ད་ཡིན་ན་ཤིང་སྡོང་དྲིན་ཆེན་དེ་བཅད་ཤག །

སྐྱོ་བྲག་དགའ་དབང་།

འཕགས་ ཡུལ་སྟོད་རྒྱུད་གྲྭ་ཚང་ནི། དྷ་རམ་སཱ་ལའི་ཉེ་འཁྲིས། སིདྡྷི་བྷ་རིས་ཀྱི་ནགས་ཁྲོད་ན་ཆགས་ཤིང་། གསར་བཞེངས་བྱ་སྐབས་ཤིང་སྡོང་གཅིག་གཅོད་དགོས་མ་ཐུག་ནའང་རང་མལ་དུ་འཇོག་རྐྱང་ བྱས་རྐྱེན། ཁོར་ཡུག་གང་སར་ཤིང་སྡོང་ཆེན་པོ་དག་ནག་སྤུངས་སེ་སྐྱེས་ཡོད། ལྷ་ཁང་གི་མདུན་ཐང་གཡས་ཟུར་ན་ཤིང་སྡོང་ཁ་ཤས་ཡོད་པ་དག་གི་འོག་ན་ང་ཚོ་རྒྱུན་ པར་བསིལ་གཞའ་བྱེད་ཅིང་། ལྷག་པར་ཚུར་ཟུར་ན་ཡོད་པའི་ཤིང་སྡོང་དེ་ནི་ང་ཚོར་བཀའ་དྲིན་ཆེ་ཤོས་ཏེ། སྐུ་མགྲོན་གལ་ཆེན་དག་བསུ་སྐྱེལ་བྱ་སྐབས་དུས་ཚོད་རིང་རབས་སྒུག་དགོས་ཐུག་པ་ན། ཤིང་སྡོང་དེའི་བསིལ་གྲིབ་འོག་ང་ཚོ་ཚང་མ་ཡིབས་ནས་སྡོད་ཀྱི་ཡོད། ང་ཚོ་ཤིང་སྡོང་དེ་དང་འབྲེལ་བ་བྱུང་ནས་ད་བར་ལོ་ངོ་བཅུ་གཉིས་སོང་། ད་ལོའི་དཔྱིད་མགོར་སྔར་རྒྱུན་བཞིན་ཡལ་འདབ་སྐྱེས་ནའང་། ཟླ་གཅིག་ལྷག་གི་སྔོན་རྐྱེན་ངན་ཅི་ཞིག་འཕྲད་པ་མ་ཤེས་པར་ཤིང་སྡོང་དེ་ནི་ བསྐམས་པར་གྱུར་ཅིང་། ཞག་ཤས་སྔོན་བཅད་ཀྱང་ཚར་ཤག །ཤིང་སྡོང་དེའི་བཅད་དུམ་དག་མཐོང་བ་ན་སེམས་པ་སྐྱོ་དུང་ངེ་བ་ཡོང་གི་འདུག །ང་ལ་སྐྱོ་སྣང་སྐྱེས་པ་ནི། བཀའ་དྲིན་ཆེ་བའི་ལྗོན་ཤིང་བཟང་པོ་ཞིག་མེད་པར་གྱུར་པའི་ཆགས་ཞེན་གྱིས་ཡིན་པ་ མ་ཚད། ངའི་གོམས་ལོབས་ཀྱིས་ཀྱང་ཡིན་སྲིད་པ་སྟེ། ང་རང་ཆུང་དུས་སྡོད་སའི་ལུང་པ་ཇག་ལྡི་ནང་ནི། ཤིང་ཤུག་པ་དང་སྟག་མ་ཉ་བྲེད་སོགས་ཤིང་སྣ་འདྲ་མིན་སྐྱེས་པའི་ནགས་གསེང་ཡིན། ཡུལ་མིའི་གོམས་གཤིས་ལ། ཤིང་ནགས་ནི་ས་བཅུད་ཡུལ་རྒྱན་ཡིན་པའི་བརྩི་མཐོང་ཧ་ཅང་ཆེན་པོ་ཡོད། གལ་ཏེ་ཤིང་ནགས་གཅོད་བྲེག་བྱས་པ་ཡིན་ན། ཆར་ཆུ་དུས་སུ་མི་འབབ་པ་དང་། སད་དང་སེར་བས་སྡང་བ། རྩྭ་སྔོ་ལྡམ་ལྡུམ་མི་སྐྱེ་བ། ཡུལ་ལུང་འཁྲུགས་རྩོད་ཤོར་བ། མི་རྣམས་ཚེ་ཐུང་བ། ནད་མང་བ། སྒོ་ཟོག་སེམས་ཅན་ལ་ཤི་གོད་སོགས་བཀྲ་མི་ཤིས་པ་མང་དག་ཅིག་འབྱུང་བའི་བློ་དོགས་ ཀྱིས་གཅོད་མཁན་ཆེས་ཉུང་། གཅོད་དགོས་ཐུག་ནའང་གསོལ་འདེབས་སྨོན་ལམ་གྱིས་གཅོད་པ་སྟེ། ངས་དྲན་སོས་པ་ཞིག་ལ། སྟོན་དུས་ཀྱི་ཕྱི་དྲོ་ཞིག་ཏུ་ཨ་ཕ་ངེད་གཉིས་སྟྭ་རེའི་ཡུ་བ་ཞིག་འཐུ་རུ་སོང་བ་ ན། ཨ་ཕས་ཁོ་རང་གིས་ཤེས་པའི་ཁ་ཏོན། འཇམ་དབྱངས་ནག་པོའི་བསྙེན་པ་སོགས་འདོན་ཞོར། བླ་མ་དག་གིས་བསྒྲུབས་པའི་རབ་གནས་ཤིག་ཁུར་འདུག་པ་གཏོར་ནས་གདོད་བཅད་སོང་། ཁོ་ཚོའི་བློ་ངོར་ས་རྡོ་རི་བྲག་དང་ཆུ་ཤིང་སོགས་ལ་སོ་སོའི་ནུས་པ་དམིགས་བསལ་བ་ རེ་ཡོད་ཐོག །ང་ཚོའི་སྤྱོད་ཡུལ་མིན་པའི་ཡུལ་ལྷ་གཞི་བདག་སོགས་ཀྱང་གནས་སྲིད་ཅིང་། དེ་དག་ལ་ཕོག་ཐུག་ཤོར་ན་ཡག་པོ་མི་ཡོང་བའི་དོགས་པས་ཀྱང་ཡིན། ང་ལ་མཚོན་ན་ཆུང་དུས་ནས་དེ་ལྟའི་ལྟ་ཚུལ་གྱི་གོམས་གཤིས་ཡོད་ཐོག །ཁོར་ཡུག་སྲུང་སྐྱོབས་ཀྱི་ཚོགས་འདུར་འཛུལ་ཞུགས་བྱས་པས། ཤིང་སྡོང་ནི་སྲོག་ཆགས་སེམས་ཅན་ལ་མེད་དུ་མི་རུང་བའི་སྲོག་རླུང་སྤྲོད་མཁན་ དང་། ཚ་དྲོད་འཕེལ་རྐྱེན་གྱི་སོལ་རླངས་རྔུབ་མཁན། ཆར་ཆུའི་གཞི་མ་སྨུག་སྤྲིན་གྱི་འབྱུང་ཁུང་སོགས་ཡིན་པ་བཤད་སྐྱེན། སྣོད་བཅུད་གཉི་ག་འཚོ་གནས་ཡོང་བ་ལ་ནགས་ཚལ་ནི་ངེས་པར་ཡོད་དགོས་པའི་མཐུན་ གྲོགས་བཟང་ཤོས་གྲས་ཡིན་པར་ཤེས་པ་དེས། ཤིང་ནགས་གཅོད་བྲེག་བྱས་པ་མཐོང་སྐབས། ས་གཞི་ཧྲིལ་པོ་འདིའི་ཐོག་འཚོ་གནས་བྱ་མཁན་གྱི་འགྲོ་བ་སྤྱིའི་ཚེ་སྲོག་ལ་ཉེན་ ཁ་སྤྲོད་པའི་བྱ་བ་མ་རབས་ཤིག་བྱས་འདུག་སྙམ་པའི་སེམས་ཚོར་ཚ་ཟིང་ངེ་བ་ཞིག་རང་ བཞིན་གྱིས་སྐྱེ་ཡོང་གི་ཡོད།