སོག་མདའ་ནས།
ལང་ཚོ་རྒས་གཉེར་རི་ནས་སད་པའི་ཕྱི་མིག་ཅིག་གི་སོ་ཁ་ནས།།
ཚོར་འདུ་ཟབ་མོ་སློག་སློག་འཕྱུར་བའི་སེམས་ཁོང་སྙི་མོས་ཁུགས་སོ་ན།།
རི་ཆུའི་རི་མོ་མིག་ལ་ཤར་དུས་གློ་མཆིན་སྙིང་རྩ་དྲོད་ཀྱི་ཁེངས།།
བསམས་གཞིགས་རྣལ་མའི་མདའ་འཕྲིན་ཕྲ་མོ་ཕ་ཁྱིམ་དྲོན་མོའི་དབྱིངས་སུ་འཐིམས།།
སྨུག་ལོང་རི་རྩེའི་མཁའ་དབྱིངས་སྒྲིབ་ཀྱང་ཕ་ས་གོར་མོ་སྔར་ལས་མཛེས།།
སྔོ་ལྗང་གོས་ཀྱི་འདབ་མའི་གཡོགས་པའི་གཡུ་ལུང་སུམ་མདོའི་འདྲེས་ཁ་ན།།
སོག་གུར་གོར་མོ་མཐའ་ན་འདུ་བའི་གཡང་གི་སྒོ་བཞི་སླས་ན་སྐྱིད།།
འབྲི་མོའི་བཞོ་དབྱངས་དབྱངས་ལ་འགུགས་པའི་ཨ་ཅེ་འབྲོག་མོ་ལས་ལ་བྲེལ།།
ལྷིང་འཇགས་མཚན་མའི་ཟླ་ངོགས་ཉུལ་བའི་ཁེར་འགྲོ་སྟག་ཤར་དར་མ་དེའི།།
འགྱུར་ཁུགས་ལ་གཞས་དབྱངས་ལ་འཐེན་པའི་སྨན་ཤར་བུ་མོ་གཉིད་ལས་དཀྲོགས།།
རེ་སྒུག་ཞག་གི་དྲན་འཛིན་བར་ནས་ཐུག་འདོད་རོགས་ལོ་རུམ་ལ་བསུས་།།
རློན་ཤ་སྙི་་མོ་གཅིག་ལ་སྦྱར་བའི་འདོད་སེམས་འཕྲུལ་གྱི་ཟེའུ་འབྲུར་རོལ།།
མཆོད་རྟེན་དཀར་བོའི་བསྐོར་ལམ་མཐའ་ན་རྒན་རྒོན་ཁ་ཤས་འཁྱར་མ་འཁྱོར།།
བཅོལ་བའི་གསོལ་འདེབས་དབྱངས་རྟ་སྙན་མོ་དྲིལ་བའི་སྒྲ་དང་མཉམ་ཏུ་འཕུར།།
ཚོགས་ཆེན་འདུ་ཁང་གྲུ་བཞིའི་ཕུགས་ན་ཆོས་ཀྱི་དབྱངས་ཡང་ལྷང་སེ་ལྷང།།
དྲི་ཞིམ་བདུག་སྤོས་སྣ་ལ་ཞིམ་ཞིང་དད་སེམས་སྙིང་གི་དཀྱིལ་ན་འཁྱིལ།།
འཚམས་སྤྲིན་བུ་མོ་མཚར་སྡུག་ངོམ་བཞིན་རི་བོའི་ཕག་སུ་དལ་གྱིས་ཡིབ།།
རྐང་རིགས་ཁྱུ་ཚོགས་སླས་རྭར་ལོག་ནས་རྡང་ན་གཉིད་ཀྱི་ཞིང་ལ་འགྲིམས།།
ལྷབ་ལྷབ་མེ་ལྕེའི་འཁྱིལ་ཞགས་འཇམ་པོ་ཁྱིམ་ར་གོར་མོ་དཀྱིལ་ན་འཕྱོ།།
ཨ་མྱེས་རྒན་པོའི་གནའ་གཏམ་རིང་མོ་ཆད་མེད་རྩེ་ཆུའི་བཞུར་རྒྱུན་འཁྲུངས།།
དྲན་འཛིན་མཚོ་མོའི་ཀློང་ན་རྒྱུ་ཞིང་ཁྲག་རྩ་རྒྱུ་བའི་རྩ་ལམ་ནས།།
ལྟེ་ཁྲག་དྲོན་མོ་ས་ལ་བཏིང་པའི་ཕ་ས་དྲོན་མོའི་ངོ་མཚར་གཏམ།།
བྲང་གཞུང་སྙིང་གི་ཁུག་སོ་དེ་ན་ལྷོག་ལྷོག་ལྡིང་བའི་དམར་ཆུང་བཞིན་།།
བྲལ་མེད་གསལ་འདེབས་རང་ལ་བྱས་པའི་རིན་ཐང་ཞིག་གི་རྟགས་མ་ཡིན།།
༢༠༡༢་༡༠་༢༦དགོང་མོ་ཆུ་ཚོད་བཅུ་གཉིས་ཐོག་སི་ལོ་བུ་ནའི་རྒྱལ་སའ་འགྲམ་ནས།
ཁྱོད་ཀྱི་སྙན་ངག་ལ་ལྟས་པས་།
ཡིད་ངོགས་སུ་དགའ་བ་ཚད་མེད་ཞིག་སྐྱིས་བྱུང་།
སོག་མདའི་ངག་ལས་སྔན་ངག་མེ་ཏོག་ཆར་དུ་བསྙིལ་།
ཕ་ཡུལ་དྲན་པའི་སྙིང་ཆུང་དམར་པོ་དྲོད་ཅིག་འཁོལ་།
ལྷ་ཡུལ་འདི་རུ་འཕོས་འདྲའི་གངས་རི་ཕ་ས་དྲོན་མོ་ཁྱོད་།
ད་ལྟ་ས་མཐའི་ཡུལ་ནས་དྲན་པའི་རྦ་རླབས་དྲག་དུ་འཕྱོ་།