࿑ སྤྱི་འཐུས་སྐབས་བཅུ་དྲུག་གི་ཁྲིམས་འགལ་གྱིས་ལས་ཉེས་འོག་ནས་བཙན་བྱོལ་བོད་མིའིབཅའ་ཁྲིམས་སྦོ་ལུག་པ་སླར་གསོའི་ཆེད་བཀའ་སྤྱི་གཉིས་ནས་དམིགས་བསལ་ཚོགས་ཆེན་བསྐོང་དགོས་པ།

གཞུང་པ་ཚེ་དབང་བསོད་ནམས།

སྤྱི་འཐུས་སྐབས་བཅུ་གཅིག་གི་ཁྲིམས་བཟོའི་འགན་ཁུར་བླངས་ནས་སྤྱི་ལོ་ ༡༩༩༡ སྤྱི་ཟླ་ ༦ པའི་ཚེས་ ༢༨ ཉིན་བཙན་བྱོལ་བོད་མིའི་བཅའ་ཁྲིམས་གཏན་འབེབས་གནང་བའི་ནང་ལེའུ་བཅུ་གཅིག་དང་དོན་ཚན་ ༡༡༥ ཡོད་པ་ནས།

ལེའུ་བཞི་པ། སྒྲིག་འཛུགས་ཀྱི་འགན་འཛིན། ལེའུ་ལྔ་པ། ཁྲིམས་བཟོའི་དབང་འཛིན། ལེའུ་དྲུག་པ། ཁྲིམས་ལུགས་དབང་འཛིན། བཅས་སྡེ་ཚན་འདི་གསུམ་བཙན་བྱོལ་བོད་མིའི་མང་གཙོའི་སྒྲིག་འཛུགས་འཛིན་སྐྱོང་གནང་མཁན་གྱི་སྡེ་ཚན་གསུམ་འགན་དབང་འདྲ་མཉམ་ཐ་དད་དུ་ཡོད་པ་ནས་མཐའ་མའི་དབང་ཆ་དེ་ཆེས་མཐོའི་ཁྲིམས་ཞིབ་ཁང་ལ་ཡོད་པ་འདི་ལྟར། བཅའ་ཁྲིམས་དོན་ཚན་རེ་དྲུག་པ། ཆེས་མཐོའི་ཁྲིམས་ཞིབ་ཁང་གི་དབང་ཚད། ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཁྲིམས་ཁང་དང་། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན། ཅེས་གསལ་བ་ནས་མཐའ་མའི་དབང་ཆ་དེ་ཆེས་མཐོའི་ཁྲིམས་ཞིབ་ཁང་ཡོད་པ་དོན་ཚན་འདིའི་གསལ་སྟོན་བྱས་འདུག་ན་དབང་པོ་ནུས་མེད་ཞིག་ཡིན་ན་ལས་དེ་མིན་དབང་པོ་ནུས་ལྡན་ཚང་མས་ཤེས་ཐུབ་པ་དང་། མཐོང་ཐུབ་པ། གོ་ཐུབ་པ། ཉན་ཐུབ་པ་ཞིག་ཀྱང་རེད། སྤྱི་འཐུས་སྐབས་བཅུ་དྲུག་གིས་ཁྲིམས་འགལ་གྱི་ཐོག་ནས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནུས་མེད་དུ་བཏང་བ་འདི་མ་འོངས་བོད་ཀྱིས་ལོ་རྒྱུས་ནང་སུབ་ནས་ཟུབ་རྒྱུ་མེད་པའི་ལོ་རྒྱུས་ཀྱིས་ནག་ཐིག་བཀོད་པ་འདིའི་འགན་སྤྱི་འཐུས་སྐབས་བཅུ་དྲུག་ནས་ཁྱེར་དགོས་པ་དང་། ད་ཆ་འཛིན་སྐྱོང་སྡེ་ཚན་དང་། ཁྲིམས་བཟོ་སྡེ་ཚན་ལས་ཁྲིམས་ལུགས་དབང་འཛིན་ཆེས་མཐོའི་ཁྲིམས་ཞིབ་ཁང་ནང་ཁྲིམས་ཞིབ་པ་གཅིག་ལས་མེད་པ་ནས་བཙན་བྱོལ་བོད་མིའི་བཅའ་ཁྲིམས་ནས་བཀུར་བའི་མང་གཙོའི་ཀ་བ་གསུམ་འགན་དབང་འདྲ་མཉམ་ཐ་དད་དུ་གནས་ནས་བཙན་བྱོལ་མི་མང་གིས་འཚོ་བའི་ལས་གཞི་དང་འབྲེལ་བའི་བདེ་སྡུག་སོགས་ལ་འགན་འཁུར་མཁན་གྱི་མང་གཙོའི་ཀ་བ་གཙོ་བོ་དེ་མེད་པ་ནས་དབུས་བོད་མིའི་སྒྲིག་འཛུགས་ཀྱིས་ལས་དོན་བྱེད་ཕྱོགས་ལ་མཛད་དཀའ་ག་ཚོད་བཟོས་ཡོད་བཅའ་ཁྲིམས་དོན་ཚན་རེ་དྲུག་པ། ཆེས་མཐོའིཁྲིམས་ཞིབ་ཁང་གི་དབང་ཚད། ཟེར་བ་ནས་གསལ་པོ་ཤེས་ཐུབ་དགོས་པ་འདི་ལྟར།

༡ ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཁྲིམས་ཁང་དང་། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན།

༢ བཙན་བྱོལ་དུ་གནས་རིང་གནས་ཡུལ་རྒྱལ་ཁབ་སོ་སོའི་ཁྲིམས་འོག་ཏུ་གནས་དགོས་སྟབས་ནག་ཉེས་དང་མཁར་དབང་རྩོད་རྙོག་གི་ཁྲིམས་ཞིབ་བྱ་རྒྱུར་འབྲེལ་བ་མེད་ནའང་གཙོ་ ཆེར།

ཀ བཙན་བྱོལ་བོད་མིའི་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་ཕྱོགས་ལ་བརྟེན་པའི་རྩོད་གླེང་དང་།

ཁ བོད་མིའི་སྒྲིག་འཛུགས་ཀྱི་འགན་འཛིན་ལས་ཁུངས་སམ། ལས་བྱེད་པས་ལས་དོན་བྱེད་ཕྱོགས་། དྲང་བདེན་བྱུང་མིན་ལ་བརྟེན་པའི་རྩོད་གླེང་།

ག བོད་མིའི་སྒྲིག་འཛུགས་ཀྱི་ལས་བྱེད་ཁག་གི་ལས་དོན་དང་། ཁེ་ཕན་རྗེས་འབྲེལ་གྱི་རྩོད་གླེང་།

ང བོད་མིའི་སྡོད་སྒར་ཁག་གི་ས་ཁང་སྐོར་གྱི་རྩོད་གླེང་།

ཅ བོད་མིའི་སྤྱི་ཚོགས་ཀྱི་རྩོད་རྙོག་དང་། སྤྱི་ཚོགས་ཀྱི་བདེ་འཇགས།

ཆ གོང་གསལ་དོན་ཚན་ཁག་ནང་མ་གསལ་བའི་རྩོད་གཞི་ཁག་བཅས་ལ་གཟུ་བོའི་ཚུལ་གྱིས་ཁྲིམས་ཞིབ་ཐག་གཅོད་བྱ་རྒྱུ་དང་།

ཇ གཞན་ཡང་ཁྲིམས་ཞིབ་ཁང་འོག་མ་རྣམས་དང་། ཁྲིམས་དོན་དང་འབྲེལ་བའི་ལས་ཁུངས་ཁག་གི་ལས་དོན་བྱེད་ཕྱོགས་དང་། འཛིན་སྐྱོང་གི་བྱ་བར་ཞིབ་འཇུག་ལམ་སྟོན་དང་། སྟངས་འཛིན་བྱ་རྒྱུའི་དབང་ཆ་ཡོད།

ཅེས་གསལ་བ་ནས་གོང་གི་དོན་ཚན་དེ་དག་ཆེས་མཐོའི་ཁྲིམས་ཞིབ་ཁང་གི་འགན་དབང་ཡིན་པ་ནས་ད་ཆ་ཆེས་མཐོའི་ཁྲིམས་ཞིབ་ཁང་དུ་ལས་དོན་བྱ་རྒྱུར་ཁྲིམས་ཞིབ་པ་གཅིག་ལས་མེད་པ་ནས་མི་མང་གི་བདེ་སྡུག་ཞུ་ས་མེད་པ་དང་མང་གཙོའི་ཀ་བ་གསུམ་བརྗིད་ཉམས་སྟངས་འཛིན་དུ་གནས་མ་ཐུབ་པ་ནི་དགྲ་དགའ་གཉེན་སྡུག་གིས་བྱ་སྤྱོད་ཙམ་ལས་གཞན་རྒྱུ་མཚན་ཅང་མཐོང་ན་ད་ཆ་བཙན་བྱོལ་བོད་མིའི་བཅའ་ཁྲིམས་དོན་ཚན་ང་དགུ་པ། དམིགས་བསལ་ཚོགས་ཆེན། ཟེར་བའི་དོན་ཚན་འདིའི་འོག་བཀའ་སྤྱི་གཉིས་ནས་དམིགས་བསལ་ཚོགས་ཆེན་འདུ་བསྐོང་གནང་ནས་ཚོགས་བཅར་བ་རྣམས་ཀྱིས་མང་མོས་ཐག་གཅོད་བརྒྱུད་ནས་བཅའ་ཁྲིམས་ལེའུ་དྲུག་པ། ཁྲིམས་ལུགས་དབང་འཛིན། ཆེས་མཐོའི་ཁྲིམས་ཞིབ་ཁང་སླར་གསོ་གནང་ནས་བཙན་བྱོལ་སྤྱི་ཚོགས་ལ་འཕྲད་པའི་ད་ལྟའི་དཀའ་ངལ་སེལ་དགོས་པ་དེ་ཕྱི་སྐྱོན་མེད་ན་ཡང་སྔ་སྐྱོན་གང་ནས་ཡོད། གཞུང་པས། ༢༠༢༣/༠༧/༠༤