བདེ་བའི་ངོགས་སུ་འཚེར་བའི་སྡུག་བསྔལ་གྱི་འོད།

ཀླུ་སྨྱོན།
་་་ ་་་ དགུན་ཟླ་རིང་མོ་ཞིག་བསུ་རྩོམ།
བཞི་བརྒྱ་རྩ་བཞིའི་ནད་ཀྱིས་ཟིན་ཀྱང་སྨན་རིགས་ཟོས་ན་གསོན་པར་བཤད། །
ནམ་གུང་གདོན་འདྲེ་ངུ་བ་ཐོས་ཀྱང་གསོལ་བ་བཏབ་ན་ཕན་ལུགས་ཐོས། །
ཆུ་ཟླའི་རི་མོ་རབ་རིབ་གསལ་དུས་སྙན་ངག་བྲིས་ན་ཡག་རབས་བརྗོད། །
འདི་དག་ཚང་མ་འཇིག་རྟེན་ཞིག་གིས་རང་མགོ་གཡོག་པའི་ཟློས་གར་ཉིད། །
ཆུ་ཚོད་སྐར་མ་ལོ་དང་ཟླ་བ་མི་ཚེ་འཚེམ་པའི་ཁབ་སྐུད་དེ། །
ལྷན་པ་རལ་ཞིང་རྐང་བ་མཐོང་ཀྱང་ད་དུང་ཨ་ཀྱོག་པ་ཀྱོག་ཉིད། །
ཆུ་ཁར་ཐོན་དུས་རྟ་ཁ་འཐེན་ན་ཨེན་ཙམ་མིན་པར་རང་སྲོག་འཆོར། །
དུས་ངན་འདི་ལ་སྨྱུག་མ་འབོལ་ཀྱང་ཆང་རག་ཐིགས་པ་གཅིག་མི་ལྡུད། །
ཕ་གིའི་སྨན་ཤར་མྱོས་བུམ་མཁྲངས་པས་ལག་གི་ཤོ་རྡེལ་བཟི་ན་ཡང་། །
ཕོར་པ་དགུ་ཡི་གཏམ་རྒྱུད་འཆད་དུས་ཕུ་ཐུང་ཁ་ལ་བ་མོ་ཆགས། །
བདེ་བའི་ངོགས་སུ་དྲག་ཏུ་འཚེར་བའི་སྡུག་བསྔལ་ཆེན་པོའི་འོད་རྣོན་འདིས། །
སྲོག་དང་བཅས་པའི་མི་རབས་དུ་མ་ཁྲག་དང་རྣག་གི་དམྱལ་བར་དྲུད། །
ད་ཀོ་རྒས་སམ་རྒུད་པར་གྱུར་ཀྱང་མུན་པ་ནག་པོའི་བཙོན་ཁང་དུ། །
སྒེའུ་ཁུང་གཅིག་གི་ལྕགས་དྲར་འཇུས་ནས་མིག་ཆུ་སྐམ་པོ་འཐུང་བའི་དུས། །
ཆུང་མ་མེད་ཅིང་དངུལ་ཡང་དཀོན་པའི་ལོ་དང་ཟླ་བའི་ལམ་ཆེན་དུ། །
ཚེ་གཅིག་འཁྱམས་པོའི་ལག་པ་དེ་ཡང་སེར་ག་སྟོང་གི་ས་ཁྲ་བཞིན། །
སྡུག་ཀྱང་མཆི་མ་སྐོམ་དུ་མི་འཐུང་མཛེས་མ་ཁྱེད་ཀྱི་ཤ་དྲོད་དེ། །
ལུག་རྫི་བུ་མོའི་སྨུག་པ་ཇི་བཞིན་རྒྱང་རིང་ཞིག་ནས་བན་བུན་མཐོང་། །
དེ་ཙམ་ཞིག་གིས་ཚིམ་པར་བྱའོ་ནགས་ཀླུང་སྟུག་པོའི་ཕྱི་རོལ་དེར། །
རང་ཉིད་གཅིག་པུར་དབང་ངོ་སྐད་ཀྱི་དུ་བ་ཀྱ་ཀྱུར་རི་སྐེད་འཐེན། །
མགོ་བོ་དགྱེ་ནས་གནམ་ལ་ལྟ་དུས་ཆར་ཐིགས་འགའ་རེ་གདོང་དུ་ལྷུང་། །
གློད་ཀླད་དེ་ཡང་འཁྱག་པས་གཟིར་ཏེ་ཡིག་འབྲུ་ཁ་ཤས་འདར་ཡོམ་ཡོམ། །
ལག་པའི་རྒས་གཉེར་ཕུ་ཐུང་གཡོགས་ཏེ་སྙན་པའི་གཏམ་རྒྱུད་རྩོམ་པའི་བདག །
ད་ནི་གཞི་ནས་འགུལ་ཙམ་མི་བྱེད་གཉིད་ཀྱི་རྒྱ་མཚོར་རོལ་བར་བྱ། །