དྲིན་ཆེན་ཕ་ལོ།

བྱ་སྨྱོན་པ།

 

ཡུན་རིང་རེ་སྒུག་ཕར་ཚུར་སྐྱོ་བའི་མནར།།
བགྲང་བྱ་རེ་རེ་ཁད་ཀྱིས་བཞུད་པར་བརྩོན།།
མ་དག་ལས་དབང་ཟེར་བའི་ཐུ་འོག་ནས།།
དྲིན་ཆེན་ཕ་ལོ་མི་འདོད་ནད་ཀྱིས་བཟུང་།།

 
མི་ལོ་བཅོ་ལྔ་འགོར་བའི་ས་མཐའ་ནས།།
དྲིན་ཆེན་ཕ་ལོ་མཇལ་བར་ཐེངས་གཅིག་བསྐྱོད།།
ཉམ་ཐག་ཞལ་རས་འཛུམ་གྱིས་རྒྱ་གྲོལ་ཏེ།།
གཅེས་ཕྲུག་ཟེར་ནས་དགའ་ངུའི་མཆི་མ་ལྷུང་།།

 
སྐྱིད་པའི་བདེ་བ་མེ་སྟག་ཕྲ་མོ་ཙམ།།
མི་འདོད་སྡུག་བསྔལ་མདའ་དང་དུང་ལྟར་རྣོ།།
སྲི་ཞུ་ཅུང་ཙམ་བསྒྲུབ་པའི་ཟླ་ངོ་ནས།།
ཕ་ལོའི་ལུས་ཟུངས་ཟད་པར་ཤིན་ཏུ་སྐྱོ།།

 
འཆི་བདག་བཙན་པོ་སྒོ་ཁར་ཉུལ་ནས་འོང་།།
མཆིན་འབྲས་ཟེར་བ་སྐྱོབ་ཐབས་མེད་པར་གླེང་།།
ཉིན་དང་མཚན་ལ་སྲུང་བའི་སྣེ་མོ་ནས།།
བདག་གི་སེམས་ཁོང་ཉི་མ་ནུབ་པར་གྱུར།།

 
ཡུན་རིང་རེ་སྒུག་ཐོད་ལ་བཅིངས་པ་ཡི།།
མ་ཐུག་ལན་གཅིག་མཇལ་བའི་དྲིན་ཆེན་ཕ།།
སྙིང་གཏམ་དྲོན་མོ་རྫོགས་དབང་མ་བྱིན་གོང་།།
གློ་བུར་མིག་ཟུང་བཙུམ་པ་སྐྱོ་བའི་གཞི།།

 
ཕ་ལོ་བཞུད་པའི་ཐོ་རེངས་སྟག་གི་དུས།།
འོད་ཆེན་བླ་སྐར་ཤར་ཕྱོགས་འགྲོ་བ་མཐོང་།།
ཉིན་གུང་ཆར་ཟིམ་འཇའ་ཚོན་བརྩེགས་མ་ཤར།།
ཉེ་དུ་ཁྱིམ་མཚེས་སེམས་གསོ་ཡང་ཡང་གནང་།།

 
རེ་ཞིག་མཇལ་བའི་དུས་ཚོད་ཆ་ཤས་ཙམ།།
སེམས་ཀྱི་དྲན་ཤིང་གཞི་ལ་བཅུག་བྱས་ནས།།
བདག་ལ་བྱུང་བའི་ཕ་མེད་སྡུག་བསྔལ་འདི།།
འབྲི་བར་འབད་ཀྱང་མིག་ཟུང་མཆི་མས་བསྒྲིབས།།

 
འཆི་བའི་གོ་རིམ་འགྲོ་སྟངས་ཡིན་དུ་ཆུགས།།
ནང་གི་འཕྲོད་བསྟེན་གང་གི་རྐྱེན་ཡིན་ནམ།།
དྲིན་ཆེན་ཕ་ལོ་ཐེ་བའི་ཡུལ་མི་དག།
ན་ཚ་སྡུག་པོ་ཞིག་གིས་གཏོང་རབས་མེད།།

 
འཇིག་རྟེན་འཚོ་བ་སྐྱོང་བའི་ནམ་དུས་རེར།།
དཀའ་སྡུག་འབུམ་ཕྲག་མྱངས་དང་མྱོང་བཞིན་དུ།།
ཁྱིམ་གྱི་ཕྱི་ནང་འདར་བའི་རྒྱབ་གཟུགས་དེ།།
བུ་དང་ཚ་བོར་གནང་བའི་དྲན་ཤིང་ཉིད།།

བྲལ་ཁའི་ཁ་ཆེམས་སྙིང་གི་གཏར་དུ་སྦས།།
དྲན་པའི་མིག་ཆུ་བྱ་ཆུ་སྔོན་མར་འདྲེས།།
ཕ་ཡུལ་བང་ལ་ཉལ་བའི་མི་རྐྱང་ངས།།
དྲིན་ཆེན་ཕ་ལོ་ཟེར་ནས་ལན་གསུམ་འབོད།།

 
སྐྱེས་ནས་འཆི་བ་འཇིག་རྟེན་ཆོས་ཉིད་རེད།།
རྒ་བའི་སྡུག་བསྔལ་སུས་ཀྱང་འགོག་ཏུ་མེད།།
རང་གི་ཚེ་གྲོགས་བསྐྱུར་ནས་འགྲོ་བ་ལ།།
ཞིབ་ཏུ་བསམ་ན་སེམས་ཀྱིས་བཟོད་པར་དཀའ།།

 
ཞེན་ཆགས་མིག་ཟུང་བདག་གི་ན་ཟུག་ཡིན།།
ནད་བདག་བཙན་པོ་ཚེ་སྔོན་ལས་ཀྱིས་དེད། །
ཐེངས་གཅིག་འཕྲད་པའི་སྐལ་བ་ཐུང་ངུ་འདི།།
ཕ་བུའི་གྱེས་བྲལ་ཡིན་པ་སུ་ཡིས་དོགས།།

 
འཇིག་རྟེན་འདི་ལ་དྲང་སྙོམས་མི་འདུག་ཞེས།།
འཁང་ར་ཚིག་རྩུབ་གནམ་ངོར་ཡང་ཡང་འཕངས།།
བདག་གི་པང་ནས་མིག་ཟུང་བཙུམས་སོང་བའི།།
དྲིན་ཆེན་ཕ་ལོ་ནམ་ཡང་བརྗེད་དུ་མེད།།

 
ཕ་ལོའི་དགེ་རྩ་བསྒྲུབ་པའི་དོན་མ་འཁྱོངས།།
མ་ལོའི་སེམས་པ་གསོ་བའི་རྒྱུར་མ་ཉན།།
རེ་བཞག་ས་མཐར་བཅོལ་པའི་ཀླད་མེད་ང་།།
མི་ཚེ་སྟོང་ཟད་ཙམ་དུ་ལུས་ནས་ཡོད།།

 
བྱིས་པའི་དུས་ལ་ཕ་ལོའི་དྲིན་མ་ཤེས།།
ལོན་པའི་དུས་སུ་མི་ཚེ་ས་མཐར་སྐྱེལ།།
དྲན་པའི་དུས་སྐབས་ཕ་ལོ་མི་བཞུགས་པས།།
དྲན་གདུང་སྣོན་མར་གྱུར་བ་བདག་གི་ལས།།
 

དྲན་ཞིང་དྲན་པའི་དྲིན་ཆེན་ཕ་ལོ་ཁྱོད།།
བདག་གི་མིག་ལམ་ཡོངས་སུ་བཀང་བར་བྱས།།
ལས་དབང་ཟེར་བའི་ཁ་ཚིག་ཐེད་པོ་དེས།།
ཤི་གསོན་བར་ཐག་བཙན་གྱིས་ཕྱེས་སོང་ཨང་།།

 
འཇིག་རྟེན་འདི་ལ་ཞེན་ཆགས་མེད་པར་ཤོག།
རང་ཁྱིམ་འདི་ལ་མིག་ཟུང་མ་འཁྱོག་དང་།།
མ་སྨད་བུ་ཚའི་འཚོ་བ་རོལ་ནས་ཡོད།།
དྲན་གཞས་ཕྲ་མོ་རྒྱང་ནས་ཁྱོད་ལ་གཏོང་།།

 
མི་མངོན་ནམ་མཁའི་དབྱིངས་རིམ་གང་ཞིག་ཏུ།།
བདེ་བ་ཅན་ཞེས་གྲགས་པའི་ཞིང་ཁམས་ཤིག།
སེར་ལམ་ཡོད་པ་བདེན་དུ་མཆི་སོང་ན།།
དེ་རུ་མི་ཚེ་སྐྱེས་པ་ལེན་པར་ཤོག།

 
སྙན་ངག་འདི་རང་གི་དྲིན་ཆེན་ཕ་ལོའི་བཀའ་དྲིན་མཚོན་བྱེད་དུ་ཉན་པར་རེ་བའི་བརྟས་ཤིང་། ཚིག་རིས་ཙམ་གྱིས་ཡིད་སེམས་ཀྱི་གདུང་བ་དྲོངས་མི་ཐུབ་ནའང་། ཕེབས་ལམ་སྐྱེལ་མའི་ལག་བརྡ་ཞིག་གི་ཚུལ་དུ། ཁོང་གི་དགུང་ཞག་གི་ཉིན། བུ་ཆེ་བ་བྱ་གཞུང་བ་སྐལ་བཟང་ཚུལ་ཁྲིམས་སམ་བྱ་སྨྱོན་པ་རུ་འབོད་པས་སྦྱར་བའོ།། ༢༠༡༢/༩/༢༥