དེ་རིང་རྔ་པར་བྱུང་བའི་གནས་ཚུལ་ཞིག

—གནས་ཚུལ་གཏོང་མཁན། ཀ་ཉག་ཚེ་རིང་།

ཕྱི་ལོ་༢༠༡༥ ཟླ་༩ ཚེས་༧ ཉིན་གྱི་བོད་ནང་གི་ཕྱི་དྲོའི་དུས་ཚོད་༣ ཙམ་ལ་རྔ་པ་ཀིརྟི་དགོན་གྱི་གྲྭ་བློ་བཟང་སྐལ་བཟང་། རང་ལོ་༡༩ ཡིན་པ་ཁོང་གིས་རྔ་པ་རྫོང་མཁར་གྱི་སྲང་ལམ་ནས་”བོད་ཁ་བ་ཅན་ལ་རང་དབང་དགོས། རྒྱལ་དབང་བསྟན་འཛིན་རྒྱ་མཚོ་ཁྲི་ལོ་བརྟན་པར་ཤོག” ཟེར་བཞིན་རྒྱ་གཞུང་ལ་ངོ་རྒོལ་སྐད་འབོད་གནང་སྟེ་གོམ་བགྲོད་བྱས་ཡོད་ཀྱང་། སྔ་ས་ནས་གྲ་སྒྲིག་བྱས་ནས་ཡོད་པའི་ཉེན་རྟོག་པ་རྣམས་ཀྱིས་ཁོང་བཙན་ཁྲིད་བྱས་ཡོད་པས་རྗེས་ཀྱི་གནས་ཚུལ་ཤེས་རྟོགས་མ་ཐུབ།

ཁོང་ནི་རྔ་པ་རྫོང་རྨེའུ་རུ་མ་རུ་ཆེན་གཉིས་པའི་ཕ་ཚེ་རིང་བརྟན་ཁོ་དང་། མ་ལྷ་སྐྱིད་གཉིས་ལ་བུ་མུ་མོ་བཞི་ཡོད་པའི་གཉིས་པ་ཡིན་འདུག་ལ། ཆུང་ཆུང་སྐབས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ། ༢༠༡༤ ལོར་སྔོན་འགྲོའི་འཛིན་གྲྭ་མཐར་ཕྱིན་ནས་དེང་སྐབས་མཚན་ཉིད་ཀྱི་འཛིན་གྲྭ་ཁ་དོག་དཀར་དམར་ཡིན་ཞིང་། ལོ་སྔོན་མར་ཁོང་གི་ཤག་རོགས་དང་མ་སྤུན་ཡིན་པའི་བློ་བཟང་བསྟན་པས་རྔ་པའི་སྲང་ལམ་ནས་ངོ་རྒོལ་སྐད་འབོད་གནང་སྟེ་ལོ་༢ ཀྱི་བཙོན་འཇུག་ཁྲིམས་ཐག་བཅད་ནས་དེང་སྐབས་བཙོན་ཁང་དུ་ཡོད་མུས་དང་། ༢༠༠༨ ལོར་ཁོང་གི་ཞང་བོ་ཚེ་བདག་དང་ཆོས་འཕེལ་གཉིས་ལ་ལོ་༦ དང་༤ ལ་བཙོན་འཇུག་བྱས་མྱོང་བ་སོགས་ཚང་མ་ཁོང་རང་གིས་དངོས་སུ་མཐོང་བའི་གནས་ཚུལ་ཡིན་འདུག

https://drive.google.com/file/d/0B-ibKFSqoHgRSGtjNEVKT2RldFU/view?usp=sharing

https://drive.google.com/file/d/0B-ibKFSqoHgRenBnd0FUZnVKbGs/view?usp=sharing

https://drive.google.com/file/d/0B-ibKFSqoHgRWmN3UWNneUVBcVE/view?usp=sharing

https://drive.google.com/file/d/0B-ibKFSqoHgRVW9xTnlpUXpvVWs/view?usp=sharing

དེ་བཞིན་གནས་ཚུལ་ཡོང་ཁུངས་ནས་བརྗོད་པར་སྐབས་ཐོག་དེར་རྔ་པའི་སྲང་ལམ་ནས་མི་སྐྱ་ཞིག་ཀྱང་ཉེན་རྟོག་པས་འཛིན་བཟུང་བྱས་པའི་གནས་ཚུལ་འདུག་ཀྱང་མིང་དང་ཕ་ཡུལ་སོགས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་བ་བཅས། བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་༢༠༡༥ ཟླ་༩ ཚེས་༧ ལ།