སྤྲུལ་དབང་ཆེན།
སྐྱ་རེངས་བུ་མོས་སྤྲིན་དཀར་གཡབ་ཏེ།
ཞོགས་པའི་ཉི་གཞོན་མགྲོན་དུ་བསུས་ཞིང་།
འཛུམ་ཞལ་འོད་ཀྱིས་སྒེའུ་ཁུང་ཕྱེས་ནས།
གདོང་ལ་དྲོད་འཇམ་ཕྱག་གིས་བྱུགས་བྱུང་། །
འདུ་འཛིའི་འདུ་ལོང་ཆེ་བས་འུར་ཟིང་།
ཚོང་ཟོག་ཡར་མར་སྐྱེད་འདྲེན་རླུང་འཁོར།
གཅིག་ལས་གཅིག་མཁས་རང་ལྟོའི་ཆེད་དུ།
དབུལ་ཕྱུག་གཉིས་ཀ་བྲེལ་ལ་ཕྱོགས་སོང་། །
གདོང་ལ་ཆབ་རྒྱུན་བསིལ་མས་བཀྲམ་ཅིང་།
འཇམ་དར་ལག་རས་གཙང་མས་འབྱིད་ནས།
སྤོས་ཐུར་རྐང་གཅིག་མེ་ལ་བསྲེག་ཞོར།
བསང་མཆོད་ཁ་འདོན་རྒྱུན་ལྟར་བཏང་རྗེས། །
རྨི་ལམ་ཡིན་མིན་ཐེ་ཚོམ་གྱུར་པའི།
ཁར་རྩང་ཕྱིར་དྲན་གློག་བརྙན་གསོན་པོ།
གློ་བུར་ད་ལྟ་སེམས་ལ་འཁོར་དུས།
ཤུགས་རིང་བརྔམས་པས་དབུགས་ཀྱང་རྔུབ་དཀའ། །
དབྱིན་མོའི་ཁང་མིག་བཙོན་ལས་གྲོལ་རྗེས།
ཉིན་གུང་ལྟོ་ཟས་ཡི་ག་འགགས་ཏེ།
རྐང་པའི་གོམ་སྟབས་ཡང་པོར་བཀྱགས་ནས།
གློ་སྙིང་འདར་བཞིན་སྡོད་གནས་འབྱོར་བྱུང་། །
ཆུ་རྐྱང་ཤེལ་ཕོར་ཁ་ཤས་བཏུང་ནས།
ཆུ་འགྲིལ་འགྲམ་རྩར་གོས་ཀྱིས་བསྐམས་ཏེ།
ཆུ་ཐིག་རློན་བྱས་ནང་དོར་བརྗེས་ནས།
ཆུ་ཚོད་ཕྱེད་ཙམ་འཐོམ་མེར་བསྡད་ཡིན། །
རྩ་བའི་བླ་མ་ཡིད་ལ་བསྒོམ་ཞིང་།
རྩ་གསུམ་ལྷ་ལ་གསོལ་འདེབས་བྱས་ཏེ།
རྩ་རྒོད་ལྷོག་ལྷོག་འདར་བའི་སྙིང་ཁམས།
རྩ་མདུད་བསྡམས་ནས་ལྷོད་ཐབས་བྱས་ཡིན། །
མི་ལོ་དུ་མར་ཁྲིམས་ལྡན་བྱས་ནས།
མི་ཚེའི་ལོངས་སྤྱོད་ཕྱེད་ཀ་བོར་དུས།
མི་འཛེམས་གློ་བུར་རྡོ་རྗེར་སྐེད་འཇུ།
མི་ལེགས་འཕྲད་པ་ཐེངས་མ་དང་པོ། །
དཔེ་དེབ་ཁ་ཤས་ལྟ་ཀློག་བྱས་རུང་།
གོ་དོན་གནད་ལ་འབབ་པ་མི་འདུག །
ལྟག་རྒྱབ་ལོག་ནས་བསམ་བློ་བཏང་དུས།
ལྟོ་བར་ལྟོག་གཟེར་ཚོར་བ་སླེབས་བྱུང་། །
མགྲོན་ཞབས་ཁུངས་ལ་ཁ་པར་བཏང་ནས།
ཟ་མ་རན་ཙམ་མངགས་ཉོ་བྱས་ཏེ།
ཁེར་རྐྱང་ཁེར་བཟས་ལྷིང་འཇགས་ཁྲོད་དུ།
རྨས་སྐྱོན་ཐེབས་པས་བྱ་བཞིན་བསྡད་ཡིན། །
སྲོད་ཀྱི་ཉི་ཟེར་དམར་པོར་གྱུར་ནས།
ངོ་ཚས་ནུབ་རིར་ཡིབ་ནས་བྲོས་སོང་།
བཙུན་པའི་ཁ་ནས་དམ་བཅའ་བྱས་པ།
སོར་སྡོམ་རི་ལ་གབ་ནས་རལ་སོང་། །
ན་ཚ་ཞིག་གམ་ཆགས་པས་གཟིར་རམ།
དབྱིན་མོར་རང་དབང་བྲལ་བས་བྱ་སྤྱོད།
ཡང་ཡང་བསམ་གཞིག་ཀློང་ལ་བསྐོར་ནས།
མགོ་བོ་འཕྱེད་ལ་གཡུག་གཡུག་བཏང་ཡིན། །
བོད་མོ་ངོ་ཚ་སྨིན་པོར་ཞེད་ཡང་།
དབྱིན་མོ་ངོ་ཚ་བྲལ་དང་འཕྲད་ཏེ།
སོར་སྡོམ་སོ་ཡིས་གཏུབ་གྲབས་བྱས་དེས།
སེམས་པ་བྱང་སེམས་རི་ནས་འགྲིལ་བྱུང་། །
བསླབ་གསུམ་ངུར་སྨིག་བགོས་པའི་ཉིན་ནས།
བསླབ་བྱའི་སྲུང་མཚམས་ཤེས་ནས་བཟུང་སྟེ།
བསླབ་པ་ཁྱད་གསོད་མི་མཐུན་རིགས་དང་།
བསླབ་མིན་གྲོགས་སོགས་སྤྱོད་པར་བརྟེན་མེད། །
ཕྱག་འབུམ་རྫོགས་ནས་རྔ་མར་བུད་ཡོད།
ཁ་བསྐང་ཙམ་ཞིག་ཁ་གསོ་མཚལ་ཡིན།
ཁར་སྣོན་སྨོན་ལམ་ཉིན་འགར་བྱས་ནས།
ཁ་ཐོག་རིང་པོར་འགྲོ་བའི་མི་ཡིན། །
ཕྱག་འཕྲོ་སྨོན་ལམ་བཅད་ནས་མི་འགྲོ །
དབྱིན་མོར་སྡོམ་པ་འཆོར་དུ་མི་བཅུག །
སང་ཉིན་ཉིན་གཅིག་ཕྱི་ལ་མི་འགྲོས།
དམ་བཅའ་ཡང་བསྡམས་ལྷོད་པོར་ཉལ་ཡིན། །
མདང་དགོང་རྨི་ལམ་བཟང་ངན་མི་དྲན།
ལུས་པོར་ཕྱག་འབུམ་དགེ་བའི་བརྡུང་ནས།
གཉིད་ཐུན་གཅིག་གི་ཅུང་ཟད་སྔོན་བར།
གཏི་མུག་ཞིང་དུ་བརྒྱལ་ནས་བཞུགས་འདུག ། །
དེ་རིང་སྤོབས་པ་མཐོ་ཙམ་བྱས་ནས།
ཕྱག་འཚལ་འགྲོ་འམ་མི་འགྲོ་བསམ་པས།
ཡིད་གཉིས་བློ་ངོར་ཐག་གཅོད་མེད་ཀྱང་།
ཞོགས་ཇ་ལྷོད་ཡངས་ངང་ནས་བཟས་ཡིན། །
སྤོབས་པའི་དྲྭ་བ་བག་ཡོད་རལ་གྲིས།
གཏུབ་ནས་ཡིད་གཅིག་བློ་ཐག་བཅད་ཏེ།
བསྡོད་པར་གྲོས་བཅད་ཤོག་སྨྱུག་བླངས་ནས།
ཉིན་ཐོ་སྔར་བཞིན་འབྲི་མགོ་བརྩམ་ཡིན། །
ཆུང་ནས་ཆུང་འདྲིས་དགའ་ལོ་མ་རྙེད།
ཆུང་བཅད་སྐྲ་ལོ་རླུང་ལ་བསྐུར་ནས།
ཆུང་སྦྱང་གོམ་སྲོལ་ཆོས་ལམ་ཞིག་གིས།
ཆུང་བཙིར་སེམས་ལ་བསྒྱུར་ཏུ་མི་བཏུབ། །
ཉི་མ་གཉིས་པའི་ཞོགས་སྔར་ལངས་ཏེ།
ཕྱག་འབུལ་གཟུགས་བཞི་ཐང་ལ་བརྡབ་ནས།
རྡུལ་ནག་མགོ་ལུས་ཡོངས་ལ་རྩེད་བཞིན།
ཉེས་མེད་ལུས་པོར་ཆད་པ་བཅད་ཡིན། །
མནའ་ཟན་སྡིག་རྒན་ཟེར་མཁན་མ་བྱུང་།
ཝ་བྲོས་སྐྱག་ཤོར་འབོད་མཁན་མེད་ཅིང་།
ཟས་སྦྱོར་སྐད་འབོད་ཐོས་རྒྱུ་མེད་པར།
ཉི་མ་བཞི་པའི་དགོང་མོ་རྫོགས་སོང་། །
ཉི་མ་ལྔ་པའི་ཕྱི་དྲོའི་དགོང་མོར།
ཕྱག་མཚམས་བཞག་ནས་ནང་ལ་ལོག་དུས།
སྐོར་ལམ་རྒྱབ་ཕྱོགས་འགག་འཕྲེང་དེ་རུ།
དབྱིན་མོ་མཛེས་མར་ཁ་ཐུག་བརྒྱབ་སོང་། །
ཁ་ངོར་སྔར་ལས་འཛུམ་ཞིག་ལངས་ནས།
ཁར་ཉིན་དགོང་མོར་དགོངས་དག་ཞུས་ཆོག །
ཁ་རོགས་གྲྭ་བཙུན་ཞིག་དང་མཉམ་དུ།
ཁ་བརྡ་བྱས་ནས་ཕྱི་པོ་ཆགས་ཟེར། །
དགོངས་དག་སེམས་ཆུང་དགོས་དོན་མི་འདུག །
དགོང་མོར་ང་ཡང་ཨ་ཐང་ཆད་ནས།
ཕྱག་འབུལ་མཚམས་བཞག་ནང་ལ་ལོག་ཏེ།
ངལ་གསོས་ངལ་བ་བསལ་ཡིན་ལབ་དུས། །
ཅུང་ཟད་དོགས་མ་བདེ་ཙམ་བྱས་ནས།
ཁྱེད་རང་ད་ལྟ་སྡོད་གནས་གར་ཡོད།
དེ་ནས་གང་དུ་འགྲོ་རྩིས་ཡོད་དམ།
མ་གསུང་དྲང་པོར་ང་ལ་ཤོད་ཟེར། །
ད་ལྟ་གྲོང་གསེབ་དུད་ཚང་རྩར་ཡོད།
དེ་ནས་ཝཱ་ནར་ཟླ་འགའ་བསྡད་ནས།
མཐའ་མ་རྡ་སར་སྡོད་ཡིན་ལབ་པས།
དྲང་མིན་གཡོ་རྒྱུས་གཏམ་ཞིག་སྨྲས་ཡིན། །
ཧ་ཅང་ཧང་སང་ངོ་མདོག་འགྱུར་ནས།
ང་ཡང་འཆར་གཞི་དེ་ག་རང་ཡོད།
ཁྱེད་རང་བོད་ཡིག་དགེ་རྒན་བརྟེན་ནས།
མཉམ་འགྲོ་མཉམ་འདུག་འགྲོ་སོང་གཏོང་ཟེར། །
འདི་ནས་རྒྱུན་རིང་ག་ཚོད་འདུག་མིན།
ཝཱ་ནར་ག་དུས་ལོག་ཡིན་གསུང་དང་།
ལས་ཀ་ཆུང་རིགས་དག་ཙམ་ཡོད་པ།
ཐོ་འགོད་དུས་བཅད་འཐུས་ཚང་དགོས་ཟེར། །
སང་ཉིན་ང་ཡི་ནང་ལ་སྤོས་ཤོག །
གྲོང་གསེབ་ཉེན་ཁའི་འཕྲེང་ནས་མ་སྡོད།
ཉལ་ཁྲི་གཅིག་དེ་རང་ལ་དབང་ཆོག །
བསམ་བློ་ཡར་མར་མ་འཁོར་གསུངས་དུས། །
འདི་རུ་ད་དུང་ཟླ་འགར་འདུག་དགོས།
བྲེལ་བ་དེ་འདྲ་ཆེ་བ་མ་གནང་།
ཟླ་གཉིས་ཁང་གླ་སྔོན་ནས་སྤྲད་ཟིན།
ཉེན་ཁ་མེད་པའི་ངོ་ཤེས་ཡིན་ལབ། །
ང་ཡང་གྲོད་པ་ལྟོགས་ནས་བསྡད་ཡོད།
མཉམ་དུ་དགོང་ཟས་བཟའ་བར་འགྲོ་ཟེར།
སྔོན་མའི་ཐུག་སྐམ་ཟ་ས་དེ་རུ།
ཡང་སྐྱར་འཛོམས་ནས་བཟའ་བཏུང་རོལ་ཡིན། །
བུ་རྒོད་པོ་གཞུགས་ནས་ཤུགས་རྒྱོབ་ཨ། ད་དུང་ཁྱོད་གློད་ས་མ་རེད།
མི་བསད་རྫུན་བཤད་རྐུ་མ་མ་རྒྱབ་ན།།
སྡོམ་པ་སྟོང་ཡང་དེ་ཙམ་ཁྱད་ཅི་ཡོད།།
ཕ་མས་དྲིན་ཆེན་རྒྱོ་དེ་མ་རྒྱབ་ན།།
ཁྱོད་ལ་མི་ལུས་རིན་ཆེན་ཐོབ་མི་སྲིད།།
ཁྱོད་ཀྱི་བཅོས་སྒྲུང་འདི་ཉན་འདོད་པ་ཞིག་རེད་འདུག་པས་མི་ཚོས་མཆན་གང་མང་འདེབས་པའི་རེ་བ་ཡོད། ངས་ནས་བཏབ་ཟིན་པ་ཡིན་ད།
རྩ་རྒོད་ལངས་ཚེ་འདོད་ཆགས་མགོ་ཆག་ཆེ།།
ཀུན་གྱིས་འདོད་པ་དེ་རང་ཡིན་པས་ན།།
འདི་ལ་རྒོལ་བ་སྙིང་པོ་མ་མཆིས་པས།།
རང་གི་འདོད་པ་དང་དུ་བླངས་བར་བྱ།།
བླ་སྤྲུལ་ཕལ་ཆེར་འདོད་ཆགས་ཆུ་ལྟར་ཁོལ།།
གཞན་ཕན་སྙིང་པོ་སེམས་ཀྱི་རྟ་ཞོན་ནས།།
སྡོམ་པ་འཆོར་ཡང་དེ་ཉེས་པ་ག་ལ་ཡོད།།
དབྱིན་མོའི་མཇིང་བར་འཐམས་པའི་རྣམ་ཐར་ཡིན།།
སྤྲུལ་སྐུ་དབང་ཆེན་ལགས་་་་་་་་་་་་་་་་་་་་ངེས་པར་དུ་ཁྱེད་ཀྱི་དངོས་སྒྲུང་དེ་འཇུག་ཡག་པོ་ཞིག་རྫོགས་པའི་རེ་བ་ཆེན་པོ་ཡོད་ཁྱེད་ཀྱིས་དེ་ཐུགས་བསམ་བཞེས་རོག་་་་་་་་་་་་་་་་་་་་་་་་་་་་་་མཆན་གང་མང་བཏབ་ཤོག་་་་་་་་་་
ཡང་སྐྱར་ཞུ་ཡ་ཞིག་ལ་དངོས་བྱུང་གི་སྒྲུང་གཏམ་ཡིན་པ་རྩམ་མ་བྱེད་་་་་་རྩོམ་གཤིས་ཡག་པོ་ཞི་དྲག་འདུག་མུ་འཐུད་ན་ཡག་གི་་་་་་་་་་་་་་་་་་་་་་་་་་
ཨ་རོགས་སྤྲུལ་སྐུ་དབང་ཆེན་ཁྱེད་ལ།
ང་ཡིས་མྱངས་པའི་སྒྲུང་ཞིག་བཤད་ཆོག
གོ་བ་ལེན་ན་བསླབ་བྱའི་གཏམ་ཡིན།
དེ་མིན་རྣ་རྒྱབ་བཏང་ན་མི་སྐྱོན།།
ལོ་ཟླ་མང་པོ་འདས་པའི་སྔོན་ན།
ང་ཡང་ཕོ་སར་ཤ་དར་ཁྲག་དར།
གྲོགས་པོ་མང་པོའི་འདོད་གཏམ་ཁྲོད་དུ།
དབྱིན་མོ་རྒྱོ་ན་འདོད་བདེའི་མཆོག་ཟེར།།
འདོད་པའི་ཁམས་སུ་སྐྱེས་པའི་མི་ང་།
འདོད་པའི་བདེ་བར་མི་དགའ་ཟེར་ན།
རྫུན་གྱི་ནང་ནས་རྫུན་མ་ཡིན་པས།
དབྱིན་མོར་རྒྱོ་འདོད་
ལས་བྲེལ་དབང་གིས་འགྲོ་དགོས་བྱུང་བས་མཆན་འདིའི་ཕྲོས་རྗེས་སུ་འབྲི་མཆོག། དབང་ཆེན་ལགས་དགོངས་དག།།
འདོད་པའི་བདེ་ལ་དགའ་བ་ང་གཉིས་མཐུན།
གནས་སྐབས་ཡུལ་ཁྲིམས་སྲུང་ལ་མི་མཚུངས་ཙམ།
ཁྲི་རྒྱལ་རང་སེམས་རང་ལ་རྫུན་ན་ཡང་།
དབང་ཆེན་ང་ཡི་ལོ་རྒྱུས་བདེན་པ་ཡིན།།