ད་རེབ་ཀྱི་༧གོང་ས་མཆོག་གི་སྤྱན་བསྙུན་དེ་མཛད་འཆར་ཉུང་འཕྲི་མ་བྱས་པ་ལ་ཡང་འབྲེལ་བ་འདུག་བསམ།

བསྟན་འཛིན་འཇམ་དཔལ།

 
སྔོན་ཆད་ཅིག་ནས་༧གོང་ས་མཆོག་གི་སྐུ་གཟུགས་བདེ་ཐང་གི་ཆེད་དུ་མཛད་འཆར་ཉུང་འཕྲི་བྱེད་ཀྱི་ཡོད་ཅེས་ཇི་ཙམ་བསྒྲགས་དང་སྒྲོག་བཞིན་ཡོད་ན་ཡང་། ལོ་སྔོན་མའི་ནང་༧གོང་ས་མཆོག་ཨ་རིའི་མངའ་སྡེ་མེན་ནི་སོ་ཀྲའི་སྨན་ཁང་མ་ཡོ་ཞེས་པ་ནས་རྒྱ་གར་དུ་ཕྱིར་ཕེབས་པའི་རྗེས་ནས། སྐུ་བགྲེས་ཁོང་གི་མཛད་བྲེལ་ནི་སླར་ཡང་སྔར་བཞིན་རང་སོར་ལྷགས་འདུག་པའི་གནས་ཚུལ་མང་དག་ཅིག་རིམ་བཞིན་བྱུང་ཡོད་པ་དེ་རྣམས། སྤྱི་ཚོགས་དྲ་ལམ་དང་གསར་འགྱུར་བརྒྱུད་ལམ་ཁག་ན་གཅིག་རྗེས་གཉིས་མཐུད་ཀྱིས་གསལ་གསལ་ཐང་ཐང་དུ་ཡོད་པ་ལྟར་རེད།

མཚམས་རེར་འབྲེལ་ཡོད་དགའ་ལྡན་ཕོ་བྲང་ཡིག་ཚང་དང་། སྲིད་སྐྱོང་སོགས་ཀྱིས་ཀྱང་བླ་མའི་མཛད་པ་ཡིན་ཤག་དང་སྣང་ཆུང་ལྟ་བུའི་ངང་ནས་གང་ཞིག་གལ་ཆེན་རྩ་ཆེན་ཡིན་མིན་གྱི་འཇུག་ལྡོག་ལ་བརྩོན་ཤེས་བྱ་ཐུབ་ཀྱི་མེད་པ་འདྲ། དེ་སྔ་ནས་གཏན་ཁེལ་ཟིན་ཞིང་འཛམ་གླིང་སྟེང་སྐད་གྲགས་དང་ཤུགས་རྐྱེན་གཉིས་ཡོད་ཀྱི་ཨ་རིའི་རང་དབང་གཟེངས་རྟགས་འབུལ་བཞེས་ཀྱི་མཛད་སྒོར་ཕེབས་རྒྱུ་ལྟ་བུ་ཕྱིར་འཐེན་གནང་ཐུབ་ས་ན། རྒྱ་གར་གྱི་གནས་རྙིང་ཞིག་ཡིན་སྐད་དང་། ཧ་ཅང་གལ་འགངས་ཅན་མིན་པའི་ལས་དོན་གང་མང་སར་༧བགྲེས་པོ་ཁོང་དཀའ་ཚེགས་ངང་ཕེབས་རྒྱུར་ཕྱིར་འཐེན་གནང་མ་ཐུབ་དོན་ཅི་ཡིན་ནམ།

དད་པ་ཡོད་མེད་ཀྱི་གཙོ་ངོས་ནས་མ་ཡིན་པར་༧གོང་ས་མཆོག་ནི་གཞིས་བྱེས་བོད་མི་ཡོངས་ཀྱི་སྤྱི་ནོར་རྩོད་མེད་ཅིག་ཡིན་པའི་ཆ་ནས། ༧གོང་ས་མཆོག་སྐུ་ཚེགས་ཆེན་པོ་ལ་མང་དུ་གཏད་ཀྱིན་པའི་སྐུ་པར་འདི་འདྲ་མཐོང་དུས་སེམས་ཀྱིས་བཟོད་མི་ནུས་པ་ཞིག་རེད། ཅིའི་ཕྱིར་སྐུ་ངལ་འདི་འདྲ་ཆེད་དུ་དང་ལེན་གནང་དགོས་པའམ། ཡང་ན་ང་ཚོའི་མིག་གིས་དངོས་སུ་མཐོང་ཆོས་ཡིན་པའི་སྐུའི་དགུང་ལོའི་བབ་ཀྱི་གནས་ལུགས་དངོས་དེ་གོ་བསྐོན་འགྲེལ་བརྗོད་ཀྱིས་དཀའ་ཚེགས་ཆེ་བའི་མཛད་འཆར་འདི་འདྲ་ཕྱིར་འཐེན་བྱེད་མ་ཐུབ་དོན་ཅི་ཞིག་ཡོད་དམ།

ཞེ་ས་མ་ཞུས་ན། མི་རྒན་ལོ་ན་བརྒྱད་ཅུར་བརྒལ་བ་ཞིག་ལ་ད་དུང་ཡང་ལྷོད་བཞུགས་ཀྱི་གོ་སྐབས་མི་སྤྲོད་པར། ཡར་གྱི་བཀའ་དབང་དང་གསུང་ཆོས། མར་གྱི་མཛད་སྒོ་དང་སྐུ་མགྲོན་སོགས་ཆེས་གལ་གནད་ཆེ་མིན་ཅི་རིགས་སར་ཕེབས་རྐྱང་གནང་འཇུག་གི་ཡོད་པ་དེ་རེད། ཆོས་ཕྱོགས་ལ་ཆ་བཞག་ན། དགའ་ལྡན་ཁྲི་བ་དང་། ཆོས་བརྒྱུད་ཁག་གི་བླ་ཆེན་ཚོའི་གཙོས་པའི་ཆེ་ཆེ་གཉན་གཉན་གང་མང་ཡོད་ཅིང་། སྲིད་ཕྱོགས་ནས་ཀྱང་། སྲིད་སྐྱོང་དང་བཀའ་བློན་ཁག སྤྱི་འཐུས་ཚོགས་གཙོ་དང་མཐོ་རིམ་ལས་སྣེ་གཞན་དག་སོགས་མང་པོ་ཡོད་ཡོད་པ་རེད།

ཡང་། ཞེ་ས་མ་ཞུས་ན། བགྲེས་སོང་འདི་འདྲ་ཞིག་ལ་སྔོན་ཆད་ནང་བཞིན་ད་དུང་ཡང་ཉིན་ནས་ཉིན་བསྟུད་ཀྱི་དཀའ་ཚེགས་ཆེན་པོར་ཅིའི་ཕྱིར་གཏད་པ་རེད་དམ། བགྲེས་སོང་ཁོང་བཞུགས་ཁྲིར་ཡར་བཞེངས་མར་བཞུགས་སྐབས་དང་། ཐེམ་སྐས་རྣམས་སུ་ཡར་འཛེག་མར་འབབ་སྐབས་ཀྱི་དངོས་ཡོད་དཀའ་ངལ་དེ་དག་ཅིའི་ཕྱིར་མ་མཐོང་བ་ཡིན་ནམ། ལོ་སྔོན་མའི་ནང་དུ་༧གོང་ས་མཆོག་གིས་གསུང་ཆོས་གནང་སྐབས་ཤིག་ལ། ཁོང་གི་ཞབས་པུས་ལ་བསྙུན་གཞི་ཡོད་ཚུལ་ཡོངས་གྲགས་ཀྱིས་གསུངས་ཟིན་ན་ཡང་། བླ་གྲྭ་ཁག་གིས་གཙོས་པའི་བོད་རིགས་མང་པོར་ཁོང་གི་བསྙུན་གཞི་ཐད་ལ་ཚོར་ཤེས་མེད་པ་ལྟ་བུ་རེད།

བོད་མི་ཚོས་ནི་དད་ཞེན་གཅིག་པོའི་དབང་གིས་༧གོང་ས་མཆོག་གི་གསུང་སྐད་དང་ཞལ་རས་ཙམ་ལས། རང་ཅག་མིའི་ཤ་ཚུགས་ཅན་གྱི་བགྲེས་སོང་ཁོང་གི་དཀའ་ཚེགས་ཆེ་བའི་མཛད་བྲེལ་དག་མི་མཐོང་བ་དེ་ཆེས་ཡ་མཚན་ཞིག་ཅི་ལ་མིན་ཨང་།

སྤྱིར་ན་བླ་མ་ལ་མཆོད་པའི་མཆོག་དང་། ཐུགས་མཉེས་པའི་གཞི་གཙོ་བོ་ནི་བླ་མའི་བཀའ་གསུང་ཇི་བཞིན་འབད་བསྒྲུབ་ཞུ་རྒྱུ་དེ་ལས་གཞན་མེད་ན་ཡང་། དག་སྣང་དང་ཆོས་འབྲེལ། མིང་གྲགས་སོགས་གཙོ་གནད་དུ་འཇིན་པའི་ཨུ་ཚུགས་ཅན་ཚོའི་ངོར་གནས་ཚུལ་གཞན་ཞིག་རེད་འདུག

༧གོང་ས་མཆོག་གི་ངོས་ནས་བོད་མི་ཚོར་སྔོན་ནས་དུས་ད་ལྟ་བར་དུ་གསོལ་རས་དང་བཀའ་སློབ། གསུང་ཆོས་དང་ལམ་སྟོན་སོགས་མ་གནང་བ་གཅིག་ཀྱང་མེད་པའི་ཚོད་དུ་ངེས་ཀྱང་། བོད་མི་ཚོས་ནི་ཁོང་ལ་ཚིག་འཁྲི་སྐམ་པོའི་བརྟན་བཞུགས་སྣ་ཚོགས་དང་སྐུ་ཚེ་བརྟན་པའི་ཁ་གཡང་ཙམ་ཞིག་ཡང་ཡང་འབུལ་སྒྲོག་བྱེད་པ་ལས། ལས་དོན་གཞན་ཅི་ཡང་ཁུར་དུ་མི་ལེན་པ་ནི་འདས་དུས་ཀྱིས་གསལ་སྟོན་མང་དུ་བྱས་ཡོད།

དོན་དངོས་སུ་དཀའ་ཚེགས་ཇི་ཙམ་ཆེ་ན་དེ་ཚོད་ཀྱིས་ལུས་སེམས་ཀྱི་བདེ་ཐང་ལ་གནོད་ཅིང་། ལུས་སེམས་ཀྱི་བདེ་ཐང་ལ་ཇི་ཙམ་གནོད་ན་དེ་ཚོད་ཀྱིས་རྙེད་དཀའ་ཞིང་འཇིག་སླ་བའི་མི་ལུས་རིན་པོ་ཆེའི་ཚེ་ཐག་ཐུང་དུ་འགྲོ་བ་ནི་ཆོས་ཉིད་ཅིག་ལོས་ཡིན།

དེ་སྔོན་འབྲེལ་ཡོད་ཀྱིས་གསལ་བསྒྲགས་བྱས་དོན་ཞིག་ལ། ༢༠༡༦ ལོའི་ལོ་མགོར་རྒྱ་གར་རྡོ་རྗེ་གདན་དུ་བོད་མིའི་སྒྲིག་འཛུགས་ཀྱིས་དུས་དབང་གོ་སྒྲིག་བྱས་པ་ཞིག་ཡོད་ཚུལ་དེ་ནི། རྒྱུ་མཚན་གསལ་དག་རང་མེད་པར་བར་ལམ་ཞིག་ནས་གློ་བུར་དུ་ཕྱིར་འཐེན་གནང་ཟིན་པའི་གཏམ་བཟང་ཐོན་ཟིན་ན་ཡང་། དེའི་ཚབ་དོད་ལྟ་བུར་རྒྱ་གར་ལྷོ་ཕྱོགས་ཁུལ་དུ་སྔ་ལོའི་ཕྱི་ཟླ་༡༢ པའི་མགོ་སྟོད་རང་ནས་༢༠༡༦ ལོའི་ལོ་མགོའི་ནང་བར་སྟེ་ཟླ་ངོ་གཅིག་མ་ཟིན་ཙམ་གྱི་དུས་ཡུན་རིང་། སྔོན་བསྒྲགས་གསུང་ཆོས་ཀྱི་ཉིན་གྲངས་དེ་དག་གི་ཐོག་ལ་བསྐྱར་དུ་ཉིན་གྲངས་འཕར་སྣོན་གྱིས་མཚོན་པའི་མཛད་བྲེལ་དང་སྐུ་ཚེགས་མང་པོ་ཞིག་བསྟུད་མར་གཏན་ཁེལ་བཟོས་པ་རེད།
ཁྱད་མཚར་ཞིག་ལ། དེ་སྐབས་སྲིད་སྐྱོང་གིས་དབུས་པའི་བཀའ་བློན་ཁག་ཅིག་དང་། སྤྱི་འཐུས་ཚོགས་གཙོ་སོགས་ལས་སྣེ་མང་པོ་ཞིག་ཀྱང་རྡ་སར་ལས་དོན་མེད་པ་ལྟར་གྱིས་དེ་སྐབས་གསུང་ཆོས་ཞུ་བར་ཆེད་བཅར་བྱས་ཡོད།

འདི་ལྟར་སྐུ་བགྲེས་ཡིན་པའི་༧གོང་ས་མཆོག་ལ་དུས་ཡུན་རིང་པོར་གསུང་ཆོས་མང་དུ་གནང་བཅུག་པའི་མཛད་བྲེལ་དང་སྐུ་ཚེགས་མང་དུ་གཏད་པ་ལ་བརྟེན་ནས། ད་ཆ་ཁོང་གི་སྤྱན་ལ་བསྙུན་གཞི་ཕོག་པ་འདི་ཡང་ཉེ་སྔོན་གྲུབ་མ་ཐག་པའི་རྒྱ་གར་ལྷོ་ཕྱོགས་ཁུལ་གྱི་མཛད་བྲེལ་རིང་བོ་དེ་ལ་ལྟོས་བཅས་ཀྱི་འབྲེལ་བ་མེད་པ་ཞིག་ག་ལ་ཡིན་སྟེ་གཏན་ནས་མིན་ནོ།།
དེར་བརྟེན། དོན་དངོས་སུ་༧གོང་ས་མཆོག་གི་ཚེགས་ཆེའི་མཛད་འཆར་ཉུང་འཕྲི་བྱས་མི་འདུག་ལ། ཕྱོགས་གཅིག་ནས་བགྲེས་སོང་ཁོང་གི་སྐུ་གཟུགས་ཀྱི་བདེ་ཐང་ལ་འགལ་རྐྱེན་བཟོ་མཁན་ནི་ང་ཚོ་བོད་རིགས་ནང་ཁུལ་རེད་ཅེས་ཀྱང་ཞོར་དུ་ཞུ་ཐལ་ཤོར་སོང་།

མཐོང་ཡུལ་དུ་མ་གྱུར་པ་ཞིག་ལ། དྲ་ལམ་དང་གསར་འགྱུར་བརྒྱུད་ལམ་ཁག་མང་པོར་བོད་འབྲེལ་གྱི་ད་ལྟའི་གསར་འགྱུར་ཆེ་གྲས་སྟེ་༧གོང་ས་མཆོག་སྐུ་གཟུགས་བརྟག་དཔྱད་ཆེད་ཨ་རིར་ཡང་བསྐྱར་ཆིབས་བསྒྱུར་གནང་ཡོད་པའི་སྐོར་ཡོངས་བསྒྲགས་བྱས་འདུག་ན་ཡང་། དབུས་བོད་མིའི་སྒྲིག་འཛུགས་སམ་བོད་གཞུང་གི་དྲ་ཚིགས་ནང་དུ་གནས་ཚུལ་དེ་སྐོར་ནས་ཟུར་ཙམ་ཡང་བཀོད་མེད་པ་དེ་ཡིན། ཅིའི་ཕྱིར་བོད་ཡིག་ཡོད་པའི་གཞུང་འབྲེལ་གྱི་དྲ་ཚིགས་གཅིག་པོ་ལྟ་བུ་འདིའི་ནང་དུ་། ༧གོང་ས་མཆོག་ཨ་རིར་སྐུ་གཟུགས་བརྟག་དཔྱད་ཆེད་དུ་ཆིབས་བསྒྱུར་གནང་བའི་གནས་ཚུལ་དེ་མི་འགོད་དོན་ཅི་ཡིན་ནམ་ཞེས་རྨོངས་བློར་དབང་མེད་དུ་དྲན་བཅུག་སོང་།