༼༤༽
དམག་སྒར་ལྟེ་བ་གྲུ་གུ་ཐང་ནས་མཚོ་སྣར་སྤོས་ནས་ལྷོ་ཁུལ་རྫོང་ཁག་སོ་སོར་དམག་གི་རྟེན་གཞི་དང་དམག་བྱུས་བཀོད་སྒྲིག་བྱས་ཚུལ།
གོང་གསལ་གྲོས་ཚོགས་དེའི་ནང་ཐག་གཅོད་ཇི་ལྟར་བྱུང་དོན་ལྟར། དམག་སྒར་ལྟེ་བ་ལྕགས་ཚ་གྲུ་གུ་ཐང་ནས་མཚོ་སྣར་སྤོས། མཚོ་སྣ་ནི་རྒྱལ་ས་ལྷ་སའི་ལྷོ་བརྒྱུད་དུ་ཡོད་ཅིང། རྒྱ་གར་གྱི་ས་མཚམས་དང་ཉེ་བར་ཡོད། ས་གནས་དེར་དམག་སྒར་ཨ་མའི་རྟེན་གཞིར་བྱས།
དེ་ནས་ལྷོ་བྲག་དུ་བ་རྫོང་དང༌། ལྷུན་རྩེ་རྫོང༌། དཔལ་སྡེ། གྲ་ནང༌། བསམ་ཡས། གོང་དཀར། རྩེད་ཐང༌། ཁྲ་འབྲུག སྣང་དཀར། ཆུ་ཤུལ། འོལ་ཁ། དྭགས་པོ་རྒྱ་ཚ། ཀླུ་ཁང་གྲུ་ཁ། བན་རྩ་གྲུ་ཁ། ཉ་སོག་གྲུ་ཁ་སོགས་ལ་འགོ་དམག་ཁག་བགོས་ཀྱིས་དཔུང་འཇུག་བྱས་ཏེ། རྒྱ་དམག་རྩ་གཏོར་ཕྱིར་འབུད་ཀྱིས་བསྟན་སྲུང་དྭང་བླངས་དམག་གིས་སྒར་ས་བཟུང༌།
ཡང་རྩེ་ཐང་དུ། བྲག་གཡབ་གཙོ་འཛིན་ཨ་ཕྲུུག་བླ་མ་དང༌། ལི་ཐང་ཇ་མ་བསམ་འཕེལ། ལི་ཐང་ཨ་ལོ་ཟླ་བ། སྡེ་དགེ་འབའ་ཆུང་དཔོན། དར་དགོན་གསེ་གསེ། ཆབ་མདོ་བློ་ཉི་སོགས་ཀྱིས་སྣེ་འཁྲིད་པའི་བྲག་གཡབ་རུ་ཤོག་དང༌། དེ་བཞིན་ལི་ཐང། སྡེ་དགེ། དར་དགོན། ཆབ་མདོ། སྨར་ཁམས་སོགས་ཀྱིས་དཔུང་འཇུག་འཐབ་འཛིངས་བྱས་ཤིང། འདི་ནི་ལྷོ་ཁའི་དམག་སྒར་ལྟེ་བ་ལྷ་རྒྱལ་རིར་མ་སྤོས་བའི་གོང་དུ་ཡིན་ལ། དམག་སྒར་ལྟེ་བ་ལྷ་རྒྱལ་རིར་སྤོས་ཟིན་པའི་རྗེས་སུ། སླར་ཡང་རྩེད་ཐང་དུ་མུ་མཐུད་ནས་དམག་སྣོན་དཔུང་འཇུག་སྔ་ཕྱི་རིམ་མཐུད་བྱས་པའི་ལོ་རྒྱུས་ནི་འོག་ནས་རིམ་པར་བཞིན་ཤེས་པར་འགྱུར་རོ།།
གྲ་ནང་དུ། སྒ་པ་དམག་སྤྱི་དགེ་ལེགས་ཕུན་ཚོགས་དང༌། གུ་ཤི་འཇམ་དགའ། ཆ་ཕྲེང་ཀོ་བ་བསྟན་པ་རྒྱལ་མཚན་ཅན་གྱིས་སྣེ་འཁྲིད་པའི་འགོ་དམག་ཁག་གཅིག་དཔུང་འཇུག་བྱས། གྲ་ནང་ནི་ལྷ་སའི་ལྷོ་རྒྱུད་དང་ཡར་ཀླུང་གཙང་པོའི་སྐེད་རྒྱུད་ན་ཡོད།
གོང་དཀར་རྫོང་དུ། ཆབ་མདོ་དམག་སྤྱི་བྱང་རི་ལྷ་རྒྱལ་དང༌། སྡེ་དགེ་ཆུ་རྡོ་བུ་དབང་ཕྱུག་ཚེ་རིང༌། ལི་ཐང་ཀུན་དགའ་བསམ་གཏན། ས་འདུ་བརྒྱ་དཔོན་བསྟན་པ་དར་རྒྱས། སྡེ་དགེ་བརྒྱ་དཔོན་འཇུ་ཆེན་བསོད་ནམས་ཕུན་ཚོགས་སོགས་ཀྱིས་སྣེ་འཁྲིད་པའི་རང་དམག་ཁག་གིས་དཔུང་འཇུག་བྱས་ཏེ་སྒར་ས་བཟུང༌། གོང་དཀར་རྫོང་ནི་ཡར་ཀྱུང་གཙང་པོའི་སྐེད་རྒྱུད་དང་ཡར་འབྲོག་གཡུ་མཚོའི་བྱང་ངོས་སུ་ཡོད།
ལྷོ་བྲག་དུ་བ་རྫོང་དུ། ཨ་མདོ་དམག་སྤྱི་ལེགས་བཤད་དང༌། མི་ཉག་གཙོ་འཛིན་ཨ་ཕོ་ཡོན་ཏན་ཅན་གྱིས་སྣེ་འཁྲིད་པའི་དམག་དཔུང་ཁག་གཅིག་གིས་དཔུང་འཇུག་བྱས་ཏེ་དམག་ས་བཟུང༌།
བསམ་ཡས་ཕྱོགས་སུ། ལི་ཐང་ཨ་ལོ་ཟླ་བ་(རྩེད་ཐང་ནས་ཕྱིར་འོང་རྗེས་)སོགས་ཀྱིས་སྣེ་འཁྲིད་པའི་རང་དམག་ཁག་གཅིག་གི་དཔུང་འཇུག་བྱས་ཏེ་དམག་ས་བཟུང༌། དྭགས་པོ་རྒྱ་ཚར་སྡེ་དགེ་བརྒྱ་དཔོན་སྦ་ལུག་གིས་སྣེ་འཁྲིད་པའི་རང་ཕྱོགས་དམག་ཤོག་ཁག་གཅིག་གིས་དཔུང་འཇུག་བྱས་ཏེ་དམག་ས་བཟུང༌།
འོལ་ཁ། གོ་འཇོ་ཆོས་དྲུག་དོན་འགྲུབ་ཕུན་ཚོགས་སོགས་ཀྱིས་སྣེ་འཁྲིད་པའི་རང་དམག་ཁག་གཅིག་གིས་དཔུང་འཇུག་བྱས་ཏེ་དམག་ས་བཟུང༌།
ལྕེ་ལྡེ་ཞོལ་དུ། དཀར་མཛེས་བརྒྱ་དཔོན་བློ་འཕྲིན་ལས་དང༌། ལི་ཐང་བརྒྱ་དཔོན་བླ་མ་བརྒྱུད་པ། ཆ་ཕྲེང་ཀོ་བ་རྒྱལ་མཚན་སོགས་རང་དམག་ཁག་གཅིག་གིས་དཔུང་འཇུག་བྱས།
ལྷུན་རྩེ་རྫོང་ནི། ལྷོ་ཁུལ་རྫོང་ཁག་རྣམས་ཀྱི་དབུས་སུ་ཡོད་པ་དང༌། རྫོང་གཞིས་ཁག་གཞན་དག་རྣམས་སུ་བསྟན་སྲུང་དྭངས་བླང་དམག་དཔུང་གིས་བཙན་ས་དང་འཐབ་ར་བཟུང་ཡོད་པས། རེ་ཞིག་ལྷིང་འཇགས་ཡིན་སྟབས། ཨ་རིའི་གསང་བའི་ལས་བྱེད་པ་ལི་ཐང་ཨ་ཐར་དང༌། ལི་ཐང་བློ་ཚེ་གཉིས་ཀྱིས་གསང་བའི་ཏར་འཕྲིན་གྱི་ལས་ཁུངས་བཙུགས་ཏེ་ཨ་རི་དང་གསང་བའི་འབྲེལ་ལམ་མུ་མཐུད་ནས་སྤེལ།
ཁྲ་འབྲུག་ཀྱང་ལྷོ་ཁུལ་གྱི་དབུས་སུ་འཁེལ་སྟབས་དགྲ་ཕྱོགས་ཀྱི་ཉེན་ཁ་དེ་ཙམ་མེད་པས། དབུས་ཆུ་སྒང་དམག་སྒར་གྱི་ཕོགས་ཁང་བྱས་ཤིང༌། རྗེས་སུ་བྲག་གཡབ་ཨ་ཕྲུག་བླ་མ་རྩེད་ཐང་དམག་སྒར་ནས་ཕྱིར་བསྐྱོད་པ་དང༌། ཨ་མདོ་སྐལ་བཟང་གཉིས་ཀྱིས་ཕོགས་ཁང་འགན་འཛིན་བྱས། ལྷོ་ཁུལ་གཙོ་དྲག་གྲས་སྒེར་ཟུར་ཁང་པའི་ཞབས་དབང་འདུས་རྡོ་རྗེ་ལས་དྲུང་བྱས།
ཀླུ་ཁང་གྲུ་ཁར། དར་དགོན་གཙོ་འཛིན་སྐལ་བཟང་དབང་ལྡན་དང༌། ཆ་ཕྲེང་བརྒྱ་དཔོན་ཤེས་རབ། སྨར་ཁམས་གཙོ་འཛིན་འགུ་གྲགས་སོགས་ཀྱིས་སྣེ་འཁྲིད་པའི་རང་དམག་ཁག་གིས་དཔུང་འཇུག་བྱས་ཏེ་དམག་ས་བཟུང༌།
སྤལ་སྡེར། སྒ་བ་དམག་སྤྱི་བུ་བཀྲ་ཡག སྨར་ཁམས་བརྒྱ་དཔོན་དགེ་འདུན་བྱང་ཆུབ་དང༌། འདན་མ་རྟག་རྟག སྨར་ཁམས་ཆོས་མཛད། སྒ་པ་གཡང་ཚེ་རིང་སོགས་ཀྱིས་སྣེ་འཁྲིད་པའི་བརྒྱ་ཤོག་བཞིའི་རང་དམག་གིས་དཔུང་འཇུག་བྱས་ཏེ་དམག་ས་བཟུང༌།
འཕྱོངས་རྒྱས་སུ་དར་དགོན་དམག་སྤྱི་གསེ་གསེ་དང༌། རྟའུ་གཙོ་འཛིན་ནོར་བུ། གླིང་ཚང་ཡར་གླིང་དབང་རྒྱལ་བཅས་ཀྱིས་སྣེ་འཁྲིད་པའི་རྟ་དམག་གོ་ཧྲག་དཔུང་ཁག་གཅིག་དཔུང་འཇུག་བྱས་ཏེ་དམག་ས་བཟུང༌།
ཡར་ཀླུང་ཕྱོགས་སུ་སྨར་ཁམས་བསྟན་འཕེལ་སོགས་ཀྱིས་སྣེ་འཁྲིད་པའི་རྟ་དམག་གོ་ཧྲག་ཁག་གཅིག་དཔུང་འཇུག་བྱས་ཏེ་དམག་ས་བཟུང༌།
དེ་ལྟར་ཁག་བགོས་ཏེ་སྔ་ཕྱིར་དཔུང་འཇུག་བྱས་པ་ལས་ས་གནས་འགའ་ཞིག་ཏུ་གཡུལ་འཐབ་དྲག་པོས་རྒྱ་དམག་ཤི་བསད་གྲངས་མེད་བཏང་བ་དང༌། རྒྱ་དམར་གྱི་ལས་ཁུངས་རྩ་གཏོར་བྱས་ཏེ་མཐའ་བསྐྲོད་བཏང་བས། ས་གནས་འགའ་ཞིག་ནི་ཆུ་སྒང་དམག་དཔུང་གི་ཟིལ་ཤུགས་ཙམ་གྱིས་ར་བཤའ་ས་ར་ལུག་འདར་ཟེར་བའི་དཔེ་ལྟར། རྒྱ་དམག་གིས་ལས་ཁུངས་དང་དམག་སྒར་བཞག་ནས་རྒྱ་དམག་རྣམས་རང་བཞིན་གྱིས་ལྷ་སར་བྲོས་བྱོལ་དང༌། ཕྱིར་འཐེན་བྱེད་དགོས་བཟོས་པ་སོགས་ལྷོ་ཁའི་ས་ཁུལ་གཙང་མ་བཟོས་པའི་ལོ་རྒྱུས་དངོས་བྱུང་ཤིན་ཏུ་མང་བ་རྣམས་འོག་ནས་རིམ་བཞིན་དགོད་པར་བྱའོ།།
ཆུ་སྒང་དམག་སྒར་ལྟེ་བ་མཚོ་སྣར་སྤོ་དགོས་པའི་རྒྱུ་མཚན་དང་དེའི་བྱུང་རིམ་ཐད། <>ནང༌། དུས་སྐབས་དེ་དག་གི་ཚེ་ལྷོ་ཁ་གྲི་གུ་ཐང་དུ་ཡོད་པའི་ཆུ་སྒང་གི་དམག་སྒར་ལྟེ་བ་ཐོག་མར་འཛུགས་ཡུལ་ཡིན་ཀྱང༌། ས་ཆ་དེ་བཞིན་བྱང་ཐང་འབྲོག་ས་ལྟ་བུར་གནས་ཡུལ་གྱི་ཆ་རྐྱེན་ཐམས་ཅད་ལ་དཀའ་ངལ་ཡོད་པ་དང༌། རིམ་བཞིན་དམག་མི་རྒྱ་བསྐྱེད་ཇེ་ཆེར་སོང་བ་སོགས་གང་ཅིའི་ཐད་དང༌། དམག་སྒར་མཚོ་སྣར་སྤོ་རྒྱུའི་གྲོས་མཐུན་བྱུང་དོན་ལྟར། དམག་སྒར་ཨ་མ་མཚོ་སྣ་རྫོང་རྒྱབ་མལ་ལེ་གཉིས་ཙམ་རྒྱང་བསྲིངས་ཏེ་སྤང་གཤོངས་སུ་སྤོས་རྗེས་ལས་ཁུངས་ལྟེ་བའི་ནང་གི་དམག་སྤྱི་ཕལ་ཆེ་བ་ཨ་འབྲུག་སྦྱིན་བདག་དང་ལྷན་དུ་དཔུང་སྐྱོད་བྱས་ཟིན་པ་དང༌། ཕྱོགས་མཚུངས་གཙོ་འཛིན་རྣམས་ཀྱང་འགའ་རེ་ཁག་བགོས་ཀྱིས་ལྷོ་ཁུལ་རྫོང་གཞིས་ཁག་ལ་དམག་ཕོགས་བཟའ་བཅའི་མཐུན་རྐྱེན་རྒྱབ་སྐྱོར་རོགས་རམ་འབོད་སྐུལ་ཞུ་བར་ཕྱིན་ཟིན་སྟབས། མཚོ་སྣའི་ལས་ཁུངས་ཨ་མའི་ཞི་དྲག་ལས་དོན་འཛིན་སྐྱོང་བྱེད་པོ་དམག་སྤྱི་དང་གཙོ་འཛིན་རེ་ཟུང་ལས་མེད་པས་གང་ཅིའི་ལས་དོན་འཐུས་ཤོར་འབྱུང་ཉེན་ལ་བརྟེན་བྱེས་ཕེབས་འགོ་དམག་རྣམས་ཕྱིར་འཁོར་མ་བྱུང་རིང༌། ཡིག་ཚང་ལས་ཁུངས་ཟུར་ཚུགས་མ་དགོས་པར་དེ་ཁོངས་ལི་ཐང་འཇང་ཚ་ཆོས་མཛད་དང༌། ཆབ་མདོ་རྡོ་ཚེ་གཉིས་ཀྱིས་དམག་སྤྱི་དང་གཙོ་འཛིན་གྱི་ལས་རོགས་འགན་ཁུར་མི་བྱ་ཀ་མེད་གྱུར་ཅིང༌། ཡིག་ཚང་གི་རྒྱུན་ལས་པ་ཆབ་མདོ་དཀོན་མཆོག་རྡོ་རྗེས་རྐང་འགན་ཁྱེར་ནས། ཡིག་འབྲིའི་བྱེད་སྒོ་ཆེ་ཕྲ་མཐའ་དག་འཐུས་ཚང་རྒྱུན་འཁྱོངས་བྱས། དེའི་ཚེ་ཆུ་སྒང་དམག་མིར་ཞུགས་མི་རིམ་འབྱོར་བྱུང་བ་རྣམས་ཁུངས་སོ་སོར་ཞུགས་སུ་འཇུག་པ་སོགས། དམག་གྲབས་ཀྱི་དུས་འདའ་བའི་མུར། སྙེ་མོ་ནས་ཨ་འབྲུག་མགོན་པོ་བཀྲིས་མཆོག་གིས་བང་མི་སྡེ་དགེ་འབར་ཆུང་བླ་མ་དང༌། ལྷོ་བ་བློ་བཟང་གཉིས་བཏང་སྟེ། ང་ཚོ་འགོ་དམག་ཤངས་དགའ་ཆོས་སུ་བསྐྱོད་པའི་ལམ་འཁེལ། རྡོ་དཀར་སུམ་མདོར་རྒྱ་དམག་དང་གདོང་ཐུག་གིས་རྒོལ་འཛིངས་རིམ་པ་བྱས་པས། འཐབ་འཛིང་སྐབས་རྒྱ་དམག་ཁྱོན་ཆེ་བསད་རྨས་བཏང་ཡང༌། རང་དམག་མང་པོ་ཞིག་ཀྱང་རྐྱེན་འདས་ཤོར་སོང་ཞིང༌། དེ་གའི་འགོ་དམག་རྣམས་ནས་ཕྱོགས་སོ་སོར་ས་སྲུང་དང་སོ་པ་བཙུགས་ཏེ། དམག་སྒར་བརྟན་སྲུང་ཐུབ་པ་དགོས་གལ་ཆེ་ཞིང༌། དེ་གའི་དམག་སྒར་ལྟེ་བ་འཐོར་ཞིག་གྱུར་ཚེ། སླར་བསྐྱར་འཛུགས་བྱེད་རྒྱུར་དཀའ་ངལ་ཡོང་གནས་ལ་བརྟེན། དེ་ལུགས་འགོ་དམག་ཚང་མས་གཟབ་ནན་དགོས་པའི་བཀའ་ཡིག་དང་གསུང་འཕྲིན་ནན་པོ་གནང་འདུག་པས། ཚང་མས་དེ་བཞིན་ཞུ་རྒྱུ་བྱས། ཞེས་བཀོད་པ་ཡོད་པ་རེད།
གནམ་འོག་ཕོ་རྒོད་དཔའ་བོའི་འདུ་འཛོམས་ཀྱིས།།
གངས་རིའི་ཕ་ནོར་སྲུང་སྐྱོབ་བྱེད་པའི་སླད།།
དྲག་པོའི་དམག་གི་བཀོད་སྒྲིག་བརྟན་པོའི་འོག།
རྫོང་ཁག་བཅོ་བརྒྱད་བཟུང་བའི་གཏམ་བརྒྱུད་རིང༌།།
ལོ་རྒྱུད་དེ་དེབ་གང་འདྲ་ཞིག་ནས་ཤུས་པ་ཡིན་ནམ་ དེབ་དེ་གང་ནས་ཉོ་ཐུབ་བམ་
འཇིགས་མེད་ནས།
ལོ་རྒྱུས་དེ་དེབ་གང་འདྲ་ཞིག་ནས་བཤུས་པ་ཡིན་ནམ། དེབ་དེ་གང་ནས་ཉོ་ཐུབ་བམ།
ཤར་འོད་ལགས་ ཐུགས་རྗེ་ཆེ་