སྐར་ཆེན།
ལོ་ན་ཆུང་བའི་དུས་སུ།
ངའི་བསམ་པར།
ཕ་ཡུལ་འདི་རང་ལ་དབང་བའི་རྩེད་རྭ་ཆུང་ཆུང་ཞིག་རེད་སྙམ
ངའི་བསམ་པར།
ཕ་ཡུལ་འདི་ལྷ་སྒྲུང་གི་ཞིང་ཁམས་ཤིག་རེད་སྙམ།
ད་དུང༌།
ངའི་ཡིད་ལ།
ཕ་ཡུལ་འདི་ཨ་མའི་འཇམ་གཉེན་གྱི་ཕྱག་ཟུང་བཞིན།
ཧ་ཅང་དྲོད་ཁོལ་ལྡན་པ་ཞིག
ཧ་ཅང་བརྩེ་སེམས་གྱིས་ཁོལ་བ་ཞིག
ད་དུང༌།
ངའི་དྲན་སྣང་ལ།
ཕ་ཡུལ་གྱི་རི་ཆུ་ནགས་གསུམ་འདི།
ང་ལ་དབང་བའི་ཁྱིམ་གཞིས་ངོ་མ་དེ་ཡིན་བསམ་མྱོང༌།
ངས་ལོངས་སྤྱོད་བྱས་ཆོག་པའི་མ་འོངས་བའི་རྒྱུ་ནོར་ཡིན་བསམ་མྱོང༌།
སྡེ་འདབས་ཀྱི་རྐང་ལམ་ཕྲ་མོ་དེ།
བགྲོད་ཆོག་ཆོག་གི་རང་དབང་གི་ལམ་ཕྲན་ཞིག་རེད་བསམ་མྱོང༌།
རི་འདབས་ཀྱི་ཆུ་ཕྲན་སྔོན་མོ་དེ།
བཏུང་ཆོག་ཆོག་གི་བདུད་རྩི་བསིལ་མ་ཞིག་ཡིན་བསམ་མྱོང༌།
ད་དུང༌།
ངའི་བསམ་པར།
མགོ་ཐོག་གི་གནམ་སྔོན་པོ་འདི་དང༌།
རྐང་འོག་གི་ས་གཞི་ལེབ་མོ་འདི།
ང་ལ་དབང་བའི་ཕ་གཞིས་ངོ་མ་དེ་རེད་བསམ་མྱོང༌།
འོན་ཀྱང༌།
ང་ནར་སོན་རྗེས།
ངས་ཕ་ཡུལ་གྱི་གནམ་སྔོན་མོ་འདི་སྤྲིན་པས་བསྒྲིབས་པ་མཐོང་བྱུང༌།
ངས་ཕ་ཡུལ་གྱི་ས་དོག་མོ་འདི་གཞན་གྱིས་འཁྱེར་བ་མཐོང་བྱུང༌།
ད་དུང༌།
ངའི་མདུན་གྱི་གཞུང་ལམ་དེ་ཡང་ཉིན་རེ་བཞིན་ཇེ་ཆུང་ནས་ཇེ་ཆུང་དུ་གྱུར་སོང༌།
ངའི་རྒྱབ་ཀྱི་བྲག་རི་མཐོན་པོ་དེ་ཡང་ཉིན་རེ་བཞིན་ཇེ་དམའ་ནས་ཇེ་དམའ་རུ་གྱུར་སོང༌།
ད་དུང༌།
ཡུལ་མི་ཚོའི་བྲང་གཞུང་གི་རྐང་ལམ་ཕྲ་མོ་དེ༌།
གཞན་གྱི་རྡོག་པས་བརྫིས་སོང༌།
ཡུལ་མི་ཚོའི་སེམས་ཀྱི་ཆུ་ཕྲན་དྭངས་མོ་དེ༌།
གཞན་གྱི་ཁྲུས་གཞོང་ཆགས་སོང༌།
དེ་རིང་ཡང༌།
ངའི་ཕ་ཡུལ་འདི༌།
གཞན་གྱི་ལག་མཐིལ་ན།
ཧ་ཅང་ཉམ་ཐག་གིས་འཚོ།
ངའི་ཕ་ཡུལ་འདི།
གཞན་གྱི་རྐང་འོག་ན།
ཧ་ཅང་སྡུག་བསྔལ་གྱིས་མནར།
ད་དུང༌།
ངའི་ཡུལ་མི་རྣམས།
གཞན་ཡུལ་ལ་སྤྱུགས༌།
ས་མཐའ་རུ་འཁྱམས།
ངས་ཕ་ཡུལ་བསམ་བཞིན།
ཕ་ཡུལ་གྱི་གཏམ་རྒྱུད་གླེང༌།
ངས་ཕ་ཡུལ་དྲན་བཞིན།
ཕ་ཡུལ་གྱི་གཏམ་རྒྱུད་བྲིས།
ཐུགས་རྗེ་ཆེ། འདི་ལྟ་བུ་མུ་མཐུད་འབྲི་རོགས། ཕ་ཡུལ་གྱི་མི་རྣམས་སྙིང་རེ་རྗེ། དེ་ལས་ཀྱང་ཕ་ཡུལ་གྱི་གྲྭ་པ་ཚོ་ཡ་རེ་ང་། དགོན་པར་བསྡད་ན་དགེ་བསྐོས་ཀྱིས་དྲག་རྡུང་བྱེད། ཁྲོམ་ལ་སོང་ན་རྒྱ་དམག་གིས་གཅར་རྡུང་བྱེད། སྙིང་རྗེ། ངའི་ཁྲག་རྒྱུད་གཅིག་པའི་ཆོས་གྲོགས་འདི་ཚོ།