དགྱ་ནག་མ་གཞི་ནས་ནད་ཀྱི་ཕུང་བོ་ཡིན།

མགལ་དུམ། (ཨོ་གླིང་།)
 
དགྱ་ནག་དགྱ་ནད་*གཉིས་ངོ་བོ་གཅིག་པ་ཡིན།།
དགྱ་ནད་འགོས་ཡོང་ལ་བློ་དོགས་ཆེ་བ་བཞིན།།
དགྱ་ནག་གང་ཡོད་ལ་སྔོན་འགོག་གྲ་སྒྲིག་དགོས།།
དགྱ་ནད་སྔོན་འགོག་ཀྱང་དེ་ལས་ལྷག་ཅིག་མེད།།

དགྱ་ནག་གར་ཡོང་ལ་སྔོན་ནས་གཟབ་རྒྱུ་ན།།
བོད་པའི་རང་བཙན་ཡང་ད་ལྟ་ཡོད་ཚོད་ཡིན།།
དགྱ་ནད་གང་ཁྱབ་ལ་ཡིད་གཟབ་ཡོད་རྒྱུ་ན།།
ད་ལྟ་འཛམ་གླིང་ཡང་སྐྱིད་ཐོག་བདེ་ཐོག་ཡིན།།

དགྱ་ནད་རྒྱ་གཞུང་གིས་བཟོས་པའི་ཉེར་ལེན་ལས།།
མི་སྲོག་རྫོགས་མེད་ཅིག་དུས་གཅིག་ཤོར་བ་རེད།།
ངོ་ཚ་སྙིང་རྗེ་དང་ཡ་རབས་ཀུན་སྤྱོད་སོགས།།
དགྱ་ལ་གནའ་ནས་མེད་དེང་སང་དེ་ལས་སྡུག།

དགྱ་དངུལ་བསླུ་བྲིད་ལ་རེ་ཟུང་རྔམ་རྔམ་གྱིས།།
འཕྲོད་བསྟེན་ལྷན་ཚོགས་ཀྱང་གཟུར་བ་ཚད་ཅིག་མེད།།
ཕྱུག་བདག་འགའ་རེ་ཡང་གཡོན་ནས་འཛུར་གྲབས་ཡོད།།
དགྱ་ནད་འགོས་ཚད་ལ་འདི་ཚོར་ནག་ཉེས་ཡོད།།

ཨ་རི་ཡོ་རབ་སོགས་རྒྱལ་ཁབ་གང་མང་ལ།།
དཔལ་འབྱོར་ཚོང་ལས་ལ་གྱོང་གུན་ཐེབས་པ་འདི།།
ཚེ་སྲོག་གྲངས་མེད་ལ་མཚོན་ན་ཅི་ཡང་མིན།།
མི་ལུས་རེ་རེ་ལ་གོང་ཚད་ཇི་ལྟར་གཅོད།།

དགྱ་ནག་དགྱ་ནད་ཅེས་སྙིང་ལ་གཟེར་བ་འདི།།
བོད་པ་དམར་གསོད་དང་བསྡུར་ན་ཅི་ཡང་མིན།།
ང་ཚོས་རྒོལ་གཏམ་གྱི་བདེན་པའི་ལས་འགུལ་ཀུན།།
ད་ལྟ་འཛམ་གླིང་གིས་མཐོང་ན་མཐོང་ཚད་ཡིན།།

དགྱ་ནག་མ་གཞི་ནས་ནད་ཀྱི་ཕུང་བོ་ཡིན།།
སྔར་བྱུང་ལོ་རྒྱུས་ན་ཧ་ཅང་གསལ་བོ་ཡིན།།
གཡོ་སྒྱུ་ཁྲམ་གསུམ་ལ་བྱང་བའི་རྒྱ་གཞུང་གིས།།
བསམ་བཞིན་ཚེ་སྲོག་ལ་རྒོལ་བ་ཐེངས་གཅིག་མིན།།

ཤི་གསོན་མ་ཤེས་གོང་དུར་སྦས་བྱས་པ་བཞིན།།
ཤི་བ་རྟོགས་ན་ཡང་ཤི་གྲངས་གསང་བ་ལྟར།།
བོད་མི་ས་ཡ་ལྷག་དེ་ལྟར་བརླགས་པ་རེད།།
འགྲོ་མི་རྩོད་མཁན་ཚོས་ཇི་ལྟར་གླེང་ངམ་ཀྱེ།།

བོད་མི་ཅོལ་ཆུང་ཚོས་ནང་འཁྲུག་བྱེད་བྱེད་ཅིག།
ཆོལ་ཁ་ཆོས་ལུགས་ཞེས་བསྒྲགས་གཏམ་སྤེལ་སྤེལ་ཞིག།
ང་བཟང་ཁྱོད་ངན་ཞེས་ཞྭ་ནག་གཡོག་གཡོག་ཅིག།
༧རྒྱལ་བའི་བཀའ་དགོངས་དེ་སུས་སྒྲུབ་རྩོད་རྩོད་ཅིག།

ལ་རྒྱ་ང་ཡོད་ཅེས་ཞེན་ཁོག་བཤད་བཤད་ཅིག།
མྱུལ་མ་ཁྱོད་རེད་ཅེས་སྤུན་ཟླར་སྨོད་སྨོད་ཅིག།
དགྱ་གཞུང་དགྱ་ནད་གཉིས་དེ་ལྟར་གླེང་རྒྱུ་ན།།
ང་ཚོའི་*རྩ་དོན་ལའང་ཅུང་ཙམ་ཕན་རེ་སྙམ།།

ཡུལ་གྲུ་འདྲ་མིན་ན་བཞུགས་པའི་རྩམ་གཟན་ཚོ།།
དགྱ་མིའི་ཟ་ཁང་ནས་ནག་ལས་བྱེད་པ་ལས།།
ཡུལ་ཁྲིམས་སྲུང་བཞིན་དུ་དགྱ་མིའི་ནག་ཉེས་གླེངས།།
ཡུལ་མི་ཐུག་ཚད་ལ་དགྱ་ནད་དྲན་གསོ་ཐོངས།།

*སྤྱིར་དགྱ་ནད་ལ་རིགས་ཤིན་ཏུ་མང་ནའང་སྐབས་འདིར་གླེང་གིན་པའི་དགྱ་ནད་ནི་coronavirus འམ་COVID 19 ཡིན་ལ། དགྱ་ནད་ཁྱབ་གདལ་མ་སོང་བའི་སྔ་རོལ་ནས་བོད་མི་ཚོས་དགྱ་ནད་འདི་ལ་ཏོག་དབྱིབས་རིམས་ནད་དང་འཇའ་ཡལ་མ། ཡང་ན་པྲོག་ཞུ་སོགས་འབོད་ཀྱིན་པའི་སྐབས་དེ་ཙ་ནས་ཁོ་བོས་ངོ་དེབ་སོགས་སུ་རྒྱ་ནད་ཅེས་ཡང་ཡང་བྲིས་ཤིང་གླེང་བ་བཞིན་ད་རེས་ཀྱང་དེ་བཞིན་དུ་བྲིས་པ་འདི་ཉིད་ཀློག་པོ་དག་གིས་དེ་དོན་དུ་ངེས་པར་གྱིས་ཤིག

*བྱེས་ཀྱི་བོད་མི་མང་དག་གིས་སྟོང་ལོ་བཅུ་དྲུག་ནས་བཟུང་ནང་འཁྲུག་གི་རྣམ་པ་འགྱུར་མྱོང་མེད་པ་མ་ཟད། སྣེ་ཁྲིད་མཁན་གྱི་དཔོན་པོ་དག་གཙོ་བའི་བོད་མི་ཚོས་ཕན་ཚུན་ལ་སྒྲོ་བཏགས་དང་ཉེས་མེད་ཉེས་འགེལ། བཤད་མ་ཤེས་ན་མ་གཏོགས་ཕན་ཚུན་ལ་གླེང་གཞི་འདྲ་མིན་བཟོས་ཏེ་དགྱ་ནག་གཞུང་ལ་ཤིན་ཏུ་མཁོ་བའི་ལས་མང་དག་ཅིག་ལས་པས། ད་ལྟ་བོད་མིའི་མཐུན་སྒྲིལ་གྱི་གནས་སྟངས་དང་འཐབ་རྩོད་ཀྱི་གནས་བབས་ཧ་ཅང་གི་ཉམ་ང་ཉག་ཕྲ་བའི་དུས་སུ་བསྐྱལ་ཡོད། དེ་ལྟ་བུའི་ངལ་བ་དག་དགྱ་ནག་དང་དགྱ་ནད་ལ་གཏད་དེ་རང་ཉིད་གང་དུ་བཞུགས་སའི་ཡུལ་མི་དག་ལ་དགྱ་ནག་གི་གཡོ་སྒྱུ་ཁྲམ་གསུམ་གྱི་བྱེད་ལས་ཅུང་ཙམ་རེ་གླེང་ཐུབ་ནའང་བོད་ཀྱི་འཐབ་རྩོད་ལ་ཅུང་རེ་ཕན་མི་ཡོང་ངམ་སྙམ་པའི་ཚོར་བ་ཡང་ཡང་ཡོང་གིན་འདུག རྒྱུ་མཚན་ནི་སྔ་ཆད་ལས་རོགས་དག་ལ་དགྱ་ནག་གི་སྐོར་ལབ་ན་ཚོར་བ་ཅི་ཡང་མེད་མོད། དེང་སང་འབྲེལ་བ་ཡོད་མེད་ཀྱི་ཁ་བརྡའི་བར་ནས་ཚོད་ཚོད་ལ་
Fucking China ལབ་ན་ཁོ་ཚོས་ཀྱང་ཚོད་ཚོད་ལ་ཁྲོ་ཉམས་དང་བཅས་ fucking Chinaལབ་ཀིན་འདུག དེ་མུར་དགྱ་ནག་གི་བྱེད་ལས་དག་གླེང་ནའང་རྣ་བ་གཟབ་ནས་ཉན་གྱིན་འདུག་པས། བཙན་པོའི་རྣམ་ཤེས་ཀྱིས་སྲུང་བའི་རྩམ་གཟན་བོད་མི་ཞིག་ཡིན་ན་ད་དྲྭ་སྟེང་ནས་རྙོག་གྲ་ལབ་ནས་འདུག་ཚོད་ཅིག་མིན་པ་ཤེས་ན་འཕྱི་དྲགས་མེད་ནའང་སྔ་དྲགས་གཏན་ནས་མི་འདུག་གོ

༢༠༢༠-༠༥-༣ཉིན་བོད་དགའ་Wagga རུ་འབོད་པའི་ཨོ་གླིང་གི་འབྲོག་སྡེ་ཞིག་ནས།