སེང་བུ་འབྲུག་ཞོན།
དེ་རིང་རྒྱལ་སྤྱི་མི་ཡི་ཐོབ་ཐང་ཉིན།།
ཨོ་གླིང་གྲོང་ཁྱེར་འཆི་མེད་དཀྱིལ་འཁོར་དུ།།
བཙོན་ཟུར་དཔའ་བོ་སེང་དར་དཔུང་ཚོགས་ཀྱིས།།
ངོ་རྒོལ་གནམ་ས་ཡོམ་ཞིང་གྲགས་ཆེའོ།།
ལེ་དབར་དུ་མར་བགྲོད་ཏེ་རྒྱ་དམར་སྒོར།།
སྐད་ཤུགས་ཆེན་པོས་རང་དབང་དགོས་ཡོད་འབོད།།
བྱི་ལའི་ངར་སྐད་རྒྱ་སྟག་ཡ་མི་ང་།།
གྲོག་མ་ཆུང་ཡང་གླང་ཆེན་གདུལ་རན་ནོ།།
བདེན་མཐའ་གསལ་བར་ལས་འགུལ་མང་དགོས་ཀྱང་།།
རིགས་ཀྱི་སྲོག་རྩ་ཕ་སྐད་གཅེས་སྲུང་མེད།།
སེམས་ཚོར་ཙམ་དང་འཇིག་བརྟེན་ཆོས་བརྒྱད་ཀྱིས།།
གཙོ་ཕལ་ནོར་བས་རྒྱལ་ཁ་ཐོབ་དཀའོ།།
དེ་རིང་འདིར་ཕེབས་རྣམས་པ་བཀའ་དྲིན་ཆེ།།
ནུས་པ་ཇི་འདྲ་ཐོན་མིན་མ་ལྟོས་པར།།
གཟེར་འཇོམས་སྨན་བཞིན་རང་སེམས་ཞི་བར་ཕན།།
ལྷག་བསམ་རྒྱལ་ཞེན་བཅངས་བར་སྔགས་འོས་སོ།།
རང་ཡུལ་དགྲ་ལག་ཤོར་བའི་དུས་ཡུན་དུ།།
དཔའ་བོ་ས་ཡ་བརྒལ་བའི་ཚེ་སྲོག་ཤོར།།
ཉེས་མེད་ཉམ་ཆུང་མང་པོ་སྡུག་གསོད་ཐེབས།།
འདི་དྲན་སེམས་ཁོང་གཟེར་གྱིས་འདེབས་ཏེའོ།།
དཔའ་རྒོད་མངས་པོས་བོད་ཀྱི་བདེ་རྩའི་སླད།།
རང་ལུས་འདོམ་གང་ལ་ལས་ཆུ་རུ་བསྟིམས།།
འགའ་རེས་མེར་སྤུར་མངས་པོར་མཚོན་གྱིས་གཤགས།།
དེ་དག་ཡིད་ལ་ནམ་དྲན་བཟོད་མེད་དོ།།
ཕ་མ་སྤུན་ཆེད་གསོན་བྲལ་སྡུག་འཁུར་ལྕི།།
གཉེན་ཉེ་ཡུལ་མི་མ་མཇལ་སྐྱོ་བས་གནར།།
སེམས་ངལ་བྲང་ཁོག་སྟོད་དུ་འཚངས་ཆེ་བས།།
དབུག་གི་རྒྱུ་བ་ཇེ་མྱུར་གཉིད་བྲལ་ལོ།།
ཀེ་ལ་ཤ་ཡིས་བསྐོར་བའི་བསིལ་ལྗོངས་འདི།།
མིང་ཙམ་མ་གྱུར་བར་དུ་བདེན་མཐའ་བརྩད།།
ཆོས་སྲིད་གོ་ཐོབ་བརྩད་ན་དགྲ་ལ་རྩོད།།
རང་དབང་ཆོས་དད་ཕྲོག་མཁན་རྒྱ་དམར་རོ།།
ནང་རྩོད་འཁྲུག་སྦྱོར་དག་ལ་སྐྱི་གཡའ་སྟེ།།
ནང་དམེ་དགྲ་ལ་སྒྱུར་ན་རྟུལ་ཕོད་ཅན།།
བཙན་པོ་སྙིང་སྟོབས་འབྲོང་གི་སྙིང་རྩ་དེ།།
ད་རུང་མ་ཉམ་གདོང་དམར་དཔུང་བསྒྲིག་གོ།
བསྟན་སྲིད་ཆག་འཇིག་གཉན་ཕྲང་དུས་ངན་འདིར།།
ང་བཟང་ཁྱོད་ངན་བཙན་དུག་བཞིན་དུ་དོར།།
མེས་པོ་གོང་མ་ང་ཚོའི་ཁྲག་རྒྱུན་དུ།།
བསམས་ཏེ་སྤུན་ཟླའི་འདུ་ཤེས་དྲོངས་ཏེའོ།།
བཞན་གྱིས་བཟང་ངན་ཅི་ཡང་བཤད་མོད་ཀྱང་།།
རང་གི་རིགས་ཞེན་དཀར་པོ་དྲི་མེད་འདི།།
ནམ་ཡང་མི་འདོར་ང་ཡི་དམ་བཅའ་ཡིན།།
ཚུལ་ཆོས་དྲིལ་སྒྲག་ངོ་སྐོག་ཅི་དགོས་སོ།།
ལ་རྒྱ་འཁྱེར་ཏེ་སྒེར་འཁོན་སྤྱི་ཚོགས་དཀྲུག།
རང་ཕྱོགས་གཅིག་པ་འགའ་རེ་སྔོན་ཐོན་ཏེ།།
སེམས་ཤུག་བཅགས་ཏེ་དགྲ་ཕྱོགས་འདེད་ན་ཡང་།།
ཁྱེད་ཅག་རེ་སྟོངས་བསྒྲུབ་ལས་འཆི་འོས་སོ།།
རང་བློ་སྐོག་གྱུར་རང་ལ་མ་ཡིན་པས།།
གང་དུ་ངོ་གནོང་ཅི་ལ་གནོང་དབེན་པས།།
བསྟོད་སྨད་གང་ལ་དགའ་སྡུག་སྐྱེ་དོན་ཅི།།
རང་སེམས་ཟླ་དཀར་ནག་ནོག་དྲི་བྲལ་ལོ།།
བུ་ལ་རུས་དང་བུ་མོར་རྐང་ཡོད་ན།།
དགྲ་ལ་བདེན་དོན་བརྩད་ན་ལ་རྒྱ་དང་།།
བླ་མའི་བཀའ་ཡང་ཡིན་ལ་ལས་འགན་ཡིན།།
ཆོས་སྲིད་གཉིས་སྒྲུབ་འདི་ཕྱི་གཉིས་ཕན་ནོ།།
ཨ་ཐང་མ་ཆད་རིགས་གཅིག་སྤུན་ཟླ་ཚོ།།
ལན་ཁག་འགེལ་ས་དགྲ་བོ་སྟན་དགྲ་ཡིན།།
ཤ་ཁོན་དགྲ་ལན་མི་དགོས་བླ་མས་གསུངས།
འཚེ་བྲལ་་ངང་ནས་བདག་དབང་ནན་རྩོད་དོ།།
སྐུ་དྲག་ངན་ཇུས་རྒྱ་དམར་སླུ་བྲིད་དང་།།
ཆོལ་ཞེན་སོགས་ཀྱིས་ཤུག་རྐྱེན་ངན་པས་ན།།
༧རྒྱལ་བའི་བཀའ་དང་འདས་པའི་དཔའ་བོ་རྣམས།
དྲན་ན་བཞན་དབང་འོག་ཚུད་ཡེ་མེད་དོ།།
དེ་རིང་ཚོར་བ་ཅི་བྱུང་ངང་གིས་བྲིས།།
ཕྲག་དོག་ཅན་ཚོར་སྤྲོ་བ་མི་བསྐྱེད་ཀྱང་།།
སེམས་རྣལ་མ་ལ་རྨ་བྱར་གཡར་རྔའི་སྒྲ།།
དོན་མེད་ཀུ་ཅོ་སྨྲ་བར་བཏང་སྙོམས་སོ།།
རྒྱལ་ཁམས་སྐོར་བའི་སེང་བུ་འའབྲུག་ཞོན་ངས།།
ཉན་ཤེས་རྣམས་ལ་སྙིང་གཏམ་ཐོལ་བྱུང་སྤེལ།།
ཕན་གནོད་མེད་པའི་རེ་ཚོར་ཙམ་ཞིག་འདི།།
འབྲི་འདོད་མེད་ཀྱང་དེ་རིང་བྲིས་ཐལ་ལོ།།
སྤྱི་ལོ། ༢༠༢༠ ཟླ། ༡༢ ཚེས། ༡༠ ཉིན། སེང་བུ་འབྲུག་ཞོན་གྱིས།