ཙ་རྐང་དྲུག་གིས།
དམངས་གཙོ་རེད་ཟེར་མོད།
ད་རེས་མི་དམངས་ཀྱི་སྐད་ཆ་དེ་ཉིད་ཉི་འོད་ཁྲོད་ཀྱི་འབྲི་མར་བཞིན་ཡུན་གྱིས་ཞི་སོང་།
མང་གཙོ་རེད་ཟེར་མོད།
ད་ཐེངས་མི་མང་གི་སྐད་ཆ་དེ་ཉིད་རླུང་འཚུབ་ཁྲོད་ཀྱི་སྤྲིན་པ་བཞིན་ཕྱོགས་ཕྱོགས་སུ་གཏོར་སོང་།
དམངས་སྒོར་གྱི་ཤུགས་ཆེ་དྲགས་པ་ཡིན་ནམ།
དམངས་ཚོགས་ཀྱི་སྐད་གདངས་ཆུང་དྲགས་པ་གང་ཡིན་མ་ངེས་མོད།
སྐད་ཆ་ཞིག་འགད་རྫས་བཞིན་བཀད་སོང་ན་ཡང་།
འགད་རྫས་དེས་གཏོར་བའི་རྡུལ་འཚུབ་མཁའ་དབྱིངས་སུ་འཕྱུར་ཏེ་སླར་ཡང་ས་ཐོག་ནས་ལྷིང་འཇགས་སུ་གནས་སོང་།
ལྷ་སྲུང་མ་བདུད་དུ་བསྒྱུར་བའི་དུས་རབས་ཀྱི་རྔ་བོ་ཆེ།
རྔ་ཆེན་དེའི་རྔ་པགས་གོ་བ་མ་ཡིན་པར་དམངས་སྒོར་རེད།
རྔ་པགས་དམངས་སྒོར་ཡིན་པའི་དུས་རབས་འདིར་རྔ་སྒྲ་ཅི་འདྲའི་ཆེ་ཨང་།
རྔ་ཆེན་པོ་རྡུང་ཐེངས་རེར་དམངས་ཚོགས་ཀྱི་རྣ་བས་མ་གཟོད་པར་ཟུག་རྔུ་འབྱིན་མོད།
གོ་གནས་མཐོ་བའི་དཔོན་པོ་རེ་ཟུང་གིས་རང་རང་གི་ཕོ་བ་ཕུར་བཞིན་རྔ་སྒྲ་སྙམ་མོ་འདུག་ཅེས་སྨྲས་ཡོད་པར་སྐད།
ལྷ་ལ་སྨད་པའི་དུས་རབས་སུ་རྡ་སའི་རི་མགོ་ནས་བྲིས།
༄༅། སྙིགས་དུས་ཤར་སོང་ལྷ་སྲུང་སྨད་སོང། སྙིགས་དུས་ཤར་སོང་བླ་མར་སྨད་སོང།
སྨད་ཡུལ་གང་ནས་སྤྱི་འཐུས་གྲོས་ཚོགས། སྨད་མཁན་སུ་རེད་བསྟན་པ་མར་སྒྲིབ།
དགྲ་ནི་དགའ་སོང་གཉེན་ནི་སྡུག་སོང། དེ་འདྲའི་སྤྱི་འཐུས་ཤེས་མེད་ཀླད་མེད།
ནང་ལ་ཤེས་མེད་ཕྱི་ནས་ཤེས་སོང། དགྲ་ཆས་གྱོན་ཡང་སྡོམ་པ་མེད་འདྲ།
མང་གཙོ་དམངས་གཙོ་དོན་གཅིག་བསམ་མཁན་དང་།
རང་བཙན་རང་དབང་གང་བསམ་བརྗོད་མཁན་དང་།
ཡུལ་མིའི་རྒྱལ་ཁབ་ཡུལ་མིའི་སྲིད་སྐྱོང་སོགས་།
ཐ་སྙད་ཚད་སྒྲུབ་ཡིན་པ་བློ་མ་བདེ་།