གོ་འཇོ། བསོད་ནམས་ནོར་བུ།
དེ་རིང་ནི་ 3: 10 དུས་དྲན་ཟེར་བའི་འཇིགས་རུང་ཡ་ངའི་ཉི་ནག་དེ་ཡོལ་ནས་ཉིན་ཞག་ལྔ་ལ་ཉེ། བདག་ནི་ཞག་པོ་དེ་དག་གི་རིང་རྣ་བ་ཀྲོང་ཀྲོང་བྱས་ཏེ་རྒྱབ་ལ་ཉན། མིག་གིས་འབུར་འབུར་བྱས་ཏེ་མདུན་ལ་བལྟས་པས་བོད་པ་ཚོས་ལུས་ཕྱུ་པ་གོན། ལག་དར་ཆ་འཕྱར་བཞིན་རྒྱ་ནག་གི་གཞུང་ཚབ་ཁང་གང་ཡོད་ཚ་ཚ་འུར་འུར་གྱིས་ངོ་རྒོལ་སྐད་འབོད་འདྲ་མིན་བྱས་ཏེ་བསྡད་སོང་།
ང་ལ་མཚོན་ན་རྒྱ་གར་འབྱོར་ཏེ་མི་ལོ་བརྒྱད་དགུ་ཙམ་གྱི་ནང་། དེ་ནི། སྤྱི་ཟླ་3 ཚེས་10 གང་ཡིན་ལ་རྒྱུན་ལྡན་མཐོང་དུ་ཡོད་པའི་ལོ་རེའི་ལས་འགུལ་ཞིག་ཡིན་སྟབས་དམིགས་བསལ་ཅི་ཡང་མ་ཚོར་མོད། ན་ཉིན་ནས་ད་ལོ། ད་ལོ་ནས་ཁ་སང་། ཁ་སང་ནས་དེ་རིང་བར་ལོ་ཟླ་འདི་དག་རིང་། བོད་མིའི་སྲིད་བྱུས་ནི་”རྫུན་ཨ་བྲའི་རྔ་མ་གཉིས་ནི་ཇེ་ཐུང་”ཟེར་བའི་དཔེ་ལྟར།
དང་པོ། གཞི་ལྟ་བ་ལངས་ཕྱོགས།
གཉིས་པ། ལམ་ལས་འགུལ་སྤེལ་སྟངས།
གསུམ་པ། འབྲས་བུ་རྒྱལ་ཁ་ལེན་ཕྱོགས་བཅས་ལ་བསམས་ན། སེམས་སྐྱ་མོ་ཐང་ལ་ལྷུང་འགྲོ་ཞིང་། སྙིང་དམར་པོ་དུམ་བུར་གས་དགོས་པའི་ཚོད་དུ་འདུག འདི་དག་གི་མཚན་གཞི་ཡག་ཤོས་ཤིག་ནི། ལོ་གཅིག་གཉིས་ཀྱི་སྔོན་ཏེ། གཞུང་འབྲེལ་མིན་པའི་ཚོགས་པ་ལྔའི་ལྟ་བ་དང་དམིགས་འདུན་བཅས་ནི་བརྒྱད་ཅུ་རྒན་པོའི་འགྲམ་སོ་བཞིན་ཁ་འཐོར་དགུ་འཐོར་གྱུར་ཅིང་། བོད་ཀྱི་གཞོན་ནུ་ཚོགས་པ་ཟེར་བ་ཕྱི་དགྲ་བོ་ཞེད་དགོས་ཤིང་། ནང་སྤུན་ཟླ་དགའ་དགོས་སའི་ཚོགས་པ་དེ་ཕུ་དཀྲུག་མདའ་དཀྲུག་གིས་སྒོ་རྒྱག་ལ་ཁད་བྱེད་དགོས་བྱུང་བ་དེ་ཚོ་རེད།
དེ་ལས་ཐབས་སྡུག་པ་གཅིག་ནི། ཁ་སང་སུམ་བཅུའི་དུས་དྲན་ཐེངས་ 56 པ་ས་གནས་ནེའུ་ཡོག་ལ་བརྩི་སྲུང་བྱེད་སྐབས། ཁ་ནས་རང་བཙན་གྱི་འབོད་སྒྲ་གྱེར་མི་ཆོག་ཅིང་། ལག་ཏུ་རང་བཙན་གྱི་འཕྲེད་དར་འཕྱར་མི་བཅུག་པ། ཕྱི་རྒྱལ་བ་ཚོའི་མདུན་ན་ཞི་ལ་ཙི་ཙི་སྡང་བ་བཞིན་གཅིག་ཤོར་གཉིས་ཤོར་གྱིས་སྤུན་ཟླ་ནང་ཁུལ་འཛིང་རྩོད་ཤོར་བ་དེེ་རེད། འདི་དག་ནི་སྡང་དགྲ་བོས་གོ་ན་ཁོག་དགོད་ཤོར་ཞིང་། གཉེན་ཕུ་ནུས་རིག་ན་མིག་ཆུ་འཐོར་དགོས་པའི་དགྲ་དགའ་གཉེན་སྡུག་གི་བྱ་ངན་བསུབ་ཏུ་མེད་པ་དག་དག་རེད།
མ་གཞི་སུམ་ཅུའི་དུས་དྲན་ནི། མེ་མདའི་ཁ་འོག་ནས་བཞུད་ཟིན་པའི་སྤུན་ཟླ་རྣམས་ལ་མྱ་ངན་རྗེས་དྲན་དང་། རྒྱ་དམར་དགྲ་བོ་ལ་ང་ཚོ་འདས་པོ་ཚོའི་ཁ་ཆེམས་དང་དམིགས་ཡུལ་ཆེད་ད་དུང་གསོན་ཡོད་ཅེས་བརྡ་ལན་སྤྲད་པའི་ཉི་མ་གཅིག་ཡིན། ལོ་གཅིག་གི་ཉི་མ་གཅིག་པུ་དེ་ཡིན། ཉི་མ་གཅིག་གི་ལས་འགུལ་ཙམ་ལ་ཕུ་ནུའི་ངོ་གདོང་རླུང་ལ་བསྐུར་ཞིང་། སྙིང་ཆུང་དམར་པོ་མེ་ལ་སྲེག་དགོས་ཐུག་ན། ང་ཚོས་ཉི་ནག་ཟླ་ལ་བགྲང་། ཟླ་ནག་ལོ་ལ་མཐུད་ནས་རྒྱ་ནག་པོའི་སྲིད་གཞུང་ལ་ཁ་གཏད་ཇི་ལྟར་བཀྱག་ཨང་སོམས་དང་བོད་པ་ཚོ།
དེ་ཚོར་བསམ་ཞིང་བསམ་ཞིང་སྐྱོ་ཡོང་བ་གཅིག་ནི། ང་ཚོར་༧གོང་ས་མཆོག་གིས་གོང་ནས་དམངས་གཙོ་གནང་ཤེས་ཡོད་ཀྱང་། ང་ཚོས་འོག་ནས་ད་དུང་དམངས་གཙོ་ལེན་མ་ཤེས་པ་དེ་རེད། རྒྱུ་མཚན་དམངས་གཙོ་ཟེར་བ་ནི། འདྲ་མིན་ལྟ་བ་མཉམ་རུབ་ཀྱི་གུ་ཡངས་སྤྱི་ཚོགས་ཤིག་དང་། གཞུང་གི་ངོས་ནས་གཙོ་བོར་མང་ཚོགས་ཀྱི་བསམ་བློའི་འདུ་ཤེས་ལ་གུས་བརྩི་དང་བསྟུན་ཤེས་དགོས་པ་དེ་རེད། ཁ་གསལ་དུ་བཏང་ན། མང་ཚོགས་ལ་སྨྲ་བརྗོད་རང་དབང་ཡོད་དགོས་པ་དེ་ཡིན།
སྨྲ་བརྗོད་རང་དབང་ཞེས་པ་ནི། མི་རིགས་དང་རྒྱལ་ཁབ་ཆེད། མི་བུ་རང་ཉིད་ཀྱི་ལྟ་ཚུལ་གང་ཡོད་པ་དེ་ངག་ནས་བརྗོད་དེ་ངོ་རྒོལ་སྐད་འབོད། སྒྱུ་རྩལ་རི་མོའི་ལམ་ནས་འབྲི་བཞེངས། གློག་བརྙན་འཕྲིན་བརྒྱུད་ནས་ཁྱབ་སྤེལ་ཆོག་པ་བཅས་ཡིན། དྲང་པོར་བཤད་ན། ང་ཚོས་དེ་དག་གི་གནད་ཀ་མ་ཤེས་པ་དང་། ཤེས་ཀྱང་ཁྱད་གསོད་བྱས་པའི་མཇུག་འབྲས་ལས་དུས་ད་ལྟ་ཡང་ང་ཚོའི་རྒྱལ་ཁབ་འདི་ཟུངས་ཟད་ཀྱི་ནད་པ་ལྟ་བུར་གྱུར་པ་རེད།
ད་དུང་ངོ་རྒོལ་ཁྲོམ་སྐོར་བྱེད་སྟངས་ལ་བལྟས་ན། རྒན་རྒོན་ཕོ་མོ་འགའ་གྲྭ་པ་ཨ་ནེ་ཚོས་ལམ་སྣེ་ཁྲིད་དེ་བྱང་ཆུབ་སེམས་མཆོག་འདོན་བཞིན་འཛུམ་ཉིལ་ལེར་གཞུང་ལམ་ལ་འགྲོ་བ་ནི། ང་རང་བསམ་བློའི་ནམ་མཁའ་དོག་དྲགས་པས་ལོས་ཡིན་ཏེ། ཆོས་ལུགས་ཀྱི་བྱེད་སྒོ་རེའི་ཁོངས་སུ་སོང་ན་མ་གཏོགས། རྒྱལ་ཁབ་ཅིག་གི་ཆབ་སྲིད་ཀྱི་ལས་འགུལ་ཞིག་ལ་འགྲོ་བ་ནི་དེ་བས་མ་མཐོང་། མི་མཐོང་། མཐོང་བར་མི་འགྱུར། ཁྲོམ་སྐོར་བ་ཡིན་ན་ཡང་དང་པོ་མ་སོང་ན་ལྕག་གིས་དེད་ནས་ཡོང་མཁན་སུ་ཡང་མེད་པས་རང་དབང་ཡིན་མོད། གལ་སྲིད་ལས་འགུལ་ལ་འཛུལ་ཞུགས་བྱས་རྗེས་ཕྱི་ཡུལ་མི་ཚོའི་མདུན་ངུ་མ་ཐུབ་ན་དགོད་ནས་འགྲོ་བ་ནི་འདས་པོ་ཚོའི་རྣམ་ཤེས་ལ་གུས་བརྩི་མེད་པ་དང་། མིས་འཕྱ་རང་དཀའ་ལས་ཅི་ཡང་མེད་པས་བསམ་བློ་སྔོན་ནས་གཏོང་དགོས་པ་གལ་ཆེན་ནང་གི་དོན་ཆེན་ཆགས་ཡོད།
ངས་འདི་ལྟར་བཤད་དུས་ཁྱོད་ཚོས་ལྟས་ངན་འདི་ནི་རང་བཙན་མ་གཏོགས་དབུ་མའི་ལམ་ཁྱོན་ནས་ཁས་ལེན་མཁན་ཞིག་རེད་མི་འདུག་ཨ་སྙམ་སྲིད་མོད། ང་ནི་ཞི་བ་ཆད་མཐའ་དོང་ལ་ལྷུང་སྟེ་དབུ་མའི་ལམ་ཁོ་ན་ལས་གཞན་བོད་ཀྱི་དཀའ་རྙོག་སེལ་བའི་ཐབས་ཤེས་མེད་ཅེས་ཟབ་མདོ་དགུ་ཟློག་འདོན་མཁན་མིན་ལ། དྲག་པོ་རྟག་མཐའ་རི་བོར་འཛེགས་ཏེ་བོད་ཀྱི་ལོ་རྒྱུས་རྒྱལ་རབས་གང་ལ་གཏུགས་ཀྱང་རང་བཙན་རང་དགོས་ཞེས་ཤི་འཐམ་རོ་འཐམ་བྱེད་མཁན་ནི་དེ་བས་མིན།
འོ་ན་ང་ལ་ཅི་དགོས་ཤེ་ན། བདག་ལ་དགོས་པ་དབུ་མའི་ལམ་ཡིན་ལ་རང་བཙན་ཡིན། འདི་གཉིས་ནི་བོད་ཀྱི་དཀའ་རྙོག་སེལ་བར་ཁ་འབྲལ་དུ་མེད་པའི་ཐབས་ཤེས་རྨད་དུ་བྱུང་བའི་བདེན་གཉིས་ཟུང་འཇུག་གི་ལམ་བུ་དེ་ཡིན། དེས་ན་བདག་ལ་ད་དུང་དེ་དག་འཛིན་སྐྱོང་བྱེད་མཁན་བོད་མིའི་སྒྲིག་འཛུགས་དགོས་ལ་གཞོན་ནུ་ཚོགས་པ་ཡང་དགོས། མ་ཟད་འཛམ་གླིང་ཞི་བདེའི་དེད་དཔོན། ༧གོང་ས་སྐྱབས་མགོན་ཆེན་པོ་དགོས་ལ། མེས་པོ་རལ་པ་ཅན་གྱི་བླ་བུ། སྐུ་ཞབས་འཇམ་དབྱངས་ནོར་བུ་ཡང་དགོས་ཞེས་པ་དེའོ།། །།
གཅིག་མ་གཏོགས་གཉིས་སྤྲོད་རྒྱུ་མིན། ཧམ་པ་ཆེ་བ་ལ།
བློ་ཁོག་ཡངས་པའི་སྐད་ཆ་རེད། བློ་རྩེ་རྣོ་བའི་གླེང་མོ་རེད།
རྩོམ་དུས་ལ་བབས་པའི་སྐད་ཆ་རེད་་་་ཚིག་གི་སྦྱོར་བ་ལེགས་ཤིང་དོན་གྱི་གནད་ལ་འཁེལ་བའི་རྩོམ་ཞིག་ཏུ་འདུག ཐུགས་རྗེ་ཆེ་གང་ལྟར་ང་ཚོའི་སྒྲིག་འཛུགས་འདི་ནི་ཆབ་སྲིད་ཀྱི་སྒྲིགས་འཛུགས་ཞིག་ཏུ་འདོད་ཀྱང་ལག་ཏུ་ལེན་རྒྱུ་ནི་ཆོས་ལས་མེད། མ་གཞི་ནས་ང་ཚོའི་འཐབ་རྩོད་ནི་རང་གི་སྐད་ཡིག་དང་ཆོས་ལུགས་འདི་ཉིད་མི་ཉམས་པའི་ཆེད་དུ་ཙམ་རེད་འདུག དེ་ལྟར་ན་ཆོས་ཁས་མི་ལེན་མཁན་དང་ཤཀྱ་འི་ཆོས་ལུགས་ལ་དད་པ་མི་བྱེད་མཁན་གྱི་བོད་རིགས་ཆོས་ལུགས་པ་དེ་དག་ལ་མཐོང་ཆུང་དང་སྣང་མེད་དུ་གཏོང་བའི་བྱུས་ངན་རང་རེད། ད་ཡོང་རྒྱུ་འདི་ལས་ཅི་ཡོད།
ཚིག་གི་སྦྱོར་བ་ལེགས་པ། དོན་གྱི་གནད་འདུས་པ། གོང་འོག་འགྲོས་མཉམ་པ། སྙན་ལ་གོ་བདེ་བ། ཚིག་ཉོག་གི་ཆ་དབེན་པ། བརྗོད་གཞི་དང་མཐུན་པའི་སྙན་ཚིག་ལྡན་པའི་རྩོམ་ལེགས་པོ་ཞིག་འདུག་པས་སྙིང་ནས་རྗེས་སུ་ཡིད་རང་ཞུ།
ཚིག་སྦྱོར་དང་བརྗོད་བྱའི་གང་ཐད་ནས་དེང་སྐབས་བོད་པ་ཚང་ལ་དགོས་རྒྱུ་དེ་རེད་འདུག། དཔྱོད་གླེང་འདི་ལྟ་བུ་རིགས་ལ་དོ་སྣང་དང་བློ་ཁ་ཕྱོགས་པ་དགོས།
བོད་པ་འགའ་རེ་ཡིས་རྒྱ་དམར་གུང་ཁྲན་ལ་མགོ་གུག་གུག་དང་ལྕེ་ནར་ནར་བྱས་ན། ད་གཟོད་ང་ཚོ་བོད་ལ་རང་སྐྱོང་གནང་གི་རེད་བསམ་པ་ནི། སྟོང་བསམ་མམ་རྨི་ལམ་ཁོ་ན་ཙམ་ལས་གཞན་རེ་བ་གང་ཡང་མེད་དོ།།