དྲན་སྣང་གི་ངོགས་སུ་འཚེར་བའི་མེས་པོ་དམ་པ།

དོལ་སྨྱོན།

དེ་རིང་ང་ཡི་ནམ་མཁའ་ཡོད་ཚད་སྤྲིན་པས་བསྒྲིབས་འདུག
མཐོང་སྣང་ཡོད་ཚད་མག་མོག་ནས་མག་མོག་རེད།
སྒེའུ་ཁུང་གི་ཡོལ་བ་ལས་ཇི་ཙམ་ཅེར་ནས་བལྟས་རུང་།
ཕྱི་རོལ་ན་མཛེས་སྡུག་གི་ཆ་ཞིག་མཐོང་ལམ་ན་ལྷག་མི་འདུག


སྐབས་འདི་འདྲ་ཞིག་ལ།
ང་ཡི་སེམས་ངོགས་ན་འོད་དུ་འཚེར་བའི་མེས་པོ་ཁྱོད་དྲན་འོང་།
སྤྱན་ཟུང་ལ་འཇམ་ཤ་འཁྱིལ་བའི་མེས་པོ་ཁྱོད་དྲན་འོང་།
ཁྱོད་དྲན་དུས་ང་ཡི་སེམས་ལ་ན་ཟུག་ཅིག་མཆེད་འོང་།
ན་ཟུག་དེས་ང་ཡི་སེམས་པ་ལྷོང་ལྷོང་པོར་གྱུར་པ་ཉུང་ཉུང་གཏན་ནས་མིན།


གང་ལྟར་ཁྱོད་ཕྱིན་སོང་།
ངེད་ཅག་ཤུལ་དུ་བཞག་ནས་ཕྱིན་སོང་།
ཆེས་བློ་བུར་བའི་དོན་རྐྱེན་དེས་ང་ཧད་དུ་བཅུག་སོང་།
བསམ་ལོང་དྲན་ལོང་མེད་པའི་དོན་རྐྱེན་དེས།
ང་ངུ་སྔངས་ཀྱི་ཀློང་དུ་བསྐྱལ་བ་ཐེངས་གཅིག་ག་ལ་ཡིན་ཨང་།


ཁྱོད་ཀྱིས་རྔུལ་ཆུ་དང་ན་ཟུག་མང་པོས་གསོས་པའི་ཁྱོད་ཀྱི་ཚ་བོས།
ཁྱོད་ཀྱི་ཆེས་མཐའ་མཇུག་གི་མིག་ཟུང་ལ་བལྟ་སྐལ་མ་བྱུང་།
ཁྱོད་ཀྱི་ཆེས་མཐའ་མཇུག་གི་སྐད་ཆ་ལ་ཉན་སྐལ་མ་བྱུང་།
ཁྱོད་ཀྱི་མི་ཚེའི་ཆེས་མཐའ་མཇུག་གི་སྐབས་དེར།
ཁྱོད་ལ་ཞབས་ཕྱི་དྲོན་མོ་ཞིག་གི་སྐྱེལ་མ་མ་བྱུང་།


ཁྱོད་མེད་པའི་ཁྱོད་ཀྱི་བསྟི་གནས་དེར་ང་སླེབས་དུས།
ངས་མཐོང་བ་ནི་ཁྱོད་ཀྱིས་ཚེ་གཅིག་ལ་བསྐོར་བའི་མ་ནི་ལག་འཁོར་དང་།
ཚེ་གཅིག་ལ་བསྒྲངས་པའི་ཕྲེང་བ་ཟད་པོ་གཉིས་རེད།
ད་དུང་ཁྱོད་ཀྱི་ཉལ་ཁང་སྟོང་པ་དེ་དང་ཁྱོད་ཀྱི་ཉལ་ཁྲི་སྟོང་པ་དེ་མཐོང་དུས།
ང་ཡི་སེམས་སུ་ན་ཟུག་གྲངས་མེད་ཀྱིས་བཙིར་འོང་།


ད་ལྟ་ང་ལ་ཡིད་ཆེས་ཡོད་པ་ནི།
ཁྱོད་ཉིད་བདེ་འགྲོ་གང་རུང་ཞིག་ཏུ་སྐྱེ་བ་ལེན་པ་ལས།
ངན་འགྲོ་གང་རུང་ཞིག་ཏུ་སྐྱེ་བའི་དོགས་པ་ང་ལ་མེད།


ཕེབས་རོགས་ང་ཡི་མེས་པོ་དམ་པ།
འཇིག་རྟེན་འདི་ནི་མེད་མུག་གིས་གང་བའི་སྡུག་བསྔལ་གྱི་བཙོན་དོང་ཞིག་ལགས་པས།
ཁྱོད་ནམ་ཡང་ཕྱིར་འོང་མེད་པའི་དག་པའི་ཞིང་ཁམས་ཤིག་ཏུ་ཕེབས་རོགས།
འདི་ལྟར་མི་ཡུལ་གྱི་གྲུ་གར་འཁྱམས་ཤིང་འདུར་བའི་ཁྱོད་ཀྱི་ཚ་བོས།
ཁྱོད་ལ་སེམས་གཏིང་ནས་སྐྱེལ་མ་ཞུ་བཞིན་ཡོད།