“དྲ་སྒང་གི་ཆོས་བཤད”ཀྱི་ལྷན་ཐབས་ཤིག

མགར་རྡོར།

 
གང་ཡང་ཚད་མས་གཞལ་བའི་འཇིག་རྟེན་ན།།
བདེན་བདེན་འདྲ་བའི་གནས་ལུགས་མང་མོད་ཀྱང་།།
གནད་ལ་ཁེལ་དུས་རང་གི་གྲིབ་མ་ལས།།
ཡིབ་པའི་ས་ཞིག་རྙེད་གི་མེད་ཚོད་འདྲ།།

དགེ་སྦྱང་མགོ་རག་སྟོན་པ་གོའུ་ཏོམ་གྱི།།
རྗེས་འཇུག་ཡིན་སྐད་ཀླུ་སྒྲུབ་ཡབ་སྲས་སོགས།།
ནང་པའི་མཁན་པོ་གསེར་གྱི་རི་འདྲ་ཚོས།།
ཡང་དག་གནས་ལུགས་རིག་པས་འདི་ལྟར་འཚོལ།།

ཆོས་ལ་ཀུན་རྫོབ་དོན་དམ་གཉིས་སུ་དབྱེ།།
དོན་དམ་སྟོང་ཉིད་ཀུན་རྫོབ་སྣང་བར་བསྙད།།
ཀུན་རྫོབ་སྣང་བར་སྒྲུབ་བྱེད་སྟོང་པ་ཉིད།།
དོན་དམ་སྟོང་ཉིད་འཚོལ་བྱེད་ཀུན་རྫོབ་ཆོས།།

“དཔྱད་པ་མཐའ་ལ་ཐུག་ནས་མེད་དམ་སྙམ།།
ལག་པ་ཁབ་ལ་འཕྲད་ནས་ཡོད་དམ།།”
ཀུན་རྫོབ་མ་ཐུབ་དོན་དམ་རྒྱབ་རྩར་དྲུད།།
དོན་དམ་མ་ཟིན་ཀུན་རྫོབ་རྐུབ་ནས་ཤོར།།

ཟབ་མོ་དོན་དམ་ནམ་མཁའི་དབྱིངས་ལ་བཞེད།།
ནམ་མཁར་ཚོར་རེག་མེད་པས་ཐང་རེ་ཆད།།
ངེས་མེད་ཀུན་རྫོབ་སྒྱུ་མའི་སྣང་བར་འདོད།།
སྣང་བ་མངོན་སུམ་མཐོང་བས་ཡ་རེ་མཚན།།

ཡབ་ཆེན་ཚད་མ་ཡིན་ཞེས་བུ་ཡིས་བསྟོད།།
བུ་ཆུང་གླེན་པ་རེད་ཅེས་ཕ་ཡིས་སྨད།།
ཡབ་ཆེན་རང་ཚུགས་མ་ཐུབ་བུ་ལ་ཁེན།།
བུ་ཆུང་རང་མགོ་མ་ཐོན་ཡབ་ལ་འབྱར།།

རྫུན་གྱི་ཆུང་མ་བདེན་པའི་ཁྱོ་ཡིས་བསུས།།
བདེན་པའི་བུ་ཆུང་རྫུན་གྱི་མངལ་ལས་འཁྲུངས།།
ཕ་མ་བུ་ཚས་སྦྲེལ་བའི་གནས་ལུགས་འདི།།
ཨ་ཁུ་ཀླུ་སྒྲུབ་ཚང་གི་ཉལ་ས་རེད།།

རྟེན་འབྲེལ་རིག་པ་ཤར་ནུབ་ཀུན་གྱིས་བཞེད།།
རྒྱུ་འབྲས་ཙམ་ཞིག་ཆོས་ལུགས་སྡེབ་པོས་འདོད།།
ལྟ་བའི་རྒྱལ་བོ་རང་བྱུང་ཆོས་ཉིད་དང་།།
ཀུན་རྫོབ་དོན་དམ་ཡིན་པ་ཁོ་བོའི་ལུགས།།

རྒྱུ་དང་རྐྱེན་གྱི་མྱུར་བགྲོད་གཞུང་ལམ་སྟེང་།།
རྒྱུ་དང་རྐྱེན་ཞེས་ཚང་མས་འུར་མོད་ཀྱང་།།
རྒྱུ་དང་རྐྱེན་དེ་རང་རང་ཁེན་ས་ལས།།
རྒྱུ་རྐྱེན་དོན་ལ་རྙེད་མཁན་ངས་མ་མཐོང་།།

རྒྱུ་ལ་བརྟེན་ནས་བྱུང་བས་རྟེན་འབྲེལ་ཞེས།།
ཞྭ་སེར་མཁན་པོས་མགོ་བོ་དགྱེ་དགྱེ་བྱེད།།
རྟེན་དང་བརྟེན་པ་སྤྲོས་མཐའ་བྲལ་ལོ་ཞེས།།
མི་ཕམ་བླ་མས་ངར་ངར་རྫིག་རྫིག་བྱེད།།

ལྟོས་ནས་བཅས་པས་ལྟོས་བཅས་རིག་པ་ཞེས།།
ཡོ་རོབ་སི་ཏན་མཁན་པོས་འཇིགས་འཇིགས་བྱེད།།
གཅིག་ལས་སྣ་མང་འཕེལ་བས་འཕེལ་འགྱུར་ཞེས།།
ཏྭར་ཝན་རྒན་པོས་སྐེ་ཐི་རིང་རིང་བྱེད།།

རྒྱུ་དང་རྐྱེན་དེ་ལྟ་བ་ཀུན་པོའི་ལམ།།
ལམ་གྱི་སྣེ་མོར་རྒྱུ་དང་རྐྱེན་དེ་མེད།།
རང་བྱུང་ཆོས་ཀྱི་གཤིས་ཀྱིས་བཀོད་པ་འདི།།
ལམ་གྱི་སྣེ་མོར་འགྲེངས་པའི་གནས་ལུགས་ཡིན།།

ཆོས་ཀྱི་གཤིས་ལ་ཀུན་རྫོབ་དོན་དམ་མེད།།
རྒྱུ་དང་རྐྱེན་ཡང་ལམ་གྱི་བདེན་པ་ཙམ།།
གང་ཞིག་དངོས་པོའི་གཤིས་ལ་ཉེ་བ་དེ།།
བདག་གི་ལྟ་བ་རང་བྱུང་ཆོས་ཉིད་ཡིན།།