དད་པ་དངོས་གླེང་བ།

སེར་ཤུལ་རིན་ཆེན་དོན་གྲུབ།

སྐུ་ཞབས་ཞོགས་དུང་གི་(དོགས་སློང་སྙིང་སྟོབས)་སུ་དད་པ་གླེང་བ་ཞེས་པའི་རྩོམ་ཡིག་ཅིག་བཀོད་ཡོད།
རྩོམ་ཡིག་དེར། འདུན་དང་ཞེ་སྡང་འཇིགས་པ་དང་། །རྨོངས་པའི་ཆོས་ལས་ཡོངས་མི་འདའ། །དེ་ལ་དད་པ་ཅན་ཞེས་བྱ། །ཞེས་པའི་མགོན་པོ་ཀླུ་སྒྲུབ་ཀྱི་རིནཆེན་ཕྲེང་བའི་ལུང་འདི་དྲངས་ནས་བོད་མི་རྣམས་ལ་དད་པ་རྣམ་དག་ཅིག་ཡོད་མ་མྱོང་ཞིང་། ཡང་མ་དག་པའི་དད་པ་དེས་བོད་གངས་ཅན་པ་རྒུད་པའི་གནས་སུ་འདྲུད་བཞིན་པ་དང་དྲུད་སོང་བར་འགྲེལ་ཡོད། འདི་ལྟར་འགྲེལ་བའི་གཞི་རྩ་ནི་གོང་དུ་བསྟན་པའི་དད་པ་དེ་དད་པའི་ཚད་གཞི་རུ་བཞག་ཅིང་དེ་ཡོད་མེད་ཀྱིས་དད་པ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་གནས་ལུགས་གཞིར་བཞག་གིས་བཤད་པ་ཞིག་རེད། གནས་ལུགས་འདིར་བདེན་ཁ་སྦྱིན་ཆེད་དུ་ཁོང་གིས་འོག་གི་ཚིག་རྐང་གཅིག་འདྲེན་བཀོད་བྱས་མེད། དེ་འདྲེན་བཀོད་མ་བྱས་པ་དང་བརྗོད་བྱ་ཆ་ཚང་མི་སྟོན་པའི་ཚིག་ཅིག་གིས་རང་གི་བཤད་པའི་གནས་ལུགས་ལ་བདེན་དཔང་བྱེད་དུ་འཇུག་པའི་བྱ་སྤྱོད་འདིའི་ཐོག་ནས་སྐུ་ཞབས་ཞོགས་དུང་གི་རང་ཚུགས་དང་། དྲང་བདེན། ལྗིད་ཁོག་སོགས་ལ་འགྲེལ་བཤད་གསལ་བོ་ཞིག་བརྒྱབས་ཡོད། བརྗོད་བྱ་ཆ་ཚང་སྟོན་པའི་ཚིག་ཡོངས་རྫོགས་དྲངས་ན་འདི་ལྟར། འདུན་དང་ཞེ་སྡང་འཇིགས་པ་དང་། །རྨོངས་པའི་ཆོས་ལས་ཡོངས་མི་འདའ། །དེ་ལ་དད་པ་ཅན་ཞེས་བྱ། །ངེས་པ་ལེགས་པའི་སྣོད་མཆོག་ཡིན། །ཚིག་རྐང་ཐ་མ་དེས་ནི་གོང་གི་དད་པ་དེ་དང་ལྡན་པའི་གང་ཟག་དེ་ངེས་ལེགས་ཐར་བའི་གོ་འཕང་གི་སྣོད་མཆོག་ཏུ་གྱུར་བ་ཞིག་ཡིན་པར་བསྟན་པ་ལས་སྤྱིར་དད་པའི་ཚད་གཞི་དང་། དད་པ་དེ་ལྡན་མི་ལྡན་གྱིས་སྤྱིར་དད་པ་ཡོད་མེད་ཀྱི་ཚད་ཐིག་ཏུ་འཇོག་རིགས་པའི་རྒྱུ་མཚན་ཏིལ་འབྲུ་ཙམ་ཡང་གསུང་མེད་བཞིན་དུ་ལུང་འདི་བོད་མི་ཚོར་དད་པ་མེད་པ་དང་བོད་མིའི་རྒྱུད་ཀྱི་དད་པ་དེས་བོད་མི་རིགས་རྒུད་མཐར་འཁྲིད་པའི་གནས་ལུགས་ཀྱི་རྒྱབ་རྟེན་དུ་དྲངས་པ་ནི་རྩོམ་པ་པོ་ཁོང་གི་བོད་ཀྱི་ནང་ཆོས་ཀྱི་ཤེས་ཚད་དང་། ཁོང་ཉིད་ཀྱིས་རྟག་ཏུ་གསུང་བཞིན་པའི་དྲང་བདེན་དང་། དཔྱོད་ཤེས་ལའང་གུས་བརྩི་མ་བྱས་པ་ལྟ་བུར་མངོན། ནང་བསྟན་རིག་པའི་གཞུང་ལུགས་ཀྱི་བསྟན་དོན་དུ་གྱུར་བའི་དད་པ་ནི་དཀོན་མཆོག་གསུམ་དང་ལས་འབྲས་སོགས་ལ་ཡིད་ཆེས་དང་། མངོན་འདོད། དང་པའི་དད་པ་སོགས་ཡིན་ཞིང་དད་པ་དེ་ལྟ་བུ་ཞིག་ཡོད་པ་ལ་ཞེ་སྡང་གི་དབང་གིས་དང་། རྨོངས་པའི་དབང་གིས་དང་། འཇིགས་པ་སོགས་ཀྱི་དབང་གིས་ཡུལ་དེ་ལས་ཡོངས་སུ་མི་འདའ་བ་ཞིག་མེད་ཀྱང་ཆོག བོད་མི་ཚོས་དཀོན་མཆོག་གསུམ་སྐྱབས་གནས་སུ་ཁས་ལེན་ཞིང་ཡིད་ཡིད་དགའ་ལྷང་ལྷང་གི་དང་བ་ཡོད་ལ། དཀོན་མཆོག་དང་ལས་འབྲས་ལ་ཡིད་ཆེས་ཀྱང་ཡོད། སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་དཀོན་མཆོག་དེའི་གོ་འཕང་ཐོབ་འདོད་ཀྱང་ཡོད་པས་བོད་མི་ཚོར་རིག་པའི་གཞུང་ལུགས་ཀྱི་དགོངས་དོན་ལྟར་གྱི་དད་པ་རྣམ་དག་ཅིག་ཡོད་པ་སུས་ཀྱང་བསྙོན་ཐབས་མེད། འདིར་གནད་འགག་ཅན་གྱི་དབྱེ་ཞིབ་རང་བཞིན་གྱི་འགག་རྩ་ནི་བོད་མིའི་རྒྱུད་ཀྱི་དད་པ་དེའི་དགེ་སྐྱོན་གྱི་སྐོར་ཡིན། བོད་མིའི་རྒྱུད་ཀྱི་དད་པ་འདིས་༸གོང་ས་ཡབ་སྲས་རྣམ་གཉིས་ཀྱི་གཙོས་པའི་ཆོས་ཀྱི་དབུ་འཁྲིད་ཚོར་ཡིད་ཆེས་བླ་མེད་བསྐྲུན་ཅིང་ཁོང་ཅག་གི་ལམ་སྟོན་འོག་བོད་མིའི་མཐུན་སྒྲིལ་གྱི་ནུས་པ་གོང་དུ་བཏེགས་ཡོད་པ་དང་། དད་པ་དང་ཡིད་ཆེས་ཀྱིས་བཀུར་བའི་བོད་ཀྱི་ནང་བསྟན་རིག་པའི་གཞུང་ལུགས་ཀྱིས་བོད་མིའི་ཆེ་མཐོང་རྒྱལ་སྤྱིའི་ཁྱོན་དུ་གཟི་བརྗིད་ཀྱིས་ངོམ་ཡོད། བོད་མིའི་རྒྱུད་ཀྱི་དད་པ་དེ་རྨོངས་དད་དང་འདྲེས་ཆ་ཆེ་བ་དང་སྐབས་འགར་དད་པ་ལ་རྟེན་ཚབ་ཆེ་བའི་དབང་གིས་འཐུས་ཤོར་སོང་བ་ཏན་ཏན་ཡོད་སྲིད་མོད། དེ་ཙམ་གྱི་དད་པ་མི་དགོས་ཞེས་བཤད་ན་དྲང་བདེན་དང་རང་ཚུགས་ཅན་གྱི་བྱེད་སྟངས་ཤིག་གཏན་ནས་མིན། ཆོས་གང་ཞིག་དགེ་སྐྱོན་གཉིས་ཀྱི་ཆ་ནས་དབྱེ་ཞིབ་ཡང་དག་པ་ཞིག་བྱས་ཏེ་གང་ཞིག་གི་དགེ་ཕན་མང་བ་དང་སྤྱི་ཚོགས་ལ་ཕན་པའི་ཕྱོགས་ནས་བལྟས་ཏེ་རིན་ཐང་འཇོག་པ་ནི་ད་གཟོད་དྲང་བདེན་གྱི་ཕྱོགས་སུ་བསྐྱོད་ཅེས་བརྗོད་ཆོག་པ་ལས་དགེ་མཚན་དང་རིན་ཐང་ཚང་མ་རྒྱབ་ཏུ་གཡུག་ནས་ཉེས་ཕྱོགས་རྐྱང་བས་ཐུར་དུ་གཡུག་པ་ནི་དྲང་བདེན་ཞིག་ག་ལ་ཡིན། དད་པ་ནི་སྒྲ་ཡངས་པོར་བྱས་ཏེ་བཤད་ན་ཡུལ་གང་ཞིག་ལ་ཡིད་དགའ་ལྷང་ལྷང་གི་དང་བ་དང་། ཡང་ན་དེ་ཉིད་མངོན་པར་འདོད་པ་སྟེ་དེ་ཉིད་ཐོབ་འདོད་དམ། ཡུལ་དེར་ཡིད་ཆེས་བྱེད་པ་དེ་རེད། དེའི་བྱེད་ལས་གཙོ་བོ་ནི་བརྩོན་འགྲུས་འདྲེན་ཞིང་བརྩོན་འགྲུས་ཡོད་པའི་མི་སུས་ཀྱང་འདི་དང་ཕྱི་མ་འཇིག་རྟེན་བཅས་ཀྱི་བྱ་བ་རླབས་ཆེན་སྣ་ཚོགས་ཞིག་བསྒྲུབ་ཐུབ་ངེས་ཡིན། སྒྲ་ཟོར་ཡངས་པར་བྱས་ཏེ་བཤད་ན་དད་པ་ནི་སངས་རྒྱས་ཀྱི་གོ་འཕང་དང་ཐར་བའི་མཛེས་སྡུག་ཙམ་མིན་པར་འཇིག་རྟེན་གྱི་མངོན་འདོད་མང་པོ་ཞིག་གི་འབྱུང་རྩ་ཡང་ཡིན། བསླབ་གཞི་ལ་དད་པ་ཡོད་ན་བརྩོན་འགྲུས་བསྐྱེད་དེ་འབད་བརྩོན་བྱེད་ངེས་ཤིང་། དཔལ་འབྱོར་ལ་དད་པ་ཡོད་ན་ནུས་ཤུགས་བསྟན་ནས་འཚོལ་བསྒྲུབ་བྱ་ངེས་ཡིན། ཁྲིམས་ལུགས་ལ་དད་པ་ཡོད་ན་ཁྲིམས་རང་སྲུང་བྱེད་ངེས་ཤིང་། ཞི་བདེ་ལ་དད་པ་ཡོད་ན་འཚོ་བ་ཞི་འཇམ་གྱི་ཕྱོགས་སུ་ཁ་ཕྱོགས་ངེས་ཡིན། མདོར་ན་འགྲོ་བ་མི་རྣམས་རང་ཉིད་གང་ལ་དད་པ་དང་དགའ་ཞེན། མངོན་འདོད། ཡིད་ཆེས་ཡོད་ས་དེར་ཁ་ཕྱོགས་ཤིང་གོམས་འགྲོས་འདོར་ཏེ་འགྲོ་བཞིན་པའི་དངོས་མཐོང་གི་གནས་ལུགས་འདིས་མདུན་སྐྱོད་དང་ཡར་སེམས་ཅན་གྱི་མི་བུ་སུ་ཡིན་ཡང་དད་པ་དང་ཁ་འབྲལ་ཐབས་མེད་པའི་གཏན་ཚིགས་བརྒྱ་ཕྲག་གི་རུང་དཔུང་སྟོང་དུ་བརྩེགས་ཡོད། དེས་ན་ང་ཚོར་དད་པ་དགོས་མི་དགོས་ནི་འབད་བརྩོན་དགོས་མི་དགོས་ལ་ཐུག་ཡོད་ཅིང་འབད་བརྩོན་དགོས་མི་དགོས་ནི་གྲུབ་འབྲས་དགོས་མི་དགོས་ལ་ཐུག་ཡོད་པའི་གནས་ལུགས་འདིས་ང་ཚོར་དད་པ་དགོས་པའི་རྒྱུ་མཚན་ཅི་ཞིག་བགྲང་གི་འདུག་བསམ་དགོས།། །།
༢༠༡༡/༧/༢༦