གཞུང་པ་ཚེ་དབང་བསོད་ནམས།
རྒྱལ་ཁབ་དང་མི་རིགས་ལ་དཀའ་སྡུག་དང་དར་རྒུད་ཀྱིས་ལོ་རྒྱུས་སོགས་ལ་ཞིབ་ཏུ་དཔྱད་སྐབས་བོད་ས་མཐོ་འཛམ་གླིང་ས་ཡིས་ཡང་རྩེ་རུ་ཆགས་པའི་ཧི་མ་ལ་ཡིས་ཁྱག་རོམ་ཁྲོད་བོད་ཡུལ་གངས་རིའི་བསྐོར་བའི་གངས་ལྗོངས་ཆོས་སྲིད་གཉིས་ལྡན་གྱིས་ཞིང་ཁམས་ཕན་དང་བདེ་བ་མ་ལུས་པ་འབྱུང་བའི་གནས་ལྷ་ཡུལ་ས་ལ་འཕོས་འདྲའི་བོད་ཡུལ་དེ་སྤྱི་ལོ་ ༡༩༤༩ ནས་བོད་ཤར་ཕྱོགས་མདོ་ཁམས་སྨད་ནས་འགོ་བཙུགས་ནས་རྒྱ་ནག་ཀླ་ཀློའི་དམར་དཔུང་རྒྱང་བསྐྱོད་ཀྱིས་བསམ་སྦྱོར་ངན་པའི་དྲག་དཔུང་གིས་བོད་ནང་བཙན་འཛུལ་རྒྱ་བསྐྱེད་ཀྱིས་མཐར་སྤྱི་ལོ་ ༡༩༥༩ ལོར་བོད་ས་ཡོངས་རྫོགས་རྒྱ་ཡིས་བཙན་འོག་ཏུ་ཚུད་ཀྱང་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༧ སྤྱི་ནོར་༧ གོང་ས་༧ སྐྱབས་མགོན་ཆེན་པོ་མཆོག་བོད་བསྟན་སྲིད་མི་རིགས་དང་བཅས་པའི་མགོན་དང་དཔུང་གཉེན་དམ་པར་རྒྱ་གར་འཕགས་པའི་ཡུལ་དུ་༧ ཞབས་སོར་བཀའ་དྲིན་བསྐྱངས་ནས་བོད་མི་བཙན་བྱོལ་བའི་དཀའ་ངལ་སེལ་སླད་གནས་ཡུལ་རྒྱ་གར་གཞུང་དང་ཕྱི་རྒྱལ་རོགས་ཚོགས་ཁག་ལ་རོགས་རམ་ཐབས་ཚོལ་གྱིས་བོད་ས་མཐོ་ས་ནས་འབྱོར་བའི་བོད་མི་རྣམས་རང་ཡུལ་ནས་ཉིན་མཚན་མེད་པར་གངས་རི་དང་། རྫ་རི། བྲག་རི། གཡའ་རི། ཆུ་རོང་སོགས་མི་མེད་ལུང་སྟོང་བརྒྱུད་ནས་ནང་མི་བུ་ཕྲུག་དང་། ཕ་མ། གཉེན་སྤུན་དང་བཅས་པ་ཁ་བྲལ་ནས་ཁ་ཕོར་ཙམ་ཡང་ཁྱེར་རྒྱུ་མེད་པ་ལུས་ལ་གང་གྱོན་པ་ལས་གྱོན་གོས་བརྗེ་ལེན་ཙམ་ཡང་མེད་པའི་ཛ་དྲག་གི་དུས་ཚོད་ངན་པའི་ནང་བོད་མི་རིགས་ཀྱིས་ལས་དབང་རྡོལ་ནས་རྒྱ་གར་དུ་འབྱོར་ནས་གནས་སྐབས་འཚོ་བསྟེན་རྒྱ་གར་བྱང་ཤར་ཁུལ་ལམ་བཟོ་རྒྱུགས་ནས་ཉིན་ལྟོ་ཉིན་ཚོལ་ལ་མགོ་ཕུད་ཙམ་ནས་༧ གོང་ས་མཆོག་དང་ཁོང་གི་བཀའ་ཤག་ལྷན་རྒྱས་དང་རྒྱ་གར་དབུས་གཞུང་དང་མངའ་སྡེ་གཞུང་ཕྱི་རྒྱལ་རོགས་ཚོགས་ཁག་བཅས་ཀྱིས་རོགས་རམ་འོག་བོད་མི་བཙན་བྱོལ་བ་ཚོའི་འཚོ་རྟེན་ཆེད་བཟོ་གཞིས་ཀྱིས་སྒོ་སྐབས་གནང་ནས་རིམ་པས་ལམ་བཟོའི་དཀའ་ཚེགས་ལས་གྲོལ་ནས་བཟོ་གཞིས་ཁག་དང་། སོ་ནམ་གཞིས་ཆགས་ཁག ཆོས་སྒར་ཁག སློབ་གྲ་ཁག རྒན་གསོ་ཁང་། དྭང་སློབ་སོགས་གང་ལ་ཅི་དགོས་ཀྱིས་འཚོ་བའི་མདུན་ལམ་བསྐྲུན་ནས་བཙན་བྱོལ་གྱི་ནམ་ཟླའི་དཀའ་སྡུག་ལས་གྲོལ་ནས་ཡར་རྒྱས་ཀྱི་ཁ་ཕྱོགས་སུ་མདུན་བསྐྱོད་ཐུབ་པའི་ཟིན་མཐོ་ཞིག་བསྐྲུན་པའི་སྐབས་འདིར་བཙན་བྱོལ་བོད་མིའི་མང་གཙོའི་འཕེལ་རིམ་ལ་དར་རྒུད་ཀྱིས་གླེང་གཞི་ཆེན་པོ་སྤྱི་འཐུས་སྐབས་བཅུ་དྲུག་པས་གྲོས་ཚོགས་ཚོགས་དུས་བཅུ་པའི་ཐོག་ཁྲིམས་འགལ་གྱིས་གྲོས་ཆོད་ཡིག་ཆ་ཨང་ ༣༩ ཟེར་བ་དེའི་འཇུག་འབྲས་ཆེས་མཐོའི་ཁྲིམས་ཞིབ་ཁང་ནང་ཁྲིམས་ཞིབ་པ་གཅིག་ལས་མེད་པ་དང་། བཀའ་བློན་ཆ་ཚང་བསྐོ་མ་ཐུབ་པ་དང་། སྤྱི་འཐུས་སྐབས་བཅུ་བདུན་པའི་གྲོས་ཚོགས་ཚོགས་དུས་དྲུག་པ་ཡང་འཇུག་སྐྱོང་མ་ཐུབ་པའི་གནས་སྟངས་ངོ་ཚ་བོ་དང་ཐབས་སྐྱོ་བོ་འདི་དག་ནི་བཙན་བྱོལ་བོད་མིའི་ལས་དབང་དུ་བསྐོས་པའི་དར་རྒུད་ཀྱིས་ཟིན་མཐོ་གསར་པ་ཞིག་མ་འོངས་བོད་ཀྱི་མང་གཙོའི་འཕེལ་རིམ་གྱི་ལོ་རྒྱུས་ནང་སུབ་ནས་ཟུབ་རྒྱུ་མེད་པའི་ནག་ཐིག་ཞིག་ཡིན་པ་དང་། ༧ གོང་ས་མཆོག་ནས་བོད་ས་མ་ཤོར་སྔོན་བོད་ཀྱི་ཆབ་སྲིད་ལམ་ལུགས་དེ་དུས་རབས་དང་མཐུན་པའི་མི་མང་མང་གཙོའི་ལམ་ལུགས་སུ་ཁ་ཕྱོགས་རྒྱུའི་བླ་ན་མེད་པའི་དགོང་གཞི་ཡོད་ན་ཡང་རང་ཡུལ་དུ་རྒྱ་མིའི་འགོག་རྐྱེན་འོག་ནས་ལག་ལེན་མ་ཐུབ་ནའང་བཙན་བྱོལ་དུ་ཕེབས་མ་ཐག་སྤྱི་ལོ་ ༡༩༦༠ ཐམ་པའི་ལོར་ཆོལ་གསུམ་ཆོས་ལུགས་དང་བཅས་པའི་མི་མང་གི་འཐུས་མི་བསྐོ་འཛུགས་ཀྱིས་ལོ་དེའི་སྤྱི་ཟླ་དགུ་པའི་ཚེས་གཉིས་ཉིན་བཙན་བྱོལ་བོད་མིའི་མང་གཙོའི་སྒྲིག་འཛུགས་དབུ་བསྙེས་ནས་དུས་ད་ལྟ་བར་མི་ལོ་དྲུག་བཅུ་རེ་བཞི་འགྲོ་བཞིན་པ་ནི་༧ གོང་ས་མཆོག་གི་རླབས་ཆེན་གྱིས་མཛད་འཕྲིན་ཁོ་ན་ལས་བྱུང་བ་ནི་འདས་པའི་ལོ་རྒྱུས་ཀྱིས་དེབ་ཐེར་ནང་ངོ་སྤྲད་ཡོད་ལ་ད་ཆ་བཙན་བྱོལ་བོད་མིའི་སྒྲིག་འཛུགས་དེ་ད་ལྟའི་མི་མང་གིས་འཐུས་མི་སྤྱི་འཐུས་གྲོས་ཚོགས་ཀྱིས་འཐུས་མི་ཚོའི་བཅའ་ཁྲིམས་ལ་འགན་བཞེས་སྟངས་ནས་བ་མོ་དེ་ཉལ་སྟངས་ལ་བལྟས་ན་བེའུ་རྐེ་ཀྱོག་ཞིག་ཡིན་པ་ཐག་ཆོད་ཟེར་བའི་དཔེ་ལྟར་མ་འོངས་བཙན་བྱོལ་བོད་མིའི་མང་གཙོའི་སྒྲིག་འཛུགས་དེ་ཁ་ཕྱོགས་གང་དུ་འགྲོ་གི་ཡོད་ཚོད་མི་ཐིག་པའི་དུས་ཚོད་ངན་པ་ཤར་མི་སྲིད་པ་མིན་ན་བསམ་ཡོད་བློ་ལྡན་བོད་མི་ཚང་མས་མནོ་བསམ་ཞིབ་ཏུ་བཏང་ནས་སླར་ཡང་དཀའ་སྡུག་གི་ནམ་ཟླ་ནས་ཡར་རྒྱས་ཀྱི་ཁ་ཕྱོགས་ལ་འགན་འཁུར་ནས་བཙན་བྱོལ་བོད་མིའི་བཅའ་ཁྲིིམས་ལ་སྲུང་སྐྱོབས་ཐུབ་པའི་འགན་འཁུར་ཆེ་ཙམ་བཞེས་དགོས་པའི་ལྷག་བློ་ཆེན་པོས་འབོད་བསྐུལ་ཞུ་འདོད་བྱུང་།