ཐེ་བོ་སངས་རྒྱས།
ཉིན་དང་པོ།
དེབ་དཀར་ལས།“ལར་སྔོན་དུས་ཀྱི་སྲོལ་ལུགས་སོགས་ཇི་འདྲ་ཡིན་བསམ་པའི་ཚེ།རྒྱལ་ཁམས་གཞན་གྱི་ཡི་གེ་བྲིས་པའི་ལོ་རྒྱུས་སོགས་ལ་བལྟ་བ་ཙམ་ལས།རང་གི་མིས་རང་ཡུལ་གྱི་སྲོལ་ལུགས་འདི་འདྲའོ་ཞེས་ཞིབ་ཏུ་བྲིས་པ་ཞིག་ཤིན་ཏུ་རྙེད་དཀའ་བ་འདི་ཡུལ་ཀུན་ལ་འདྲ་བ་ཡིན།” ཞེས་གསུངས་པ་ལྟར་ཡིན་ན་ཟིན་ཐོ་འདི་མ་འོངས་པར་ཐའེ་ལན་ཌུའི་དཔྱད་གཞིའི་ཡིག་ཚགས་ཁྲོད་ཉར་ལས་ཆེ།ཨ་ལ་ཀུ་རེ་ཡིན།གཏམ་ཀུ་རེ་མ་བརྩེས་བཤད་སྲོལ་མེད།།ཟེར་བའི་བོད་ཀྱི་གཏམ་དཔེ་དེ་མ་ཐོས་སམ།ཕྱི་ཚེས་༢༩ཞོགས་པ་ས་གནས་ཆུ་ཚོད་༩ཡོལ་ཙམ་རེད།ང་ཚོ་བྷན་ཀོག་གི་སཱུ་ཝར་ན་བྷུ་མི་Suvarnabhumi international airport, Bangkok ཞེས་པའི་རྒྱལ་སྤྱིའི་གནམ་གྲུ་ཐང་དུ་འབྱོར་ཡོད།གནམ་ཐང་གི་ཁང་པ་བཞི་བརྩེགས་ཅན་ཕྱི་ནས་བལྟས་ན་འབྲུག་དཀར་པོ་གཉིས་ཞེང་དུ་དང་།གཅིག་འཕྲེད་དུ་བསྣོལ་ནས་བབས་པ་འདྲ་ཞིང་།ཀླད་ཁེབས་ནི་སྲ་རས་དཀར་པོའམ་ཅི་མཐའ་དམའ་ཞིང་དབུས་མཐོ་བ་གུར་གྱི་རྣམ་པ།ནང་ངོས་སུ་གཞུ་དབྱིབས་ལྟ་བུའི་ལྕགས་ཀྱི་གདུང་ཏལ་མ་ཕྲེང་བསྒྲིགས་ནས་ཕུབ་པ།མཚམས་མཚམས་སུ་རྒྱ་མཐོངས་ཤེལ་གྱི་སྒེའུ་ཁུང་པད་འདབ་ཀྱི་བཟོ་ལྟ་ཅན།དཀྱིལ་དབུས་ཀྱི་ཐོག་ཁར་གསེར་གྱི་མཆོད་སྡོང་དང་།ཤེལ་སྒོའི་གནམ་གཅལ་ཅན་གྱི་ཚོམས་ཆེན་དབུས་མར་སྐུ་མདོག་སྣ་ཚོགས་པའི་ལྷའམ་མི་བུ་དག་གིས་རྒྱ་མཚོ་ལས་གཡུ་འབྲུག་མགོ་བོ་གསུམ་པ་ཞིག་བཟུང་བའི་འདྲ་སྐུ་ཡ་མཚན་ཅན།གཞན་ཡང་།གློག་རྡུལ་རྩིས་འཕྲུལ་དང་།བརྡ་འཕྲིན།གློག་གི་འཁོར་སྐས།བསིལ་ལྷང་ལྷང་གི་གྲང་གློགཀླུ་ཡི་བང་མཛོད་ལྟ་བུའི་ཁྲོམ་ར་སོགས་གྲ་རྒྱས་ཕུན་སུམ་ཚོགས་ཤིང་།ར་སྐོར་ནང་ལོགས་སུ་མེ་ཏོག་ལྡུམ་ར་བཅས་ལྟ་ན་སྡུག་པ་ཤ་སྟག་གོ།ཉིན་མཚན་ཁོར་མོ་ཡུག་ཏུ་གནམ་གྲུ་འབབ་འཕུར་མཚམས་མི་ཆད་ལ་ཕྱོགས་འགྲུལ་གྱི་འཚང་ཁ་ཆེ་བ་སྨོས་ཅི་དགོས།སྔ་ལོར་བྷན་ཀོག་ཏུ་ཕྱོགས་བཞི་མཚམས་བརྒྱད་ནས་འགྲུལ་བ་བྱེ་བ་གཉིས་དང་ས་ཡ་གཉིས་སླེབས་པས།འཛམ་གླིང་ནང་ལྗོངས་རྒྱུ་བ་ཆེས་མང་ཤོས་སུ་གྱུར་པར་རྒྱུ་མཚན་མེད་པ་ག་ལ་སྟེ།དགུན་གྱི་གྲང་རེག་ཟེར་བ་མིང་ཙམ་ཡང་མ་གྲགས་པ་དང་།བི་ཤྭ་ཀརྨས་པིར་གྱིས་བྲིས་འདྲའི་རྒྱ་མཚོའི་གླིང་ཕྲན།སྐབས་གསུམ་གནས་ནས་བབ་འདྲའི་རང་བྱུང་གི་རྦབ་ཆུ།ལོ་ངོ་སྟོང་ཕྲག་འགོར་བའི་གནའ་ཤུལ།ལྐུགས་པས་ཀ་ར་ཟོས་འདྲའི་བཟའ་བཏུང་གི་བྲོ་བཅུད།ཁུ་ཚུར་གཅིག་གིས་ཕ་རོལ་པོ་རྫོག་པའི་ཐའེ་དྲག་རྩལ།ཟ་འོག་ལ་ཅི་འདོད་དུ་ཕབ་འདྲའི་ཁབ་གཙགས་རི་མོ།ཐང་ཅིག་ལ་རྨི་ལམ་གྱི་ཞིང་དུ་ཁྲིད་པའི་སྐུ་མཉེད།འདོད་པའི་སྒྱུ་རྩལ་རེ་བཞིར་མཁས་པའི་གཟུགས་འཚོང་མ་སོགས་རྒྱང་རིང་གི་མགྲོན་པོ་འགུགས་པའི་ཁབ་ལེན་རྡོ་ལྟར་ཆགས་པ་མ་ཡིན་གྲང་།
གནམ་ཐང་གི་འགག་སྒོ་ནས་ཕྱིར་འབུད་དུས་འགེངས་ཤོག་རེ་དགང་དགོས་པ་རང་རང་སོ་སོའི་ས་ནས་བཀང་སྟེ།ཕྱི་སྐྱོད་ལག་ཁྱེར་དང་མཉམ་དུ་རྟོག་ཞིབ་པའི་མདུན་དུ་བསྲིང་བ་ན།ཁོ་མོས་ལག་ཁྱེར་དག་གི་ཨང་གྲངས་གློག་ཀླད་ནང་གཏགས་ནས་ཞིབ་འཇུག་གིས་ཐམ་ག་བརྒྱབ་སྟེ།“ཐའེ་ལན་དུ་བྱོན་པ་ལེགས་” ཞེས་མགོ་བོ་དུད་ཅིང་སྙིང་གར་ཐལ་མོ་སྦྱོར་བར་བྱེད།དེར་ནང་པའི་གྲྭ་བཙུན་ཚོར་དམིགས་བསལ་འཛུལ་སྒོ་བཞག་པ་འདིས་སངས་རྒྱས་ཆོས་ལུགས་ལ་ཚད་མཐོའི་བཀུར་བསྟི་གནང་གི་ཡོད་པ་མངོན།དེར་མ་ཟད།ལྡི་ལིའི་སངས་རྒྱས་རིང་བསྲེལ་ལ་གསེར་གྱི་རྒྱ་ཕིབབ་དང་།རྡོར་གདན་གྱི་མཆོད་རྟེན་རིན་པོ་ཆེར་གསེར་སྦྱང་བཙོ་མའི་གཉྫི་ར་སྦྱིན་བདག་གནང་བ་སོགས་ཀྱིས་ཤེས།ཕྱི་རོལ་ཏུ་བུད་དུས་གནམ་ངོ་དྭངས་ཤིང་ཁྲི་གདུགས་ཉི་མའི་ཚ་ཟེར་རྣོ།དྲོད་ཚད་ཏུའུ་སུམ་ཅུ་སོ་གསུམ་ཡས་མས་སུ་ཡོད་པས་ཉིན་གུང་ཚ་གཡོལ་བྱེད་དགོས་པའི་ཚད་དུ་གདའ།
གནམ་ཐང་དུ་ཨ་སྒོར་གྱི་འཛའ་གོང་མི་བཟང་རུང་གླ་འཁོར་གླ་ཆར་དམིགས་ནས་ཏོག་ཙམ་ཐའེ་དངུལ་བྷཀ་ལ་བརྗེས་ཡོད།སྤྱིར་བཏང་བྷཀ་གཅིག་ལ་ཧིན་སྒོར་༢ལྷག་འབབ།དེ་ནས་ཁང་བརྩེགས་འོག་མར་བབས་ཏེ་གླ་འཁོར་བཙལ་བ་ན།ཡི་གར་འོངས་པ་ཞིག་ལ།གླ་འཁོར་རྣམས་དུས་ཚོད་ཀྱི་གོ་རིམ་ལྟར་འགྲོ་བ་ལས་བར་དུ་འཚངས་ནས་སུན་པོ་བཟོ་མཁན་ནི་སྲིད་མཐའ་ཙམ་དུ་བས།ང་ཚོར་རག་པའི་གླ་འཁོར་ནི་གཡག་མགོ་རྟགས་ཅན་Toyota ཆེ་གྲས་ཤིག་ཡིན་ཅིང་།ཁ་ལོ་བས་དབྱིན་སྐད་འཆལ་ལེ་འཆོལ་ལེ་ཤོད་པས།ང་ཚོའི་མགྲོན་ཁང་གི་ཁ་བྱང་བསྟན་ནས་གོང་ཚད་དྲིས་དུས་རྒྱང་ཚད་གཞལ་ཆས་སྒོ་འབྱེད་ཀྱི་ཡིན་ཟེར།དེ་ཡང་བྷཀ་སུམ་ཅུ་སོ་ལྔ་ནས་འགོ་བཙུགས་ཏེ་བརྩི་བ་ནི་གྲོང་ཁྱེར་དེའི་ནང་འགྲོ་སྟངས་གཅིག་གྱུར་རེད་འདུགབལྟས་ཚོད་ལ་ཡུལ་འདིའི་མི་རྣམས་གཡོ་སྒྱུ་ཆུང་བས་ཡིད་ཆེས་བྱས་ཆོག་པར་མཐོང་།འཕྲུལ་རྟའི་གླ་འཁོར་ཡང་ཡོད་པས་མི་ཁེར་འགྲོ་ཅ་ལག་མེད་མཁན་ཞིག་ཡིན་ན་རིན་གོང་དེ་བདེ།
གླ་འཁོར་གྱི་སྒེའུ་ཁུང་ལས་མྱུར་འགྲོས་གཞུང་ལམ་ཐོག་འདུར་གྱིན་པའི་རླངས་འཁོར་ཆེ་མ་ཆུང་གསུམ་དང་།རྩེ་མོར་ལྟ་ན་ཞྭ་མོ་ལྷུང་བའི་ཁང་བརྩེགས་རྣམས།གསེར་འོད་ཆེམ་ཆེམ་འཕྲོ་བའི་གནའ་བོའི་ལྷ་ཁང་དང་དགོན་པ་དག་གི་མཆོད་རྟེན་སོགས་མིག་ལམ་དུ་བརྒྱུས་བཞིན་ཆུ་ཚོད་གཅིག་ཙམ་སོང་མཐར་ང་ཚོའི་མགྲོན་ཁང་གི་སྒོ་ཁར་གཡུགས།དྲ་ཐོག་ནས་ཞག་པོ་གཉིས་ལ་མངགས་ཉོ་བྱས་པའི་མགྲོན་ཁང་དེའི་མིང་ལ།Resort M-MRT Huai Khwang, ཅུང་རྒྱས་སྤྲོས་ཅན་ཏེ་སྒོ་ཁྱམས་འདབས་ན་ཁྲུས་རྫིང་གྲ་དག་ཅིག་ཀྱང་འདུགམགྲོན་ཁང་གི་སྣེ་ལེན་པ་མ་ནིང་ཞིག་ཡིན་པ་དང་ང་ཚོའི་དབྱིན་སྐད་ཆག་པོས་གོ་བརྡ་འཕྲོད་ཀྱི་འདུགལག་ཁྱེར་རྣམས་པར་སློག་བརྒྱབ་ཅིང་དོ་བདག་སོ་སོས་མིང་རྟགས་བཀོད།ཅ་ལག་རྣམས་དེ་གར་བཞག་ནས་འགྲམ་གྱི་ཀོ་རི་ཡའི་འཚིག་ཇ་ཁང་ཞིག་ཆུ་ཚོད་གཉིས་ཙམ་ལ་ངལ་གསོ་བྱས།དེ་ནས་སྲང་ལམ་གྱི་ཟ་ཁང་ཞིག་ཏུ་ཐའེ་ཟ་མ་རེ་ཟོས།དེར་ཤ་འབྲས་དང་།འབྲས་ཕྱེའི་ཐུག་པ་དག་འདུགཁྲོམ་སྲང་དག་ཏུ་རྒྱ་ཡིག་གི་སྒོ་བྱང་མང་དུ་བཀལ་བར་མ་ཟད་རྒྱ་སྐད་ཉེ་བར་གྲག་ཡོང་བས་ང་ཚོ་རྒྱ་གྲོང་ཞིག་ཏུ་སླེབས་ཡོད་སྣང་ཤར།གློག་སྐུད་ནི་གང་སར་འཛིངས་ནས་འཐེན་པས་གྲོང་ཁྱེར་གྱི་མཛེས་ཉམས་ལ་ཅུང་གནོད་འདུག་དྲན།བག་མེད་ལོངས་སྤྱོད་དུ་བརྩི་བའི་རླངས་འཁོར་དབྱིན་སྒོར་འབུམ་ཕྲག་རི་བ་སྟེ།མཱར་སེ་སྒྲེ་སི་དང་།Mercedes སྦེའུ་ཨེམ་སྒྲ་པུལ་ཡོས།BMW ཨའོ་ཌི།AUDI སོགས་གཞུང་ལམ་ཁག་ཏུ་བརྒྱུད་མར་འཕྲད།གྲོང་ཁྱེར་གྱི་སྲང་ལམ་གྱི་གཡས་གཡོན་དུ་ཞི་མི་རྒྱགས་པ་མང་ཙམ་མཐོང་།རྒྱ་བལ་གྱི་གྲོང་ཁྱེར་ནང་ལྟར་གད་སྙིགས་གང་བྱུང་དུ་གཡུགས་སྲོལ་མི་འདུགཉིན་གུང་རྒྱབ་ཏུ་ང་ཚོ་ཧུའེ་ཧང་Huai Khwang སྲང་ལམ་གྱི་ས་འོག་མེ་འཁོར་འབབ་ཚིགས་ནས་མེ་འཁོར་ལ་བསྡད་དེ་རྒྱ་ནག་གྲོང་སྡེའི་མཐའ་སྐོར་ཐྲ་ལ་ཐྲི་ནོ་ཡི་Talat Noi འཆམ་འཆམ་དུ་ཕྱིན།ས་འོག་མེ་འཁོར་ནང་ཅུང་འཚང་ཁ་ཡོད་ཅིང་མི་ཕལ་ཆེ་བ་ཁ་པར་ནང་ཟུག་ནས་ཡོད་པ་དེང་གི་འཛམ་གླིང་སྤྱི་འགྲོས་རེད།ཆུ་ཚོད་ཕྱེད་ཀ་ཙམ་ན་ས་ཆ་དེ་ལ་སླེབས།དེ་ནི་གནའ་ནས་ཡུལ་སོ་སོའི་རྒྱ་རིགས་འཛོམས་ས་ཞིག་རེད་ཟེར།ང་ཚོར་རྒྱ་ནག་གིས་བག་ཆགས་ངེས་ཅན་བཞག་ཡོད་པའང་ཞར་ལ་རྟོགས།
ཐྲ་ལ་ཐྲི་ནོ་ཡི་ནས་ང་ཚོས་ཨ་སྒོར་གང་འཚམ་བྷཀ་ལ་བརྗེས་ཏེ།ཉེ་འཁོར་གྱི་ཐའེ་དགོན་པ་རྙིང་པ་ཞིག་ཡོད་པར་མཆོད་མཇལ་གྱིས་མཆོད་མེ་ཆ་རེ་ཡང་སྦར།ནུབ་ཁའི་མཚམས་སྤྲིན་མཆོད་རྟེན་གྱི་རྒྱབ་ལྗོངས་སུ་བཀོད་པའི་འདྲ་པར་རེ་བླངས།སྤྱིར་ཐའེ་གྲྭ་བ་དག་གིས་ཕྱི་དྲོའི་ཁ་ཟས་མི་བཞེས་རུང་།སྤྱིར་“ཡུལ་ཆུ་འཐུང་ན་ཡུལ་ཁྲིམས་བརྩི་རྒྱུ་” དགོས་མོད།ཉིན་དེར་ང་ཚོའི་ཟས་ཐུན་བཞི་པ་སྟེ།དགོང་མོ་ཆུ་ཚོད་༨ཙམ་ལ་ཐའེ་ཟས་ལེའུ་བཅོ་བརྒྱད་ཅན་ཞིག་འཇོལ་ཉོག་ཏུ་སྤྱད།བཛྲ་ས་ཏྭ།མགྲོན་ཁང་རེ་རེའི་ནང་ཁྲུས་ཁང་བཅས་ཆ་རྐྱེན་འཛོམས་རུང་ཁྱམས་རའི་འདབས་སུ་ཁྲུས་རྫིང་ཡོད་པས་ཁྲུས་ཁང་དག་བེད་མེད་དུ་ལུས།ང་ཚོས་ལྕམ་འབྲུ་བརྔོས་མ་དང་།གཏེར་ཆུ།ཝུ་སིབ་ཁུ་ནག་རེ་ཉོས་ནས་ཁྲུས་རྫིང་འགྲམ་གྱི་ཉལ་ཁྲི་འདྲ་བའི་རྐུབ་སྟེགས་ལ་བསྡད་དེ།ངོ་དེབ་དང་།སྐད་འཕྲིན།གཡུ་ཁྲོབ་སོགས་སྔོག་ཞོར་ཁ་བརྡ་གློད་དེ་ནམ་ཕྱེད་རྒྱལ་བའི་དཀྱིལ་འཁོར་ལ་གཏུགས།ད་ལན་ཐོངས་མཆན་ཞུ་བའི་ཆ་རྐྱེན་དུ་ཕར་ཚུར་གཉིས་ཀའི་གནམ་གྲུའི་འཛིན་བྱང་མ་ཉོས་ཀ་མེད་ལས་གཞན།ང་ཚོས་འགྲིམ་འགྲུལ་ལ་དམིགས་བསལ་འཆར་གཞི་ངེས་གཏན་ཞིག་བཟོས་མེད།གང་དུ་སྐྱིད་ན་དེར་ཉིན་ཤས་རེ་འདུག་རྒྱུ་དང་།མ་སྐྱིད་ན་གནས་གཞན་ཞིག་ཏུ་ཆས་ཆོག་ཆོག་ལ་བསམས་པ་ཡིན།གལ་ཏེ་ཞག་པོ་བཅུ་པོའི་མགྲོན་ཁང་མངགས་ཏེ་འཆར་གཞི་ཚང་མ་སྔོན་དུ་བཏིང་ན།རང་ཉིད་ཀྱི་འགྲོ་འདུག་རང་དབང་ལ་ཚད་བཀག་བཟོས་པར་འདོད།དེ་བཞིན་རྒྱ་གར་འགྲིམ་འགྲུལ་ལས་ཁུངས་ཤིག་གི་གོ་སྒྲིག་འོག་སྣེ་ཤན་པར་མགོ་བཏགས་ནས་འགྲོ་བའང་སོ་སོའི་འདོད་པ་ལྟར་ཡོང་དཀའ་བ་ང་ཚོས་ཤེས་ཡོད།(མུ་འགོད།)
ཐེ་མིའི་ངོར་གྲྭ་པས་ཕྱི་ཟས་མཆོད་པ་དང་ཞི་མོ་བསྟེན་པའི་སྡིག་པ་མཉམ་པོར་བརྩི་བས་ད་ནི་མདའ་གཅིག་གིས་ཡུ་མོ་གཉིས་བསད་ན་ལེགས།
སྐུ་ཉིད་ཡུལ་དེར་འབྱོར་ཐོ་ཧ་ཅང་སྙན།
མཁྱེན་ཡངས་ཀླུ་སྨྱོན་ལགས། དེ་གོ་སྐབས་རེད་དཱ། ཁྱེད་ཀ་ཚང་ལ་ཆ་རྐྱེན་ཡང་འཛོམས་ཤག
ཐེ་ལན་ནི་ནང་པའི་རྒྱལ་ཁབ་ཅིག་ཡིན་ཕྱིར། དགེ་འདུན་པར་རྩི་བཀུར་ཆེན་པོ་ཡོད་ས་རེད། ས་ཆ་དེའི་ལུགས་སྲོལ་དང་དགེ་འདུན་པའི་འགྲོ་འདུག་སྤྱོད་གསུམ་སོགས་ལེགས་་པའི་ཆ་ང་ཚོས་ལེན་ན་ཡག་པོ་དེ་འདྲ་མཐོང་སོང་ངམ། ང་ཡང་ལོ་ཤས་གོང་ལ་དེར་འགྲོ་མྱོང་། ཐེ་མི་རྣམས་ཀྱིས་རྫུན་བཤད་ཀྱི་མི་འདུག་སྙམ་པ་ཞིག་ཤར་སོང་། འོན་ཀྱང་བདུན་ཕྲག་གསུམ་གྱི་རིང་ལ་མི་གཤིས་དངོས་གནས་དེ་མཐོང་དཀའ་རྒྱུ་རེད། །
༄༅། ང་ཡི་ནང་མི་ཆོལ་གསུམ་སྤུན་ཟླ་ཡིན། མེས་པོའི་སྲོལ་བཟང་འཛིན་པའི་ཕུ་ནུ་ཡིན།
ཕ་ཡུལ་གངས་ལྗོངས་སྔར་ལས་རྒྱས་པ་ཤོག། ང་བོད་པ་ཡིཀན་པའི་བསོད་ནམས་ཆར།
ང་ཡི་མི་རིགས་གངས་ཅན་བོད་པ་ཡིན། བྱམས་སེམས་སྙིང་རྗེ་ཅན་གྱི་མི་རིགས་ཡིན།
ལས་དང་རྒྱུ་འབྲས་སྲུང་བའི་མི་རིགས་ཡིན། ང་བོད་པ་ཡིན་པས་པའི་བསོད་ནམས་ཆེ།
ཐེ་མི་དང་ནི་འབྲུག་པ་དང་། །
མོང་གོལ་བོད་རིགས་སོ་སོ་ཡིས། །
ནང་ཆོས་ཉར་སྟངས་སོ་སོར་ངེས། །
དེས་ན་གཅིག་ཕན་གཅིག་གྲོགས་མཛོད། །
་
དེ་ནི་ལེ་འུ་གཉིས་པ་དེ། །
བཀླགས་ནས་ཁ་ནས་གང་ཐོན་རེད། །
ད་ནས་ལེ་འུ་དང་པོ་དེ། །
ཀློག་ཕྱིར་ཡང་བསྐྱར་བསྐྱར་འགྲོ །