མགོན་པོ་བསོད་ནམས།
ཀྱེ་མ་དེང་འདིར་ལྟར་སྣང་རིག་པ་ཡིས།།
རབ་རྨོངས་སྨྲ་ངན་ཝ་ཚོགས་རང་དགར་རྒྱུགས།།
ལེགས་བཤད་སྐྱེས་ཀྱིས་ཉེ་བར་འདུལ་མཁས་པ།།
སྨྲ་བའི་སེང་ཆེན་དེ་ཉིད་གཟིགས་དག་མཁྱེན།།
ལྟ་གྲུབ་ལུགས་སྲོལ་མངའ་ཁོངས་གང་ཡང་རུང་།།
རྟགས་དང་དབང་ཐང་དཔུང་ཤུགས་སོགས་མིན་པར།།
བདེན་ལུགས་བདེན་པར་སྐྱོང་བའི་སྐྱེས་བུ་གང་།།
བཀའ་བཞིན་སྤྲོ་བས་སྒྲུབ་ཅིང་བཀུར་བའི་ཡུལ།།
བདེན་པ་གཙུག་ཏུ་བཀུར་བྱེད་པ། །འཇིག་རྟེན་མཁས་པའི་སྐྱེས་ཀྱི་མཆོག།
འཇིག་རྟེན་སྒྲ་དག་ཇི་སྙེད་ལས། །བདེན་པའི་སྒྲ་ལས་སྙན་པ་གང་།།
གང་གིས་གང་ཞིག་བདེན་སྨྲ་བ། །དེ་ནི་འཇིག་རྟེན་མཛེས་པའི་རྒྱན།།
བདེན་པ་ཐབས་ཤེས་དང་མི་འབྲལ། །ཐབས་ཤེས་བདེན་པའི་མཐའ་བརྙེས་ཕྱིར།།
གང་ཞིག་བདེན་པ་ཆུང་ངུས་ཀྱང་། །འཇིག་རྟེན་རྫུན་དག་བརླག་བྱེད་ཅིང་།།
བདེན་དང་བདེན་པའི་སྟོབས་ཉིད་ཀྱིས། །ཡང་དག་ལམ་ལ་ཁྲིད་གྱུར་ཅིག །
རང་བྱུང་བཅོས་མ་ལས་རྒྱལ་ཞིང་། །དཀར་ནག་རྣམ་གཞག་ཡང་དག་འབྱེད།།
བདེན་གྲུབ་གནས་ལུགས་མཐུ་བོ་ཆེས། །གཡོ་སྒྱུའི་བསྟན་པ་ནུབ་གྱུར་ཅིག །
དེང་འདིར་རྫུན་ལ་གོམས་ཆེས་པས། །བདེན་ཞལ་མཐོང་བའི་ཡུལ་བསྐལ་ཡང་།།
སླུ་བ་མེད་པའི་བདེན་སྟོབས་མཐའ། །སྙེག་ལ་འཇིགས་མེད་གདེང་བརྙེས་ཤོག །
དངོས་རྣམས་ཀུན་ལས་སྟོབས་ཀྱི་ཕུལ། །གང་ཞིག་དྲང་ཞིང་བདེན་པ་ཉིད།།
བདེན་པའི་མགྲིན་པ་གཟེངས་མཐོ་ཞིང་། །རྫུན་གྱི་མགོ་འཕང་ཆུ་ལས་དམའ།།
གང་ལ་བདེན་པའི་དཔུང་ཡོད་ན། །དཔུང་གཞན་གང་གིས་གནོད་མི་ཚུགས།།
འཇིག་རྟེན་དག་ན་དཔུང་གི་མཆོག །བདེན་པའི་དཔུང་ཞེས་མཁས་རྣམས་གླེང་།།
གང་ཞིག་ལོག་རྟོག་མཐར་ཐུག་དང་། །སྒྲུབ་ཀྱང་འགྲུབ་དུ་མེད་པའི་དངོས།།
བདེན་པ་རྫུན་མར་སྒྲུབ་པ་དང་། །བཅོས་མས་བདེན་པའི་ཚབ་བྱེད་པ།།
རྗེས་འབྲས་བཟང་ན་ཐབས་ཡིན་ལ། །རྗེས་འབྲས་ངན་ན་གཡོ་སྒྱུར་ངེས།།
ཐབས་དང་གཡོ་ཡི་ཁྱད་པར་གཞན། །བདེན་པའི་རྩིས་ཀྱིས་ཟིན་མིན་ཉིད།།
དབང་ཐང་རིགས་རུས་འབྱོར་བ་སོགས། །གང་ཡང་མི་ཆེ་བདེན་ཉིད་ཆེ།།
གང་ལ་བདེན་པའི་ནོར་ཡོད་ན། །དངོས་གཞན་གང་གིས་མཚོན་དུ་མེད།།
རྫུན་དང་གཡོ་སྒྱུར་བརྟེན་བྱས་ཏེ། །གོང་མར་གྱུར་ཀྱང་ཆེ་དགོས་ཅི།།
བདེན་པར་གནས་པའི་དཀའ་ཐུབ་ཅན། །སྤྲང་སོགས་ཉམ་ངར་ཚུད་ཀྱང་ཆེ།།
གང་གིས་སྐབས་ཀྱི་དགོས་དབང་དང་། །འཕྲལ་སེལ་ཙམ་གྱི་རྐྱེན་གྱི་ཕྱིར།།
བདེན་ལ་སྐུར་བ་མི་འདེབས་པར། །བདེན་ཚིག་མན་ངག་སྟེན་གྱུར་ཅིག །
རྫས་སྦྱོར་སྣ་དགུའི་དུག་མཚོན་དང་། །དམག་དཔུང་བྱེ་བས་གཡུལ་བཤམ་ཡང་།།
གང་ཞིག་བདེན་པའི་བཙན་ས་ཆེ། །འཇོམས་མིན་བསྐལ་བའི་བར་དུ་གནས།།
རྫུན་གྱིས་སྡུག་དང་ངན་འགྲོར་ལྟུང་། །བདེན་པས་བདེ་དང་ཐར་ལམ་ཟིན།།
སླུ་མེད་གཤིས་ཀྱི་རྣམ་གཞག་ཆེས། །སྲིད་དང་ཞི་བའི་ངང་ཚུལ་སྨིན།།
བདེན་པར་སྨྲ་བའི་སྐྱེས་བུ་གང་། །འཇིག་རྟེན་དག་ན་ཉི་ཟླ་བཞིན།།
བདེན་པ་རྕིས་མེད་གཏོང་བྱེད་ལས། །ཉེས་ཆེན་མུན་ནག་གཞན་གང་ཞིག །
ངན་གཡོའི་བསྟན་པ་ཁ་དར་བས། །གང་ཞིག་བདེན་མཐའ་མ་གསལ་ཡང་།།
བདེན་ལ་གནས་པའི་དཀའ་ཐུབ་ཀྱིས། །རབ་དགའི་བདེ་བ་མཆོག་ཐོབ་ངེས།།
བདེན་པ་ཆུང་ཡང་རྡོ་རྗེའི་ཟེགས། །རྫུན་དཔངས་རི་བོའི་གཏོས་མཉམ་ཡང་།།
ཝུ་བ་བཞིན་དུ་སྙིང་བོས་ཕོངས། །དེས་ན་སུ་ཞིག་སྙིང་བོ་འདོར།།
གང་ལ་ཉེས་པ་གཞན་མེད་ན། །བདེན་པ་སྟེན་པས་གནོད་མི་འགྱུར།།
གང་ལ་ཉེས་པས་གོས་ན་ཡང་། །བདེན་པས་དག་ལས་གཙེ་མི་འགྱུར།།
མཆོག་དམན་གྲལ་རིམ་བདེན་པས་འབྱེད། །བདེན་པ་བཞག་ན་གང་གིས་འབྱེད།།
འཇིག་རྟེན་དག་ན་བདེན་པའི་གཤིས། །མཚོན་དུ་མེད་པའི་གནས་ལུགས་ཆེ།།
བདེན་ལ་བརྩིས་མེད་ལྟར་སྣང་དག །གཉེན་སོགས་སུས་ཀྱང་རྒྱང་དུ་འདོར།།
བདེན་ལུགས་དགྲ་ཡིས་སྐྱོང་ན་ཡང་། །དགའ་བཞིན་འཕྲལ་མར་དང་དུ་ལོངས།།
གང་ལ་བདེན་པའི་གནས་ཡོད་ན། །ལྟོས་མིན་དེ་ཡི་ཕྱོགས་སུ་ལོངས།།
སུ་ཞིག་བདེན་པའི་ཕྱོགས་སུ་ལངས། །མིར་སྐྱེས་རིན་ཐང་དོན་གོ་ཉིད།།
སྐྱེ་བོ་གང་ཞིག་བཟང་ངན་དེ། །བདེན་པར་གནས་མིན་ཁོ་ནས་འབྱེད།།
བདེན་མིན་སྐྱེ་བོས་གཞན་གང་གིས། །སྐྱོང་ཡང་མགུ་མིན་ནམ་ཞིག་སླུ།།
ཅི་འདྲའི་ཉམ་ངར་ཚུད་ཀྱང་བླ། །བདེན་པ་ནམ་ཡང་གཏོང་མིན་ཏེ།།
བདེན་ཉིད་ཉམ་ངར་མི་ལྷུང་ཞིང་།། དེ་ཡིས་ཉམ་ངའི་གཡང་ལས་སྐྱོབ།།
དྲག་ཞན་སུས་ཀྱང་བདེན་པའི་གཏམ། །བཤད་ལ་ཉེས་བ་མི་ཕོག་པར།།
བདེན་པ་དབང་བཙན་ལུགས་མཐུན་དུ། །རྟོགས་ཤིང་བདེན་པས་སྐྱོང་བ་ཤིས།།
འགའ་ཞིག་རྫུན་དང་གཡོ་སྒྱུའི་ཕྱིར། །སྲོག་སོགས་གང་ཡང་བློས་ཐོང་ན།།
བདེན་དང་བདེན་པའི་མཐའ་སྐྱོང་ཕྱིར། །མི་ཐོང་བ་ཡི་དངོས་དེ་གང་།།
གང་གིས་བདེན་ལ་རྒོལ་བྱེད་པ། །སྒོ་ངས་བྲག་ལ་བཞུས་པ་བཞིན།།
བདེན་ལ་གནས་ཤིང་སྐྱོང་བ་ནི། །ངོ་བོའི་གཤིས་ལུགས་བཀུར་བ་ཉིད།།
བདེན་འབྲས་སྨིན་ལ་མ་ལྟོས་པར། །བདེན་ལ་གནས་པ་དམ་པའི་གཤིས།།
བདེན་པར་གནས་པའི་དྲང་སྲོང་ཆེ། །འཇིག་རྟེན་ཤིས་པའི་རྒྱན་གྱི་ཕུལ།།
མི་རྣམས་བདེན་ལ་བློ་ཕྱོགས་ཤིང་། །འཇིག་རྟེན་བདེན་པས་སྐྱོང་བ་དང་།།
བདེན་པའི་དར་ཆ་མཐོ་ནས་མཐོར། །སྒྲེང་ཞིང་བདེན་ལ་ངེས་རྙེད་ཤོག།
2007ལོའི་སྤྱི་ཟླ6པའི་ནང་། ཨོ་སི་ཀྲེ་ལེ་ཡའི་ལྷོ་ཁུལ་གསར་བ། ཞི་བདེ་རྒྱ་མཚོའི་འགྲམ་གྱི་སུམ་རྩེན་གནས་མཆོག་ས་ལ་འཕོས་འདྲ་སྟེ་སེད་ནེའུ་ཞེས་ཡོངས་སུ་གྲགས་པའི་གྲོང་ཁྱེར་དུ། དེང་སྐབས་གོ་ལ་འདིའི་ཡུལ་ཁྱོན་གང་ས་ན་བདེན་པ་དང་གནས་ལུགས་ཀྱིས་ཕོངས་བཞིན་པས་ཡིད་རབ་ཏུ་དུབ་ཅིང་འདི་ལྟ་བུས་ཀྱང་རེ་ཞིག་སེམས་ཀྱི་གསོས་སུ་ཅུང་ཟད་ཕན་པར་འགྱུར་ན་ཅི་མ་རུང་སྙམ་སྟེ་བྲིས་སོ།། །།