བཀའ་ཡིག་རིན་པོ་ཆེའི་ཐད་ལ་མདོ་སྨད་ནས་བསམ་ཚུལ།

ཡུལ་མདོ་སྨད་ནས་ར་ཛྰ་ན་མས།

ང་ཚོས་གླེང་དགོས་པ་ནི་ད་ལོའི་སྤྱི་ཟླ་གསུམ་པའི་ཚེས་བཅུ་བཞིའི་ཉིན་རང་ཅག་གི་མགོན་དང་སྐྱབས་བླ་ན་མེད་པ་སྐྱབས་མགོན་ཡིད་བཞིན་ནོར་བུས་སྤྱི་འཐུས་ལ་གནངས་པའི་བཀའ་ཡིག་དེ་རེད།  བཀའ་ཡིག་དེ་ནི་དམངས་གཙོའི་གཟེར་ཟམ་གྱི་སྟེང་ལ་བསྣོན་པ་བཏབ་པའི་གཟི་ཡི་འཕྲ་རྒྱན་ཞིག་རེད།  མི་སུ་ཞིག་གིས་རང་གི་སྐེ་ལ་འདོགས་ཐུབ་པ་བྱུང་ན། ཚེ་བསྲིངས་ཤིང་། གེགས་མེད་པ།  ལོ་བརྒྱ་ལོན་ཞིང་།  དོན་བརྒྱ་མཐོང་བ་ཞིག་རེད།  ཁོང་གི་བཀའ་ཡིག་ལས་ཉེ་ཆར་བྱང་ཨཕ་རི་ཀ་དང་ཡུལ་ལུང་གཞན་མང་པོར་འཚེ་མེད་ཞི་བའི་ལམ་ནས་རང་དབང་དང་མང་གཙོའི་རྩོལ་སྒྲུབ་བྱས་པ་དེ་དག་བསྔགས་པར་འོས་ཤིང༌། འཚེ་བ་མེད་པ་དང༌། མི་མང་གི་ནུས་སྟོབས་ལ་ངོས་ནས་རྒྱུན་དུ་ཡིད་ཆེས་བྱེད་ཀྱི་ཡོད། བཟང་འབྲས་ཀྱི་མྱུ་གུ་འདི་དག་གསོ་སྐྱོང་གི་འབྲས་བུ་སྨིན་པའི་ལྗོན་ཤིང་དུ་འགྱུར་བའི་སྨོན་འདུན་བྱེད་དགོས། ཞེས་གསུངས་པར་མ་ཟད།  སྔོན་མ་ང་བཅུ་ང་གྲངས་ལོ་ནས་བཟུང་ཁོང་གིས་རྒྱལ་དབང་བཅུ་གསུམ་པ་ཆེན་པོའི་གསར་གཏོད་ཕྱག་རྗེས་ཀྱི་རྗེས་མཐུད་ནས་སྐུ་ངལ་བསྐྱོན་ཡོད་མོད།  མི་མང་དང་ལས་ཀྱི་སྣེ་མོ་བ་དག་གིས་བསམ་བཞིན་དུ་བཀག་པ་རེད་ཅེས་ན་ཐལ་ཆ་ཆེ་བའི་སྐད་ཆར་འགྱུར་མོད།  དད་པ་དང་དག་སྣང་གི་ལྟ་ཕྱོགས་འདྲ་བོ་འམ།  ཡང་ན་རང་རང་གི་ཕྲག་སྟེང་ལ་བབ་ན་འགན་ལྕི་བར་གྱུར་བའི་བསམ་ཚུལ་ལམ།  ཡང་ན་རང་དང་ན་མཉམ་པའི་སོ་སོའི་སྐྱེ་བོ་ཞིག་གིས་ཁོང་གི་དབང་ཆ་འཛིན་པར་ཕྲག་པ་དོག་སོགས་ཀྱི་རྐྱེན་ངན་མང་པོ་ཞིག་གིས་ཁ་རུ་ཁ་ཐུག་བྱས་ཏེ་ལམ་ལྷུང་ཉུང་ཙམ་ལས་བྱུང་མེད་མོད།  ཁོང་གིས་ཐུགས་བསྐྱེད་ལ་ཞིམ་པ་མེད་པའི་སྒོ་ནས་ནམ་རྒྱུན་ཁྱེད་ཚོས་ང་མེད་པ་ནང་བཞིན་ལས་ཀ་བྱེད་དགོས་གསུངས་པ་དང་།  ད་དུང་ད་ལྟའི་ཆར་ཁོང་བགྲེས་ཡོལ་དུ་ཆ་ཚང་བཞུགས་རྒྱུར་ཐག་གིས་བཅད་པར་མ་ཟད།  དགའ་ལྡན་ཕོ་བྲང་ཞེས་པའི་མཚན་གནས་འདི་ཡང་ཕྱིར་བསྡུ་བྱ་དགོས་པའི་དུས་ཚོད་སྨིན་པར་གསུངས་ཡོད་མོད། ཉེ་ལམ་སྤྱི་འཐུས་ཚོགས་པས་བཀའ་ལན་ཕྱིར་ཟློག་བྱས་ཏེ།  ཡར་སྐོར་མར་སྐོར་གྱིས་སྙན་ཞུ་ལྷན་པ་ཅན་མང་དག་ཅིག་ཞུས་ཡོད་ཚོད་རེད།  སྤྱིར་སྤྱི་འཐུས་ཚོགས་པ་འམ་ཁྲིམས་བཟོ་ལྷན་ཚོགས་ལ་མཚོན་ན་ཐད་ཀར་ཐག་གཅོད་བྱ་ཐུབ་པ་ཞིག་མིན་མོད།  མ་མཐའ་ཡང་གང་འཚམ་གྱིས་བོད་ཕྱི་ནང་གཉིས་ནས་གནས་ཚུལ་བསྡུ་ལེན་བྱ་དགོས་ཤིང་།  ལྷག་པར་དམངས་གཙོ་དང་ཆབ་སྲིད་ཀྱི་གོ་རྟོགས་ཡོད་པའི་མ་འོངས་པའི་བདག་པོ་ན་གཞོན་དག་ལ་ངེས་པར་དུ་གྲོས་ཁ་བསྡུར་དགོས་པ་རེད།  ཡིད་བཞིན་ནོར་བུ་ཁོང་གིས་གསུངས་པ་བཞིན་ ངོས་ཀྱིས་སྲིད་དབང་རྩིས་སྤྲོད་བྱ་རྒྱུའི་བསམ་ཚུལ་འདི་འགན་འཁུར་བྱེད་འདོད་མེད་པའམ། སེམས་ཤུགས་ཆག་པ། བོད་མིའི་བདེན་དོན་གྱི་འཐབ་རྩོད་བློས་བཏང་བ་བཅས་གཏན་ནས་མིན་པར་བོད་མི་རིགས་ཀྱི་འཕྲལ་ཕུགས་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན་པས་ཁྱེད་ཚོའི་རེ་སྐུལ་དང་ལེན་བྱ་ཐབས་མ་བྱུང་ཡང༌། གསུངས་པ་ལྟར་ང་ཚོའི་མི་རིགས་ཀྱི་འཕྲལ་ཕུགས་ཀྱི་ཁེ་ཕན་ཆེས་རྩ་བར་གྱུར་བ་ཞིག་ཡིན་སྟབས།  འདི་ལྟའི་སྐབས་སྟབས་བདེ་ཡི་ལན་བསློགས་པ་ནི་མདོ་དོན་ཅི་ཞིག་ཡིན་ནམ།  ང་ཚོའི་མི་རིགས་ཀྱི་ལས་དོན་འདི་དུས་ཚོད་མང་པོའི་རིང་དུ་གནས་དགོས་ཤིང་། གཡས་བལྟ་གཡོན་བལྟ་ངེས་ཅན་ཞིག་དགོས་པའི་རྒྱུ་མཚན་གྱིས་ལས་ཀྱི་སྣེ་མོ་བ་རེ་འགས་དག་སྣང་གིས་ངོར་བལྟས་པ་འམ།  སྔ་མོ་ནས་གོམས་ཡོད་པའི་དུངས་ཞེན་གྱི་དབང་དུ་འགྲོ་མི་རིགས་པ་ཅིའི་ཕྱིར་མ་གཟིགས་པ་ཡིན་ནམ། ངེས་པར་དུ་ང་ཚོས་དམངས་གཙོའི་ཡོངས་ཁྱབ་རིན་ཐང་ལ་རྩོད་ལེན་བྱེད་པ་དང་བསྟུན་ནས།སྐྱབས་མགོན་ཡིད་བཞིན་ནོར་བའི་ཐུགས་སུ།  མི་དམངས་ཀྱིས་འདེམས་ཐོན་བྱུང་བའི་ལས་ཀྱི་སྣེ་མོ་བ་ཐོ་ཤས་དེར་དབང་ཆ་ཡོངས་རྫོགས་སྤྲད་དེ།  ཁོང་གཤེགས་ཤུལ་ཏུ་ཡང་རང་རྐྱང་འཕེར་བའི་སྲ་བརྟན་གྱི་བཙན་བྱོལ་སྲིད་གཞུང་འདི་ཚགས་དམ་པོ་ཞིག་ཡོང་མིན་ལ་མཉམ་ཚོད་ཐེངས་ཤིག་བླངས་པ་དང་ཡང་འདྲ། ཁོང་གིས་ ྋརྒྱལ་བ་རིན་པོ་ཆེར་བརྟེན་མི་དགོས་པར་རང་ཚུགས་ཐུབ་པ་ཡོང་རྒྱུའི་གོམས་གཤིས་འཇགས་ཐབས་སུ། ལམ་སྲོལ་འདི་ད་ལྟ་ནས་ལག་བསྟར་བྱེད་རྒྱུ་བྱུང་ན་དཀའ་ངལ་འཕྲད་ཚེ་སེལ་ཐབས་སུ་ངོས་ཀྱིས་མཐུན་འགྱུར་བྱེད་ཐུབ། དེ་མིན་འདི་མུར་ལུས་ཏེ་ནམ་ཞིག་གློ་བུར་ངོས་ཀྱི་འགོ་ཁྲིད་མེད་པའི་དུས་སྐབས་ཤར་ཚེ་ཅི་བྱ་གཏོལ་མེད་ཀྱི་གནས་ཚུལ་ཞིག་ཡོང་སྲིད་པས་དེ་འདྲ་མི་ཡོང་ཆེད་ད་ལྟ་ནས་ངེས་པར་ལག་ལེན་བྱེད་དགོས་པ་དེ་བོད་མི་ཡོངས་ཀྱི་གལ་ཆེའི་ལས་འགན་ཞིག་ཏུ་གྱུར་ཡོད།བཀའ་གསུང་འདི་ལས་ལྷག་པ་ཞིག་ང་ཚོ་ལ་མི་དགོས་པ་འདྲ།  ཐུགས་བསམ་བཞེས་ས་འདི་ངས་བལྟས་ཚོད་ལ་ང་ཚོའི་ཉེ་རབས་ལོ་རྒྱུས་ཤིག་ལ་དམིགས་ཏེ་གསུངས་པ་འདྲ།  དཔེར་ན་རྒྱལ་དབང་སྐུ་འཕྲེང་བཅུ་གསུམ་པ་ཆེན་པོས་སྐུ་ངལ་མང་དུ་བསྐྱོན་ཏེ་ཆབ་སྲིད་བསྒྲིགས་འཛུགས།  ཚན་རིག་ལག་ལེན་སོགས་གང་མང་ཞིག་གསར་དུ་བསྒྲུབས་པ་མ་ཟད།  ལུང་ཤར་སོགས་གསར་ཐོན་གྱི་བསམ་བློ་ཡོད་ཤག་གི་མི་མང་པོ་ཞིག་ལས་ཀྱི་སྣེ་མོར་བསྐོས་ཏེ། ཡར་རྒྱས་མུ་མཐུད་དུ་གཏོང་འདོད་ཤུགས་དྲགས་ཀྱང་།  ཁོང་གི་སྐུ་ཚེ་འཕེན་པ་ཡིས་མ་ཟིན་པར་དགོངས་པ་རྫོགས་འཕྲལ།  སྐབས་ཀྱི་མི་དཔོན་དག་ནི་རང་རང་གི་ཁེ་དབང་ཉི་ཚེ་བ་རེ་རྩོད་འདོད་ཀྱི་སྟེང་དུ་མགོ་འཁོར་ནས་ད་གཟོད་ཡོད་ཚད་བརླགས་སོང་བ་རེད།  སྐབས་དེར་སྤྱི་མཐུན་གྱི་ལས་ལ་བསམ་བློ་གཏོང་མཁན་མེད་པ་འམ།  ཡོད་རུང་རྒྱལ་དབང་ན་རིམ་ལྟ་བུའི་བཀའ་སྲུང་མཐོན་པོ་གནང་མཁན་མེད་སོང་བས་ལན་ནམ།  ཕལ་བོས་བཤད་སྟངས་ལྟར་ན་ལས་ཀྱི་མཐུ་ཟད་པར་བསྟུན།  ཕྱི་ཡི་དགྲ་ལ་ནང་གི་འགལ་རྐྱེན་གྱིས་གྲོགས་བྱས་ཏེ་གནས་ཚུལ་འདི་ལྷག་པ་རེད།  ད་ལྟའི་སྐབས་སུ་ཡང་ཁོང་དགོངས་པ་རྫོགས་པའི་དུས་སུ་འདི་འདྲ་མི་འོང་བའི་ངེས་པ་མེད་ཅང་།  ལྷག་པར་དུ་སྔར་དང་མི་འདྲ་བར་རྒྱ་དམར་སྲིད་གཞུང་གི་གཡོ་ཇུས་ནི་ནམ་གསལ་གསལ་ཉི་མ་ཤར་ཤར་ལགས་ན།  ཆོལ་ཁ་དང་ཆོལ་ཁའི་བར། གྲུབ་མཐའ་དང་གྲུབ་མཐའི་བར།  སྤྲུལ་སྐུ་དང་སྤྲུལ་སྐའི་བར་དུ་འབྱུང་ངེས་པས་ན། ང་ཚོས་ད་ནས་བཟུང་བསྒྲིགས་འཛུགས་བརྟན་པོ་ཞིག་འོང་བའི་ཕྱིར་དུ།  དམངས་གཙོའི་གོ་རྟོགས་མེད་པའི་དམངས་ཀྱི་སེམས་སུ་ཡང་ང་ཚོའི་སྲིད་ཀྱི་དབུ་ཁྲིད་ནི་རྒྱལ་བ་རིན་པོ་ཆེ་ལས་གཞན་ཞིག་བསྐོས་ཆོག་པ་འཇགས་ཐབས་སུ།  ད་ལྟའི་བཀའ་ཡིག་རིན་པོ་ཆེའི་དགོངས་དོན་ཅི་འདྲའི་བརྩི་དགོས་པ་ལ་ཨང་།  ཟམ་གདོང་རིན་པོ་ཆེས་བཀའ་ཡིག་རིན་པོ་ཆེ་འོག་ཏུ་དགའ་རུང་སྐྱོ་རུང་ཤར་བསྐྱོད་བྱ་རྒྱུ་ཡིན་པར་གསུངས་པ་འདི་ཇི་འདྲའི་རླབས་ཆེན་ཞིག་རེད།  ང་ཚོའི་གྲོས་ཚོགས་ཀྱིས་ཀྱང་འདི་ལྟའི་དགོངས་གཞི་ཞིག་ངེས་པར་དུ་བརྩི་དགོས་པར་འདོད།  དེང་གི་སྐབས་སུ་ང་ཚོའི་དམངས་གཙོའི་གྲོས་ཚོགས་ཤིག་གི་ལས་འཛིན་པ་དག་ལ་འདི་འདྲའི་མིག་རྒྱངས་ལས་མེད་དུས། མཐའ་ཁོར་གྱི་དམངས་ཕལ་བ་དག་ནི་བཀའ་ཡིག་རིན་པོ་ཆེ་འདི་ལ་ཇི་འདྲའི་ཁས་ལེན་མེད་མཁན་གྱི་ཚོགས་ཤིག་ཡིན་ནམ།   བདག་གིས་རླུང་འཕྲིན་དང་བརྙན་འཕྲིན་ལས་བཀའ་ཁྲིའི་འོས་མི་དང་སྤྱི་འཐུས་འོས་མི་མང་པོ་ཞིག་ལ་བཀའ་ཡིག་རིན་པོ་ཆེའི་འདིའི་ཐད་ནས་བཅར་འདྲི་དང་གཏམ་གླེང་བྱེད་པ་མང་པོ་ཞིག་མཐོང་མོད།  བཀའ་ཡིག་རིན་པོའི་ཆེ་འོག་ཏུ་ཤར་བསྐྱོད་བྱ་དགོས་པ་གསུང་མཁན་ཉུང་ཉུང་རེད།  འདི་ལ་རྒྱུ་མཚན་གཞན་ཞིག་སྣང་བ་ནི་འོས་མི་གང་མང་ཞིག་ལ་འདེམས་ཤོག་རག་དགོས་སྟབས་དམངས་ཀྱི་གོ་རྟོགས་དང་བསྟུན་ནས་གཏམ་ལབ་ཡོད་ལོས་ཆེ།   གང་ལྟར་ངེད་ཀྱི་ཁོར་ཡུག་འདི་ནས་ན་གཞོན་མང་པོ་ཞིག་ལ་བློ་འཚུབ་སྐྱེས་སའི་གཞི་ནི་བཀའ་ཡིག་རིན་པོ་ཆེ་མ་ཡིན་པར།  སྤྱི་འཐུས་ཚོགས་པས་བཀའ་ཡིག་ཕྱིར་ཟློག་པ་དེ་དང་།  ཁོང་གི་མཚན་གནས་སུ་འགྱུར་བ་བཏང་ན།  རྒྱ་བོད་གྲོས་མོལ་ལ་བློ་འཚུབ་ཡོད་པའི་སྐད་ཆ་ཤོད་མཁན་དེ་དག་རེད།  རྒྱ་བོད་གྲོས་མོལ་ལ་ད་སྔའི་བར་གྲུབ་འབྲས་ཆེན་པོ་བྱུང་མེད་ལ།  ད་ལྟ་ཁོང་གིས་མཚན་གནས་ལ་འགྱུར་བ་སོང་བ་དང་ལྷན་དུ་གཞན་ཞིག་ཏུ་འགྱུར་ན་ཡང་འགྱུར་དུ་འཇུག་དགོས་པ་རེད།  དེ་ལ་སྐྲག་དགོས་གང་ཡང་མེད་པར་འདོད་དོ།།  ཞེས་ཡུལ་མདོ་སྨད་ནས།  ར་ཛྰ་ན་མས་འཕྲལ་དུ་བྲིས་པ་ལགས་པས་རྩིང་རགས་ཀྱི་ལམ་དུ་སོང་ཡོད་མོད།  སྐབས་འདིར་བསམ་བློ་ཕྱི་རུ་འདོན་ཐབས་ཙམ་ཡིན་ནོ།།