བཀའ་དྲིན་རྗེས་དྲན་གྱི་བསྟོད་དབྱངས།

ཆབ་མདོ་ངག་ཕུན།

མཁས་དབང་ཟམ་གདོང་བླ་མ་དགུང་ལོ་དོན་ལྔ་ཕེབས་པར་བཀའ་དྲིན་རྗེས་དྲན་གྱི་བསྟོད་དབྱངས།

 
བཅུ་ཕྲག་རིག་པར་བརྩོན་པ་ལྷུན་ལེན་མཛད།།
ལུང་རིག་ཐམས་ཅད་ཁོག་ཏུ་ཆུད་པར་གྱུར།།
སེ་འབྲས་དགེ་གསུམ་མཁས་དབང་འཛོམས་པའི་དབུས།།
ལྷ་རམས་དམ་འཇོག་ཀུན་རྣམས་ཡིད་དབང་འཕྲོག།

བླ་མའི་མཚན་སྙན་བློ་ཁེངས་མ་བཞུགས་པར།།
མ་འོངས་རང་རེའི་སོན་རྩ་ཁྱུ་ཚོགས་ལ།།
གནའ་དེང་ཤེས་ཡོན་སྤྲོད་རྒྱུའི་གལ་ཆེའི་གཟིགས།།
ཉིན་མཚན་ལྷོད་མེད་སློབ་ཁྲིད་ཁོ་ནར་གནང་།།

༸རྒྱལ་བའི་བཀའ་སློབ་སྤྱི་བོའི་གཙུག་ཏུ་བཀུར།།
ལེགས་སྦྱར་མཐོ་སློབ་དེ་ཉིད་སྲ་བརྟན་བཙུགས།།
རིས་མེད་གངས་ལྗོངས་བུང་བ་ཁྱུ་ཚོགས་ལ།།
ཤེས་རིག་སྐྱེས་ཚལ་འཇུག་སའི་སྒོ་མོ་ཕྱེས།།

བོང་བ་ཚོགས་ཀྱིས་ཤེས་རིག་སྙིང་བཅུད་འཐུང་།།
འདབ་གཤོག་རབ་རྒྱས་འགྲོ་དོན་ལྷོད་མེད་མཛད།།
ཕྱི་ནང་ཀུན་གྱིས་ཁྱེད་ལ་བསྟོད་དབྱངས་འབུལ།།
བཀའ་དྲིན་ཆེ་འོ་རྗེ་བཙུན་ཟམ་གདོང་མཆོག།།

སྤྱི་འཐུས་ཚོགས་གཙོའི་མཛད་འགན་ཡོངས་སུ་བཞེས།།
གནའ་དེང་མཐུན་པའི་ཁྲིམས་ལུགས་གཏན་འབེབས་དང་།།
ཁྲིམས་ལུགས་དབང་བསྒྱུར་ཚད་དང་ལྡན་པར་བསྐྲུན།།
མཁས་མཆོག་ཟམ་གདོང་མཆོག་ལ་བསྟོད་དབྱངས་ཕུལ།།

བཀའ་ཁྲིའི་ཐུགས་འགན་ཡོངས་སུ་བཞེས་གནང་མཛད།།
ལས་ཁུངས་མ་ལག་ཡུལ་ཁྲིམས་མཐུན་པ་དང་།།
རྒྱས་སྤྲོད་མེད་ཅིང་ཚགས་ཚུད་སྲ་བརྟན་གྱིས།།
ཆབ་སྲིད་འགན་དབང་འཐུས་ཤོར་མེད་པར་མཛད།།

མཐོ་དམའ་མེད་པར་ཀུན་ལ་གཅིག་ལྟར་གཟིགས།།
ཆོལ་ཁ་ཆོས་ལུགས་འཐེན་འཁྱེར་རྩ་ལྟར་འདོར།།
དྲང་ཚུགས་ལྡན་ཞིང་འགྲོ་ལ་བརྩེ་བས་གཟིགས།།
མཁས་མཆོག་ཟམ་གདོང་མཆོག་ལ་བསྟོད་དབྱངས་ཕུལ།།

ཆོས་སྲིད་བླངས་འདོར་བཀའ་སློབ་གནང་ཐེངས་རེར།།
ལེགས་བཤད་བཅུད་ཀྱིས་བདུད་རྩིའི་སྦྲང་ཆར་ཕབས།།
གཟུར་གནས་མཁས་ཀུན་ཡིད་ཀྱི་དབང་པོ་འཕྲོག།།
མཁས་དབང་ཁྱེད་ལ་བསྟོད་དབྱངས་དབང་མེད་ཤོར།།

མི་ལོ་ལྔ་བཅུ་བརྒལ་རིང་བསྟན་འགྲོའི་དོན།།
ངལ་བ་ལྷོད་མེད་བཀའ་དྲིན་བླ་མེད་བསྐྱངས།།
དགུང་ལོ་དོན་ལྔ་ཕེབས་པའི་མགོན་ཁྱེད་ལ།།
སྙིང་ནས་བཀའ་དྲིན་བསྟོད་དབྱངས་རྗེས་དྲན་ཞུ།།

སྐུ་ཚེ་ཡུན་རིང་བརྟན་ཅིང་འགྲོ་བའི་དོན།།
མཛད་འཕྲིན་ཡར་ངོ་ཟླ་ལྟར་རྒྱས་པ་དང་།།
གངས་ལྗོངས་ཞིང་ལ་རང་དབང་མྱུར་ཐོབ་ནས།།
བདེ་སྐྱིད་རྫོགས་ལྡན་གསར་པ་མྱུར་ཡོང་ཤོག།།

ཞེས་པ་འདི་ནི་ཕྱི་ལོ་ ༢༠༡༤ ལོའི་ཟླ་ ༡༡ ཚེས་ ༥ ཉིན་མོར་སྐྱབས་རྗེ་མཁས་དབང་ཟམ་གདོང་རིན་པོ་ཆེ་མཆོག་དགུང་གྲངས་དོན་ལྔ་ཕེབས་པར་བཀའ་དྲིན་རྗེས་དྲན་མཚོན་ཆེད་དུ་ཤར་མ་བྲིས་པ་ཞིག་ཀྱང་ཡིན་པས་དེ་དོན་དགོངས་འཇགས་འཚལ།