གླིང་ཚ་ཚེ་བརྟན་རྡོ་རྗེ།

 
མགོ་ནག་བོད་མི་རྩམ་གཟན་ཞིག་གི་སྐྱེ་བ་བླངས་ཏེ། མི་ལོ་བཅུ་དགུའི་ཡར་སྔོན་ཏུ་གསར་འབྱོར་སྤྱི་མཚུངས་བཞིན་རྡོག་ཁྲེས་ཤིག་ཕྲག་པར་བླངས་ནས་རང་མི་རིགས་ཀྱི་ཆོས་སྲིད་གཉིས་ཀྱི་དབུ་ཁྲིད་༧གོང་ས་མཆོག་ལ་ཞལ་མཇལ་ཞིག་བྱུང་ན་ཤི་སོང་ཡང་བློ་འགྱོད་མེད་པའི་བསམ་བློ་དང་རང་རིགས་ལ་སྲི་ཞུ་གང་ཞིག་བྱེད་འདོད་ཀྱི་ཀུན་སློང་གིས་བོད་མི་ཚོས་འཕགས་ཡུལ་ཏུ་འབོད་པའི་གནས་མཆོག་རྡ་རམ་ས་ལར་འབྱོར་བ་དང་༧གོང་ས་རྒྱལ་བའི་དབང་བོ་མཆོག་གི་ཞལ་དངོས་སུ་མཇལ་བའི་སྐལ་བཟང་དང་གསུང་དངོས་སུ་ཐོས་པའི་སྐལ་བ། གསུང་རྩོམ་བཀའ་སློབ་ཁག་ལ་རང་གི་བློ་འདོད་བཞིན་ཀློག་ཆོག་ཆོག་གི་གོ་སྐབས་ཚང་མར་ལོངས་སྤྱོད་པའི་སྐལ་བ་རླབས་པོ་ཆེ་ཐོབ་ནས། མི་ལོ་དགུ་ལྷག་གི་རིང་ཡུལ་གྱར་བའི་བདེ་སྡུག་གི་རོལ་མྱོང་གང་འཚམ་བསགས་པའི་ཐ་མར། བོད་ཡུལ་ནས་ཞི་བའི་མེ་ལྕེ་གཅིག་རྗེས་གཉིས་མཐུད་དུ་བྱུང་བ་དང་རྒྱ་ནག་གི་དཔོན་རིགས་དག་གིས་བོད་ཐོག་ལ་འཛིན་པའི་སྲིད་ཇུས་ཡོངས་སུ་རྫོགས་པ་ཚིག་དམར་རྗེན་དུ་བསྒྲགས་སྟབས། རང་ཉིད་ཕྱི་རང་དབང་གི་རྒྱལ་ཁབ་ཞིག་ནས་ལྷོད་ཀྱིས་བསྡད་ན་འགྲིག་ཐབས་མེད་པའི་བསམ་པའི་ཀུན་སློང་དང་འཚེ་མེད་ཞི་བའི་འཐབ་རྩོད་ཅིག་ལ་བརྟེན་ནས་རང་མི་རིགས་འདི་ཉིད་ལ་སྲི་ཞུ་ཞིག་བྱེད་རྒྱུའི་ཆོད་སེམས་བརྟན་པོའི་དམ་བཅའ་དང་།  བློས་གཏོང་གིས་ཞི་བའི་འཐབ་རྩོད་ཀྱི་ཆ་ཤས་ཞི་བའི་གོམ་བགྲོད་ཐེངས་དང་བོ་དྲིན་མ་ལོ་དང་ནུ་མོ་གཉིས་དང་ལྷན་འགོ་བཙུགས་ནས་ཟླ་ངོ་གཉིས་ལྷག་གི་རྗེས་སུ་ཚང་མས་མཁྱེན་གསལ་ལྟར་དོན་དག་དེ་ནི་ལམ་ལྷོང་མ་བྱུང་བར། མཐར་ང་རང་བལ་ཡུལ་གྱི་བཙོན་དུ་ལོ་ལྔ་དང་ཟླ་ལྔ།  ཉིན་ཉེར་ལྔའི་བཙོན་འཇུག་བྱེད་པར་ཐག་བཅད་མོད།  གཞུང་སྒེར་ཐུན་མོང་གི་འབད་བརྩོན་གྱི་གྲུབ་འབྲས་ལས་ང་རང་ཟླ་དགུ་མ་ཟིན་ཙམ་གྱི་རྗེས་སུ་གློད་གྲོལ་ཐོབ་པ་རེད།

ཞི་བའི་གོམ་བགྲོད་ཐེངས་གཉིས་པ་འགོ་འཛུགས་བྱས་ནས་ཉིན་མོ་བརྒྱད་ཀྱི་རིང་དུ་དྲིན་ཕ་མ་གཉིས་ཀ་མཉམ་ཞུགས་གནང་བ་དང་དེ་ཡི་རྗེས་སུ་ཞི་བའི་གོམས་བགྲོད་ནང་མཉམ་ཞུགས་བྱེད་མཁན་གྱི་ལོ་བཀག་བཀས་བཅད་ཀྱི་དབང་གིས་ཕ་མ་གཉིས་ཀ་ཕྱིར་འཐེན་གནང་རྗེས་སུ་ང་རང་གཅིག་བུར་མུ་མཐུད་དུ་ཞི་བའི་གོམ་བགྲོད་ཐེངས་གཉིས་པ་བྱས་པ་དང་ལམ་ཁར་སྐོམ་ཆུ་འཐུང་བྱེད་དང་ཁ་བཏགས་སྒྲོན་མཁན་གྱི་བོད་མི་སྒེར་བ་རེ་ཟུང་བྱུང་བ་དང་། དམིགས་བསལ་མདོ་སྨད་དབུས་ས་གཉིས་ཀྱིས་རོགས་ཕན་ག་རེ་གནང་དགོས་པ་ཡིན་ན། གྲྭ་སྒྲིག་ཨང་གསར་ཡིན་ཞེས་ཡང་དང་བསྐྱར་དུ་གསུངས་པ་དང་ལྷག་པར་ལྡི་ལིའི་མདོ་སྨད་ས་གནས་ཚོགས་གཙོ་རྟ་འགྲིན་དང་། དྲུང་ཆེ་ཆོས་འཕེལ། རྩིས་པ་བྱམས་པ་གསུམ་གྱིས་སྔ་གཞུག་ཀུན་ལ་གོམ་བགྲོད་ནང་མཉམ་ཞུགས་པ་བསུ་སྐྱེལ་གནང་བ་སོགས་ཁོང་ཚོས་རང་ནུས་གང་འཇོན་གནང་ཡོད།

ལྡི་ལི་ནས་དྲ་ཐོག་གི་སྐད་འཕྲིན་ཚོགས་པ་ཁག་ཅིག་ཆེད་དུ་ཕེབས་ནས་ང་རང་ཚོ་མཉམ་དུ་ཕེབས་མ་ཐུབ་ཀྱང་། འདི་ནི་གོམ་བགྲོད་ཀྱི་ལམ་ཁར་སྐོམ་ཆུ་རེ་འཐུང་བྱེད་དང་ཟ་མ་ཟ་བྱེད་དུ་བཞེས་རོགས་ཞེས་གསུངས་ཏེ་ཞལ་འདེབས་ཕུལ་བ་ཁ་ཤས་ཤིག་བདག་གིས་བླངས་པ་ཡིན། དེ་ནས་ཕྱི་ལོག་ན་ཡོད་པའི་བོད་མི་སྒེར་བ་མི་རེ་ཟུང་གིས་མཉམ་རུབ་ཀྱིས་ཟ་མ་ཟ་བྱེད་རེ་སྐུར་ནས་ཕེབས་པ་སོགས་ཀྱང་བྱུང་བ་དེ་དག་ལ། ངས་གོ་སྐབས་འདི་བཟུང་ནས་བཀའ་དྲིན་ཆེ་ཞུ་བ་དང་ཁྱབ་གཅིག་འབོད་སྐུལ་ཞིག་ཞུ་འདོད་པ་དེ་ནི། མ་འོངས་པར་བོད་མི་རིགས་ཀྱི་རྩ་དོན་དང་མི་རིགས་ཀྱི་བདེན་པའི་འཐབ་རྩོད་ཆེད་དུ། སྐྱ་སེར་དང་དབུལ་ཕྱུག་སུ་ཞིག་བྱུང་ནའང་ཕྱར་གྲུ་མཉམ་འདེགས་མང་ཙམ་གནོང་རོགས་ཞུ་རྒྱུ་ཡིན།

ལྡི་ལི་ནས་ཉིན་གྲངས་བཅུ་ལྷག་གི་རྗེས་སུ་རྡ་སར་གནས་སྡོད། འཚོ་བ་རང་སྐྱོང་དང་མ་བྱན་གྱི་ཕྱག་ལས་གནང་མཁན་གྱི་ཕོ་གསར་བཀྲ་ཤིས་དོན་འགྲུབ་ལགས་བདག་གི་ཞི་བའི་གོམ་བགྲོད་ནང་ཉིན་གྲངས་བཅོ་ལྔ་ཏག་ཏག་ལ་མཉམ་ཞུགས་གནང་བ་དང་དེ་ཡི་རྗེས་སུ་ང་རང་བྷེ་ཧར་མངའ་སྡེ་ནང་དུ་འབྱོར་བའི་རྗེས་སུ། ཆབ་སྲིད་བཙོན་ཟུར་སྐལ་བཟང་ཐར་ལགས་ཕེབས་ནས་རང་གིས་འཁྱོག་ཚད་ཅིག་ལ་ཕེབས་ཀྱི་ཡིན་གསུངས་ནས་བདག་གི་ཞི་བའི་གོམས་བགྲོད་ནང་མཉམ་ཞུགས་བྱས་པ་དང་།  ད་ལྟ་ཁོ་རང་དངོས་སུ་མཉམ་ཞུགས་གནང་ནས་ཉིན་གྲངས་ཉི་ཤུ་ལྷག་སོང་ཡོད་པ་རེད། ཁོང་ནི་བོད་ནང་དུ་བཙོན་ལས་སྣ་དགུའི་མནར་གཅོད་མྱངས་ཚར་བའི་མི་ཞིག་ཡིན་སྟབས། གཟུགས་པོའི་གནས་སྟངས་ཀྱང་ཧ་ཅང་སྐྱོ་ནའང་། དཔའ་ངར་ཞུམ་མེད་ཀྱི་རང་མི་རིགས་ལ་བཅིངས་པའི་སྙིང་སྟོབས་ནི་ཧ་ལས་པ་ཞིག་འདུག་པ་མ་ཟད། སེམས་ཀྱི་ངར་ཁ་ཡང་མ་ལྷོད་པར་ཁོང་གིས་ནམ་ཞིག་ང་རང་ཕྱིར་རང་གི་ཕ་ཡུལ་བོད་དུ་རོ་འཕེན་ངེས་ཡིན་གསུངས་གིན་འདུག་ལ། ད་དུང་མཉམ་ཞུགས་མུ་མཐུད་ནས་གནང་གིན་ཡོད།

ཡོ་པེའི་མངའ་སྡེ་ནང་གི་རྩྭ་མཆོག་གྲོང་དུ་འབྱོར་བ་དང་རྣམ་རྒྱལ་གྲྭ་ཚང་གི་མགྲོན་ཁང་ལས་འཁུར་བ་རྒན་ཐུབ་བསྟན་སྐལ་བཟང་ལགས་ཀྱིས་སྣེ་ལེན་གཟབ་རྒྱས་གནང་བ་མ་ཟད།  འགྲོ་ཁར་རྣམ་རྒྱལ་གྲྭ་ཚང་གིས་སྐུ་ཚབ་གནང་ནས་ངའི་ལག་པར་བཙན་གྱིས་ཧིན་སྒོར་༢༥༠༠བརྫངས་སོང་། སྐབས་དེར་རྩྭ་མཆོག་གྲོང་བར་དུ་རྡ་སའི་ཚོགས་སྐྱིད་མཉམ་སྦྲེལ་ཐུན་ཚོགས་སམ་ཚོགས་པ་བཅུ་གཅིག་གི་སྐུ་ཚབ་དབུ་མའི་ལམ་ལས་འགུལ་ཁང་གི་རྨོག་རུ་བསྟན་པ་དང་མངའ་རིའི་སྐྱིད་སྡུག་ཚོགས་པའི་ཚོགས་གཞོན་གྲགས་པ་བསམ་གཏན་གཉིས་ཀྱིས་ཡིག་ངག་གཉིས་ཐོག་ནས་རྒྱབ་སྐྱོར་ཡོད་པའི་རྣམ་འགྱུར་གསལ་བོ་དང་ལག་པ་སྟོང་མིན་ཙམ་ལ་ཟས་སོང་གི་དོད་དུ་ཡིན་གསུངས་ནས་ཨུ་ཚུགས་ཀྱིས་ཞལ་འདེབས་ཧིན་སྒོར་༡༡༠༠༠གནང་བ་བཅས་ལ་གོ་སྐབས་འདི་བཟུང་ནས་བཀའ་དྲིན་ཆེ་ཞུ་རྒྱུ་ཡིན།

དེ་རིང་གི་བར་དུ་རྒྱ་གར་གྱི་མངའ་སྡེ་ཆེན་པོ་མངའ་སྡེ་དྲུག་ཙམ་བརྒྱུད་པའི་ལམ་ཁར་སྤྱིའི་ཆ་ནས་རྒྱ་གར་ཡུལ་མི་རྣམས་པ་ནི་ཧ་ལས་པའི་ཡག་པོ་འདུག་པ་མ་ཟད། ངའི་ཞི་བའི་འབོད་ཚིག་ལྔ་ལ་རྒྱབ་སྐྱོར་ཡོད་གསུང་མཁན་ཡང་ཆེས་མི་ཉུང་བ་ཞིག་བྱུང་བ་དང་ཆབས་ཅིག་ཡུལ་མི་དཀྱུས་མ་ཕལ་ཆེ་བ་ཞིག་གིས་བོད་པ་ཟེར་བ་གོ་མ་མྱོང་བ་མ་ཟད།  ༧རྒྱལ་བ་རིན་པོ་ཆེ་ཡི་མཚན་ཡང་ཐོས་མེད་མཁན་གྱི་གྲངས་ཀ་ནི་ཧ་ལས་པའི་མང་བོ་རེད་ལ།  དེ་ཡི་གྲངས་ལ་བོད་དོན་སྐོར་འགྲེལ་བཤད་བྱེད་རྒྱུ་དེ་ནི་དངོས་ནས་ལས་སླ་བོ་ཞིག་གཏན་ནས་མ་རེད་ལ།  ཁ་ཤས་ཀྱིས་ང་ཚོ་རྒྱ་གར་གཞུང་གིས་ཁྱོད་ཚོ་ལ་རོགས་རམ་ག་རེ་བྱས་ནས་བྱེད་དགོས་པ་རེད་དམ་གསུངས་མཁན་ཡང་འདུག  རེ་ཟུང་གིས་ང་ཚོས་བོད་དོན་ལ་རོགས་པ་བྱེད་རྒྱུར་སྐྲག་སྣང་འོང་གི་འདུག  རྒྱ་ནག་ནི་སྟོབས་ཆེན་པོ་རེད་གསུངས་མཁན་ཡང་བྱུང་བ་མ་ཟད།  ཁ་ཤས་ཀྱིས་ང་ཚོ་ལ་བོད་ཀྱི་རྙོག་དྲ་དེ་དག་དགོས་དོན་མི་འདུག་ཟེར་མཁན་ཡང་འདུག

ཚགས་པར་འགོད་མཁན་དང་མི་ཉུང་བ་ཞིག་གིས་ང་རང་གིས་བོད་དོན་བདེན་པའི་འཐབ་རྩོད་ཀྱི་ཞི་བའི་འབོད་ཚིག་ལྔའི་ནང་དོན་ཇི་བཞིན་ཚགས་པར་སྟེང་དུ་བཀོད་ཀྱི་འདུག་ན་ཡང་།  རེ་ཟུང་གིས་ཞི་བའི་གོམ་བགྲོད་ཀྱི་སྐོར་གཅིག་པུ་མ་གཏོགས་བཀོད་ཀྱི་མེད་པ་དང་།  རེ་གཉིས་ཀྱིས་གནས་ཚུལ་དྲིས་ཀྱང་ཚགས་པར་ལ་མི་འགོད་མཁན་དེ་འདྲ་ཡང་བྱུང་སོང་།  གང་ལྟར་གསར་འགོད་པ་ཕལ་ཆེ་བ་ནི་དངོས་ནས་ཡག་པོ་འདུག་ལ་ང་ཚོ་ཁྱོད་ཅག་དང་མཉམ་དུ་ཡོད་གསུངས་ཀྱི་འདུག

ས་གནས་ནས་ས་གནས།  མངའ་སྡེ་ནས་མངའ་སྡེ་ནས་བརྒྱུད་དུས་སུ་རྒྱ་གར་གྱི་ཉེན་རྟོག་པ་གཅིག་གིས་ཀྱང་ང་རང་ལ་མི་འདོད་པའི་རྣམ་འགྱུར་གང་ཡང་བསྟན་མ་བྱུང་ལ། དམིགས་བསལ་གྱིས་ང་རང་ལ་ལམ་བར་ཁ་ཤས་ནས་སྐར་མ་གཉིས་གསུྱ་རིང་སྐད་ཆ་འདྲི་མཁན་མི་ཉུང་བ་ཞིག་ལ་འཕྲད་པ་དེ་དག་གི་ཁྲོད་ནས་ཁ་ཤས་ཀྱི་རོགས་རམ་ག་རེ་གནང་དགོས་ཀྱི་འདུག་གསུངས་པ་དང་།  ཁ་ཤས་ཀྱི་ངའི་མིང་དང་ས་གནས་གང་ནས་འགོ་བཙུགས་མིན་སོགས་ཡིག་ཐོག་ལ་ཕབ་པ་ལས་ཚིག་ངན་པ་གསུང་རྒྱུ་ཕར་ཞོག ད་ལོ་བོད་པ་ཞི་བའི་གོམ་བགྲོད་དུ་འགྲོ་མཁན་ཁྱོད་རང་གཅིག་བུ་མ་གཏོགས་མེད་པ་རེད་དམ་ཞེས་འདྲི་མཁན་ཡང་བྱུང་བས།  དྲི་བ་དེ་འདྲར་ང་རང་ངོ་ཚ་བ་དང་དུས་མཚུངས།  མ་རེད་ལགས། ལམ་ཁ་འདི་བརྒྱུད་དེ་འགྲོ་མཁན་ང་རང་ལས་མེད་ཀྱང་།  ཕྱི་རྒྱལ་ཡུལ་གྲུ་གཞན་དག་ན་མི་ཉུང་རེ་ཡོད་པ་དང་རྣམ་པ་འདྲ་མིན་གྱི་སྟེང་ནས་འཐབ་རྩོད་གནང་གི་ཡོད་པ་རེད་ཅེས་ཞུས་དུས།  ཁོང་་དག་གི་གདོང་ལ་འཛུམ་ལངས་ཞོར་དུ།  ང་རང་ལ་གུས་པའི་རྣམ་འགྱུར་རེ་བསྟན་ཕེབས་འགྲོ་གི།  གནས་ཚུལ་འདི་ལྟར་འདྲ་མིན་ལ་ཐུག་ཡང་།  ཉེན་རྟོག་པ་སུ་གང་གིས་ཀྱང་ང་རང་ཁྱོད་རང་ཆོག་མཆན་ཐོབ་ཡོད་དམ་ཟེར་ནས་འདྲི་མཁན་མ་བྱུང་བ་དེར་བོད་མི་ཚང་མས་བསམ་བློ་གཏོང་ས་ཞིག་མིན་འགྲོ་སྙམ་པའི་བསམ་བློ་འཁོར་མྱོང་ཡོད།

ཚ་བ་ཆེ་བ། སྐོམ་ཆུ་གཙང་མ་རེག་མིན། ཟ་མ་དུས་ཐོག་ལ་རེག་མིན།  ཉལ་ས་བདེ་བོ་རེག་མིན་དེ་དག་ནི་གནད་དོན་གཞན་ཞིག་རེད། དེ་འདྲ་མང་དུ་བྱུང་ཡང་དེ་དག་ནི་ངས་དཀའ་ངལ་ཞིག་ལ་གཏན་ནས་བརྩིས་མེད། ད་ལྟའི་བར་དུ་འདུག་ནས་གཡར་ས་མང་ཤོས་ནི་ཧིན་རྡུའི་ལྷ་ཁང་དང་། པན་རྗབ་ལྷ་ཁང་། དུར་ས། གྲོང་གསེབ། སྣུམ་ཚིགས། ས་སྟོང། ས་ཁང་གི་འགྲམ། གཞུང་ལམ་གྱི་ཟུར་སོགས་སྣ་མང་འགྲིམ་ཡང་། ངའི་ལུས་ཐོག་ལ་གས་ཆག་གང་ཡང་མ་ཤོར་བ་འདི་ནི་གཅིག་ན་༧རྒྱལ་བའི་དབང་བོའི་བྱིན་རླབས་དང་གཉིས་ན་བོད་རིགས་སུ་ཞིག་གིས་ངའི་ཕྱོགས་སུ་རྣ་བ་གཏོད་མཁན་གྱི་སྤུན་ཟླ་དག་གིས་སེམས་ཀྱི་སྨོན་འདུན་དང་ལྷ་ཆོས་སྐྱོང་སྲུང་མའི་རོགས་རམ། གསུམ་ན་དྲིན་ཕ་མ་གཉིས་ཀྱིས་བློ་བསམ་དཀར་པོས་རང་གི་བུ་མི་རིགས་ཀྱི་བདེན་དོན་ལ་སྲི་ཞུ་བྱེད་པར་ཕུལ་བ། བཞི་ན་སྐྱེ་བོ་ཕལ་བ་ང་ལ་རང་མི་རིགས་ཀྱི་བདེན་དོན་དང་༧སྐྱབས་མགོན་རྒྱལ་བའི་དབང་བོ་བོད་དུ་གདན་འདྲེན་བྱེད་པར་སྲི་ཞུ་བྱེད་པའི་བསོད་ནམ་ཕྲན་པུ་ཞིག་ཡོད་པས་རེད་སྙམ། ལྔ་ཡིན་ན་རྒྱ་གར་གཞུང་དང་ཡུལ་མི། ཉེན་རྟོག་པ་བཅས་ཀྱི་རོགས་རམ་དང་ལྟ་རྟོག་འོག་ང་དེ་རིང་བར་དུ་ཞི་བའི་གོམ་བགྲོད་ལ་གས་ཆག་མ་ཤོར་བར་སྤྱི་ལེ་ཉིས་སྟོང་༢༡༤༨དང་ཉིན་གྲངས་༨༩། མངའ་སྡེ་དྲུག་ཙམ་སོང་ཚར་ནས་མི་རིང་བར་མངའ་སྡེ་བདུན་པ་ཞིག་བརྒྱུད་ནས་རང་ཡུལ་གངས་ཅན་ལྗོངས་སུ་རང་ལུས་འདི་འཕེནཐུབ་བྱེད་དགོས་པ་དེ་ཡིན།

རང་ལུས་འདི་བོད་ཡུལ་ལ་སླེབས་ཉིན་ནས་ནམ་ཞིག་ང་རང་ལ་མཇུག་འབྲས་གསུམ་མ་གཏོགས་གང་ཡང་མེད་པ་རེད།  གཅིག་གར་སོང་ཆ་མེད། གཉིས་སྡུག་གཅོང་མནར་གཅོད་ཁྲོད་ནས་ཤི་རྒྱུ་དང་། གསུམ་ལོ་ངོ་མི་ཉུང་བ་ཞིག་ལ་ཁྲིམས་བཅད་ཀྱིས་སྡུག་ལས་སྣ་དགུ་མྱངས་ནས་རྒྱའི་བཙོན་འོག་ནས་ལུས་རྒྱུ་དེ་ཡིན།

ལམ་བར་གྱི་མི་ཁ་ཤས་ཀྱི་དྲི་བ་ནི། ཁྱོད་རང་ལ་ག་རེ་ཐོབ་ཀྱི་རེད་དམ།  ཁྱོད་རང་ལ་འགྲོ་སོང་གཞུང་གིས་སྤྲོད་ཀྱི་ཡོད་དམ།  ཁྱོད་རང་གི་རྒྱབ་དུ་མི་མང་བོ་ཏན་ཏན་ལངས་ནས་ཡོང་གི་ཡོད་རྒྱུ་རེད། ཁྱོད་རང་གཅིག་བུ་མ་གཏོགས་མེད་སོང་བ་ཅི་རེད་དམ། ཁྱོད་རང་གཅིག་བུས་གང་འཇོན་གྱི་རེད་དམ།  ཁྱོད་མི་གཅིག་གིས་རྒྱ་གཞུང་ལ་ཁ་གཏད་གང་ནས་ནུས་ཀི་རེད་དམ།  ཁྱོད་ཀྱིས་འཛམ་གླིང་གི་ཟིན་ཐོ་གཏོར་གྱི་ཡོད་དམ། ཁྱོད་རང་ཆོས་པ་ཞིག་རེད་དམ།  ཁྱོད་རང་ལ་དྲག་རྩལ་ཡོད་དམ། ཁྱོད་རང་གཅིག་བུར་འགྲོ་རྒྱུར་སྐྲག་གི་མི་འདུག་གམ།

ངའི་རྒྱབ་མདུན་གྱི་སྐད་ཆ་ཐར་ཐོར་ཚོ།  ཁོ་བོད་མི་རིགས་ཀྱི་དཔའ་བོ་རེད། ཁོ་རྒྱལ་གཅེས་པ་རེད། ཁོ་སེམས་དཔའ་རེད།  ཁོ་བླ་བཙོང་བ་རེད། ཁོ་བཙན་བྱོལ་ལོ་རྒྱུས་ནང་གི་ནག་ཅན་རེད། ཁོ་རྒྱ་ལ་མགོ་འདོགས་བྱེད་མཁན་རེད། སྐྱག་གཟན་ཁོ་ང་ཚོའི་ཞབས་འདྲེན་རེད། ཁོ་བོད་ཀྱི་གྷན་དྷི་ཆུང་ཆུང་རེད། ཁོ་ཞི་བའི་འཐབ་རྩོད་པ་རེད། ཁོ་ལ་ཁ་ཕྱོགས་མི་འདུག  ཁོ་འཐབ་རྩོད་པ་ཞིག་གཏན་ནས་མ་རེད། ཁོས་ས་མཚམས་ནས་འགྲོ་རུ་མི་འཇུག་པ་ཤེས་ཀྱང་འཁྲབ་ཀྱི་ཡོད་པ་རེད།  མང་བོ་མང་བོ་ཞིག་བཤད་ཀྱིན་འདུག དེ་ལྟར་བཤད་ལ་དགའ་བའི་མི་དག་གི་ནད་ཡམས་སམ་བཤད་ཡམས་སྣ་ཚོགས་ཤིག་ངའི་རྒྱབ་མདུན་ཀུན་ཏུ་སྐྱི་སེར་རླུང་བུ་བཞིན་འཐིབ་ཀྱི་ཡོད་ཀྱང་།  ངས་རང་མི་རིགས་ཀྱི་མི་སུ་ལའང་འཁོན་སེམས་བཅངས་མ་མྱོང་ལ།  མ་ཤི་བར་བོད་མི་རིགས་ཀྱི་བདེན་དོན་འཐབ་རྩོད་དང་༧གོང་ས་རྒྱལ་བའི་དབང་བོ་བོད་དུ་གདན་འདྲེན་ཞུ་ཆེད་དང་ཤི་བོའི་ཚོའི་ཁ་ཆེམས་ལ་རང་ནུས་གང་ཡོད་ཀྱིས་འབད་འབུངས་བྱེད་ཀྱི་ཡོད་ལ།  མུ་མཐུད་དུ་བྱེད་ངེས་པ་མ་ཟད།  ང་རང་སྟབས་མ་ལེགས་པར་གང་ཞིག་ནས་ཤི་སོང་བ་ཡིན་ཡང་།  སྐྱེ་བ་རྗེས་མར་རང་ཡུལ་བོད་དུ་སྐྱེ་ནས་བསྟུད་མར་བོད་མི་རིགས་ཀྱི་བདེན་དོན་རྩོད་མཁན་ཞིག་གི་སྐྱེ་བ་ལེན་པར་སྨོན་ལམ་ད་ལྟ་ནས་རྒྱག་བཞིན་ཡོད་ལ།  རྒྱ་བོད་ཞི་འགྲིག་གིས་འཛམ་གླིང་གི་ཁྱིམ་གཞི་ཆེན་པོའི་ནང་དུ་ཞི་བདེའི་གླིང་ཕྲན་གསར་བ་གང་མྱུར་ཡོང་རྒྱུར་རེ་བ་ཆེན་པོ་བཅངས་ནས། དེ་རིང་ང་ཀ་ལོན་སྦུག་བོད་དགོན་སྲད་རྒྱུད་གྲྭ་ཚང་གི་འགན་འཛིན་ལས་ཟུར་བ་བསོད་ནམ་རྒྱལ་མཚན་ལགས་ཀྱིས་སྣེ་ལེན་འོག་ཀ་ལོན་སྤུག་མི་མང་ལ་ཞི་བའི་འཐབ་རྩོད་ཀྱི་ཆ་ཤས་ཞི་བའི་གོམ་བགྲོད་སྔ་གཞུག་གཉིས་ཀྱི་སྐོར་ངོ་སྤྲོད་མདོར་བསྡུས་གནང་ཚར་བ་དང་ཀ་ལོན་སྦུག་བོད་དགོན་སྲད་རྒྱུད་གྲྭ་ཚང་དུ་རྒན་བསོད་ནམ་རྒྱལ་མཚན་ལགས་ཀྱིས་སྣེ་ལེན་འོག་ངལ་གསོ་བའི་སྐབས་སུ་རྒན་ལགས་ལ་ལག་ཁྱེར་གློག་ཀླད་ཅིག་གཡར་ནས།  ཞི་བའི་འཐབ་རྩོད་ཐེངས་གཉིས་པའི་སྐབས་ཀྱི་གནས་ཚུལ་རག་བསྡུས་ཤིག་ཤར་མར་ཡིག་ཐོག་ལ་ཕབ་པ་པོ་ཞི་བའི་འཐབ་རྩོད་ཀྱི་ལམ་ནང་དུ་ཞུགས་ཟིན་པའི་གླིང་ཚ་ཚེ་བརྟན་རྡོ་རྗེ་ཡིན། དེ་ནས་བདག་ལ་རོགས་རམ་དང་ཞལ་འདེབ་གནང་མཁན་གྱི་མི་སྒེར་བ་རེ་རེ་བྱས་ནས་མིང་ཐོ་བཀོད་མ་ཐུབ་པར་དགོང་འགལ་མེད་པ་ཞུ་རྒྱུ་ཡིན། ཞིབ་ཚགས་པོ་ཞིག་འབྲི་དགོས་བྱུང་ན་དངོས་ནས་འབྲི་རྒྱུ་དགའ་རབས་ཤིག་ཡོད་ཚོཔད་གདའ་ཡང་། དུས་ཚོད་ཀྱིས་མི་འདང་བ་དང་དགོས་དབང་དང་འཚམ་མིན་སོགས་ལ་བལྟས་ནས་རེ་ཞིག་འདི་ནས་མཇུག་བསྡུས་སོ།  སྤྱི་ལོ་༦།༦།༡༣།  ས་ག་ཟླ་བའི་ཚེས་༢༨་དང་གཟའ་ཕུར་བུའི་ཉིན་གུས་པ་དང་བཅས་ཕུལ།

________________________________________________

ཞར་བཀོད་གཅིག    སྒེར་བ་ཁག་གཅིག་གི་ཞལ་འདེབས།

 

མཛོ་དགེ་སྐལ་བཟང་སྦྱིན་པ། རྔ་བ་མཁས་གྲུབ། རྡོ་སྦིས་ཆོས་འཕེལ། སྨན་པ་འཇམ་དབྱངས། དོན་འགྲུབ། དམེ་བ་བསྟན་འཛིན། བླ་བྲང་སྦྱིན་པ། ཁ་ན་ཀྲར་གནས་བཞུགས་པ་ཐུན་མོང་ནས་ཧིན་སྒོར་ 13746 སྐུར་འབྱོར་བྱུང་།

རྒྱ་གར་བོད་དོན་རྒྱབ་སྐྱོར་བ་ཨན་ཀྲས་ཨ་ཤ་ནས་ཧིན་སྒོར་ 5000 གནང་།

རྩོམ་པ་པོ་ཧོར་གཙང་འཇིག་མེད་ཀྱིས་ཧིན་སྒོར་ 2000 སྐུར་འདུག

ལོན་ཌོན་གནས་བཞུགས་རྔ་བ་ཡོན་ཏན་ནས་ཧིན་སྒོར་ 8000 བསྐུར་འདུག

ནུབ་ཨ་རིའི་གནས་བཞུགས་པ་མགོ་ལོག་བརྕོན་འགྲུས་དཔལ་གཙོས་བའི་མགོ་ལོག་པ་ཁག་གཅིག་གིས་ཧིན་སྒོར་ 10000 སྐུར་འབྱོར་བྱུང་།

སྣེ་ལེན་ཁང་གི་མ་བྱན་སྐྱིད་འཛོམ་ནས་ཧིན་སྒོར་ 500 གནང་།

བོད་འབྱོར་བ་པ་སངས་ལགས་ནས་ཧིན་སྒོར་ 500 གནང་བཅས་འདིར་མཚན་མ་བཀོད་པ་རེ་ཟུང་དང་། ད་ལྟའི་བར་རིགས་ཀྱི་འདུ་ཤེས་ཀྱི་རྒྱབ་མདུན་གང་རུང་དུ་བཞུགས་པ་ཡོངས་ལ་སྙིང་ཐག་པ་ནས་བཀའ་དྲིན་ཆེ་ཞུ་ལགས།