དྲན་གླུ།

ཨ་མདོ་སྐྱབས།
——-ང་ཡི་ཡུལ་ཤུལ་བ་ཡི་སྤུན་ཟླ་གང་དེར།

 
ཞོགས་པར་རྩ་མགོའི་ཟིལ་བ་མ་འཐོར་གོང་།།
ཉི་གཞོན་གསར་བའི་འོང་མདངས་མ་འཕྲོས་གོང་།།
ནང་མི་ལྷན་འཛོམས་ཞོགས་ཇ་མ་འཐུང་གོང་།།
ས་ཆེན་ཁྲོས་པའི་གཡོ་འགུལ་ཤུགས་ཀྱིས་ལྡེམ།།

ཚེ་སྲོག་གསོན་པོ་ནས་སྐྱ་རྔོད་རྔོད་བྱས།།
རྣམ་ཤེས་འཁྱམས་པོ་སྟོན་གྱི་ཤིང་བལ་འདྲ།།
དྭ་ཕྲུག་ཡུགས་སའི་ངུ་དབྱངས་དབྱར་རྔ་འདྲ།།
འདྲ་འདྲ་ཚང་མ་སྡུག་གི་དམིགས་པ་འདྲ།།

ས་ཡོམ་ཟེར་བ་གོ་ན་འཇིགས་ཡེར་བ།།
བསྐལ་བརྒྱའི་གོད་ཆག་ཐོལ་གྱིས་འཕོ་བ་བཞིན།།
གནམ་སའི་མགོ་རྟིང་ངཏན་དུ་སློག་འདྲའི་ཉམས།།
གང་ཞིག་ཉེས་སམ་ཅི་འཛོལ་བས་ལན།།

ཕུ་ནུའིརྐག་ལག་་རུས་རྐང་བརྡུངས་ནས་ཡོད།།
གཅེན་གཅུང་དོན་ལྔ་སྣོད་དྲུག་གཅུར་ནས་ཡོད།།
ལྟ་བས་མི་བཟོད་བསམ་ཡང་མི་ཕོད་པའི།།
རང་གི་ཁྱིམ་གཞི་འཇིགས་རུང་དུར་ས་ཡིན།།

ཡུལ་ལྷ་གཞི་བདག་ཟེར་བའི་ལོང་བ་གཅིག
སྐྱབས་གནས་དཀོན་མཆོག་ཟེར་པའི་འོན་པ་གཉིས།།
སླུ་མེད་རྒྱུ་འབྲས་ཟེར་པའི་སྐྱག་རྫུན་གསུམ།།
ད་ནི་ཁྱེད་ནི་ཁྱེད་དང་ང་ནི་ང།།

རྒྱ་དམར་བོད་ལ་འཁོར་བ་རྒྱུ་ཡི་དོན།།
བྱ་རྒོད་རོ་ལ་འཁོར་བ་ལྟོ་ཡི་དོན།
དམིགས་པ་སྲོག་གི་ཆེད་དུ་མ་ཡིན་དག
མདོར་ན་འདུས་ཐམས་ཅད་སྒེར་གྱི་དོན།།

གཤིན་རྗེ་རྔ་ལམ་འགང་པའི་བསྐལ་ངན་དུས།།
ལས་མཁན་བྲེལ་བའི་བཀའ་ཡི་དབང་བསྐུར་བའི།།
འདི་ཕྱི་མཉམ་གནས་བསྲེས་བློ་ཡུལ་འགོངས་དུས་འདིར།།
སྐྱབས་འགྲོའི་སྨོན་ལམ་མཐུ་ཡིས་ཅི་བྱར་ཡོད།།

རི་མགོའི་བ་ཁ་ལྟ་བུའི་འཚོ་བ་སྐྱུར་མོ།།
ཐ་མག་ཉལ་ཐ་འདྲ་བའི་དུས་ངན་ནག་པོ།།
མི་ཡུལ་རྡུལ་ལ་བརྫུས་ནས་ངར་གྱིས་སླེབས་པ།།
བཟློག་པའི་ཐབས་དང་མཐུ་ནུས་གང་ན་སྦས་ཡོད།།

ཁ་ནས་མྱུར་སྐྱོབ་ཟེར་བའི་དགྲ་དམག་དམར་པོ།།
བརྫུ་བག་ཐལ་མོ་སྦྱར་བའི་ཧོའུ་མིང་དཔོན་ཚོགས།།
ཚུལ་འཆོས་ཕྱི་ཡི་ཉམས་ཀྱིས་མྱ་ངན་བསྟན་ཡང་།།
ནང་སེམས་དགའ་མགུ་རླབས་ཕྲེང་ཤུགས་ཀྱིས་རྩེན་ཡོད།།

འདི་ནས་རྒྱང་ཐག་རིང་བའི་སྐྱེ་རྒུ་མདོ།།
སྨོན་ལམ་ཕྱག་རྒྱས་སྙིང་ལ་སྒོམ་ནས་ཡོད།།
ཚེ་འདས་ཀུན་དང་ཤུལ་ལུས་སྤུན་ཟླ་ཡོངས།།
འདི་ཕྱི་གང་དུའང་ང་ཚོ་ལྷན་དུ་ཡོད།།

ཉེས་མེད་བཀའ་ཆད་རླུང་གིས་འཁུར་དུས་དེར།།
འཇོམས་མེད་ཁྲིམས་ཆད་གཉའ་རུ་ལྷུང་དུས་དེར།།
མུན་ནག་ཡོལ་བས་ས་གཞི་བཀབ་དུས་དེར།།
བཙན་པོའི་རྒྱུད་ལ་གོད་ཆག་ལྕི་འདི་སྐྱོ།།

ཨ་མ་ཟེར་ནས་འབོད་ཁོམ་མེད་དུས་ཤིག།
བུ་ཆུང་ཟེར་ནས་བཙལ་ས་མེད་དུས་ཤིག།
རེ་བའི་མིག་ཟུང་ཁྲག་གིས་ཁེངས་པ་ཡི།།
ང་ཡི་ཕ་ཡུལ་དམྱལ་ཁམས་བསྒྱུར་འདི་ཅི།།

དཀའ་སྡུག་རྔུལ་ཆུས་ལན་བརྒྱར་བསྐྲུན་པ་ཡི།།
དྲོན་མོའི་ཁྱིམ་དང་རྩ་ཆེའི་དངོས་ཟོག་སོགས།།
ཐལ་བའི་རྡུལ་འཐིམས་པའི་ངང་ཚུལ་དག།
བསམ་ཞིང་བསམ་ན་སུ་ཡི་བཀའ་ཆད་ཡིན།།

དམར་བོ་ཁྲག་གི་མཚོ་མོ་འཁྱིལ་བ་གཅིག།
མི་རོ་ཐང་མར་བརྡལ་བའི་འཇིགས་རྔམ་གཉིས།།
མཐོང་བའི་ལམ་ལ་མངོན་སུམ་སྣང་བ་འདི།།
འཛམ་གླིང་འཁྲུག་ཆེན་གང་གི་གཡུལ་ས་ཡིན།།

སྔོན་ཆད་རྨི་ལམ་ནང་དུ་མ་འཁོར་བ།།
ཕྱིན་ཆད་དྲན་པའི་ཀློང་ནས་མི་བརྗེད་པས།།
གོད་ཆག་སྟོང་འདུས་དུས་ངན་ཡ་ང་བ།།
མཐོང་ན་གཤིན་རྗེ་ལས་མཁན་ཡིན་ཡང་འཇིགས།།

སིལ་མ་བཅུ་གཉིས་འདས་པོའི་བཙན་པོའི་རྒྱུད།།
ཆོལ་གསུམ་ཡོངས་ལ་ཁྱབ་པའི་བོད་རིགས་ཀུན།།
དགའ་ན་དགའ་བའི་དགོད་སྒྲ་ལྷན་དུ་ཡོང་།།
སྡུག་ན་སྡུག་གི་མཆི་མའང་བསྡོངས་ནས་ཡོད།།

རྒ་བ་སྐྱེ་རྒུ་ཟེར་བའི་དུར་ཐང་ན།།
ཆོལ་གསུམ་ཀུན་ནས་འདུས་པའི་རུས་ཞེན་ཅན།།
ཕ་ཤུལ་བུ་འཛིན་དམ་བཅའ་བླངས་ནས་ནི།།
གཅིག་སྒྲིལ་ལས་ལ་བརྩོན་འདི་ཨེ་མ་རྨད།།

བསྟན་འཛིན་སྐྱེ་བོ་གྲྭ་བ་བཙུན་མའི་ཚོགས།།
སྡུག་གི་མུན་པས་གནམ་ས་བཀང་དུས་དེར།།
རིགས་རུས་གཅིག་པའི་འདུ་ཤེས་ཟབ་མོ་ཡི།།
གཞན་ཕན་སྒྲུབ་ལ་དཔའ་འདི་ཨེ་མ་མཚར།།

ལས་འབྲས་གོ་ལྡོག་དྲག་ཆར་བབས་གྱུར་ཀྱང་།།
བག་འཁུམས་བློ་ཡིས་གཉའ་ནི་མ་ཞུམ་པར།།
གཅིག་སེམས་གཅིག་གིས་གསོ་བའི་བརྩེ་འདང་གིས།།
སྐྱིད་སྡུག་མཉམ་མྱོང་བྱེད་འདི་དགའ་བའི་གཞི།།

སྙིང་སྟོབས་དགུ་འགྱུར་སྲོག་གི་དབང་བོ་ལ།།
རྣམ་དཔྱོད་རིག་པའི་བློ་གྲོས་ཆེར་བསྐྱེད་ནས།།
བོད་ས་ཕྱི་ནང་ལྷན་དུ་འཛོམས་བྱས་ཏེ།།
མགྲིན་དབྱངས་གཅིག་གིས་སྨོན་ལམ་བཏབ་སྟེ་མཆོག།

༧གོང་ས་མཆོག་དང་༧རྒྱལ་བ་ཀརྨ་པ།།
ཐུགས་སྨོན་དྲག་པོས་འདས་པའི་གཤིན་པོ་ལ།།
ཆོས་ཀྱི་རྫོངས་པ་ཤུལ་ལུས་མི་དམངས་ལ།།
མཁོ་རྒུ་བསྩལ་ནས་སྡུག་བསྔལ་དྲུངས་ནས་ཕྱུང་།།

འཛམ་གླིང་ཤར་ནུབ་ཀུན་གྱི་གངས་ཅན་རིགས།།
མ་གྲོས་གཅིག་མཐུན་དང་བླངས་ལས་བྱས་ཏེ།།
ཤོག་དངུལ་ཕོན་ཆེན་ལྷན་དུ་བསྡུས་ནས་ནི།།
བོད་གསར་སྐྱོང་ལ་བྲེལ་བའི་ལས་འདི་འཚེངས།།

ཁ་སང་འདས་བའི་ང་ཡི་སྙིང་གི་སྤུན།།
སྡུག་གི་མུན་པ་གཏན་དུ་སངས་གྱུར་ཏེ།།
ཕྱི་མའི་ཡུལ་ནས་ལན་གཅིག་ཕྱིར་གཟིགས་དང་།།
ཤུལ་ལུས་ཁྱིམ་གཞི་སླར་གསོ་བྱེད་ལ་བྲེལ།།

སྟོན་གྱི་སྡོང་ལོ་ཟགས་པའི་དུས་ཚིགས་དེ།།
མི་རྟག་ཆོས་ཉིད་སྟོན་པའི་བརྡ་དོན་ཡོན།།
ས་ཡོམ་དྲག་པོའི་གཏོར་བཤིག་མཐའ་དག་ཀྱང་།།
སྔོན་བསགས་ལས་ཀྱི་འབྲས་བུར་བསམ་པར་རིགས།།

ཡུན་རིང་འགྲོགས་ན་ཚེ་འདིའི་བྱ་གཞག་ཀུན།།
མི་སྐྱོ་བྱ་བ་གཅིག་ཀྱང་ཡོད་མ་ཡིན།།
དགེ་ཆོས་དམ་པས་ལུང་དུ་བསྟན་པ་འདི།།
སྡུག་བསྔལ་བྱུང་བའི་མི་ལ་སྨན་དུ་བསྔགས།།

སྐྱེ་རྒ་ན་འཆི་སུས་ཀྱང་ལྡོག་ཐབས་མེད།།
འདུས་བྱས་ཐམས་ཅད་མི་རྟག་ཆོས་ཉིད་ཡིན།།
དུས་ཀྱི་སྔ་རྗེས་མ་གཏོགས་ནམ་ཞིག་ཚེ།།
བསགས་པའི་དངུལ་དང་གཅེས་པའི་སྲོག་ཀྱང་འདོར།།

བསམ་ཞིང་བསམ་ན་འཇིག་རྟེན་མི་ཡུལ་འདིར།།
སྐྱིད་སྡུག་འཚོ་བ་རླབས་ཀྱི་རེས་མོས་བཞིན།།
ཚེ་ཐུང་མི་ཚེར་སྟར་ཕྲེང་བསྒྲིགས་པ་ཡི།།
དགའ་སྐྱོ་མི་རྟག་རྩྭ་མགོའི་ཟིལ་བ་འདྲ།།

སྔོན་ཆད་སློབ་གྲར་ཡོད་དུས་ཤིག་ལ་བྲིས་བ་ཞིག་དེ་རིང་དུས་དྲན་དང་བསྟུན་ནས་འདིར་སྤེལ་ཡོད།