དཔེ་ཆ་ལྟོས་པའི་ཕན་ཡོན། སྒང་བུ་འཁྱམས་པོ།

Comments (9) on “དཔེ་ཆ་ལྟོས་པའི་ཕན་ཡོན། སྒང་བུ་འཁྱམས་པོ།”

1. དངོས་ནས་བདེན་པ་རེད། མཁས་པ་བྱེད་འདོད་ན་མཐོང་རྒྱ་དང་ཐོས་རྒྱ་ཆེ་དགོས་པ་རེད། དེ་ལྟར་ཡིན་པ་ཚང་མས་མཁྱེན་གསལ་རེད། དེ་ཡིན་དུས་མཁས་པ་བྱེད་འདོད་ན་དཔེ་བཀླག་དགོས་ཞེས་པའི་བསྐུལ་མ་དེ་དོན་མེད་རེད། བསྐུལ་མ་དང་སློབ་གསོ་གནང་དགོས་ས་དེ་དཔེ་ཀློག་དུས་ཇི་ལྟར་ཀློག་དགོས་པ་དང་། དཔེ་ཀློག་རྒྱུར་སྤྲོ་བ་བརྟས་ཕྱིར་ཅི་ཞིག་བྱེད་དགོས་པ། ཀློག་དོན་སེམས་ལས་མ་བརྗེད་པར་བཞག་ཐབས་ཇི་ལྟར་ཡིན་སོགས་ཡོད། དཔེར་ན་དཔེ་ཇི་ཙམ་བཀླགས་ཀྱང་བཀླགས་དོན་སེམས་ལ་བཞག་མ་ཐུབ་ན་དེས་མཁས་པ་ཆགས་རྒྱུར་ཕན་མི་སྲིད། དེ་ཡིན་དུས་དེ་ལྟ་བུའི་བསླབ་གསོ་གནང་ཐུབ་མཁན་ཡོད་ན་དེ་ལ་ངས་ལག་གཉིས་ཐལ་མོ་སྦྱོར་ཏེ་བསླབ་གསོ་གནང་དགོས་པའི་བསྐུལ་མ་ལན་བརྒྱར་ཞུ་གི་ཡིན།

2. རྩོམ་ཡིག་འབྲི་བ་པོ་དང་མཆན་འདེབས་པ་པོ་གཉིས་ཀ་ལ་བོད་སྤྱིར་མ་ཟད་འགྲོ་བ་སྨྲ་ཤེས་དོན་གོ་བ་ཡོངས་ལ་ཕན་པའི་ལྷག་བསམ་ལ་རྗེས་སུ་ཡི་རང་ཞིང་། དེ་ལྟར་འོང་བ་ལ་བློ་ལྡན་ཡོངས་ཀྱིས་འབད་པར་ཞུ་ག་ལ་དགོས། མི་དགོས་སོ།།

3. དཔེ་ཆ་ཀློག་པ་ནི་ཡོན་ཏན་གྱི་རྨང་གཞི་རེད། དཔེ་ཀློག་མ་བྱས་པར་མཁས་པའི་གདན་གྲལ་ལ་ཕེབས་པ་ཡོད་མེད་བཤད་དཀའ་ཡང་དགོན་གྲོང་ན་གནས་པ་སུ་ཞིག་ཡིན་རུང་དཔེ་ཆ་མང་པོ་ཀློག་མཁན་ལ་མ་མཐར་ཡང་དཔེ་ཆ་བ་ཞེས་པའི་མིང་འདོགས་འོས། དཔེ་ཆ་བའི་རིན་ཐང་ནི་ཡུལ་དུས་གནས་བབས་དང་བསྟུན་ནས་ཐག་ཆོད་དཀའ་ཙམ་མིན་པར་འཚོ་བའི་མྱོང་གོམས་དང་སེམས་ཁམས་ཀྱི་གཤིས་ལུགས་དང་འབྲེལ་ནས་ཡོད་པའི་སེམས་ཁམས་ཀྱི་སྨན་པ་མཆོག་ལྟ་བུ་དཔེ་ཆ་བ་རྣམས་ནི་ཐོག་མར་གལ་ཆེ་བ་སྟེ་ཤེས་ཡོན་གྱི་རྨང་གཞི་འཛུགས་མཁན་དེ་ཡིན།

4. དཔེ་ཆ་ལྟ་ཞེས་པ་དེ་བཟང་ངན་གང་རུང་ལ་འགྱུར་ཆོག་པའི་བྱ་ཚིག་ཅིག་རེད། ཕན་གནོད་གཉིས་ཀའི་ཕྱོགས་སུ་འགྱུར་ཆོག་པ་ཞིག་རེད། བཟང་ངན་གཉིས་ཀའི་གྲུབ་འབྲས་འབྱུང་ཆོག་པ་ཞིག་རེད། དཔེ་ཆ་ལྟ་བ་ཡིན་ན་ཡག་པོ་ཡིན་པས་མ་ཁྱབ་ཅེས་ལན་འདེབས་རྒྱུ་ཡིན།

5. རེད་རེད་དཔེ་ཆ་ལྟས་ནས་ཆགས་སྡང་གི་བློ་ཤུགས་ཆེ་བ་དང་ང་རྒྱལ་ཆེ་བ་དང་། ཐ་ན་ལས་འབྲས་དང་ཆོས་ལ་ལོག་ལྟ་ཡང་སྐྱེ་མཁ་་མང་ཆེ་བ་དཔེ་ཆ་ལྟས་ཏེ་འབྱུང་གི་ཡོད་འདུག། དཔེ་ཆ་ལྟས་པ་ཙམ་གྱིས་མི་འགྲིག་
   བློ་རྣམ་པ་གསུམ་དང་ལྡན་པ་ཞིག་དགོས། དང་པོ་འཛིན་པའི་བློ། བར་དུ་བརྟག་པའི་བློ། ཐ་མར་རྟོགས་པའི་བློ་དང་ལྡན་པ་ཞིག་དགོས། རྟོགས་པའི་བློ་ཟེར་བ་ནི་དཔེ་ཆ་ནས་གསུངས་པའི་བླང་དོར་གྱི་གནད་རྣམས་ལ་མ་རྨོངས་པ་ཚུལ་བཞིན་ཉམས་སུ་ལེན་ཤེས་དགོས། དེ་མིན་ཆགས་སྡང་གི་བློ་སྔར་མེད་གསར་དུ་སྐྱེས་ན་དཔེ་ཆ་ལྟས་པའི་གོ་མ་ཆོད་པ་རེད། མ་ཟད་ཀུན་བཏགས་ཀྱི་བདག་འཛིན་དེ་ཉིད་དཔེ་ཆ་བ་དང་གྲུབ་མཐའ་འཛིན་མཁན་ཡིན་ཟེར་མཁན་དེ་ཚོར་འཇིག་རྟེན་ཕལ་པ་ལས་ཀྱང་ཐོལ་པའི་ཉོན་མོངས་པ་རེད།

6. ཡིག་གེ་ཡོད་པའི་མི་རིགས་ཁག་ལ་མི་རིགས་སོ་སོའི་གཤིས་ཀ་རེ་ཡོད། གཤིས་ཀ་དེ་མི་རིགས་དེའི་ཡིག་ཐོག་ནས་བྲིས་པའི་དཔེ་ཆ་ཀློག་བཞིན་གྲུབས་པ་རེད། ད་ལྟ་བོད་པའི་སྤྱི་ཚོགས་ནང་དུ་བོད་དབྱིན་རྒྱ་གསུམ་ཀློག་མཁན་ཡོད། ཕྱི་ཚུལ་ནས་བལྟས་ན་ཚང་མ་བོད་པ་རེད། ནང་གི་བསམ་བློའི་བར་ཆད་ཆེན་པོ་རེད། དེ་ལྟར་ན་སྐབས་རེ་ཡིག་རིགས་མི་གཅིག་པ་ཀློག་མཁན་གྱི་བོད་པའི་ཤེས་ཡོན་རྣམས་བསམ་བློ་བརྗེ་རེས་བྱེད་རྒྱུ་དེ་གལ་ཆེན་པོ་ཡིན་པ་དང་། ཕན་ཚུན་གང་མང་མང་ནང་བསམ་མནོ་ནས་ཆ་རྒྱུས་ཡོད་པ་ཞིག་བྱེད་ཐུབ་ན་ཡག་པོ་འདུག དཔེ་ཞིག་བཞག་ན། འཇམ་དབྱངས་ནོར་བུ་ལྟ་བུའི་དབྱིན་ཡིག་ཀློག་མཁན་དང་བོད་ཡིག་ཀློག་མཁན་གང་རུང་གི་རིག་པ་སྨྲ་བ་མཉམ་དུ་འཛོམས་ནས་བགྲོ་གླེང་གནང་ཐུབ་ན་དགེ་མཚན་ཞིག་འདུག་བསམ་སོང་། དེ་མ་གཏོགས་བསམ་མནོའི་བར་ཐག་རིང་པོ་རེད། བགྲོ་གླེང་བྱེད་ཐུབ་ན་ཕན་ཚུན་ཁ་གསབ་དང་ཁ་སྣོན་རྒྱུས་མངའ་ཡག་པོ་ལོན་པར་བསམ། དཔེ་ཆ་བྱེ་བ་འབུམ་ལ་བཀླག་གྱུར་ན། སྨྱུག་རྩེ་འགུལ་བར་ལྷ་ཡིས་ཁ་ལོ་བསྒྱུར་ཟེར་བ་ལྟར་དཔེ་མང་བལྟས་ན་རྩོམ་ལ་ཕན་ངེས་རེད། ལྟ་གྲུབ་གྱི་ཆ་ནས་བཤད་ན་ཇི་ལྟར་ཡིན་མིན་ངས་བཤད་མི་སྤོབས།

7. སྒང་བུ་འཁྱམས་པོས་གསུངས་པ་ལ་རྗེས་སུ་ཡི་རང་ཡོད་དོ་ དེ་དེ་བཞིན་ནོ་ དཔེ་ཆ་ཀློག་མཁན་ཞིག་ཡིན་ཕྱིན་ཉིན་རེ་ནས་ཉིན་རེ་བློ་སྟོབས་དང་གོ་བ་ལ་འཕེལ་རྒྱས་ཡོང་བ་ནི་སྨོས་མ་དགོས་སོ།

8. གོང་གི་རྩོམ་འདི་ལ་རིག་པ་དང་མྱོང་བས་དཔྱད་ན། འདི་འདྲ་རེད།

   དཔེ་ཆ་ཀློག་ཐུབ་ན་ཤིན་དུ་ལེགས་ཟེར་བ་འདི་ཡང་བདེན་པ་མ་རེད།  དཔེ་ཆ་འཚོ་བ་དང་ཉམས་མྱོང་ལ་ལེགས་ཆ་བླང་རྒྱུ་ཡོད་པ་དེ་དག་ཀློག་ན་བཟང་མོད། དེ་མིན་ཆགས་པ་སློང་ཆེད་དང་། མགོ་བདེ་དྲན་འཁྲུལ། དེ་བཞིན་རྣམ་པར་གཡེང་ཆེད་ཀྱི་སྒྲུང་ཕལ་པ་འདི་ཚོ། དུས་ཚོད་འཕྲོ་བརླག་གཏོང་བའི་རྒྱུ་མིན་ཡིན་ནམ། དེ་དག་ལ་ཕན་པ་དང་དགེ་མཚན་ཡོད་དམ་ཞེས་མ་མེད་པ་ནི་མཐའ་གཅིག་གོ

   ད་ལྟ་མི་མང་པོ་ཞིག་གིས་འཕྲུལ་རྩལ་ལེགས་པར་སྤྱད་ནས། དཔེ་ཆར་མགོ་བོ་མ་འཁོར་བར། གློག་བརྙན་དང་བརྙན་འཕྲིན་གྱི་འཕྲུལ་རྩལ་དུ་མ་སྤྱད་ནས་ཡོན་ཏན་ལེན་བཞིན་ཡོད་ན། དཔེ་ཆ་ལྟ་བུ་ཡོན་ཏན་ལེན་པའི་རྒྱུ་མིན་སྟབས། དཔེ་ཆ་དང་བརྙན་འཕྲིན་དེ་ཚོའི་ཕན་ཡོན་མཉམ་དུ་སྦྱར་དགོས་པར་མཐོང་།

   དེ་བཞིན་མིས་གང་བཤད་ལ་ལམ་གསེང་ལྐུགས་པའི་ལྷོད་རྒྱུག་མ་བྱེད་པར་དཔྱད་པ་བྱ་རྒྱུ་དེ་ཤིན་དུ་ནས་གལ་ཆེན་པོ་རེད་སྙམས། དེ་ན་ཕྲུ་གུར་བློ་གཟུར་བོར་གནས་པ་དང་བརྟག་པ་བྱེད་པའི་རྣམ་དཔྱོད་སྐྱེ་ཐུབ་པ་བྱ་རྒྱུ་ཡིན་ཤིན་དུ་ནས་གལ་ཆེ།

9. སྐུ་པར་དང་པོ་དེ་ནི་བྱིན་རླབས་ཅན་ཞིག་འདུག །
   དཔེ་པར་གཉིས་པ་དེ་ནི་ལག་བྲིས་གསོན་ཉམས་ལྡན། །
   སྒང་བུ་འཁྱམས་པོས་རང་གི་འཁྱམ་ས་ནོར་མི་འདུག །
   རྟོག་དཔྱོད་འཁྱམ་ས་དཔེ་ཆ་ལས་ལྷག་གང་ཡང་མེད། །