དམུས་ལོང་གི་ཚོགས་དང་གླང་ཆེན།

དབྱིན་ཇིའི་སྙན་ངག་མཁན་སྐུ་ཞབས་ཇོན་ གྷོཌ་ཕི་རི་ སེཀ་སི། (༡༨༡༦-༡༨༨༧)

དགེ་བཤེས་དགྲ་འདུལ་རྣམ་རྒྱལ་གྱིས་བོད་སྒྱུར་བྱས།

རྒྱ་གར་ཡུལ་གྱི་མི་དྲུག་སྟེ།།
ཤེས་པར་འདོད་པའི་བློས་རིངས་ནས།།
གླང་ཆེན་བལྟ་བར་ཐམས་ཅད་ཆས།།
དེ་ཀུན་དམུས་ལོང་ཡིན་མོད་ཀྱང་།།
རེ་རེས་རང་གི་བརྟག་པ་ལས།།
ཡིད་ནི་ཚིམས་པར་འགྱུར་བར་རེ།།

དང་པོས་གླང་ཆེན་ཕྱོགས་སུ་བསྐྱོད།།
འགྲིལ་བའི་སྟབས་ཀྱིས་དེ་ཡི་མོད།།
མཁྲེགས་པའི་ལུས་ཀྱི་ངོས་ལ་རེག།
དེ་མ་ཉིད་དུ་འདི་སྐད་དུ།།
ཨ་ཙ་མ་ན་གླང་ཆེན་ནི།།
གྱང་གི་ལོགས་དང་ཅིས་ཀྱང་འདྲ།།

གཉིས་པས་མཆེ་བར་རེག་བཞིན་དུ།།
ལྟོས་དང་འདི་རུ་ཅི་ཞིག་གདའ།།
ཅི་འདྲའི་ཟླུམ་ཞིང་རྣོ་ལ་འཇམ།།
ཞེས་པའི་མཚར་གཏམ་དབང་མེད་ཐལ།།
ཡ་མཚན་གླང་ཆེན་མདུང་དང་མཚུངས།།
ཁོ་བོ་ལ་ནི་ཧ་ཅང་གསལ།།

གསུམ་པས་གླང་ཆེན་ཕྱོགས་སུ་བསྐྱོད།།
སྟེས་ཀྱིས་ལག་པར་གླང་ཆེན་གྱི།།
འགུལ་ཞིང་ཁྱུག་པའི་གླང་སྣ་ཐེབས།།
སྙེམས་པའི་སྟབས་ཀྱིས་འདི་སྐད་དུ།།
གླང་ཆེན་ཞེས་བྱ་སྦྲུལ་དང་ནི།།
ཧ་ཅང་འདྲ་བར་ཁོ་བོས་ཤེས།།

བཞི་པས་མཚར་བཞིན་ལག་བརྐྱངས་པས།།
པུས་མོའི་ངོས་ལ་རེག་པར་གྱུར།།
ཡ་མཚན་སེམས་ཅན་འདི་ཉིད་ཀོ།
ཅི་འདྲའི་སྤྲོས་མེད་ཅིག་འདུག་སྟེ།།
གླང་ཆེན་ཞེས་ནི་བྱ་བ་འདི།།
སྡོང་རྐང་དང་ནི་མཚུངས་སོ་ཟེར།།

ལྔ་པས་སྟེས་ཀྱིས་རྣ་བར་རེག།།
དམུས་ལོང་བས་ཀྱང་དམུས་ལོང་གིས།།
འདི་ཉིེད་ཅི་ཡིན་བདེ་བར་ཤེས།།
དེས་ན་གླང་ཆེན་ཞེས་བྱ་བའི།།
མཚར་པོ་འདི་ནི་རླུང་གཡབ་བཞིན།།
ཡིན་པ་སུས་ཡིས་དགག་པར་ནུས།།

དྲུག་པས་ཉུལ་བར་བརྩམས་ཉིད་དུ།།
དཔྱང་འཕྲུལ་གཡོ་བའི་རྔ་མ་ནི།།
ལག་པར་ཐེབས་ཤིང་ཡུན་རིང་བར།།
ཕུར་ཞིང་ཉུག་མཐར་འདི་སྐད་དུ།།
གླང་ཆེན་ཞེས་ནི་བྱ་བ་འདི།།
ཐག་པ་འདྲ་བར་ཁོ་བོས་ཤེས།།

དེ་ལྟར་རྒྱ་གར་མི་འདི་རྣམས།།
རང་རང་གྲུབ་པའི་མཐའ་དག་ལ།།
ཧ་ཅང་དམ་པོར་གནས་བཞིན་དུ།།
རིང་པོའི་བར་དུ་དྲག་ཏུ་རྩོད།།
ཕྱོགས་ཙམ་བདེན་པ་ཀུན་མཉམ་ཡང་།།
སྤྱིར་ན་ཐམས་ཅད་ནོངས་པར་གྱུར།།

ངེས་དོན་གྱི་མཐའ་ཚིག
དེ་བཞིན་ཆོས་ལུགས་རྩོད་པའི་ནང་།།
ཞུགས་རྣམས་ཁོ་བོའི་སྣང་ཚོད་དུ།།
མ་རིག་མུན་ཀློང་སྟུག་པོའི་ཁྲོད།།
ཕན་ཚུན་དམ་བཅའ་མ་ལོན་ཞིང་།།
སུས་ཀྱང་མ་མཐོང་གླང་ཆེན་སྐོར།།
བབ་ཅོལ་ཁོ་ནས་དུས་འདའ་འོ།།