དོན་ངོ་མར་སུས་ཁྲིམས་འགལ་བྱས་འདུག

བེ་རི་རིག་པའི་རྡོ་རྗེ།

 

ཆོས་རྒྱུད་བྱེ་བྲག་པ་ཞིག་དང་། སྐུ་དྲག་ལམ་ལུགས་ཀྱིས་དབང་བསྒྱུར་བའི་སྤྱི་ཚོགས་ཤིག་གི་ནང་དུ། ཡང་དག་པའི་དམངས་གཙོ་ལྟ་ཅི། ཐ་ན་སྤྱིར་བཏང་གི་དམངས་གཙོ་ཙམ་ཡང་ཡོང་ཐབས་མེད། དེར་བརྟེན་རང་རེའི་སྤྱི་ཚོགས་འདི་དུས་རབས་བཅུ་བདུན་པའི་ནང་ནས་བཟུང་ད་བར་ཆོས་རྒྱུད་བྱེ་བྲག་པ་ཞིག་གི་དབང་སྒྱུར་ལ་ཨ་འཐས་གོ་འཐས་སུ་གྱུར་བའི་ཉེན་ལེན་གྱིས། སྤྱི་ཚོགས་ཧྲིལ་བོ་རུལ་སུངས་སུ་གྱུར་ཏེ། ཆོས་ལུགས་དབྱེ་འབྱེད་དང་ཆོལ་ཁའི་འཐེན་ཁྱེར་གྱི་གཡུལ་ས་ཞིག་ཏུ་གྱུར་ཡོད།

འགྱུར་བ་ཅུང་ཐེབས་པ་ནི། ཕྱི་ལོ་ ༡༩༩༡ ཟླ་ ༦ ཚེས་ ༢༨ ཉིན་བཙན་བྱོལ་བོད་གཞུང་འདི་གཞི་རྩའི་ཁྲིམས་ཡིག་ཡོད་པའི་དེང་རབས་དམངས་གཙོའི་འགྲོ་ལུགས་དང་མཐུན་པ་ཞིག་ཏུ་བསྐྱོད་རྒྱུའི་ཉིན་མོའི་རྨི་ལམ་ལ་སྟ་གོན་བྱས་ཤིང་། དམངས་གཙོའི་རྒྱལ་ཁབ་འགའ་རེའི་རྩ་ཁྲིམས་ངོ་བཤུས་བྱས་ཏེ། བཅའ་ཁྲིམས་གཏན་ལ་ཕབ་ཡོད། ཡིན་ན་ཡང་བཅའ་ཁྲིམས་ཀྱི་ནང་དུ་རུལ་སུངས་ཀྱི་དྲི་ངན་སྔར་ལྟར་འཐུལ་བཞིན་ཡོད།

དཔེར་ན་དེའི་དོན་ཚན་སོ་བདུན་པ། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་ཞེས་པར། “བོད་ཀྱི་ས་ཁུལ་ཆོལ་ཁ་རེ་ནས་འོས་བསྡུ་བྱས་པའི་སྤྱི་འཐུས་ཕོ་མོ་ཁྱད་མེད་བཅུ་རེ།
ཁ༾ རྙིང་མ་དང༌། བཀའ་བརྒྱུད། ས་སྐྱ། དགེ་ལུགས། གཡུང་དྲུང་བོན་བཅས་ལྔ་པོ་རེ་རེ་ནས་འོས་བསྡུ་བྱས་པའི་སྤྱི་འཐུས་གཉིས་རེ།” ཞེས་གཏན་ལ་ཕབ་སྟེ། བོད་ཀྱི་ཆོས་རྒྱུད་ཆེན་པོ་དཔལ་མཆོག་དུས་ཀྱི་འཁོར་ལོའི་བཀའ་བབ་རྒྱལ་བ་ཇོ་ནང་པ་རྣམས་ལ་གདམས་བྱ་འདེམས་བྱེད་ཀྱི་ཐོབ་ཐང་མེད་པ་བྱས་ཏེ། སྐྱུག་བྲོ་བའི་ཆོས་རྒྱུད་དབྱེ་འབྱེད་ཀྱི་སྤྱོད་ངན་དམར་དམར་ལྗེན་ལྗེན་དུ་བསྟན་ཡོད།

དེ་ཙམ་མ་ཟད། དོན་ཚན་འདིས་བཅའ་ཁྲིམས་ཧྲིལ་བོ་ནང་འགལ་གྱི་ཕུང་བོར་བསྒྱུར་ཡོད། དཔེར་ན། བཅའ་ཁྲིམས་དོན་ཚན་དགུ་བར། “བོད་ཀྱི་ཡུལ་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན། ཕོ་མོ་དང༌། རིགས་རུས། སྐད་ཡིག ཆོས་ལུགས། སེར་སྐྱ། དབུལ་ཕྱུག སྐྱེས་ཡུལ། སྤྱི་ཚོགས་ཀྱི་འབྱུང་ཁུངས། གོ་གནས། གནས་སྟངས་གཞན་དག་བཅས་ཀྱི་ཐོག་ནས་དབྱེ་འབྱེད་མེད་པར་ལེའུ་འདིར་འཁོད་ཀྱི་ཐོབ་ཐང་ཁག་ལ་ལོངས་སུ་སྤྱོད་ཆོག་པ་ཡིན།” ཞེས་དང་།
དོན་ཚན་བཅུ་བར། “ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་ཡིན།” ཞེས་བོད་ཡུལ་མི་དང་ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་ཡིན་ཞེས་ཁ་གཡང་སྒྲོག་བཞིན། དོན་ཚན་སོ་བདུན་པར་བོད་ཀྱི་ཡུལ་མི་ལ་གྲལ་རིམ་དང་། ཆོས་ལུགས་དབྱེ་འབྱེད་ཚད་ལས་བརྒལ་བ་བྱས་ཏེ། བཅའ་ཁྲིམས་ཉོག་པོར་བཏང་ནས་རང་གིས་བཟོས་པའི་བཅའ་ཁྲིམས་རང་གིས་བཤིག་སྟེ་གླང་རྒན་ས་མཆོད་རང་གཉར་གཏོར་ཡོད། འདི་ཁྲིམས་འགལ་རེད།

ད་དུང་དོན་ཚན་གཉིས་པ། ཁྱབ་ཚད་ཅེས་པར། “བཅའ་ཁྲིམས་འདིས་བོད་མིའི་སྒྲིག་འཛུགས་ཀྱི་མངའ་ཁོངས་སུ་གཏོགས་པའི་བོད་མི་ཡོངས་ལ་ཁྱབ་པ་ཡིན།” ཞེས་བཤད་ཡོད་མོད། བཙན་བྱོལ་ཁྲོད་ཀྱི་ཇོ་ནང་པ་རྣམས་ལ་བཙན་བྱོལ་བོད་མིའི་བཅའ་ཁྲིམས་ཀྱིས་ཁྱབ་ཡོད་མེད་ནམ་ལངས་ཉི་ཤར་ཡིན།

མཚམས་འདི་ནས་བཙན་བྱོལ་གཞུང་གིས་ཆོས་ལུགས་དབྱེ་འབྱེད་ཇི་ལྟར་བྱས་ཚུལ་ཕྱོགས་ཙམ་ངོ་སྤྲོད་བྱེད་རྒྱུ་ཡིན།
གཅིག བཅའ་ཁྲིམས་དོན་ཚན་སོ་བདུན་པར་གསལ་བ་ལྟར་ཡིན་ལ། འདི་ཁྲིམས་ཐོག་ནས་ཆོས་ལུགས་དབྱེ་འབྱེད་བྱས་ཚུལ་རེད།

གཉིས། ཕྱི་ལོ་ ༢༠༠༩ ལོར་གཏན་ལ་ཕབ་པའི་བཙན་བྱོལ་བོད་མིའི་ཆོས་དོན་ལྷན་ཚོགས་ཀྱི་ཁྲིམས་ཡིག དོན་ཚན་གསུམ་པ། ཁྲིམས་ཡིག་གི་ཁྱབ་ཚད་ཅེས་པར། “བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་ཁྱབ་ཁོངས་སུ་ཡོད་པའི་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ལ་ཁྱབ་པ་ཡིན།” ཞེས་ཇོ་ནང་པ་ཆོས་རིག་ལས་ཁུངས་ཀྱི་ཁྱབ་ཁུངས་སུ་ཡང་མེད་པ་བྱས་ཡོད། འདི་ཁྲིམས་ཐོག་ནས་ཇོ་ནང་པར་ལྟ་ཚུལ་རེད།

གསུམ། ཤེས་རིག་ལས་ཁུངས་ནས་དཔར་བསྐྲུན་བྱས་པའི་སློབ་དེབ་ཁག་ཏུ་བོད་ཀྱི་ཆོས་རྒྱུད་ཁག་གི་བྱུང་རབ་ངོ་སྤྲོད་སྐབས། ཆོས་རྒྱུད་བཞི་བོན་དང་ལྔ་ལས་ཇོ་ནང་གི་སྐོར་བཙལ་ན་རྙེད་རྒྱུ་མེད་པ་བྱས་ཡོད། འདི་སློབ་གསོའི་ཕྱོགས་ནས་ཇོ་ནང་ཆོས་རྒྱུད་ནག་གསུབ་གཏོང་རྒྱུའི་ངན་སེམས་རེད།

བཞི། བོད་གཞུང་དྲ་ཚིགས་ཐོག ཆོས་རིག་ལས་ཁུངས་ངོ་སྤྲོད་སྐབས། “ཆོས་རིག་ལས་ཁུངས་ཀྱི་ལས་དོན་དང་མཐུན་འགྱུར་གལ་ཆེན་འགའ་ཞིག བོད་ཀྱི་ཆོས་བརྒྱུད་ཆེན་པོ་བཞི་དང་། གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་དང་སྐུ་ཚབ་རྣམས་འཛོམས་པའི་ཆོས་ཚོགས། ཆོས་རིག་ལས་ཁུངས་ཀྱིས་གོ་སྒྲིག་གནང་ཞིང་ལོ་གཉིས་རེའི་མཚམས་སུ་འཚོགས་པའི་ཚོགས་འདུ་རྒྱས་འཛོམས་” ཞེས་ཇོ་ནང་པ་དེ་ལྟའི་ཆོས་ཚོགས་གང་དུ་ཡང་མཉམ་ཞུགས་བྱེད་མི་ཆོག་པ་བྱས་ཡོད། འདི་དེང་རབས་དྲ་བའི་འཇིག་རྟེན་གྱི་ཐོག་ནས་ཇོ་ནང་པ་རྒྱང་འབུད་གཏོང་རྒྱུའི་རྨི་ལམ་རེད།

ལྔ། སྲིད་སྐྱོང་སློབ་སངས་ཀྱིས་ལོ་སར་འཚམས་འདྲི་སོགས་ཀྱི་སྐབས། རྒྱུན་ལྡན་དུ་བོད་ཀྱི་ཆོས་རྒྱུད་ཆེན་པོ་བཞི་བོན་དང་ལྔ་ཞེས་ཆོས་ལུགས་དབྱེ་འབྱེད་ཀྱི་ཐ་སྙད་དངོས་སུ་སྒྲོག་བཞིན་ཡོད། འདི་སྲིད་སྐྱོང་གི་གོར་ཐིག་གསུམ་གྱི་ནང་གི་གཅིག་རེད།

དྲུག སྤྱི་འཐུས་ལྷན་འཚོགས་ཀྱི་དྲ་ཐོག་ཏུ། སྐབས་སོ་སོའི་སྤྱི་འཐུས་རིམ་བྱོན་ཞེས་པའི་ཁ་བྱང་འོག ཆོས་རྒྱུད་རེ་རེའི་སྤྱི་འཐུས་གཉིས་རེའི་མཚན་དང་པར་བཅས་བཀོད་ཡོད་མོད། ཇོ་ནང་པ་རྣམས་ལ་སྤྱི་འཐུས་འོས་འདེམས་བྱེད་རྒྱུའི་ཐོབ་ཐང་མེད་སྟབས། ཇོ་ནང་ཆོས་རྒྱུད་ཀྱི་སྤྱི་འཐུས་གཅིག་ཀྱང་མེད། འདིས་ཇོ་ནང་པ་རྣམས་ལ་བོད་ཀྱི་ཡུལ་མི་སྤྱི་མཚུངས་ཀྱི་གཞི་རྩའི་ཐོབ་ཐང་ཙམ་ཡང་མེད་པ་གསལ་སྟོན་བྱས་ཡོད། འདི་དག་འཛུབ་མོས་རི་སྟོན་ཙམ་བྱས་པ་ཡིན།

དེ་ལྟར་དུས་རབས་ནས་དུས་རབས། མི་རབས་ནས་མི་རབས་སུ་རང་གཞུང་གིས་ཆོས་ལུགས་དབྱེ་འབྱེད་བྱས་སྟབས། ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས། ཕྱི་ལོ་ ༡༩༩༧ ལོར་སྐྱབས་མགོན་རྗེ་བཙུན་པ་སྐུ་ཕྲེང་དགུ་བ་ཆེན་པོ་མཆོག ཇོ་ནང་བསྟན་པ་ཡོངས་རྫོགས་ཀྱི་བདག་པོར་བསྐོ་བཞག་མཛད་ཅིང་། བརྟན་གཞི་དགོན་པ་རྟེན་བརྟེན་པ་བཅས་གསོལ་བསྩལ་བཀའ་དྲིན་མཛད་ཐོག ཇོ་ནང་རྗེ་བཙུན་དམ་པའི་མཚན་གནས་ཉམས་གསོ་མཛད་ཡོད།

དེ་ནས་བཟུང་སྐྱབས་མགོན་རྗེ་བཙུན་དམ་པ་མཆོག བོད་ཀྱི་ཡུལ་མི་དང་ཇོ་ནང་པའི་གཞི་རྩའི་ཐོབ་ཐང་གི་ཆེད་དུ་ཡར་བཞེངས་ནས། བསྟུད་མར་བཙན་བྱོལ་གཞུང་ལ་དེ་ལུགས་ཀྱི་སྙན་ཞུ་ཐེངས་དུ་མར་ཕུལ་ཡོད་མོད། བཙན་བྱོལ་གཞུང་གིས་མཐོང་ཆུང་དང་སྣང་མེད་བྱས་སྟབས་གྲུབ་འབྲས་གང་ཡང་སྨིན་མེད། འོན་ཀྱང་༧གོང་ས་ཐམས་ཅད་མཁྱེན་པའི་གཟིགས་སྐྱོང་འོག སྐྱབས་མགོན་རྗེ་བཙུན་དམ་པའི་མཚན་གནས་སྔར་བཞིན་བོད་སོག་གཉིས་སུ་ཉི་ཟླ་ལྟར་གྲགས་ཡོད།

ང་ཚོའི་འདས་པའི་ལོ་རྒྱུས་དང་། ད་ལྟའི་གནས་བབ་ལ་ཟུར་ཙམ་བལྟས་ན། ཇོ་ནང་པའི་ལོ་རྒྱུས་ནི་དྲང་བདེན་དང་འདྲ་མཉམ་མ་ཡིན་པའི་བྱུང་རབས་ཤིག་དང་། དྲག་གནོན་དང་མནར་གཅོད་ཀྱི་གཡུལ་སར་ལྷུང་བའི་སྐྱོ་གར་ཞིག་ཆགས་རེད། ཆོས་རྒྱུད་བྱེ་བྲག་པ་ཞིག་གིས་དབང་བསྒྱུར་བའི་སྤྱི་ཚོགས་ཁྲོད། དུས་རབས་བཅུ་བདུན་པའི་ཡ་ང་བའི་གྲུབ་མཐའ་བཙན་བསྒྱུར་གྱི་དྲག་བརྡུང་དང་དམར་གསོད་ཆེན་མོའི་དུས་སྐབས་ནས་བཟུང་། ཇོ་ནང་པ་རྣམས་འཇིག་རྟེན་ཁམས་ན་ཡོད་ཀྱང་། གྲངས་ཀྱི་ནང་ན་མེད་པ་ལྟ་བུར་གྱུར་བ་མ་ཟད། ཐ་ན་ཇོ་ནང་པའི་གསུང་རབ་ཁག་ལ་ཡང་ནག་ཉེས་ཕོག་སྟེ། བཙོན་འཇུག་ཁྲིམས་ཆད་ཕོག་ཡོད། འོན་ཀྱང་ལོ་རྒྱུས་ཁྲོད་ཇོ་ནང་པ་རྣམས་ཀྱིས་འདག་ཐབས་མེད་པའི་ནག་ཉེས་གང་ཡང་བསག་མེད།

བཙན་བྱོལ་སྤྱི་ཚོགས་ཁྲོད་བོད་ཀྱི་ཡུལ་མི་རྣམས་ཀྱིས་ལོ་ལྔ་རེའི་མཚམས་སུ་དམངས་གཙོའི་འགྲོ་ལུགས་ལྟར། ཆོས་ལུགས་ཆོས་རྒྱུད་ཀྱི་སྤྱི་འཐུས་ལ་འོས་ཤོག་འཕེན་སྐབས། ཇོ་ནང་པ་རྣམས་ཀྱིས་མགོ་བོ་སྒུར། སེམས་ཁུང་དུ་ཆུད་ནས་སྡོད་པ་ལས་རང་གི་ཆོས་རྒྱུད་སྤྱི་འཐུས་འདེམས་རྒྱུའི་ཐོབ་ཐང་མེད།

ད་དུང་ཇོ་ནང་པ་ཚོས་རྒྱལ་སྤྱིའི་འགྲོ་བ་མིའི་ཐོབ་ཐང་དང་། བཙན་བྱོལ་བོད་མིའི་བཅའ་ཁྲིམས་གཞིར་བཟུང་དམངས་གཙོའི་ལུགས་སྲོལ་དང་མཐུན་པར་སྤྱི་འབངས་ཀྱི་ཐོབ་ཐང་གནང་རོགས་ཞེས་ཞུ་འབོད་ཙམ་བྱས་ན་ཡང་། “གཞུང་ལ་ངོ་རྒོལ་བྱས་སོང་། ཁྲིམས་འགལ་རེད་”ཅེས་ཉེས་མིང་བཏག་ནས་ས་གནས་བདེ་སྲུང་ལས་ཁུངས་ཚུན་ཆད་དུ་ལྐོག་བརྡ་སྤྲད་ཡོད་ལ། སྤྱི་འཐུས་ཚོགས་གཙོའི་དྲུང་དུ་དངོས་སུ་བཅར་ནས་སྙན་ཞུ་འབུལ་སྐབས། “ཡང་ཡང་སུན་པོ་བཟོ་མ་ཡོང་། དེ་ལྟར་བྱས་ན་ཁག་པོ་རེད་”ཅེས་འཇིགས་བསྐུལ་དང་། ཨ་རིར་ཡོད་པའི་ཇོ་ནང་པ་རྣམས་ཀྱིས་ཨ་རིའི་སྤྱི་འཐུས་རྣམ་གཉིས་ལ་སྙན་ཞུ་ཅི་ཙམ་ཕུལ་ཡང་། གྲོས་ཚོགས་སུ་སྙན་སེང་ཙམ་ཡང་ཞུས་མེད། འདི་བཙན་བྱོལ་སྤྱི་འཐུས་རྣམ་པའི་ཀུན་སྤྱོད་རེད། དོན་ངོ་མའི་ཁྲིམས་འགལ་ཡང་འདི་རེད། བཙན་བྱོལ་བོད་མིའི་བཅའ་ཁྲིམས་ཟུར་སྣོན་ཡིག་ཆ་ཨང༌། ༢ སྤྱི་འཐུས་ལས་འཁུར་དམ་བཅའ་/ཁས་ལེན་ཞེས་པར།“བདག   ཞེས་བགྱི་བ། སྐབས་  བོད་མི་མང་སྤྱི་འཐུས་ལྷན་ཚོགས་སུ་སྤྱི་འཐུས་འོས་འདེམས་བྱུང་བ་ལགས་ན། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་ཀྱི་ཐོག་ནས། སྤྱི་འཐུས་ཀྱི་ལས་འཁུར་ཞུ་སྒོ་མཐའ་དག བཅའ་ཁྲིམས་ཀྱི་དགོངས་དོན་འགལ་མེད་ཐོག རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུའི། མཆོག་གསུམ་དཔང་བཙུགས་ཀྱིས་དམ་བཅའ་བརྟན་པོ་ཞུ་རྒྱུ་ཡིན།” ཞེས་དམ་བཅའ་བཞག་ཡོད། ཁྲིམས་དང་དམ་བཅར་འགལ་ཡང་ཁྲིམས་འགལ་མིན་ན། ཁྲིམས་འགལ་ཟེར་བའི་མགོ་ན་རྭ་ཅོ་དགུ་དང་། ཞབས་ན་རྐང་པ་བཅོ་བརྒྱད་ཅན་ཞིག་ཡོང་རྒྱུ་མེད།

མདོར་བསྡུས་ན། དེ་རིང་ངས་འདི་ནས་གསལ་བོར་ཞུ་འདོད་པ་ནི། ད་ཐེངས་སྐབས་ ༡༦ སྤྱི་འཐུས་འཚོགས་དུས་ ༦ ཐོག ངེས་པར་དུ་བོད་ཀྱི་ཡུལ་མི་ཇོ་ནང་པ་རྣམས་ལ་བོད་མི་སྤྱི་མཚུངས་ཀྱི་གཞི་རྩའི་ཐོབ་ཐང་ཡོངས་རྫོགས་གནང་རྒྱུའི་ཐག་གཅོད་གནང་དགོས། གལ་ཏེ་དེ་ལྟར་མ་བྱུང་བ་ཡིན་ན། སྔར་ཡང་བཤད་ཟིན་པ་ལྟར། ཁྲིམས་འགལ་གྱི་གྱོད་གཞི་ཁྲིམས་ལ་གཏུག་རྒྱུ་ཁྲིམས་མཐུན་ཡིན་པས། སྲིད་སྐྱོང་དང་ཚོགས་གཙོ་རྣམ་གཉིས་ལ་ཁྲིམས་ཁང་དུ་མཇལ་འཛོམས་ཀྱི་དུས་བཅད་བཟོ་རྒྱུ་ལས་འདེམས་ཁ་གཞན་མེད་པ་ཤེས་པར་བྱོས་ཞེས་མཇུག་བསྡུ་རྒྱུ་ཡིན།

ཕྱི་ལོ་ ༢༠༡༨ ཟླ་ ༩ ཚེས་ ༥ ཉིན།  བེ་རི་རིག་པའི་རྡོ་རྗེས་མགྱོགས་བྲིས་བྱས།