བདག་ནི་སུ་ཡིན་ད་ཀོ་ཤོད།

ཟླ་བ་གཞོན་ནུས་ལེགས་སྦྱར་ལས་བསྒྱུར།

གང་གིས་རྒྱུན་དུ་སྣུམ་སྦྱིན་པ།།
དེ་ལ་རྟག་ཏུ་ཆོས་རྣམས་ཀྱི།།
ཤེས་རབ་འོད་སྣང་སྩོལ་བྱེད་པའི།།
བདག་ནི་སུ་ཡིན་ད་ཀོ་ཤོད།།

གཙང་ཞིང་དག་པའི་བདག་གི་ངོར།།
གང་ཚེ་མི་རྣམས་ལྟ་འདོད་དུས།།
ཇི་ལྟར་དགའ་དང་སྐྱོ་བ་ཡི།།
སོ་སོའི་གདོང་བཞིན་སྟོན་པར་བྱེད།།

མིག་གསུམ་ལྡན་ཡང་དབང་ཕྱུག་མིན།།
ཆུ་ཡིས་གཏམས་ཀྱང་བུམ་པ་མིན།།
ཁ་སྤུ་ཨ་ར་རྟག་ལྡན་ཡང༌།།
མི་མིན་བདག་ནི་ཅི་ཡིན་ཤོད།།

སོ་མེད་རྡོ་ནི་ཟ་བར་བྱེད།།
སྲོག་ནི་མེད་ཀྱང་སྨྲ་བ་མང༌།།
སྐུད་པའི་ཚོགས་ཀྱིས་བཙེམས་ཡོད་ཀྱང༌།།
གཞན་གྱི་ཞབས་ལ་བསྟེན་ནས་འགྲོ།།

འཕྲུལ་གྱི་ཆ་དང་ཁྱབ་འཇུག་མཚོན།།
ས་སྐྱོང་བྷཱ་ར་ཏ་ཡི་རྟགས།།
འཁོར་ནས་འགྲོ་བ་ང་རང་ཉིད།།
ཤེས་པ་སུ་ཡིན་པཎྜིཏ།།

སྤྲིན་ལྟར་ནག་ཀྱང་ནག་པོ་(ཁྱབ་འཇུག)མིན།།
གཟུགས་བོངས་ཆེ་ཡང་ལྷུན་པོ་མིན།།
སྟོབས་དང་ལྡན་ཞིང་འཇིགས་དང་བཅས།།
སྣ་ཡི་ལག་ཅན་བདག་ནི་སུ།།

གདན་དཀར་སྟེང་དུ་རྟག་རྩེན་ཞིང༌།།
མི་རྣམས་སྙིང་གི་ལྟ་ཚུལ་དག།
ཁྱད་པར་རྟགས་ཀྱིས་མངོན་བྱེད་པའི།།
གདོང་ནག་ཅན་སུ་བལྟས་ནས་ཤོད།།
སྐྱ་སེང་ཟླ་སུ་སྡུམ་རྒྱན་སུ།།

རཱ་མའི་དགྲ་སུ་ཨ་ག་སྟྱའི།།
འཁྲུངས་ས་གང་ཡིན་ཉི་མའི་བུ།།
སུ་ཡིན་ཁྱེད་ཀྱིས་མཁྱེན་ན་གསུང༌།།
ཀུནྟི་བུ་དང་རཱ་ཝཎ་དང༌།།
ཀུམྦྷ་ཀརྞ་སོགས་རྣམས་སོ།།

7།5།2010་ལ་དྲང་སྲོང་ལྷུང་བ་རི་དྭགས་ནགས་ཀྱི་འདབས་རོལ་ཏུ་གྱུར་བ་གངས་ཅན་བྷོ་ཊའི་གཙུག་ལག་སློབ་ཆེན་དུ་རྫོགས་པར་བསྒྱུར་བ་དགེའོ།།

ཁེད་འདི་དག་སུས་མ་ནོར་བར་བཤད་ཐུབ་ན་དེ་ལ་ལེགས་སྐྱེས་ཤིག་འདེགས་ངེས་ཡིན།