགས་པོ་ཚོས་ཀྱང་བལ་པོའི་སེའུ་ཧ་ཅང་ཞིམ་མདོག་གིས་ཟ་བ་བརྟེན་ནས། རང་བཞིན་གྱིས་ཟ་སྙིང་འདོད་པ་ཞིག་ཏུ་གྱུར་ཏེ། མཐར་ང་ཡང་བལ་པོའི་སེའུ་ལ་དགའ་ཞིང་ལོབས་པར་གྱུར།

བལ་པོའི་སེའུ་ལ་ཕྱི་མདོག་ལྗང་ཁུ་དང་དམར་ནག་གི་རིགས་ཡོད་ཀྱང་། རྒྱ་གར་ན་ཡོད་པ་དེ་ཕྱི་མདོག་ལྗང་ཁུ་ཅན་དེ་ཡིན། བལ་པོའི་སེའུ་ལྗང་ཁུ་ལ་སྨིན་ན་ཁོག་དམར་པོར་འགྱུར་འགྲོ་བ་དང་། ཁོག་དཀར་པོར་འགྱུར་བའི་རིགས་གཉིས་ཡོད། རོ་སྐ་བ་དང་མངར་ཤས་ཆེ། ནང་ན་འབྲུ་ཆུང་ཆུང་དཀར་པོ་མཁྲེགས་པོ་མང་། ཕྱིའི་མདོག་སེར་ཤས་སུ་གྱུར་པ་སྨིན་པའི་རྟགས་ཡིན།

སྤྱི་ལོ་ ༢༠༢༡ ཟླ་ ༥ ཚེས་ ༩ ཉིན།