བར་སྐོར་གླིང་།

སོག་མདའ།

བསང་དུད་བར་སྣང་ལ་འཁྲིགས་པའི་བར་སྐོར་གླིང་།།
མཆོད་མེ་སྐར་ཚོགས་བཞིན་སྒྲོན་པས་བར་སྐོར་གླིང་།།
དར་ལྕོག་རླུང་བུ་ཡིས་འཕུར་བའི་བར་སྐོར་གླིང་།།
གཙུག་ལག་གསེར་འོད་ཀྱིས་མཆེད་པ་བར་སྐོར་གླིང་།།
ཇོ་བོའི་བྱིན་རླབས་ཀྱིས་མཐུག་ས་བར་སྐོར་གླིང་།།
མ་ནི་ཡིག་དྲུག་ནི་འདྲེན་ས་བར་སྐོར་གླིང་།།
མ་ནི་འཁོར་ལོ་ནི་སྐོར་ས་བར་སྐོར་གླིང་།
ཕྱག་འཚལ་སྡིག་སྒྲིབ་དེ་འདག་ས་བར་སྐོར་གླིང་།།
དགེ་བའི་སྐོར་ཕྱག་ནི་བྱེད་ས་བར་སྐོར་གླིང་།།
རྒྱ་བོད་རྡོ་རིང་དེ་འགྱིངས་ས་བར་སྐོར་གླིང་།།
བོད་པའི་བཙན་པོ་ཡི་ཕ་ས་བར་སྐོར་གླིང་།།
ཐོན་མའི་བོད་ཡིག་དེ་བཟོ་ས་བར་སྐོར་གླིང་།།
མགར་གྱི་བློ་རིག་དེ་བཀྲ་ས་བར་སྐོར་གླིང་།།
མཁས་དབང་ཉི་ཟླ་ལྟར་འཁྲུངས་ས་བར་སྐོར་གླིང་།།
བརྒྱ་ཚོགས་སྟོང་འདུས་གྱི་ཚོང་ས་བར་སྐོར་གླིང་།།
འདྲ་མིན་མི་རིགས་དེ་འདུས་ས་བར་སྐོར་གླིང་།།
སྐད་རིགས་འདྲ་མིན་དེ་གླེང་ས་བར་སྐོར་གླིང་།།
ཆོལ་གསུམ་བོད་རིགས་དེ་འདུས་ས་བར་སྐོར་གླིང་།
ཁམས་པའི་གཟི་བྱུར་དེ་བཙོང་ས་བར་སྐོར་གླིང་།
ཨ་མདོའི་འབྲི་མར་དེ་བཙོང་ས་བར་སྐོར་གླིང་།།
དབུས་པའི་གོས་གདན་དེ་བཙོང་ས་བར་སྐོར་གླེང་།།
ཤ་མོག་ཞིམ་པོ་དེ་ཟ་ས་བར་སྐོར་གླིང་།།
བོད་ཇ་སྣུམ་པོ་དེ་འཐུང་ས་བར་སྐོར་གླིང་།།
བོད་ཀྱི་ཚོང་རྫས་ཀུན་འཛོམས་པ་བར་སྐོར་གླིང་།།
བོད་ཀྱི་གླུ་གཞས་ཀྱི་ཕ་ས་བར་སྐོར་གླིང་།།
བོད་ཀྱི་རིག་གནས་ཀྱི་ལྟེ་བ་བར་སྐོར་གླིང་།།
བོད་ཀྱི་ལྷ་བྲིས་ཀྱི་གནས་ཆེན་བར་སྐོར་གླིང་།།
བོད་ཀྱི་གཟིམས་སྤོས་ཀྱི་འབྱུང་གནས་བར་སྐོར་གླིང་།།
ཕེབས་ན་ཡིད་སེམས་ནི་དགའ་ས་བར་སྐོར་གླིང་།།
བསྐོར་ན་སྡུག་སྒྲིབ་ནི་དག་ས་བར་སྐོར་གླིང་།
མཇལ་ན་བསོད་ནམས་ནི་བསོགས་ས་བར་སྐོར་གླིང་།།
མཐོང་ན་མིག་ཟུང་གི་དགའ་སྟོན་བར་སྐོར་གླིང་།།
ཁ་བ་གངས་ཅན་པའི་ཕ་ས་བར་སྐོར་གླིང་།།
འཛིན་མའི་སྐྱེ་བོ་ཀུན་འཁོར་བའི་བར་སྐོར་གླིང་།།