རྔ་བ་བརྒྱད་གསུམ་གཅིག་དྲུག
ཕྱི་ལོ་ ༡༩༥༩ ནས་བཟུང་དེ་རིང་བར་དུ་མི་ལོ་ཧྲིལ་བོ་ལྔ་བཅུ་ལྔ་གསུམ་འཁོར་ཡོད། ལོ་འདི་དག་ལ་ཕྱི་མིག་ཅིག་བལྟས་པ་ཡིན་ན། རི་བོ་ཧི་མ་ལ་ཡི་རི་རྒྱུད་དུ་གནས་པའི་བོད་རིགས་དག་ལ་དགའ་སྤོབས་རང་དབང་དང་། བག་ཡངས་ཞི་ལྷོད་ཀྱི་བདེ་སྐྱིད་ཅིག་སྒེར་གཅོད་རིང་ལུགས་པའི་ནམ་ཡང་སྤྲད་མྱོང་མེད། ཡིན་ན་ཡང་། ཕྱི་མའི་ལས་ལ་གུས་པའི་རང་ཅག་མི་རིགས་འདིས་བཟོད་སྒོམ་ཞིག་ལ་བརྩི་སྲུང་བྱས་ཏེ། ད་བར་གྲི་ཆུང་ཞིག་གི་སོ་ཁ་ཙམ་ཡང་སྒེར་གཅོད་རིང་ལུགས་པར་བསྟན་མྱོང་མེད། དེའི་ཕྱིར། སྒེར་གཅོད་རིང་ལུགས་པ་འུ་ཐུག་ཐབས་ཟད་དེ་མཐར་ ༢༠༠༨ ལོར་བོད་ཆས་གྱོན་ནས་མང་ཚོགས་ཁྲོད་གྲི་ཁྱེར་ནས་འཁྲབ་གཞུང་ཞིག་བཟོས་བ་རེད། འདི་ནི་འུ་ཅག་གི་མི་རིགས་འདིས་རྒྱལ་ཁ་ཞིག་ཏུ་ངོམ་ཆོག་ལ། མི་གཞིའི་མནོ་བསམ་གྱི་སྟོབས་ཤུགས་ཤིག་ཀྱང་རེད། ༸གོང་ས་མཆོག་གིས་རྒྱུན་དུ་ཞི་བདེ་དང་སྤྱི་གཞུང་ལ་དོ་ཁུར་བྱ་དགོས་ཞེས་རིང་ནས་སྙིང་དུ་བརྣག་པའི་འདོད་དོན་ཡང་དེ་རེད་སྙམ།
ཡང་གཅིག་བཤད་ན། ལོ་སྟོང་ཕྲག་བརྒྱུད་འོང་བའི་སྒང་བ་བོད་པའི་གཤིས་སྤྱོད་དང་འགྲོག་པའི་ཞི་བའི་སྤོབས་སེམས་ལ་འཛམ་གླིང་གི་མི་བུ་རེ་རེ་ཧང་སངས་ཧོན་འཐོར་ཏེ་བོད་མིའི་སྒེར་ཚུགས་ལ་གཟེངས་བསྟོད་བྱེད་བཞིན་པའི་སྐབས་འདིར། སྒེར་གཅོད་རིང་ལུགས་པའི་རྒྱུ་འབྲས་བློ་མིག་ལ་དྲག་རྒོལ་བྱེད་རྒྱུ་མོ་རྩིས་ལ་བབ་པ་ཞིག་རེད། དེའི་ཕྱིར། དེ་རིང་ངས་ཁ་གསལ་ནས་བཤད་འདོད་པ་ཞིག་ལ། ཁྱེད་ཅག་སྒེར་གཅོད་པའི་དྲག་དམག་གི་མདུན་ལ་ལངས་བའི་ཞི་བའི་མེ་མཆོད་འབུལ་མཁན་ཚོ་སྟོང་ལོ་བརྒྱད་ཅུ་བའི་རྗེས་སུ་སྐྱེས་པའི་མི་བུ་ཤ་སྟག་ཡིན་ལ། ཁྱེད་ཅག་ནི་ ༥༩ ལོར་དམར་གསོད་བཏང་བའི་ངེད་ཚང་གི་ཕ་མ་ཚོའི་རྣམ་ཤེས་ཡིན། རྒྱུ་མཚན་དེས་ན། བཙན་རྒྱལ་རིང་ལུགས་པ་སུ་ཞིག་གིས་བུ་རབས་ཚ་རྒྱུད་ལྡན་པའི་མི་རིགས་ཤིག་མཇུག་རྫོགས་ཐུབ་མེད་སྟབས། དོན་དག་ཅི་ཞིག་ལ་འཕྲད་ཀྱང་གངས་ཅན་པའི་བདེན་ལུགས་འདི་འདོར་མི་སྲིད། སྟོང་ལོ་གཉིས་བ་ནས་བཟུང་བོད་ཀྱི་འཐབ་རྩོད་འདི་མི་རབས་གསར་བས་འགན་ཁུར་བའི་འཐབ་རྩོད་གསར་བ་ཞིག་ཏུ་ཁྲིད་ཡོད། དེའི་ཕྱིར། བོད་ཀྱི་འཐབ་རྩོད་ཀྱིས་ངོ་བོ་ཇེ་མཁྲེགས་ཇེ་འཁྲུག་ཏུ་གྱུར་དང་འགྱུར་བཞིན་པའི་ཁ་སང་དེ་རིང་བདུན་ཕྲག་གཅིག་ལ་མི་བུ་བཅུ་གྲངས་ཤིག་གིས་ལུས་ངག་ཡིད་གསུམ་ཞུགས་འབུལ་ཞུས་བ་འདི། མི་རབས་གསར་བའི་འགན་ཁུར་བས་རླབས་ཆེན་གྱི་སྤོབས་སེམས་ཤིག་རེད་ལ་འགྲོ་བ་མིའི་རིགས་ལ་དགའ་ཞེན་བཅངས་པའི་མཆོག་གྱུར་གྱི་གླེང་རིན་ཡོད་པ་ཞིག་རེད།
ཡིན་ནའང་། འུ་ཅག་གི་མི་བུ་གང་མང་ཞིག་གིས་ཞི་བའི་མེ་མཆོད་འདི་མཚམས་འཇོག་དགོས་ཚུལ་ནན་གྱིས་ཤོད་ཀྱིན་འདུག་ལ། ལྷག་པར་དུ་ཨེ་ཤ་ཡ་རང་དབང་རླུང་འཕྲིན་ཁང་གིས་མི་ཆེན་སྐོར་ཞིག་གི་མིང་གིས་བཟུང་ནས་འདི་དང་འདི་དག་གིས་ཞི་བའི་མེ་མཆོད་མཚམས་འཇོག་དགོས་ཚུལ་གསུངས་སོང་ཞེས་ཡང་དང་བསྐྱར་གྱིས་སྒྲོག་གིན་འདུག འདི་ནི་རྒྱུན་ལྡན་མིན་པའི་བསྒྲགས་སྟངས་མི་ལེགས་པ་ཞིག་རེད། གང་ཡིན་ཟེར་ན། ཕྱོགས་གཅིག་ནས་ཟུར་ཟ་ཞིག་རེད་ལ། གཉིས་ནས་མིག་གིས་མཐོང་བ་ཙམ་ལས་རྒྱང་རིང་ལ་ལྟ་བའི་དཔྱོད་ཤེས་ཀྱི་མིག་ཟུང་ཀུམ་སོང་བ་ཞིག་རེད། གང་ལགས་ཤེ་ན། སྟོང་ལོ་གཉིས་པའི་བརྒྱད་ཀྱི་ལོ་འཛམ་གླིང་གི་མི་བུ་རླབས་ཆེན་གང་དག་ཞིག་གིས་འུ་ཅག་གངས་ཅན་པའི་ཆེད་དུ་རྒྱ་ནག་གི་རྩེད་འགྲན་ལ་མི་ཞུགས་བའི་དམ་བཅས་ནའང་། རང་ཉིད་ཀྱི་འཐུས་ཤོར་ལ་བརྟེན་ནས་སྒེར་གཅོད་པའི་འཛུམ་མདངས་ཀྱི་མེ་ཏོག་རྒྱས་བཞིན་མཇུག་བསྡུས་བ་དེ་ཡང་རང་ཅག་གིས་ད་ལྟའི་ཆར་དྲན་དགོས་པ་གནད་ཅིག་རེད་འདོད། ཡང་གཅིག་བཤད་ན། རང་སྲོག་མེ་མཆོད་ཀྱི་སྦྱིན་པ་འདིར་བོད་ཕྱི་ནང་གང་གིས་འགོག་མི་ཐུབ་ལ་བཀག་ན་ཡང་མི་འོས་པ་རེད། ངས་འདི་ལྟར་བཤད་ན་འུ་ཅག་གི་མི་བུ་གང་མང་ཞིག་གིས་ང་ལ་སྐྱོན་མཚང་གིས་རྔ་བོ་དྲག་ཏུ་བརྡུང་སྲིད་ཀྱང་ངས་སྨྱུག་ཁ་འདི་ཅིས་ཀྱང་ཕྱིར་བསྡུ་མི་བྱེད། གང་ལ་ཟེར་ན། མེ་སྤར་མཁན་ལ་མ་གཞུས་པར་བུད་ཤིང་ལ་ལེ་བདའ་བྱས་ན་འདི་ནི་གླེན་རྟགས་ཤིག་རེད་ལ། བསམ་བློའི་སྒེར་ཚུགས་ཤོར་བའི་ཐན་ལྟས་ཤིག་ཀྱང་རེད། མ་གཞི་རང་རེའི་བསམ་བློ་བ་དང་ཆབ་སྲིད་པ། ཤེས་ཡོན་པ་སོགས་ཀྱིས་ནམ་ཡིན་ཡང་གཏམ་སྨྱུག་གི་མགོ་བོ་ནང་ལ་སྲིང་བསྡད་པ་འདི། འུ་ཅག་གི་མི་རིགས་འདིའི་སྐྱོ་གར་གྱི་ལས་འབྲས་ཤིག་ཡིན་ནམ། གཞི་རིམ་སློབ་གསོ་ཀུམ་པའི་ཤེས་རྨོངས་པ་ཞིག་ཡིན་པ་ཁོ་བོས་མ་ཤེས་སོ།།
གང་ལྟར་ཡང་། ང་ཚོས་དྲན་དགོས་པ་ཞིག་ལ་འུ་ཅག་གི་རྒྱལ་གཅེས་རིང་ལུགས་པ་དགུ་བཅུ་ལྷག མེ་ལ་སྦར་མཁན་དེ་སྒེར་གཅོད་རིང་ལུགས་པ་རེད་ཅེས་ངས་ཅིས་ཀྱང་སྒྲོག་ན་འདོད། རྒྱུ་མཚན་དེའི་ཕྱིར། སྒྲིག་འཛུགས་གང་ཡང་མེད་པའི་རང་འགུལ་གྱི་མེ་མཆོད་ཕུལ་མཁན་དག་གིས་རླབས་ཆེ་བའི་བྱ་འགུལ་འདིའི་ངོ་བོ་བསྒྱུར་དགོས་དང་མི་དགོས། མཚམས་འཇོག་དང་མི་འཇོག་སོགས་སྒེར་གཅོད་རིང་ལུགས་པའི་འགྲོ་བ་མིའི་རིན་ཐང་ཤེས་མིན་དང་། རྒྱལ་གཅེས་དཔའ་བོ་དགུ་བཅུ་ལྷག་གི་མགྲིན་དབྱངས་གཅིག་པའི་འབོད་སྒྲའི་སྟེང་འགྲོ་ཐུབ་མིན་དེ་རེད། ཡིན་ན་ཡང་སྒེར་གཅོད་རིང་ལུགས་པས་ད་དུང་གླེན་རྟགས་འདིའི་མཇུག་མུ་མཐུད་སྐྱོང་སྲིད་ལ། སྤྲེལ་ལད་ཡང་མང་པོ་ཞིག་འཁྲབ་སྲིད་པས། འུ་ཅག་ལ་ཡང་ཆིག་སྒྲིལ་གྱི་ནུས་པ་ངོམ་པའི་གྲ་སྒྲིག་ཨང་གསར་དགོས་པ་མ་ཟད། དཔའ་བོ་དགུ་བཅུ་ལྷག་གི་ཞུམ་མེད་དཔའ་ངར་གྱིས་ཁ་ཆེམས་གཙོར་བཞག་ཐོག འཐོན་སྲིད་པའི་དཔའ་བོ་བརྒྱ་ཕྲག་མང་པོའི་སྙིང་སྟོབས་དེ་རྒྱལ་སྤྱིའི་སྡིངས་ཆའི་སྟེང་ནས་གྱེར་ཐུབ་པའི་འབད་བརྩོན་དགོས་པ་ལས་འགྲིག་མིན་བཤད་པའི་དུས་བབ་མིན། སྤྱིར་བཏང་རང་ཅག་གི་མི་རིགས་འདིས་བྱ་འགུལ་གང་ཞིག་བརྩམས་ཀྱང་མིག་བཙུམ་ལོང་མེད་པར་གྲུབ་འབྲས་དགོས་ཞེས་པའི་ཧམ་བཤད་དེ་ལྐུག་རྟགས་ཤིག་ཡིན་སྟབས་ཤེས་ཡོན་པའི་དཔྱད་པ་མ་བྱས་ཀྱང་། ཐང་ཆད་ཆོག་ཆོག་གི་གཤིས་ངན་དེ་འབྱུང་འགྱུར་གྱི་གཉན་ནད་རེག་དུག་ཅིག་ཡིན་པས། རྒྱང་རིང་གི་དཔྱོད་ཤེས་མེད་ན་མི་རིགས་ཤིག་ཁུ་སིམ་ཁད་ཀྱིས་འཇིག་རྟེན་འདིའི་སྒང་ནས་ཡལ་ངེས་ཡིན་པས། སྤྱི་གཞུང་ལ་དོ་ཁུར་ཡོད་པའི་མི་བུ་དག་གིས་འདི་ངེས་པར་དུ་གླེང་དགོས་པ་ཞིག་ཡིན་ནོ།།
ད་དུང་འུ་ཅག་གི་མི་བུ་གང་མང་ཞིག་གིས་དཔའ་བོ་དགུ་བཅུ་ལྷག་གིས་ཞི་བའི་མེ་མཆོད་ཕུལ་ནའང་གྲུབ་འབྲས་ཅི་ཡིན་འདི་ཡིན་སྟོན་རྒྱུ་མེད་པ་མ་ཟད། ཐ་ན་དྲིལ་བསྒྲགས་ཀྱང་འཐུས་ཚང་ཞིག་བྱས་མ་སོང་ཞེས་བོད་མིའི་སྒྲིག་འཛུགས་ཀྱི་ལས་ཀྱི་སྣེ་མོ་བ་དག་ལ་ལེ་བདའ་བྱེད་ཀྱི་འདུག་ལ་བྱ་དགོས་ངེས་ཤིག་ཀྱང་རེད། ལས་ཀྱི་སྣེ་མོ་བ་རྣམས་ཀྱིས་ཀྱང་མང་ཚོགས་ཀྱི་འགན་ཁུར་ཞིག་ལ་བསམ་ནས་རྒྱབ་མདུན་ནོར་མི་ཉན། འོན་ཀྱང་། གྲུབ་འབྲས་མི་འདུག་ཅེས་པའི་བཤད་སྟངས་དེ་དཔྱོད་ཤེས་ཀྱི་མིག་ཟུང་ཞར་སོང་བ་རེད། རང་ཅག་གི་དཔའ་བོ་དགུ་བཅུ་ལྷག་གི་རླབས་ཆེན་གྱི་ཆོད་སེམས་དེས་སྒང་བ་བོད་པའི་གནས་སྟངས་ཀ་དང་ཁ་ཞེས་རྒྱལ་སྤྱིའི་སྤྱི་ཚོགས་སྟེང་དུ་བསྲིངས་ཡོད་པ་མ་ཟད། འབར་ལ་ཉེ་བའི་རྒྱལ་སྤྱིའི་གནད་དོན་རང་བཞིན་ཅན་ཞིག་ཆགས་ཡོད། ཁ་སང་དེ་རིང་མེད་ན་སང་ཉིན་རང་ཅག་ཧང་སངས་བའི་ཉིན་མོ་ཞིག་ཡོད་པའི་འུ་ཅག་གི་ཆོད་སེམས་ནམ་ཡང་སྨག་རུམ་དུ་ལྷུང་མི་ཉན། ད་དུང་ཆིག་སྒྲིལ་ནི་འཐབ་རྩོད་ཀྱི་མ་རྩ་ཡིན་པས། ད་ལྟ་འུ་ཅག་བོད་མི་ཡོད་དོ་ཅོག་གི་སེམས་ངོ་ན་བརྗེད་ཐབས་མེད་པའི་ཆིག་སྒྲིལ་གྱི་རྨ་ཁ་ཞིག་བཞག་ཡོད། དེ་ནི་དེ་རིང་ནས་བཟུང་སླར་ཡང་མི་ལོ་ལྔ་བཅུའི་རིང་གི་རྣོ་ངར་ལྡན་པའི་འཐབ་རྩོད་ཀྱི་རྨང་རྡོ་ཇེ་བརྟན་ཇེ་མཁྲེགས་སུ་བཞག་པ་རེད། ད་དུང་དགེ་ཆོས་ལགས་ཀྱིས་རང་རྒྱུས་རང་ལ་ཡོད་གསུངས་པར་ལྟར་འུ་ཅག་གི་མི་རིགས་འདི་ནང་ཕན་ཚུལ་ཁ་རྩུབ་ལག་རྩུབ་ཅིག་ཡིན་པ་སྦ་གསང་བྱེད་ས་མེད་ནའང་། ད་ལྟའི་གནས་བབ་ལ་ཚིག་ངན་ཞིག་ཤོར་ནའང་། ལམ་སང་དཔའ་བོ་ཚོའི་ཞལ་ཆེམས་ཀློག་ཡོང་གི་ཡོད་པར་གསལ་རྗེན་དུ་མཁྱེན་བཞིན་དུ་ད་དུང་གྲུབ་འབྲས་མི་འདུག་ཅེས་ལབ་ཕོད་པ་འདི་ཡང་དཔའ་རྒོད་ཞིག་གི་རང་གཤིས་ཡིན་སྲིད་མོད་། ངས་གླེན་པ་ཞེས་འབོད་རྒྱུ་ཡིན།
མཐར་ངས་འདི་ལྟར་བརྗོད་ན་འདོད། ཆོད་སེམས་ནི་འགྲོ་བ་མིའི་ལེགས་འགྲུབ་ཀྱི་མྱུ་གུ་ཡིན་པ་བདེན། བསམ་བློ་ནི་འགྲོ་བ་མིའི་རིན་ཐང་གི་ལྗིད་ཚད་ཡིན་པ་བདེན། དེའི་ཕྱིར། འུ་ཅག་གི་ལམ་བུ་ཀྱག་ཀྱོག་དང་ཚེར་མའི་གང་ནའང་ལེགས་འགྲུབ་ཀྱི་མྱུ་གུ་ཡོད་པའི་ནམ་ཡང་ལམ་ཟུར་དུ་ཐོན་མི་རུང་། སྙིང་ཉེ་བའི་གངས་ཅན་པ།
ཕྱི་ལོ་ ༢༠༡༢ ཟླ་བ་ ༡༢ ཚེས་ ༠༣ ཉིན།
ཧ་ཅང་ཡག་པོ་གསུང་འདུག དེ་དེ་བཞིན་ནོ།